عرض مشاركة واحدة
قديم 01-02-2009, 11:30 AM   #[127]
شبارقة
:: كــاتب نشــط::
الصورة الرمزية شبارقة
 
افتراضي

[align=justify]قالوا الشاعر صالح عبد السيد (أبو صلاح) كان راكب في بابور البحر متجها ً للجنوب وعندما كان البابور راسيا ً على شاطي قرية ود الزاكي على النيل الأبيض كانت هناك فتاتان على الشاطئ إحداهما إسمها الفرير ( مسماه على العطر الباريسي المشهور فلور دا مور .. أو كما تطلق عليه حبوباتنا فرير دامور) وكانت الفرير هذه رائعة الجمال ... فرأها أبو صلاح وإنبهر بجمالها ... وسمع صديقتها تناديها : يا الفرير ... و لبعد المسافة بين أبو صلاح وبينهما إعتقد أن إسمها الفريع ... فكان هذا الخطأ الجميل : يا فريع ياسمين متكي في رمالو قول لعاشقك وين ضاعت آمالو ... معذب في هواك مالو[/align][align=center]

قلبي همالو خديدك وجمالو
معذب بى هواك مالو
***
بدر حسنك لاح والقلوب مالو
لى هواك وشوق قلبي عمالو
يا فريع ياسمين متكي في رمالو
قول لعاشقك وين ضاعت آمالو
***
الجوهر الفردي الما اتلقى مثالو
قلبي ليه يلين وقلبه يقسالو
حبه صبحني وحسنه مسالو
وغير وسيم خدو دموعي ما سالو
***
شعره حاك الغيم حاجبو هلالو
فر بسمه نغيم والبروق لالو
مافي مانع لو قتلى حلالو
افدي جوز تفاح صدرو لولالو
***
الشادن المكحول قلبي يصبالو
واخشى من لحظه ومن رمي نبالو
كم جريح سهام عينه ضاربالو
وبيها لا يدري ولا على بالو
***
خصره ناحل زاد جسمي انحالو
طرفه ناعس نام وطرفي يصحالو
الفريع السيل دمعي سحالو
يا نسيم ارجوك شوفو كيف حالو
***
في النجوم مرفوع مجده ينبالو
وبين سماك أعزل حظي ما نالو
لو نظر محيه عشوقه جنالو
ولو بسم دمع السحاب حنالو
***
شوف لحاظو سيوف عاشقه هلالو
وحرسه حولو يدور استعدالو
شوف خديد يلصف وحسنه يندالو
والبدر لو غاب يضوي في بدالو
***
طرفه ليه نعسان وأنا طرفي ليه يصحا لو
ويتلو آية الحب الفي الخديد لايحا لو
جمالو كل ما يزيد جسمي يزيد إنحالو
أما قلبي الضاع خلي اليروح في حالو[/align]


[align=justify]الشاعر أبو صلاح مولود في حي الموردة في العام 1890م وتوفي في العام 1963م ويعد من أشهر شعراء الحقيبة وهو أول من تُغني له بأغنية حقيبة سُجـِلت بمصاحبة الطمبور في اسطوانة [/align]



شبارقة غير متصل   رد مع اقتباس