منديل حرير !!! النور يوسف

قيامة دولة المتحولون الانسانية !!! أسعد

خِلِّي العيش حرام - عبر الأجيال !!! أشرف السر

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > نــــــوافــــــــــــــذ

 
 
أدوات الموضوع انواع عرض الموضوع
قديم 06-07-2009, 10:04 PM   #[1]
imported_شوقي بدري
:: كــاتب نشــط::
الصورة الرمزية imported_شوقي بدري
 
افتراضي محن سودانيه . 25.. السبهلليه .

محن سودانيه . 25.. السبهلليه .

بقدر ما كنت اكره البشير واليوم الجابو بقيت دلوقت . آسى لحاله . هذا الرجل لا بد ان يكون غفله او على مستوى غير طبيعى من الطيبه . انا افهم انه يغضب . وان يأتى بما لم يأتى به الاولون والآخرون . وافهم انه يشتم فرنسا والعالم ويقول انهم تحت حذائه.وهذا ما لم يقله الرؤساء الآخرون في حاله حرب عن اعدائهم . وافهم انه يحلف بالطلاق وكأنه فى زريبه مواشى . هذه اشياء تحدث لنا نحن السودانيين لاننا شعب انفعالى سريع الالتهاب . وافهم اننا قد صرنا مثل يوغندا ايام عيدى امين . الذى كان يتصرف وكأنه الثور فى مستودع الخزف .
ما يصعب على تصديقه . ان البشير والذى كان ضابطاً فى الجيش السودانى( مصنع الرجال ), وتخرج من الكليه الحربيه , سنتين من الدردحه والهزار والمزاح والنقاش . الم يتعلم البشير اى شئ عن المعلومات العامه والسياسه والادب ؟
كل الضباط فى السودان يتنقلون فى كل مناطق السودان . وتفتح لهم رتبهم الابواب لمجالس الصفوه والمتعلمين والكتاب والصحفيين . الم يتعلم البشير اى شيء من هذه الجلسات او اللقائات .
اننى لم اصدق اذنى عندما ذكر البشير ان الاراضى التى انتزعت قسراً او خدعهً, او عن حق, ستستعمل فى زراعه بنجر السكر . ووضح البشير للشعب السودانى المسكين ان البنجر هو البامبى . الذى كنا نأكله فى كل حوليه ونجده امام كل طاحونه مفروشاً على الشوالات للبيع مع العنكوليب والتبش . لقد كان سياسى السودان يصيبون الآخرين بمركب نقص عندما يتحدثون عن القانون الدولى والسياسه والشعر والادب العالمى . والسودانى العادى كان يلم باسماء رؤساء العالم وعواصم الدول وطريقه الحياه وسبل كسب العيش والتفاعل فى تلك الدول . كان عند السودانى حب استطلاع فطرى لكى يتسقط الاخبار . وحتى اللذين لم يفكوا الخط كانوا يسألون ويستمعون الى الراديو . اين كان البشير ؟؟ .
انا على اقتناع بأن بعض اهل الانقاذ يطربون لغلطات البشير وما يسمى بالدراب الذى يطلقه . لقد فاق البشير النميرى . فهذه الغلطات لم يأتى بها حتى النميرى . وبعض رجال الانقاذ المتمكنين سعداء بوجود البشير . لان شخص بهذه السذاجه من المؤكد انه يسهل اللعب عليه . ويمكن قيادته والسيطره عليه . وعندما تحدث المصيبه وتسقط الانقاذ. سيقع كل العبء على البشير . وسيتملص الآخرون . وسيقف البشير حسب فهمهم كجعلى عوير ولن ينكر . وسيقول لقضاته كلكم تحت جزمتى دى . وسيهرب الآخرون الى الاموال التى تنتظرهم فى الخارج . وسيتعالجون وينعمون برفقه ابنائهم واحفادهم . وسيكون البشير اما فى السجن او فى القبر .
قديماً كانت المافيا تأتى بانسان متدنى الذكاء او اهبل القريه ويحفزونه ويملؤون رأسه ويدربوه لكى يقتل زعيماً او مسئولاً حكومياً كبيراً . هل يجهز اهل الانقاذ البشير لهذا الدور ؟.
قبل سنوات سمعت البشير فى التلفزيون . يقول لاهلنا النوير وهو يعدد انجازات الانقاذ والنعيم الذى احل ببلاد النوير ( يا جماعه حسى انتو عندكم بيبسى كولا بيبسى كولا . ) . انا رباطابى واعرف ان الرباطاب لسانهم طويل ولماحين وعندهم ذكاء فطرى . ولكن النوير اذا لم يكونوا اذكى منهم ليسوا بأقل منهم فى طول اللسان والتعليق . واظن ان النوير الى الآن يضحكون ويعلقون على موضوع البيبسى كولا .
عندما يكمل الطفل الثامنه فى السويد يدعى اهله الى اجتماع موسع . وتقوم المسئوله الاجتماعيه والمدرسه وممرضه المدرسه باداره حوار يشمل كم ساعه يسمح للطفل فى ذلك العمر بمشاهده التلفزيون . وكم ساعه يقضيها امام الكمبيوتر . وكم يعطى كنثريات ... الخ . وبعد احد الاجتماعات التى تخطت الثلاثه ساعات المقرره , كانت الممرضه تتحدث بألم وضيق وتتطرق للمصيبه التى احلت بالمدرسه . وانها لن ترتاح وستذهب الى اعلى مسؤول فى المدينه , للتخلص عن ماكينه البيبسى كولا التى وجدت طريقها الى المدرسه . وان البيبسى كولا مشروب غير صحى ومضر باسنان الاطفال . وسيتوقف الاطفال من شرب الحليب الذى يقدم مع الاكل المجانى بكميات غير محدوده .
واذكر اننى تضايقت واخذت معطفى وقلت للممرضه ( انها ماكينه بيبسى كولا وليست بتنين حتى تأتوا باحد الفرسان لقتله . وان ميقيل سرفنتى سيكون سعيداً اذا سمع بمعركتكم هذه مع ماكينه البيبسى كولا . ولمن لا يعلم فميقيل سرفنتى هو كاتب كتاب دون كيشوت الذى يحارب طواحين الهواء . وانا ذاهب الآن ويمكن انا تتحدثوا عنى بعد ان اذهب . ) الماكينه طردت من المدرسه والمدارس لا تسمح بهذه الماكينات . ورئيسنا السودانى يذكر وجود البيبسى كولا فى بلده سودانيه كانجاز او اعجاز .
قبل ايام فى المكابراب ذكر البشير للمواطنين بانهم سيأكلون آيسكريم . مع من يتحدث البشير , تلاميذ فى روضه اطفال ؟ ماكينه الآيسكريم لا تساوى اكثر من ثلاثه الف دولار . والآيسكريم يأتى فى شكل بودره يضاف اليها الماء . وحتى اذا لم تتوفر الكهرباء فمولد صغير يكفى . واى مغترب ممكن يدق سدرو ويجيب ليهو مكنه مكنتين لاهله والحله كلها تهيص .
قبل ايام ناقش السويديون تكثيف زيارات المكتبات للاحياء . والمكتبات عباره عن بصات ضخمه تقودها سيده او رجل لكى يستلف اهل الحى الكتب والمجلات والمراجع والاسطوانات . واذا لم يتوفر الكتاب يسجل الطلب فى الكمبيوتر وفى الزياره القادمه يكون الكتاب متوفراً . وكل هذا بالمجان . والسائق له درايه بالادب واحدث المطبوعات .
الآن يناقش تحميل الدوله مسئوليه تخرج الطالب من المدرسه الثانويه وهو يجيد قياده السياره ومتحصلاً على رخصه قياده . وهذا مكفول لكثير من طلاب المدارس الصناعيه او الزراعيه . ولكن يريدون ان يعمموه لان هذا شئ مكمل للحياه العصريه ويجب ان تتكفل به الدوله نحو مواطنها .
وبما ان السويد لا تسمح بايجار اى شقه او مسكن لا تتوفر فيه كل معدات المطبخ من حفاظات وثلاجات وماكينات غسل الثيباب ونشافات وماكينه غسل اطباق ودواليب واضاءه ودواليب الملابس , لذا يطالبون الآن بان يكون جهاز الكمبيوتر والانترنت جزء من مكملات المسكن لان الكمبيوتر ليس من الكماليات . ونحن نفتخر بوجود البيبسى كولا فى بلادنا .
هذه الايام يهلل البعض وتملأ الحكومه العالم ضجيجاً , لانهم قد صنعوا طائرات . هذه الطائره التى شاهدناها تشبه الطائره التى صنعها اثنين من العجلاتيه فى العشرينات وهما الاخوان رايت مخترعى الطائره . سادتى هذا منذ الخمسينات صار المحرك النفاث شيئاً عادياً حتى فى الطائرات الصغيره . اى مجموعه من الهواة فى امريكا او اوربا اللذين يحبون الطائرات وصيانتها . يمكن ان يعملوا طائرات خير من هذه . اذكر فى الخمسينات ان الكنيسه فى ملكال كان عندها طائره سيسنا اسمها عصفور الله . كنت اشاهدها فى اكوبر وفى البيبور وفى ملوط . كانت تبدو اكثر تطوراً من طائره اليوم . والحقيقه ان الطائره جمعت فى السودان .
الشئ المحير والذى يمحن الانسان . ان البشير يندفع ويتحدث عن عظمه السودان وتطوره ويقول ان السودان قد صار من اعظم الدول . والمحنه ان هنالك من يصدقه . واللذين يقفون من خلفه ويهزون رؤوسهم موافقين من حمله الدكتوراه .
كلما نتحدث مع اهلنا واحبابنا نجدهم يعانون فى امدرمان من انقطاع الماء وانقطاع الكهرباء وانعدام كثير من السلع الضروريه . او ارتفاع اثمانها لدرجه ان مرضى السكرى لا يجدون او لا يستطيعون ان يشتروا الدواء . وان مرضى ضغط الدم قد اتجهوا للاعشاب والعلاج البلدى . ونسمع عن النهضه الصناعيه والتطور . وانعدام صفوف العيش والبنزين . والصفوف قديما كانت موجوده لان العيش كان مدعوما ً ومتوفراً للجميع . والعلاج كان مجانياً . ولكن المحير ان البشير يبدو وكأنه قد اشترى الطرماج . او ان الذين حوله قد مارسوا عليه بعض السحر والشعوذه او التنويم المغنطيسى . ولقد مؤرس هذا مع نميرى . واقنعوه بأنه معصوم وانه خليفه المسلمين وان الله قد اختاره . وان السودان لا يمكن ان يتقدم او بعيش بدونه . والبشير قد كان هنالك وشاهد كل هذه الخزعبلات وشاهد كيف كان الترابى يلعب على نميرى . ويجعله ينفذ كل مايريده . وعندما كان النميرى منبوذا ومبعداً عن وطنه , كان الترابى يستمتع بوفود المعجبين والمؤيدين ويعامل كشبه ملك فى السودان .
والله انا افتكر ان البشير رجل مسكين لا يعرف اى شئ. وان الاخوان المسلمين قد وفقوا فى اختياره . لانه لا يعلم ولن يتعلم . وان رفاقه يضحكون خلف ظهره فعندما يتكلم الناس عن انهيار مشروع الجزيره . انتشار مرض السرطان فى الشماليه , عدم الشفافيه فى المناقصات الحكوميه او اشتداد الحر فى هذا الصيف او عطاله الخريجين . يردد البشير ومن معه الرد الرد بالسد . والحال كشخص يمشى حافياً وعندما يلفت نظره يقول ما انا عندى جلابيه سكروته مكسوره دبل عامود . انا لابس جلابيه سكروته مكسوره دبل عامود .
كلما يحدث شيء فى العالم نجد البروفسورات وحمله الشهادات يتحدثون عن تفصير اوكامبو واليوم قرأت فى سودان نايل للاستاذ ابو بكر يوسف ابراهيم تحت عنوان اوكامبو لماذا السكوت على الاباده الجماعيه فى وادى سوات وتاميل نادو . هذه والله محنه لا نستطيع الفكاك منها . يا جماعه اوكامبو موظف عنده شغلانه معينه محدده بتدفعوا ليهو عليها مرتب . اذا ترك الشغل ده واتدخل فى السند والهند وفاس الما وراها ناس حيطردوهوا من شغلو . ذى سمكرى فى زقاق الصابرين . ما مسئول من شرقرق انشقه مثلا فى المظاهر .ده ما شغلو وما مسئوليتو .
ياخى جراح بجيبوا ليهو زول عنده زايده بدخلوهو بى اورنيك وفحوصات . ما ممكن نقول ليهو فى مره كانت محتاجه كلبش بعد الولاده فى جوبا وانت ما عملته حاجه . الجراح ده موظف فى مستشفى الشعب فى الخرطوم عندو صلاحيه محدوده ومهمه محدوده . لو اتدخل فى شغل مستشفى جوبا يكون غلطان .
بعدين حتى اذا كان اوكامبو ده زول بطال ومتحامل ومجرم ومرتشى وحاقد وبكره السودانيين وخاصه الجعليين وعندو تار مع البشير . حيفيد شنو انو ممثل السودان فى الامم المتحده . يقعد يشاتمو وينابزو ويضحك علينا الناس . وكل زول يقول اذا كان ده الدبلوماسى الله لا ورانا البلطجى بتاعهم .
ابن عمى الدكتور حسن فرح المتواجد الآن فى جمهوريات البلطيق كتب من قبل ان اثنين من اعمامه من صائدى التماسيح خرجا بحثا عن التماسيح لكى يقتاتا ويوفرا رزقاً لاسرهم . فساقهم البحث الى ديار الجعليين .
ومرت بهم مجموعه من شباب الجعليين . وانتهى الامر بأن تحدى الجعليون الرباطاب للصراع وكان بينهم شاب قوى . الرباطابى قال ما بصارع مجاناً . فوعدوه بجائزه . وبسرعه سقط الجعلى ارضاَ . واحتج الجعلى بانه لم يكن مستعداً . واعيد الصراع وانهزم الجعلى مرةً اخرى . فغضب زملائه وقالوا له كيف يرميك الرباطابى السجمان ده وكان الرد ( هى نان الرباطابى الجعان ده بعد ما قلتو ليهو ملوه عيش بدور يقع لى )الجعليين نسوا انو الرباطابى بصارع التماسيح . اها اوكامبو ده شغلتو يقاضى الناس . هو ممثل اتهام جابو ليهو قضيه . هو دلوقت بعمل فى شغلو كان ممكن يكون اوسطى تانى او اوكامبو ده بكره يموت ينظفو واحد جديد من الرف ويواصل فى نفس الطريق . ذيو وذى اى نجار جابو ليهو خشب وقزاز وقالو ليهو سوى لينا دولاب فضيه .اها حسى انتو اوكامبو ده القلتو عليهو حاقد وابن كلب وصفتو نعتو بدور يخلى ليكم البشير بتاعكم ده .
التحيه...
شوقى ...



التوقيع: [frame="6 80"]

العيد الما حضرو بله اريتو ما كان طله
النسيم بجى الحله عشان خاطر ناس بله
انبشقن كوباكت الصبر
وتانى ما تلمو حتى مسله
قالوا الحزن خضوع ومذله
ليك يا غالى رضينا كان ننذله



[/frame]


http://sudanyat.org/maktabat/shwgi.htm

رابط مكتبة شوقي بدري في سودانيات
imported_شوقي بدري غير متصل  
قديم 07-07-2009, 10:35 AM   #[2]
imported_AMAL
:: كــاتب نشــط::
الصورة الرمزية imported_AMAL
 
افتراضي




محنة سودانية
قصدي صناعة سودانية






ياشوقي ياخ الشعب السوداني هو من يستحق ان ناسي لحاله
رايت بعيني في تلفزيونا الرسمي يوم الاحتفال بالمحنة الفوق دي
امرأة ترتدي زي الدفاع الشعبي تحمل صوت عنج
تقوم به صفوف الحضور البسطاءء من نساء واطفال
بيد لاترحم الجابوهم من بيوتم عشان يتذلو بدل يفرحو
بالصافات التي تنافس الطائرات الورقية


كان هناك شاب مبدع جدا يصنع طائرات من بقايا الصفيح
ويعرضها جوار نادي الخرطوم
انا غايتو شاكة يكونو استعانو بي خبراتو



imported_AMAL غير متصل  
قديم 07-07-2009, 08:36 PM   #[3]
بابكر مخير
:: كــاتب نشــط::
الصورة الرمزية بابكر مخير
 
افتراضي

يومتها وأنا راجع من لندن بطيران الإتحاد، لاحظتا بلل في أرضية الطيارة وناديت المضيفة، قلتا ليها يكون في تسرب موية (هو طبعن في الأرضية، مش غريبة أقول تسرب)،،
قالت ليا التبريد بعض مرات بيحصل منو كدآ،،
المهم على مضض رضيت، بس زعلتا ما؛ أنه كان يكون قولي يزعجهم ويعاينو الطيارة ويلقو عطل وباكر أو بعد باكر،،
يقولو سوداني يتسبب في إنقاذ أرواح وخد يا موكافآت (جمع مكافائة أو مكافاءة، إختارو المناسب)...
دحن حسي بجرب حظي مع أبو عمير ود البشير وآلفت نظرو لأمر جد خطير،،
ولزوم الإثبات!!!
ياها دي الصورة...


[align=center][/align]

مش ممكن الفتحآ دي تتسب في سقوط الطائرة
بعدين سؤال، شوية خبيث؟؟
بتذكر أول سفرية لطائرة السوبر سونيك ركب فيها رؤساء الدول المصنعة.
لييييييييييييه عمر ما ركب في الطيارة أُم طاقة دي؟؟



بابكر مخير غير متصل  
قديم 08-07-2009, 07:20 PM   #[4]
imported_هشام قريب الله صديق
:: كــاتب جديـــد ::
 
افتراضي

تحياتي استاذنا
وضعت يدك علي واحده من آفاتنا أما كان الأجدي إنشاء شبكة المجاري أولاً للعاصمه الحضاريه قال سنبدا من حيث انتهي الأخرون. أين أساسنا ؟؟



imported_هشام قريب الله صديق غير متصل  
 

تعليقات الفيسبوك


تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 06:40 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.