الكراهية شينا خلاص

[بابكر مخير]

أريتني كان بكره
ذي ما الناس بي غبن تكره
كنت كرهتا للأنصار وحزب الأمة
وسيدي الصادق حواليه الجميع إتلمة
كنت كرهتا للأحفاد ولي ناسا
لي قاسم ويوسف وبابكرالختا العلم ساسا
كنت كرهتا لي بلدي
ولي لإهلي ولي ولدي
لأمو وأخواتو
وللأصل ذاتو
كنت كرهتا للسودان
أعظم الأوطان
كنت كرهت للحرية
والعمى شوفت ديمقراطية
كنت كرهت أشوف الناس تتهنى
لي مستقبل كريم تتمنى
وكرهت للكورة والحرفا ناس جقدول
المحينة وجكسا والأمير منزول
كنت كرهت للفن وإبداعو
وغنايين الحقيبة الخالدين وما ضاعو
كنت كرهت للأدبا والكتاب
بي كتاباتم سلبوا لي الألباب
والصحافيين والصحافة وجريدة الأيام
وبشير وعتباني وساتي وكتيرأقلام
كنت كرهت للكومة
والزيادية ملموة
كنت كرهت التعايشة
وكل قبايل بلدي في أمنا متعايشة
كنت كرهت للأقباط ولي ميلاد
ولي الأفراح بعيد يوم للمسيح ميلاد
كنت كرهت لي ود قرنق دكتور جون
الكان ليهو في القيادة فنون
كنت كرهت لو الجبهة تغور تتمشى
وللمغبون بعدها يفرح وكمان يتفشى
كنت كرهت قولت الحق ونصرة المظلوم
وشوفت العين تلاقي النوم
كنت كرهت للأحزاب
ودرت تكون السياسة سباب


لكني ما بكره تب
وبعيش بالحب وكل الحب
بحب الناس تتخاوى
تحن وما تتلاوى
بحب الناس تحب الناس
ويلعنو الخسيس وسواس
تكون الولفة بيناتم
والريدة سايدا حياتم
أخوان تحب أخوان
وأخوات وسط أخوان ومتحابين

[bayan]

أخوان تحب أخوان
وأخوات وسط أخوان ومتحابين

تعيش يا ود العم

[haneena]

لكني ما بكره تب
وبعيش بالحب وكل الحب
بحب الناس تتخاوى
تحن وما تتلاوى
بحب الناس تحب الناس
ويلعنو الخسيس وسواس
تكون الولفة بيناتم
والريدة سايدا حياتم
أخوان تحب أخوان
وأخوات وسط أخوان ومتحابين

Well said ustaz babiker

never mind

i will see you all this Eid inshaa allah

we will have a long conversation then

salam to your family

[خالد الحاج]

سلامات يا دكتور
أهديك كلمات ود بادي ...

[frame="2 50"]حال هذا البلد بكانى ما سكتنى
ريدتن فيهو كيف مالكانى كيف ملكتنى
نارن فيهو كيف ماكلانى كيف لهبتنى
الاّ ترانى فى العرضة انحسب برانى
والناس البتعرض جوه ما سمعتنى
الاّ ترانى انبح زيي زى إخوانى
والخيل بى عجاجة عمتنى
توبى قصير وما غطانى
والزيف ام برد شقتنى
قلت اباصر امرق بره من احزانى
وين قبلتا سفكت دمى وإتعدتنى
ولا زينوبة آخرت إيدى فى الدنيا أم بناين هش
من شافتنى جفلت منى خنست فى نوايا القش
مرادى سلاما يغسل حزنى
الاّ سلاما زاد احزانى زادنى عطش
لحقتها فى الفريق اتناسا وانشد حالا
طلبتها شاى وقست مداسا
قصرت عينى فوق خلخالا
لفحت توبا لحقت ناسا
وقفت غادى عدلت حالا
غزت كوعه هزت راسا
لفت جيدا قالت لا لا
قالت لى شن معناك وشن كسب الرجاك ورجاك
وشنو الراجنو من تالاك
زمنك كلو تاكل باردة ماضق شر
زمنك كلو نحن نعوم وانت تغنى ماسك البر
وزمنك كلو فوق الفارغة فوق ريح المدن منجر
الخير إن مرق من دارنا لا انحسيت ولا نحاس القبيلة نقر
ولينا سنين خلانا سموم وما شربت حفايرو مطر
منيحه الشافع الاماتو راحن فى شموس الحر
صقور الباشا نهشن من ضروعا وفوقنا طارن فر
كلاب الباشا فطرن فيها وما لقن البيقول لها جر
والباشا الغشيم فى ذاتو قعقع ومن كبادا فطر
لا ولدن يقولو انتر ولا مهيرتن تقولو فشر
ويا الباشا الغشيم قول لى جدادك كر

بعد حكت العليها اتوهدت برزن بروق عينيها
كست خلاصى بين إيديها ما لقيت البلفقوا ليها
وقعت دمعة من ود عينى قلت اخفيها
وقعت عينى ذاتها عليها
حسبت المسافة البينا قلت امشيها
كفتنى الصقور بي جيها والبلد اترمت بي جيها
حكموا كتافى عقدوا لسانى ضاروا وشيها
غنوا اتهنوا تربوا وشربوا من بكريها
مصرو ثديها شربوا سلاف معتق من لذيذ شفتيها
عينى تشوف لسانا وصرختا وثكليها
عبلة تنادى فى الولد البشق التيه
عبلة تنادى فى الولد البعرف الجيها
عبلة تنادى فى الولد البعدلو وشيها
عبلة تنادى واقفة قصادى مصروا ثديها
عينى تشوف لسانا وصرختها وثكليها

هيا ريح الصلاح هبى
وامرقى من متاريسك
من طرف البلد شدى
وسوى البرجى داك ميسك
بارده علينا تنكبى
ودمنا زيت فوانيسك
هو لا شرقى ولا غربى
بينزف من دراويشك

والليلة يا ريح الصلاح الهابا فيك راحه وجع
والليلة الشجر الكبار وحشاه ناقرو السوس بقع
والليلة حق الناس ببين والليلة بنشوف البدع
والليلة وين البرقى من تالاك يبين
والبرق من تالاك سنين
يبرق كذا سيوف الصحابه الساجدين
والعاديات المؤريات خرشه جنات فى الارض جات
والخلوق الضايقة لا قوها اجمعين
عرب البوادى المن شرق والامه دى المصلوبه
فوق حبل الصبر لما اتمدت والكادحين
والصالحين والساجدين والعابدين والزاهدين
ونفضنا من زمن الجدود صقر السنين
وسرجنا خيل مسروجة من زمن الحسين
وعرضنا زين
وجمعنا غطا المشرقين والمغربين
واميرنا صاح الرايه وين
والجمع صاح الرايه وين
ومشينا بالتاريخ ركبنا على البساط الأحمدى
كايسين محل وقعت سوارى الرايه
وانقطعت تواريخ النعوش
ولقينا باقى الرايه فوق قبر الخليفة الراشدى
مليانه دماً كيف ندى
وساريها فوق الفتنة دايخ ومنتكى
وغسلنا بى دمع الندم قميص عثمان من الدم الزكى
وعقدنا حبل الدين على طرف القميص المكملى
والراية زادت من الملى ورفرف قماشا المخملى
وحرسوها زى سبعين ولى
ما جلهم حراس الهنا ما جل حراس الأمانة وديدنا
يات من حوار ختم الكتاب ختم السند والعنعنا
يات من ولى ودرويش غرق فى الهمهمات والدندنا
آن الاوان والخير دنا
اتحزموا السبح الطوال واللوح برق
ارجونا فوق طرف الجبل مشهادنا نفزع مجدنا
ايد فى لجام الخيل تقل والتانية فى لجام النفوس
المادحه فى درك الزمن
يا امه كسلى ونائمة فى تياب الكسل
وهواها ماشى مع الأضل
الخيل مصوبر فى محل والخيل تجقلب فى محل
بعد العدل والريح صلاح والظلم راح والصاح قدل
بعد الشروق يا امة وسطا بتشهد فى الخلوق
بعد الشروق نجمك أفل نعشك غشانا على عجل
يا امة وافاها الاجل وماتت على سوء الختام
واخر الكلام فى لسانا كان هبلاً .. هبل
هبلاً .. هبل
وسقط هبل .[/frame]

[بابكر مخير]

الحبيبة حنينة
أتذكر زمان أيام الطفولة لمن زول كبير يقول عاوزك وعندي معاك كلام،،،، قلب الواحد بينقطع
قولي خير يازولة والى اللقاءفي العيد وأنا حأكون مع ناس دكتور سيد إنشاء الله

[بسمله]

بوركت يا بابكر
مع انو اليله يوم من الايام الحزينه بتاعتى لكن نصك خف عنى شويه كدا
شكرا

[بابكر مخير]

سلامتك بسملة
الغريبة في أنو أحزن الأيام هو اليوم البوافق يوم ميلاد الزول؛ يعني مثلاً مولود يوم الأربعاء يوم كدا، آها !!! في يوم الأربعاء من كل إسبوع بتصيب الزول كدا هبشة من أحباط وإذا كان في حاجة بسيطة ما مشت صاح بيبقى الأحباط حزن،،،،، كدي شوفي يكون دا يوم ولدوك
دا يوم ولدوك يوم السعد
فرحة وأريتا تتمد
وتبقى مبسوطة من السبت لين يوم الحد
شكراً ليك

[بابكر مخير]

خلود
من أكتر الغناء الذي يدغدغني مشاعري هو غناء أهل العراق وأكثر كلمات الغناء التي تهزني هي كلمات شعرائنا الشايقية
هي حنينة (ما ذي حنينة زولتنا في السودانيات) وكمان شبعانة.
لكن دا ما كلام شوايقى.
يا يما ، دي هي المحنة، دي كلمات أهلنا الشوايقة، حلاوة خلقة وجمال أخلاق
وين كلام إسماعيل حسن الجميل وغنا ود اليمني الحنين
شكرا ليك، حبي ومودتي