عليّ اتوكل شديد^_^

[تماضر حمزة]

نطفة حنين في لحظة شاخت جد معاك
ووقفت بين ولهان تواضع يوم لقاك لكنّو بالغ في اشتهاك
كان بيكفيهو ابتسامك وضحكك العشرق سماك
وماتفرح كتير شان قُت ليك انت السحاب
برضو خطواتي البحر الكثّف الموية الهناك
ولو انّي بس حبيت اقيف..يبقى المطر قطعا نساك
وتعدم الدنيا الخريف لحدّي مأأكثّف سِواك
ووكتو الحزن باعك سلف كاش بالفرح قلبي اشتراك
والكان بيقنع بي قليل الشوفة جاك
وانت في اسبوعو يوم..ومكمّل الستة اشتياق

عكيرة في نص البحر الموجو ين شطينو ضاق
والموجة يوم تفرد ضراعا ينهدل للقيف كتيف
ضِفّير الخدارو الهاج ........ و.. راق
.ومرقت كان سيدي ال حزن..
راسمة خطواتي الفراق
قبال أفوت نفّاج كلامك بي ..خطيوة و..انعتاق
وطلّة حرف صالب حواسي على الحراق
كضب البقول الليل ضحك فوقو النهار
شان ضيّو ماطبعو الشماتة وفعلو سمّوهو الصباح
وكضابة عتمة حسّك المرهون هواجس واغتراب
خايفة مابتخشّو ضو والخشّة كانت شكل صاح
ماواضحة بس ضحّاكة كانت في زمن مليان نواح
وكيف يعبرك زول من سراب
كلّما تقرّب حنين تدخلك غيمة وتنوم
والرؤيا تفتح ألف باب
تدخل الأحلام مبلّلة بالمطر والبيني مابينك حراب زعلة أواصر من ونس وزعلو مافعلو الخراب
الفينا داخل انسراب
ومابتنسرب منّي الحكاوي القلتها إلا في جوف حسّك النصر الغياب
وجاني راجع منهزم ماقلت ليك
مااااقدر الشعيرة القطعها
كان بسوّيهو
العتاب
وماعاتب عليك
ولابقدر أشيل في الخاطر المرتاح عذاب
والكان معاك
دي الرهيفة وخرمها خلّيو ..عليّ
وعليّ اتوكّل شديد
وانا كنت عاوزك تنبسط من فكرة انّك ليّ نديد
زيي زيّك وماصحيح أنا زولة بس بعرف..بريد
انت خايف من شنو؟؟
وانت مابتعرف تريد
وانت قايل الورطة زولة مابتعرف الحل السعيد؟؟
ولاقايل الحل ده فكرة ناطّة في عقلك براك
ياجايي بالراي ال...سديد
وماشديد
وأنا كُت قفلت عليك دواخلي وسمّيت وجودك لون جديد
علّقت ابتسامك في الحِيَط
وآخر الجوف البعيييد
ومنعتك المرقة وتفوت؟
وكيفن بتمشي علي المروق قبلما توادع مداخل بينا بينك عُشرة الحكي والسكوت
ومابتعيش أحرف غُناك القلتها
طالما الاحساس بموت

[مي هاشم]

المشاركة الأصلية كتبت بواسطة تماضر حمزة

ووكتو الحزن باعك سلف كاش بالفرح قلبي اشتراك
والكان بيقنع بي قليل الشوفة جاك
وانت في اسبوعو يوم..ومكمّل الستة اشتياق

مقرّشة والله

يا سلام عليك يا تماضر..

أها جنس ده ما بقدر عليو..

[معتصم الطاهر]

واحدة فى الاسبوع

وحات حبيبك ..

خوف التخمة ..

[معتصم الطاهر]

مبدأً .. الفكرة

تعجبنى الحبيبة البتدلع
و بتعرف روحها و عاقلة ريدتها ..

لكن الهجر العلنى حار و الله ..

---
أجمل بيت
( خايف من شنو ؟) ..
-----

و برضو
فى حاجات كثيرة ممكن تحذف و تبقى القصيدة اقوى

----
بعدين راجعى الوزن هنا ..

علّقت ابتسامك في الحِيَط

و مفردة ( لى ) سببها شنو ممكن تحذف ..
لأنو بقت تدخل فى شعر البنات الأيام دى و هي إضافة لا داعي لها ..

وانا كنت عاوزك تنبسط من فكرة انّك ليّ نديد
زيي زيّك وماصحيح أنا زولة بس بعرف..بريد

سؤالى هنا
منو/ شنو الما عاتب عليك
العتاب
أم أنتي

كان بسوّيهو
العتاب
وماعاتب عليك
ولابقدر أشيل في الخاطر المرتاح عذاب

[أسعد]

عجبني في العنوان الوش ^____^























وبعض هناي مدفوق داخل البص

[ناصر يوسف]

المشاركة الأصلية كتبت بواسطة تماضر حمزة

وكيفن بتمشي علي المروق قبلما توادع مداخل بينا بينك عُشرة الحكي والسكوت
ومابتعيش أحرف غُناك القلتها
طالما الاحساس بموت

الله لا مَوَّت أحاسيسك يا بت

سيبي مروقك وما توادعينا يا زولة
النعمنو كدي بيناتنا عُشرة ياخ

لوا شنو بالله ؟؟ !!!!

[معتصم الطاهر]

الزولة دى بكتنا و حرشتنا و مشت تبارى ياتو حروف فى ياتو رصيف ..

[ناصر يوسف]

المشاركة الأصلية كتبت بواسطة معتصم الطاهر

الزولة دى بكتنا و حرشتنا و مشت تبارى ياتو حروف فى ياتو رصيف ..

مشت يا باش تفتش عن دريباتها ونستنا

ونِحنَ ؟؟؟؟!!!!!!


نحن نباري الكباري
نَوَلِع رتينة في عز العَصَارِي
نَفَّتِش عليها
البِنَيَة الرَزِينة التَغَنِي الغناوي
تَغَرِّد تَقُوقِي
تحاكي القماري


ومين بشبهك يا بنية زي ضُل الضحي ،، أبقي مارقه يا زوله ،،، أبقي مارقه ياخ ولسه بيناتنا العُشرة

[عصمت العالم]

العزيزه تماضر حمزه..
الشاعره الرهف..والجمال..

ياقيثارة الشدو الشجى..

وانت تراقصين حروف اللغه.تحت ضى القمر...ويتساقط المطر فى سرساب رذاذ.يتقطر.يبلل كل شء فى الوجود..الرعش والاحساس.ورنة الخلخال..على مساسقة .. ايقاع الخطى فى ليل العشق الطويل..
تلك مضامين تنفدع فى غنج دلال فاره ومترف..
ياسلام عليك..
وانت تنثرين كل ذلك الحكى المنمق.الانيق.بذات الرشق الدفيق.وتلاعبين كل القلوب الراجفه .وترفعين خفق ضرباتها...وهى تكاد ان تنخلع من مكامنها فى جوف الصدور..
يا سلام على الطلاوه والحلاوه..ورنة النغم الدعاش وهو ياتى بكل مصادرالنسيم من قرونه..ليتحف كل العقول ويلفح كل الوجوه ويسقى من عتق دنان معتقه..
لعل البلاغه فى رفقة عشرة الحكى السكوت...وذلك التستر الخفى الذى برهافته يغلف كل شىء..
تماضر..الفنانه..
ايتها الرائعه....ما اجملك..وانت تاخذين منحنى جديد وتشقين دربا جديدا غنيا بالتعابير والمعانى.فى جناس ذخيرة قاموس لغوى بالعاميه مهول. ودسم ...وشهى...وزاخر..
محبتى دائما

[ناصر يوسف]

المشاركة الأصلية كتبت بواسطة عصمت العالم

تماضر..الفنانه..
ايتها الرائعه....ما اجملك..وانت تاخذين منحنى جديد وتشقين دربا جديدا غنيا بالتعابير والمعانى.فى جناس ذخيرة قاموس لغوى بالعاميه مهول. ودسم ...وشهى...وزاخر..
محبتى دائما

عصمت العالم ببواطن أسرار الجمال

أخوي الكبير

تحايا وشوق إليك أبا زينب

بالله البت تماضر دي قاعده متوهطة في لندنكم دي ولا وين كدي بلاد التنقليز الكفار ديل ،،،

ياخي ما ينوبك ثواب وتشد ليها سِلِك في السِلِك وتقولها في ناس كتااااااااار يعلم الله مشتهين يقروك يا بت ياخ

[عصمت العالم]

حبيبنا المخرج الفنان ناصر يوسف..
لك عاطر التحايا والاعزا.ز.
واامل ان تكون الاسره الرائعه بخير وامان.
يا اخى الاصغر.
الشاعره تماضر حمزه...تلك الذخيره الزاخره لغة وشعرا وابداعا وروعه..وهى ودواخلها فى امتلاء متخم بالمفردات الجميله وبقدرات مهوله فى التدقيق والتصوير والتشكيل الهندسى السريالى والتشكيلى فى فن الشعر.هى حقا اضافه ومعلما بارزا يستاهل ان تسلط عليه الاضواء وبكثافه وهى ايضا مشروعا ناجحا للرؤيه الشعريه الجديده فى فن الكتابه ونظم الشعر..وهى انسانه مرهفه رقيقه وجميله...وحنينه تحمل كل الصفات الانسانيه وتلك الصفات تتخلق بمستوى خلق رفيع ومتجانس.وانسانى بكل المقاييس ومدارات الادراك...وحقا ان بيئة الشماليه دائما تمنح قدرات خارقة ومهوله..وهى سيدة بيت من الطراز الاول ..وزوجه وام...
ربنا يحفظها ويمكنها من اداء هذه الرساله الشعريه القويه...
نعم هى معنا هنا فى مدينة لندن الكبرى.وسانقل لها رسالتكم...وهى قطعا تستاهل ان يقرا الجميع..لها.. ..وتستاهل ان يشملها الاهتمام الثقافى والاعلامى...
وطبعا تستاهل ان تنشر وان تخرج لها دواوين شعريه.فهى تحسب من طلائع الشعراء والشاعرات رجالا او نساء على امتداد سماء بلادنا الحبيبه وعلى امتداد سموات المهجر..من نيوزليندا الى الامريكيتين وكندا والقطب الشمالى والسكا.وبالطبع اوروبا والبلاد الاسكندنافيه..وشمال وجنوب شرق اسيا واليابان والصين والكورتين,,..وطبعا الخليج العربى باكمله..وافريقيا يكل اتجاهاتها..
بس تحتاج كى تنشر بتوسع...
لك الاعزاز

[رأفت ميلاد]

فرحتونا ياخ قايل تماضر جات


لكن كتر خيرك يا ناصر القصيدة زادت عمرنا أسبوع زيادة

[ناصر يوسف]

المشاركة الأصلية كتبت بواسطة عصمت العالم

نعم هى معنا هنا فى مدينة لندن الكبرى.وسانقل لها رسالتكم...وهى قطعا تستاهل ان يقرا الجميع..لها.. ..وتستاهل ان يشملها الاهتمام الثقافى والاعلامى...
وطبعا تستاهل ان تنشر وان تخرج لها دواوين شعريه.

لك الاعزاز

أخوي الكبير عصمت العالم ببواطن أسحار الجمال

أشكر لك ما خطَّه يراعك عن هذه السيدة الفُضلي تماضر الخنساء
نعم هي ما تفضلت أنت به عنها ،،
تماضر الخنساء شاعرة مُجيده ونحن نحتاجُ أن نغوص في بحور حروف أشعارها
عساها تأينا وتنثر بعضاً من أقوالها فينا ،، عَنَّا ،، ليتها

[ناصر يوسف]

المشاركة الأصلية كتبت بواسطة رأفت ميلاد

فرحتونا ياخ قايل تماضر جات


لكن كتر خيرك يا ناصر القصيدة زادت عمرنا أسبوع زيادة

يااااا عمك ياخ ،، رأفت الزول الجميل

ينعل شنو داك ياخ لو ما مشتاق ليك إنت كمان

عموماً هذه التماضر ،، ليس رياءاً ،،، بل تستحق الإحتفاء بها كثيراً كثيراً جداً

رأفت ،،،

أكتب لينا كتابتك الطاااااااااااااااعمه ديك يا الحبيب أكتب ياخ

وهل من وعد إني اليوم أو باكر أو حين يحين المِزاج ،،، ألقي لي بوست جديد لننننجي بقلم رأفت ميلاد ؟؟

يا ريت ياخ ،، يا ريت والله يا رأفت أشوفك زينت سودانيات بطاعم الكلام

لقد هرمناااااااااااااا يا رجُل