|
المشاركة الأصلية كتبت بواسطة وجدي الاسعد الاسعد
اسطورة الحب
تحكي الاسطورة ان آلهة الجمال فينوس كانت تمتلك روحا متمردة حتى انه شهد لها في طفولتها انها كانت شقية جدا اذ كانت دائمة التنطط وحتى يحكي انه في يوم من الايام كانت تنطط من كوكب الي كوكب وكان ابوها ينهرها (يا بت بتقعي) والبت ما شغالة بيهو وقاعدة تنطط وتنطط فانزلقت فوق بوز كوكب ليبتون فوقعت وكسرت سنها الامامية فكان غياب السن شبيها بالفلجة فزادتها الفلجة جمال علي جمال, المهم قال ليك لمن فينوس دي بلغت وشخت اولى دوراتها الشهرية , قال ليك مسكها كسل وملل ما عادي لمن ابوها وامها اتحيروا فيها , زيوس دا يقوم الفجر وتقوم معاهو اثينا يحلبو سحاباتهم ويسوا شاي الصباح ويشربوهو بشابورة الاجرام السماوية ويقوم عمك زيوس يشيل فراره ويبقى مارق وتقوم اثينا تقعد تكنس وتنضف وتعوس عواستها وتجهز فطورها , ويجي عمك زيوس راجع وفي يدة عقلة من ارواح الناس القام الاحتطبهم في الصباحية دي , وتقوم اثينا تقطع ليهو الناس وتجيبهم ليهو عشان يفطر بيهم , دا كلوووو وفينوس نااااااايمة تشخر طول اليوم بتكون نايمة ما بتقوم من سريرها الا تمشي الحمام عشان تبول وتجي راجعة ,المهم بعد مرور ستين سنة علي المنوال دا قامت عمتك اثينا وفي قعدة جبنة قالت لي عمك زيوس ( هووووووي يا زيوس بتك دي ما كويسة , البت دي لو خليناها بالطريقة دي ح تنتحر, احسن ليك تشوف ليك معاها دبارة) قام عمك زيوس بعد ما مسح لحيتو بتأمل وتدبر صاح قائلا (بتي فينوس دي اظنها زهجت من الدنيا دي , فحقو نخليها تشوف حاجات جديدة , عشان كدة ح اشترك في مجلة الدهر العصرية , واخليها تتصفح الدهور والعصور وتشوف الدنيا دي بعدين ح تكون كيف , بي كدة ح اخليها تمرق من جو الكآبة العايشة فيهو دا) وعمك طوالي خت فنجان الجبنة بي جاي وقام طوالي مسك طرف اول خيط للريح ونفخ فيهو فيما معناهو (يا جماعة مجلة الدهر الشهرية , رسلوا لينا مجلة ضروري) وقبل ما يفك طرف الرياح , كان تسمع ليك صوت بببببببب برب ترااااخ صوت وقوع المجلة , يقوم عمك زيوس يستلم المجلة ويشيلها ويدخل بيها لغرفة بتو , وبدون ما يقول ليها كلمة قام فووووووو جدع ليك المجلة في وش بتو وقام تراااااااااح جرا باب الغرفة وراهو , فقامت فينوس مسكت المجلة واتفنقلت علي بطنها وقعدت تتصفح فيها مسكت المجلة دي من زمن عصر المايوسين وقعدت تتصفح فيهو مرور بالعصر الحجري ثم العصر العباسي (نكاية في حافظ) ثم العصر الصناعي وتوقفت عند العصر الالكتروني لانها اكتشفت فيهو حاجة ما طبيعية, فقال ليك قعدت في العصر خرطومائة سنة لانها قعدت تفلفل العصر فلفلة , مسكتو ليك ايميل ايميل وماسنجر ماسنجر وقروب قروب ومنتدى ومنتدي , ياخ دي لحدي الفيس بوك ما خلتو , لمن مسكت التويتر عشان تفتشو قامت عصرتها بولة فقامت مشت تبول لمن جات راجعة خلت التويتر وقعدت تفتش من طرف سااااي وفجاءة اذا بها تفتح منتدى سودانيات ويا لهول ما رأت في سودانيات , اذ انها تفاجأ بانها تقرأ لشاب سوداني يدعي وجدي الاسعد , فاخذت تتبع خطواته الي ان امسكت ببداية خيط الالياف البصرية الذي سيوصلها الي هذا الوجدي وفعلا وصلت الى مقر وجدي الكائن في جنته السامية , وما ان شافته حتى ذابت ولهاً وصاحت قائلة (اووووووب علي انا منك , حلاااااااااتك قرووووض ساااااي) , وهنا اذ تلحقها يد امها وتجذبها لتعيدها الي غرفتها القابعة في اطراف الكون , فتصيح فيها امها (واللاي كويس ؟! ابوك جاب ليك المجلة دي عشان تتصفحيها تقوم تقعدي تجكسي فيها؟!) وطرااااخ تقتطع فيها كف وتشيل منها المجلة والام تردد (ما عندنا الهات قاعدات يتصعلكن مع الناس المعفنين ديل) وتراااااح ترزع الباب وراها وتتربسه وهي تردد (اها اتحبسي قبلك ان شاء الله تموتي ولا تجيب لينا زول معفن يسكن معانا في مجرتنا دي) -عنصرية آلهة- ^ــ^
تجلس فينوس في غرفتها والحسرة تقتلها علي حرمان اهلها من حبها (الوحيد) , وبعد تفكير وتدبير تقرر فينوس انه اذا لم يكن لها نصيب في ذلك الفتى فلابد اذا ان تصنع شيئا له كهدية منه امنتانا بجوده علي هذه البسيطة , لانه بوجوده اعطاها الرغبة في الحياة والعيش مرة اخرى بعد ان تملكها الملل والضجر ,
المهم ياخ بالمختصر المفيد كدة (لاني زهجت من الكضب الآيل للكتابة)
قال ليك فينوس قامت طلبت من امها وابوها انهم لازم يدوها سحر عجيب وقدرة علي خلق الاشياء كيفما تشاء ووقتما تشاء , المهم لمن ادوها ليها قامت تنطط من كوكب لي كوكب لحدي ما جات كوكب الارض وقامت زرعت الزهور ودورت القمر ووفرت الشروق ولونت الغروب , وصنعت الموسيقى وخلقت شكسبير وخلقت الرحابنة وفيروز ووديع الصافي عشان يغنوا في مسرحية (سهرة حب)
ولكن علي الرغم من كل هذا , يرد عليها وجدي قائلا (الحُب بدونك يا فينوس بكون حَب بطيخ سااااي)
فرفض وجدي الحب
لذلك قال الفلاسفة ان الحب نهايتو قريبة وفي اول سنة زواج بتلحس
لانو وجدي رفض الهدية
فلو وجدي قبل الهدية من فينوس كان الحب ما حينتهي بين المحبين
^ـــ^
|
