الطاهر حسيب :الادروب الرهيب

[imported_حسام الدين ميرغني]

مايفعلة (الساحر)حسيب بالكرة شئ لا يقبله عقل بشري..كانها مربوطة بخيط رفيع على طرفى قدميه..يحركها كما يشاء وليست كما تشاء..تكن غبيا ان مددت رجلك لتستخلصها منه ..فانك اذا لا تلسم من يمررها بين قدميك او يعليها فتطال قامة رأسك القوى..فمن قال ليك خش عليهو..!!!!
(2)
بين ارض جبيت الحجرية ورمال ديم العرب ببورتسودان عاش الطاهر حسيب يعطى وقتة وانتباهته ..يتمرن بليمونة او حجر مستدير او كرة شراب محشوة بقطن بالى ..فخرج للناس من خلوتة الكروية ساحرا يدهش المشاهدين ..تمتعت ابصار جيل الستينات والسبيعينات والثمانيات بمشاهدتة المبدعة على المستطيل الاخضر..الطاهر حسيب اكثر لاعب فى العالم مارس كرة القدم اذ لعب لاكثر من 35 سنة بابداع تام كلما نوى الاعتزال عدل عن رغبتة بناء على رغبة الجمهور..حتى بلغ به العمر عتيا فتركة الناس يستريح ولكنه يشارك لماما فى المهرجانات الرياضية بدون انقطاع فيفعل بالكرة ما كان يفعل بها فى صباه..
(3)
رفيق دربة الكروى الكابتن بافلى محمود جعفر المولد فى سواكن فى العام 1957 شكل مع حسيب ثنائية كروية باذخة وممتعه درس الاولية بالغربية بورتسودان ..تزامل شقيقه الراحل جعفر محمود اوالا مع الطاهر حسيب فى نادى الثغر منذ العام 1951 حيث اسسوا النادى مع رعيلة الاول ..ليواصل بافلى مسيرة اسرتة العاشقة لكرة القدم مع الساخحر حسيب ..لعب بافلى للثغر فى العام 1969 بعد تسجيلة من روابط الناشئين مباشرة لمدرسة الثغر النادى صاحب الفنيلة الخضراء والكورة المدرسة..تزامل مع الطاهر ورفقاء الابداع الكروى همزة الزبير.. شمس الدين ...هاشم فرج ..بكرى حسن ...خليفة احمد.. مصطفى فى السبعينات فلاصق اسم الثغر يامدرسة كورة وفن وهندسة التيم منذ ذاك الاوان...كانوا يلعبون فى جماعة من لمسة واحدة ..ماهرون حاذقون فى ممارستهم لكرة القدم ..فى منتصف الملعب يفعل الطاهر بالكرة كل شئ ..الصعب والساهل..وكان قد عاد من رحلة احتراف قصيرة فى الهلال العاصمى حيث وقع لكشوفاتة فى العام 1964 لو يتوائم مع التيم ففى الناس الحسد ..سرعان ماتركة ليعود لابداع الثغر المدرسة..
كان يدرب الهلال اليوغسلافى استاورستا خير مدربى اوربا الذين عملوا فى التدريب بالسودان ..اول تمرين لحسيب مع الهلال كان استاورستا يضع يديه على جنبتية فاخذ الطاهر كرتين ..شات الاولى فادخلها بين يده وجنبته وفعل بكرة اخرى ذات الحركة فى يمين استاورستا فاندهش من مهارتة ..قال له اجلس على دكة الاحتياط انت مش عاوز تدريب تجى الماتش طوالى...!!!!
(4)
فى قمته الكروية ورغم نجوميتة الا ان الطاهر كان يعيش حياة المبدعين المتواضعين دون تعال او عنجهيه بسيطا كما موهبتة المبدعة ..كان يحب الطرب وفى اوائل السبعينا ت بزغ نجم فنان التراث الشعبى قدورة ببورتسودان فكان الطاهر يتصيد حفلاتة هنا وهناك مطالبا ايه ان يغنى له اغنيتة المفضلة(ذاد اذاى ياصاحى) فيغنيها له بامتعا شريطة ان يحاور ليهو فلان وفلان فى الماتش الجاى يقول قدورة لحكايات انه شاهد الطهار حسيب مرارا وتكرارا يلعب كل مره يدهشة اكثر ..يتابعة منذ ان كان نادى الثغر بموقعة القديم قبالة قضيب ديم مدينة واقرب لاعب يدانيه فى الموهبة هو لاعب بورتسودان السابق عمر سرور ..وحكى قدورة ان الطاهر فى مباراه رفع الكرة عاليا وتلقفها بفنيلتة ومسك طرفى الفانلة وجرى بالكرة دون ان تلامس يده فوضعها فى الشباك وسط دهشة الحكم والجمهور ولاعبى فريقه والفريق الثانى ..وتمحن الحكم فى ان يحتسبها مخالفة وللا قون وللا شنو ذاتو ماعارف ..فاضطر لالغاء المباراه بعد احتجاج الجمهور على فعله الطاهر الغريبه والتى تحكى عن موهبه عاليه..!!!
(5)
يقول بافلى انهم ذهبوا فى السبعينات ضمن رحلة لناديهم الثغر ليلاعبوا فرق جدة ..فطقطقنا الاتحاد والهلى و والوحدة مكة ..فعل الطاهر فى تلك الرحلة حركات عجيبة حيرت السعوديين ..ففى مبارة الوحدة مكة نفذ ضربة جزاء وضع الحارس فى جهه والكرة فى جهة بصورة مدهشة فاحتار الجمهور كيف فعل هذا ..ووسط دهشتم تلك سحب بالكرة اربعة مدافعين فى هجمة اخرى وانفرد بالحارس ..فاخذ يغمز الكرة بطرف الكدارة فتتحرك فى حلزونية نحو المرمى ..يقع الحارس ليمسكها تعود الكرة للطاهر المنتظرها فيفعل الحركة مرة ثانية وثالثة ورابعة والحارس يقع ويقوم ..فى الاخر ترك الحارس المرمى خاليا وذهب قائلا:
ها ذا مش زول ..دى حركة شيطان مايفعلها...!!!!!
(6)
اقرب اصدقاء الطاهر هو لاعب الهلال السابق الفريق القومى عبد الله اوهاج وكاناو يهتمون بموهبة نادى ترهاقا والهلال بورتسودان الساب قمحمد على عثمان الديبة ففيه كانوا يرون شباب موهبتهم ..ولكن الاصابة ابعدت الديبة اللعاب عن الملاعب قال الديبه ان توجيهات حسيب مكنته من ممارسة الكرة بامتاع واستفاد كثيرا من مهاراتة ونفذها ليصير لاعبا يشارله بالبنان ..حكى الديبه ان حسيب فى مباراه للثغر مع دبايوا انتهت بالتعادل ودخل حسيب فيها متاخرا لجأ الحم للقرعة والطاهر كان داير يعيدوا المباراه باى شكل .الحكم يجدع الريال الطاهر يلتقطة قبل ان يقع فى الارض بالكدارة دون ان يراه احد حتى خلصت قروش الحكم ولم تنهتى القرعة فاضطر لاعادة المبارة بعد ان اظلم الليل واستحالت الرؤيه ..واثناء خروجهم من الملعب ناول حسيب الحكم ريالاته بعد ان اخرجها من بطن الكدارة وقال للحكم :قروشك ..اركب بيهم مواصلات...!
اعيدت المراة وانتصر الثغر بهدفين احرزهما حسيب..!!!
(7)
بافلى يقول:الطاهر يضقل بالليمونه وكورة المضرب ..يدق الليمونة برقدمة للوراء ويعيدها لقدمه بالكعب لاكثر من مره ..مايفعلة ناس رونالدينو دا شفناه زمان عند الطاهر الذى احلف بانوا مافى زول العب منو فى الدنيا ..مكمل الشغلانيه دى تماما ..برجلوا يدخل الكرة فى سله الباسكت..استاورستا لمن ماشى بلدوا قالوا ليهو اطلب هديه نقدمها ليك من السودان..
قال ليهم بس ادونى الطاهر دا اسوقوا معاى ..لكن حسيب رفض ورجع مره اخرى للثغر وحياتة العادية فى ديم عرب ببورتسودان..

[بابكر مخير]

والله جنس دآ
لا كان في الحير ولا حتى وسط الطير، حايم
دي عدييييييييييل كدي بالغتا
الزول دآ مش لعاب!!
دآ الهة كورة بالتمام والكمال،،
إيه رأيك لعبتا معاهو،،،
لا!!!؟
لعب بينا دافوري في جنينة عمنا الصادق "مدير السجون" عليه رحمة الله في الخرطوم شرق (عشرة بيوت، حي مشتل الفنطاز) آها وفي سنة كم وستين، غايتو قبل أكتوبر...
سمعتا عنه الناس بتحكي حكاية الضقل دي،، لكني شفتها مستحيل يكون ماشي وما في شيئ في رجله ينقز،،،
إشتهرت كورة الثغر بعجايب في كورة القدم والطاهر حسيب كان جوهرتها....
كان المزاج هو، سيدو محبه

[النور يوسف محمد]

بسم الله الرحمن الرحيم
سلامات أخ حسام وعساك مرتاح
هذا السرد الممتع الصادق أعادنى الى هذه المجنونة
التى باعد بيننا وبينها جرى الحياة (ودرشها ) ثم ازدحام الزمان
أيضاً من الذين علقوا بالذاكرة ( عبد المحمود) لاعب ساردية الموهوب
والذى أظنه من جيل الطاهر أو الذى بعده
ذهبت مرة الى مدينة شندى فى مهمة عمل وكانت هناك مباراة لساردية
قلت لمرافقى ياخى داير أشوف عبد المحمود ,
قال لى نحنا نمشى نخش الأستاد , بعدين شوف اللعيبة أحسن واحد هو عبد المحمود وبس
لا بكلمك بيهو ولا يحزنون
وصدقاً كان لاعب فلتة
ومعجزة من معجزات هذه المستديرة
أيضاً أبعده الحسد عن دورى الأضواء
حدثنا مرة المرحوم الطيب عبد الله , قال مشوا شندى عشان إسجليهو للهلال
أو يتأكدوا من أنو لن يسجل للمريخ وتانى ما مهم
........................................
على المستوى العالمى أعتقد أن الملاعب عقمت أن تنجب مثل ماردونا
كان بحق اسطورة الملاعب
اللاعب الذى لا يخطئ فى تمريرة أو تصويبة نحو المرمى
إمكانيات تفوق الوصف
لك التجلة , على هذه الطرح
شكراً أخى

[imported_حسام الدين ميرغني]

تعرف يالنور اخوي..
حدث ان تبارى الثغر وساردية شندي فى كأس السودان زمان ..مايفعله عبد المحمود فى زملاء الطاهر يتسداه ليهو الطاهر فى الهجمة المقبلة مباراة ممتعة ياريت لو كان فى بلوتوث فى سبعينات القرن الماضى لضمنا تسجيلها وتسريب فنياتهم....!!!
ولما انتهت المباراهة مسك الطاهر عبد المحمود من رقبيتو قائلا:انت يالجعلى عارف ,,نحنا العب اتنين فى السودان ..فانبسط عبد المحمود بشهادة الطاهر ولكن الطاهر طبظها بعد ان فك رقبتوا قائلا:لكن انا العب منك....!!!
عبد المحمود لحبه لشندي رفض هلال مريخ واراد ان يكرم اهلة بان يلعب وسطهم ويرفع رأسهم ولكن بعد اعتزاله لم يلتفت اليه احدا..!!!!
اما الطاهر حسيب فقد شاهدته يلاعب شبابا فى وسط المدينة فى زقاق ضيق وكان هناك شباك حمام فاتح على الشارع قال للولد خش جوة البيت فاخذ يشوت الكورة فى فتحة الشباك تخش تووووش والولد يجدعها ليهو من جوه ..اكثر من عشرين مرة ولاكرة لم تدقش الحيطة تقول لى (عمار مرق).......!!!!!!!!!

[imported_wadosman]

الاخ حساام...

بوست ممتع و سرد جميل لتاريخ واحد من افذاذ كرة القدم فى السودان
رغما عن فارق العمر الكبير بيننا و بين اللاعب الفذ الطاهر حسيب الا انه كانت
تربطنا به صداقة قوية جدا و لازالت....

اذكر كنا نمشى مسافات طويلة جدا من حينا الذى يبعد بمسافة ليست قصيرة من ميدان
نادى الثغر و ذلك لمشاهدة الطاهر حسيب و هو يتمرن مع نادى الثغر و ايضا كنا نهرب
من البيت لمشاهده الطاهر حسيب بدار الرياضة بورتسودان فى المباريات التى يكون فريق
الثغر طرفا فيها...

الطاهر حسيب انسان بسيط متواضع جدا و كان يحضر الينا كثيرا فى تمارين فريقنا الذى
الذى كان يلعب فى روابط الناشئين و تعلمنا منه الكثير جدا فى مهارات الكرة و التحكم...

فترة الطاهر حسيب فى هلال العاصمة لم تكن طويلة و رغما عن قصرها لكنه خلف
الكثير من الذكرياات و كان مثار اعجاب الجميع..و انا شخصيا اعتقد واحد من المشاكل
التى كانت سببا فى عدم استمراره بالعاصمة هو تشغيله بمصنع البيرة وقتها و ذلك على اياام
الراحل كيشو....

قدم فريق الثغر للعاصمة الكثير من اللعيبة المميزين و بالتحديد لفريق الهلال العاصمى
حيث كانت البداية باللاعب طاهر حسيب ثم جاء بعده بكرى حسن و الذى لعب لفترة طويلة
باك ايمن فى فرقة الهلال و ايضا جاء بعده اسامة الثغر (شيتا) و الذى لعب لفترة طويلة
و اصبح لاعبا مشهورا يعرفه الجميع..ايضا هناك اللاعب حسين عبد الحفيظ (الطبق الطائر)
و ايضا لعب لفترة ليست بالقصيرة بهلال العاصمة قبل ان يهاجر خارج السودان..

شكرا اخ حسام على هذا البوست الجميل و لازال هناك الكثير فى الذاكرة عن هذا اللاعب
الفذ نتمنى ان نجد الوقت و نجيك راجعين...

لكل التحية...

[imported_عثمان]

رائع العزيز حسام الدين ميرغني وأنت تعطي رجل حقه بحكم أنني من مدينة بورتسدان شاهدت الساحر الطاهر اكثر من مرة يداعب الكورة وبالفعل يا حسام هو ساحر بحق وحقيقة مرة في نادي حي العرب بورتسدان هنالك ميدان للكرة الطائرة والباسكت بول أتخيل الطاهر دا ينقر الكورة كدة بطرف الكدارة بس بتدخل على طوول في المرمى بتاع الباسكت وفي مرة شاهدته هو ولاعب حي العرب السابق قيسوني الفنان وفايز نصر الدين برضو ليهو لمسات حلوة جدا في الكرة اتخيل التلاتة ديل بيلعبوا بالكرة يمكن لأكتر من ساعة الكورة دي ما هبشت الواطة، الطاهر حسيب بحق فنان وساحر.

تحياتي/ عثمان الطيب

[imported_ابومشعل]

الاستاذ / حسام الدين
احتراماتي والسلام
برغم اننا لم نعاصر تلك الفترة الذهبية لعمالقة كرة القدم في سوداننا الحبيب الا ان سيرة الطاهر حسيب لها حظها الوافر من الامتنان والتقدير في ذاكرة الرياضين عامة ورواد كرة القدم على وجه التحديد ويقال ان الرجل كان فلته زمانه وموهبة لا يشق لها غبار الا ان وجوده بعيداً عن اعلام الخرطوم المحدود والقاصر على العاصمة وتحيزه الفاضح ائنذاك لحدودها الجغرافية الضيقة لم يسلط الضوء على الكثير من المواهب وفي مجالات مختلفة .
لك الشكر والتقدير كله .

[imported_التباري]

الأخ حسام والبقية
تحياتي
شقيقي الأكبر كان شغال في جبيت في السكة حديد
حكى إنو مرة عملوا مهرجان رياضي وكان في حارس مشهور في الشرق، عملوا مسابقة إنو أي زول يدخل ضربة الجزاء يأخد (طرادة)
وليك الحق تلعب أكتر من ضربة جزاء ..
قال لي جاهم راجل كبير قال داير يشارك ..
ختوا الكورة .. ظوووط ختاها للحارس في حنانو ، وأخد طرادة
لف وجاء تاني ختاها
وهكذا ..
لامن جاهم واحد أدروب .. قال ليهم : يا ناس إنتو مجانين، دا الطاهر حسيب والله لو لعب مية ضربة جزاء ما يضيع فيهم واحدة .. ولو عايزين تضيعوا قروشكم كلها خلوهو يلعب
وللآن يصر شقيقي إن الطاهر حسيب لو ظهر في البرازيل لكان أبرز من بيليه
بس حظو مطين الرماهو في السودان

[imported_حسام الدين ميرغني]

يبدو ان الطاهر لم يكن ماهرا فى كرة القدم فحسب,اذ انه كان ايضا يجيد مايفعلة الحاوى من سرعة حركات وكده..قيل انه يجدع الريال فوق فبينما تتشالق الرقاب والاعين لمباصرته يكون قد مرقوا ليهم من كم القميص..
هذا مع العلم بان حياته كلها بساطة فى بساطة اقرب الى الريفيين من الحضر عاش طفولتة فى جبيت ثم بورتسودان فى ديم عرب ببساطة البجا الحياتية ..تعليمة قليل ولكن موهبتة كبيرهة الاكثر ادهاشا انه لم يقلد احدا فى ممارسة كرة القدم اللهم الا لاعب فى حيوات الشرق القديمة اسمه محمود الهندى ..دا قالوا كان حكاية فى الشغلانية دى غيره لم يكترث حسيب لاحد يركل الكرة ويطوعها بمهارة فائقة ..
انتو مش معاى الطاهر حسيب دا داير ليهو دراسة جادة لحالتة الابداعية مثلة ومثل ابداع كجراى وابوامنه حامد والصاغ محمود ابوبكر و اوكير الدامر وكل مبدعى الشرق الحبيب..
ناس التلفزيون بعد ان علموا بما قد كتبنا فى الطاهر حسيب قالوا انهم كذا مرة بحثوا عنه ليوتقوا لفنياته العجيبة دى ولكنه مابيدور الكاميرا...ويستحسن الزوغان .....!!!

[بابكر مخير]

المشاركة الأصلية كتبت بواسطة التباري

بس حظو مطين الرماهو في السودان

التباري
سلام
دي يا الحبيب ذكرتني الموضوع الكان كتبو فترة بعد إنتخاب أوباما رئيس لأمريكا،،،
قال برضو ذي كلامك دآ وموضوع شيق عن؛
لو كان مشى وقراْ في الأزهر بدل الهجرة لأمريكآ...
دمت يابا
وسلام

[imported_حسام الدين ميرغني]

تعرف يامخير.. ان استاورستا لما اراد ان يغادر السودان الى يوغسلافيا طلبوا منه ان يختار مايهدى له وان غلا...
فالراجل ماقصر مع الكرة السودانية وانعشها حنانها فى ستينات وسبعينات القرن الماضى ..قال ليهم (بس تدونى طاهر حسيب دا اسوقوا معاى)
ولكن الادروب رفض حبا فى (ديم الاراب).وقدر ماحنسوه :ياراجل دى اوربا والزول دا شبهك بى بوشكاش عظيم الكرة المجرية والعالمية ولكن الطاهر رفض..
فى الاخير مضى استاورستا دون نيل امنيتة ولم يمكث الطاهر كثيرا فى الهلال وتصوب نحو الشرق..
عارف, قالوا اللعيبة خافوا على مكانتهم من مهارتة يقوم يطيرهم الشارع ...
فماحدث انهم بقوا وقت التمارين يدسوا منو فلا يعلم بميعاده ويأخذ فسحتة فى شوارع الخرطوم.. الى ان ودع كشوفات الهلال..!!!
طبعا حكاية تعنصر بعض الاداريين للاعبيين قديمة جدا فان بقى الطاهر ناس النقر ديل كانوا راحوا فى خبر كان.....!!!!!
الطاهر الجيهه جاتوا مدردقه للهجرة لاوربا ليفصح اكثر عن موهبته لكنه مادقا الفرصة (سدر) وختاها واطا..كما يفعل بفن مع الكرة ..بل تركها تمر مرور ماء من تحت جندول.....!!!!

[imported_التباري]

سلامات يا عزيزي
تعرف يا مخير
أنا درست في منطقة فيها تداخل قبلي واختلاط شديد، شي جعليين شي رباطاب شي كواهلة، لكن هي في الأساس منطقة بجا وقروا معانا كمية من الأخوة البجا، أذكر فيهم واحد إسمو محمد طاهر بلعب في فريق المدرسة جناح يمين، تعرف الزول دا الباك البلعب معاهو ما عندو حل غير يقول ليهو (طووط) لمان يستلم الكورة، لأنو طوالي بخليها وبطلع برة الخط..
لكن مهارة غير عادية ، سرعة خاطفة، ذكاء غريب في الميدان ..
ما عارف أسع حظو رماهو وين
وفي هلال عطبرة كان هناك محمد الحسن بوداي الشهير بأدروب، ودا قيل إنو كان بجيب الكورة من وراء القون في تمارين الهلال ومرة نزلوهو معاهم تمرين وبعد داك كان من أفضل لاعبي الوسط في دوري عطبرة
وتحياتي للجميع

[imported_أميرى]

الليلة في جريدة السوداني في مقال ممتاز عن المرحوم الطاهر حسيب إعداد محمد عبد العزيز

الغريب إنو ناقل البوست دة بضبانتو بدون ما يشير للمصدر

كلمة إعداد دي هسا مراقتو يعني؟