اللهم باسطة...

[أميرى]

و غازي صلاح الدين بجلبابه ناصع البياض يخطو خطوة ناحية المغضوب عليهم
و الدستور الذي يشهره غازي في وجه عمر هو ما سيفتح الف نافذه للجحيم
و سيد الركشة لم يجد ما يزين به دابته من كل عبارات العربية إلا جملة صغيرة تبدأ ب نفسي
ولا تنتهي بأمشي الدهب
و نفسي أمشي الدهب هو ما
سيغرق ما تبقي من طازج مياهنا في غيابة الجب
فقط من يأبه؟

واللبانة الممضوغة جيدا هي ما سيصطلي أولا ببيان فلان الأول
و سنكتفي حينها بالبحث عن هدايا صندوق العلكة و لن نجد إلا
عبارة قديمه قالها نميري لسفير السودان في مصر الذي جاء ليشاوره هل يحضر حفلا يتواجد
فيه سفير اسرائيل
فيقول نميري بعد تأمل
أمشي بس ما تتعشي

أهو العشاء الأخير يا غازي؟

و....

[أميرى]

و البحث عن خليفة لا يبدأ حتي ينتهي بطاولة تصلح للعب البوكر أو لدق العنق
و لا ينسكب حينها إلا...دمنا
ولا ينجو إلا الجوكر
فمن يبدأ التوزيع يفقد أصبعا تلو أصبع و...يتصدر الخنصر نشرات الأخبار بجدارة

و نشرات الطقس

و العاصفة في العاصمة

و

و

[مبر محمود]

سلام يا أميري وأشواقنا الهبطرش،
أنتَ من القليلين الذين أقرأ لهم كل حرفٍ يخطونه في سودانيات هنا، وذلك لذكاء العبارةِ عندك ولإسلوبك المتميز في الحكي، ولكني مؤخراً لاحظت إنك واقع في تناص إسلوبي مع إسحاق أحمد فضل الله، وقطعاً إسحاق عندي من الكتّاب أصحاب العبارة الذكية ولكنك تمتلك من الإسلوب ما هو أفخم وأمتع، على الأقل بالنسبة لي!

الملاحظة دي واقفة في حلقي منذ بوستين ليك لي وراء!

[عبدالمنعم الطيب حسن]

وبعدين الجماعة زعلانين من الغازي ليه ؟
مش كبيرهم قال ما داير ...
ام ان دخول الحمام سهل ، الكلام الخروج
.......
عمنا قريب الله، رجل لطيف ، وفاطي سطرين ، نام في سرير الرجل الذي هو داخل الحوش ، ومفروش من بدري ، وساقط...
صحاهو صاحب السرير : ياعم قريب الله تمشي معاي البوليس من سكات ،
والله امسكك من ايدك دي ، واوديك للبوليس ،
اجاب عمنا قريب الله : يا زول هوي الضمان المسوك ،
.......................
اها يا اميري
الضمان المسوك ،
غايتو لو قطر وقعت ،
في ناس كدة الا تمشي صراصر ...

[أميرى]

المشاركة الأصلية كتبت بواسطة مبر محمود

سلام يا أميري وأشواقنا الهبطرش،
أنتَ من القليلين الذين أقرأ لهم كل حرفٍ يخطونه في سودانيات هنا، وذلك لذكاء العبارةِ عندك ولإسلوبك المتميز في الحكي، ولكني مؤخراً لاحظت إنك واقع في تناص إسلوبي مع إسحاق أحمد فضل الله، وقطعاً إسحاق عندي من الكتّاب أصحاب العبارة الذكية ولكنك تمتلك من الإسلوب ما هو أفخم وأمتع، على الأقل بالنسبة لي!

الملاحظة دي واقفة في حلقي منذ بوستين ليك لي وراء!

شيخي مبر و عليكم السلام و الشوق
وقبل ما أدلف لي حكاية التناص
دو داير أحكي ليك حكاية
قبيل بديت كتاب مذكرات الشهيد الشريف حسين الهندي
و في الفصل الخاص بالجزيرة أبا و بعد ما أفاض في مدحها و تمجيد رجالها
قال ولكني كنت أدخن ولا سجاير في الجزيره ولا من يدخنها
حسيت بيهو والله يا مبر و طوالي اتناصيت مع حالة الخرمة و دخنت ليو سيجارة في صحته
Cheers يا عمك

و تلبس حالة اسحق مجرد نزوة نشغل بها فراغنا و فراقنا للسطر
ثم لا نستعجل ضوء الصباح
فلا نحنا في الأمنية ولا عندنا عربية أو كما غنت المغنية في قلبا قلبا

...
أها قيس شحاته المتلبساو حالة حسين خوجلي داك عذروا شنو
والله الا كان السبب بنك فيصل

تشكرات يا صديق علي الكلمات واللكمات

[أميرى]

المشاركة الأصلية كتبت بواسطة عبدالمنعم الطيب حسن

وبعدين الجماعة زعلانين من الغازي ليه ؟
مش كبيرهم قال ما داير ...
ام ان دخول الحمام سهل ، الكلام الخروج
.......
عمنا قريب الله، رجل لطيف ، وفاطي سطرين ، نام في سرير الرجل الذي هو داخل الحوش ، ومفروش من بدري ، وساقط...
صحاهو صاحب السرير : ياعم قريب الله تمشي معاي البوليس من سكات ،
والله امسكك من ايدك دي ، واوديك للبوليس ،
اجاب عمنا قريب الله : يا زول هوي الضمان المسوك ،
.......................
اها يا اميري
الضمان المسوك ،
غايتو لو قطر وقعت ،
في ناس كدة الا تمشي صراصر ...

قال ليك يا منعم قبل أسبوع في تور هايج في الحاج يوسف
جهجه الناس والشوارع و الرجال فكوا البيرك
إلا سكرانا ماشي و بخيط الشارع
و التور جاي عليو والناس تشيل و تنبه فيو
شوية كده والسكران سلم علي السما و جا داقي الدلجه و علي
جسمه آثار العدوان
المهم الشرطه جات هنضدبت التور و أخلوا السكران في البوكس
للمستشفي
عمك في السكه شما شوية هوا
و شبك ليك الجماعه
أها إن شاء الله العربية الدقشتني دي ما جرت و قبضتوا عليها ههههه

وما بين سكرتنا يا منعم والتور الهايج مساحة مناسبه لفك البيرك أو إنتظار الإخلاء حتي لو بقطر بسكة بدون حديد

جميلة حكاياتك التي تذكرني قري قديمة و قمر للسمر
شكرا عليها و شكرا إليك

[أميرى]

و بالونة البشير الكاذبة ما يفجرها
تماما و يخرق عبثها ثقب صغير
يتسلل من برلين
و طقس جليدي حميم ينهمر بالمفاجآت

و الترابي لا يملك إلا أن يبتسم

[زهير ابو سوار]

تحياتي اميري ..
غايتو وصية نميري للسفير دي ام الديلوماسبة ذاتا .. ضحكت يا اميري لمن الصداع طار .. لكن نميري بكون قالا جد.
شكرا

[أميرى]

المشاركة الأصلية كتبت بواسطة أميرى

و بالونة البشير الكاذبة ما يفجرها
تماما و يخرق عبثها ثقب صغير
يتسلل من برلين
و طقس جليدي حميم ينهمر بالمفاجآت

و الترابي لا يملك إلا أن يبتسم

كتب البوست قبل وقت طويل من فصل غازي ومن إنقلاب البشير علي علي عثمان ومن خطاب البشير الأخير و إقتزاب الترابي من المشهد الآن

فيا لعصفورتي ياخ

[عادل عسوم]

اقترح تعديل العنوان الى:
اللهم اندومي
...
جينا نسلم