[جيجي]

المشاركة الأصلية كتبت بواسطة زول الله

نواصل ......
3/ الغناء لم يتدهور في السودان بل تدهورت الاخلاقيات وتدنت القيم وضاعت المُثُل وضاع معها جيل كامل اصبح همه ان .. يطبِق حاجتو .. وينتبذ بها ركناً قصياً
وهذا التدهور لم ياتي من حكومة ولا دخل له بالسياسة إذا كنا واقعيين ونظرنا للأمر من زاوية محايدة
لأننا قاسينا اكثر في انظمة سابقة ولم نصل لهذه النتيجة في يوم من الايام.
الحاصل بالضبط هو اننا نحاول التطاول و مد كرعيننا اطول من لحافنا ومجاراة العالم الخارجي في ثقافاته وهذه نتيجة طبيعية لما يحدث وطبيعي اكثر ان ينعكس هذا الواقع على الغناء وتمتليء مفرداته به .

4/ ختان البنات العادة المتأصلة فينا زي حبوباتنا وحكاويهن من الصعب التخلص منها بأخوي واخوك في السودان لكن الوعي بأضرارها وحسنات تركها أراهـ بدأ يقف على أرجله بين الشابات خصوصاً وعقبال امهاتهن ومادام انهن - الشابات ديل - حيكونن امهات فأنا متفائل بإندثار هذه العادة في المستقبل القريب ان شاءالله وتنتهي هذه المزبحة المامنها فايدة.

5/ الرياضة ياسيدي عندنا بقت مستقبل .. يعني اللاعب بيعني عند اهله كوم كبير بتاع قروش زي المغترب في العقود الماضية. وهذه النظرة المادية اثرت وسوف تؤثر على مسيرتنا الكروية الى ماشاءالله بالذات عندما يكون طموح اللاعب الوصول الى احد الفرق الكبير هلال أو مريخ ولما يوصل ويستلم ينوم نومة اهل الكهف.
وايضاً عندما تختلط السياسة بالرياضة يضيع التنافس الحر وتختفي الروح الرياضية فنحن ياصاحبي شعب كان رياضياً لايشق له غبار في هذه القارة وصار الآن يتغنى بأمجاد الكباتن السابقين الذين مات بعضهم وهم مديونين لأصحاب البيوت الساكنينها بالايجار وبرضو يظل الهلال ساطعاً ومنيراً رغم انف الوصيفاب ومن لف لفهم

6/ عالم النت لهو وتسلية لمن أراده كذلك وعلم ومعرفة وعلاقات انسانية سامية لمن أراده كذلك

7/ ...
رأفت ميلاد .. ملك الجالدين والمناطق المجاورة
خالد الحاج .. الكبير كبير ياودالحاج وانت كذلك
سارة ..... يانادرة في زمناً كعب ياواقفة ضد المستحيل
النور يوسف .. لله عباداً اختصهم بقضاء حوائج الناس .. وانت منهم
نبراس .... حاحيت عليك غيماتي ماصبن حداك ؟؟؟
جيجي .... يابت يافوق منتظرة شنو ؟ امطري كلماتك وبِلي الشوق
ود عثمان .... في ناس تحسهم قبل تشوفهم وانت منهم يازول يانيل
عكود ....... صورتك الخايف عليها الفطور عندكم لكن
فتحي مسعد .... أول مرة الاقي حلبي بأخلاق الانبياء .. لك الاحترام
ام التيمان .... تخشك وتمرقك عااادي .. المشكلة مابتقفل الباب بي وراها
شبارقة ... وضاح المحيا سمحاً إذا التقاك وسمحاً اذا فارق
حسن فرح ...... ركازة وسند .. ماتطول الغيبة ياخال
شوقي بدري ..... شوقي بدري و كفى
بابكر مخير ...... أوتعلمون ان هذا الهرم القامة .. قريبي ؟؟ بس كيف ماعارف والله
جانيت ..... زولة من طينة ملايكة وراضعة من ثدي البتول .. زي بسمة في ثغر الرسول

اححححح ياخ قطعت نفسنا زاتو
عميلنا العزيز فيصل .. خلاص لقد استنفذت الكوتة حقتك من الاسئلة
عليك بمراجعة المستودع












اقول قولي هذا واستغفر الله لي .................

معليش يا ابو اماني
بث والله اناكنت مافي وعندي سؤال لابد منه لزول الله
زول الله وذاك التناقض
ود الشيوخ....الغناي
الرقيق البناغي مشاعر البنيات وبعرض وسطهم....وهو شايل سكينه
البيعقل رجله ويمدها حسب الظروف
البيحمل لزميلاته الهدايا ويبكيهن
البيغني في رمضان ويحجر على الناس حق القراية