محنه سودانيه .. ربيع عبد العاطى .

[imported_شوقي بدري]

محنه سودانيه .. ربيع عبد العاطى .

الواحد ممكن يفهم ان الدكتور ربيع عبد العاطى ربط الكرفته وركب الطياره ونزل فى الهوتيل ، واتى لكى يملك المساكين من امثالنا معلومات لا نعرفها . صرة الوش فى شنو ؟ . بعدين الله ما فتح عليهو بى كشيمه خليك من بسمه او ضحكه . المسؤولين ديل فى كل العالم بيجيبوا ليهم ناس العلاقات العامه يوروهم يبتسموا كيف ، ويكسبوا المشاهدين . اعدائهم قبل اصدقائهم . بعدين ده حوار . يعنى لو كان عيتنوبه ولا بطان كان عمل شنو .
حسب ما اورد الاخ صديق الموج الذى نحسده على روعته ووطنيته ، والذى زامل الدكتور ربيع عبد العاطى فى السعوديه ( ربيع كان شغال مخزنجى باربعه الف ريال فى السعوديه . ) وامثال صديق الموج لا يكذبون . طيب ربنا فتح على ربيع بفيلا ضخمه واراضى ومال وعقار . كاجى الناس ليه . انحنا ما عملنا ليه حاجه . الكج ده زمان لمن الزول يجى يضارب زول بدى اشاره انو انا جاى لدواس عشان التانى يكون مستعد . والا يعتبر الامر غدر . والكج هو ان يصر الانسان عين واحده ويصر وشو ، دى كانت حاله ربيع .
المقرر كان نقاش محدد . الدخل الاستاذ محمود محمد طه والجمهوريين فى الموضوع شنو . ودى المحن السودانيه اقحام اشياء لا دخل لها بالموضوع . اخونا القراى كعادة الجمهوريين كان متزناً ومعقولاً . وتحدث عن المال المجنب . المشكله ما المال المجنب . المحنه السودانيه المال المهرب . لان المال المجنب ديه بلف ويخش الاقتصاد السودانى . الضرر فيه انو بيصرف فى وجوه بذخيه . ولا يمكن اعادة استثماره بصوره جيده فى شكل مدخلات صناعيه وزراعه ... الخ . المال المهرب ده السودان يفارقوا فراق الطريفى لى جملو . الناس ديل خاتينوا لليوم الاسود .
الناس ركزت على ال 1800 دولار دخل الفرد السودانى . فى دى ربيع ما كذب . وافتكر ان دخل الفرد السودانى اكثر من 2000 دولار من الناتج القومى فى السنه . ولسؤ الحظ بعض اهل المعارضه دخلوا فى لولوه واستهزاء. اذا ناس الانقاذ كذبوا ولولوا نحن ما مفروض نجاريهم . يجن ان نكون امينين . اذا قال سمين نقول آمين .السؤال وينا ؟؟ . الفيلسوف برنادشو الذى كان اصلعاً وله لحيه كثه ويغطى جسمه شعر كثيف ، كان يقول ان حاله مثل النظام الرأسمالى غزاره فى الانتاج وسؤ فى التوزيع . ثروة السودان لمن تتوزع على عدد سكان السودان بطلع نصيب الانسان حوال 2000 دولار فى السنه . لكن ادروب الحائم فى الخلا ولا كوشى البتسرح بغنم فى فنقر او حتى سكان العشوائى خارج امدرمان ال2000 دولار دى ما بشموها . لكن هم داخلين فى الحسبه . ولهذا قال الكاتب الامريكى الساخر مارك توين ، هنالك كذب وكذب لعين واحصائيات . والاحصائيات احسن ما يكذب . ولا تعبر عن الواقع .
اذكر انه عند الثوره الكوبيه كان دخل الفرد فى كوبا هو 319 فى السنه . وبعد معركة خليج الخنازير وهزيمة التدخل الامريكى ،كان الرأسماليون يسخرونه من ان دخل كوبا لم يزد لعدة سنين . وكنا نرد وقتها . بأن كل المال المنتج فى عهد الجنرال باتستا كان يذهب الى اصحاب الكازينوهات و رجال المافيه ومصانع السكر التى كان يحتكرها الامريكان . ولكن المزارع الكوبى لم يكن يجد العلاج والتعليم الذى صار مجانياً . وصار الدخل يقسم على الجميع . وكان المناضل تشي جيفارا وهو وزير الماليه يتحصل على دخل المواطن العادى . ال 319 دولار فى ايام الاشتراكيه كانت تقسم على الجميع .
الدخل القومى ينتج فى الزراعه والرعى ومصائد الاسماك . الصناعه والتعدين ، التجاره المباشره بمعنى اخذ بضاعه من مكان الى مكان آخر . وهذا لا يعنى التخزين والمضاربه . بمعنى ان الحلاق او فنان المسرح او طبيب الاسنان . لا يشارك فى انتاج الدخل القومي مباشرةً . ولكنه يشارك بطريقة غير مباشرة . لانه هو الذى يساعد المنتج من عامل او زارع فى ايجاد حياة كريمه ومريحه . لكى ينتج .
فى آخر تشنجات البشير ذكر ان السودان ينتج 50 طن من الذهب . والحقيقة ان السودان ينتج اكثر من هذا . لان الشركات المنتجه لا تكشف عن كل الفلوس . وهنالك تنقيب عشوائى قد ينتج حوالى ال 15 طن . ولكن هذه الفلوس لا تدخل الاقتصاد السودانى . وهذه الاموال تتلف وتصرف فى اشياء فارغه . فالبشير هو ابن مغترب أتى من حوش بانقا وعمل فى الخرطوم بحرى مع عزيز كافورى كحلاب . وهذا يعنى انه قد اتى لتحسين وضعه المالى . وانه قد ترك اهله فى حوش بانقا اللذين وضعهم اقل جوده . اليس من المحن السودانيه ان البشير يصرف ملايين الدولارات فى شراء يخت او يخوت ، توقف بسببها الحركه فى طريق بورتسودان تقطع اسلاك الكهرباء ، وتهدم بعض المبانى . اليس فى جسم هذا الرجل ذره من الحياء ؟ . فحتى اذا سرق مال الشعب ،اليس فى اهله من يحتاج لراكوبه او متره . الا يزال فى ود بانقا اطفال يحتاجون لاحذيه . اليست هذه بالمحن السودانيه
من المحن السودانيه ان هنالك وظيفه اسمها خبير وطنى . عشنا فى الدول الناميه ، المتخلفه ، المتطوره ، ودول نص كم . ودول نص رباط . يطرشنا ما سمعنا بخبير وطنى . الزعيم السوفيتى خروتشوف الذى خلف استالين ، قال عندما قدموا له البرنس اوف ويلز ، ده شغال شنو . فقالوا ليهو ده راجل الملكه . قال انا عارفوا بعمل شنو بالليل . لكن بالنهار بسوى شنو؟ . انا ما عبقرى وما عندى دكتوراه ذى حقت ربيع ، لكن قريت شويه وشفتا ، خبير وطنى دى ما قدرته افهمها . اخونا كمال سينه الله يرحمو كان شغال فى شئون الموظفين . ناس مدنى جابوا ثمانيه وظائف جديده اربعه غطاسين واربعه مساعدين غطاسين . صدق بالغطاسين . لمن ناس مدنى احتجوا . قال ليهم غطاس دى المهنه الوحيده الما عاوزه ليها مساعد ، يا بتغطس يا ما بتغطس . يعنى مساعد غطاس ده يعنى بغطس فى وش المويه . قولوا عندكم لعيبين كوره عاوزين تشغلوهم ، بنشغلهم ليكم . ربيع ده كان لاعب كوره ولا شنو .
محنه جديده نائب الرئيس قال ، انخفاض او طلوع الدولار لا ينقص ارزاق الناس . لان الارزاق من الله . طيب الاعمار دى من الطوخى ؟ الاعمار دى ما بيد الله سبحانه وتعالى ما فيها لعب . الجيوش دى مودينها المتحركات والجبهات . ليه صارفين عليها فلوس تسليح وطيارات وانتنوف وذخيره ودبابات وعربات . ما يمشوا محقبين ايدينهم . فى زول بقدر يقصر اجل زول يومه ما تما . ليه صارفين 77 فى المئه من الدخل القومي على الامن والتأمين . بكره دى خلى على ولا البشير ولا اى واحد منهم يمشى يتضرع فى دارفور او يخلف كراعو فى كاودا ، او النيل الازرق . وماشين بعيد ليه . خلى يمشوا بس كجبار دى . ليه امن وتأمين ، الامين هو الله سبحانه وتعالى .
المحن انو الانقاذ الكذب ما بتعرف ليهو كويس . الهلكوبتر الوقعت قبل كم يوم دى فى دارفور ، وقال مقاتلى دارفور انهم قد اسقطوها ، بكل غباء تقول الانقاذ ده سبب فنى . معنى كده التقصير من الحكومه والجيش . وانهم بيركبوا اولاد الناس المساكين توابيت طائره . مفروض سلاح الطيران يقول الطياره بحاله جيده لكن ضربت بصاروخ . وده شئ طبيعى لاننا فى حالة حرب .
البشير ده بعد ما نبذ سلفاكير ووصفه برئيس الحشره الشعبيه وانه حيقد عين الحشره . وانو اى زول يمد ايدوا حيقطعوها ، ويرفع عينو حيقدوها . والله رباطين خور ابو عنجه ما كان بيتكلوا بالطريقه دى . شعور البشير والناس الحوالينو شنو . لمن يشوفوهو واقف مع سلفاكير ويبدو منكسراً لانه محتاج .
زمان كتلوا ولدنا مجدى والطيار جرجس وولدنا الطالب اركنانجلو . وهذا لحيازه العمله الصعبه . وبعد داك بقت العمله الصعبه متواجده فى كل بيت ذى المحريب والجردقه . وفى بيت قطبى المهدى ذى السنمكه . تانى جو رجعوا والنائب الاول بكل لؤم يطالب بقتل اى انسان يحاول ان يهرب مواد غذائيه لجنوب السودان . زمان فى واحد مجنون حايم بخرطوش فى الخرطوم بدق بنات الناس ، المالابسين محتشم حسب فهمه . قال مجذوب الخليفه انه قد اعطاه تصريحا . ما محل هذا فى القانون الوضعى او الشريعه الاسلاميه . واى شريعه تسمح لانسان ان يطالب الآخرين بقتل المسلمين بسبب الشبهه . يعنى واحد عندو غبينه مع زول يشوفو دايس ابنص لسفنجه يملاهوا دخان ويقول النائب الاول قال .
طيب ، حكوا على جماعه بخمستاشر سنه سجن بسبب سكر ، وجد في حوزتهم وبعيدا عن الحدود . اها ديل حيرجعوا ليهم عمرهم الضاع ده بأثر رجعى . طيب البشير القاعد حسى يناقش فى الجنوبيين . لو قام دقه سدرو وقال للجنوبيين تعالوا خموا . مايو ود عكر ، مقد ، قصابى ، فتريته اى حاجه . برضوا يطبق عليهو كلام النائب الاول ( شوت تو كيل ) . ولا دى حيطلعوا ليها فتوه جديده .
التحيه .
شوقى بدرى .

[imported_بدر الطائف]

تحياتى عمنا شوقى.
نساءنا لما تعمل ليك حاجه يكون فيها شئ من الطرافة والغرابه بيقولوا ( الله يجازى محنك يا فلان).
هسع الجماعه ديل الله يجازيهم هم زاتم فى محنم البيسووا لينا فيها دى.
محن اخر الزمن.
شكرا على المقال الجميل .

[imported_بدر الدين اسحاق احمد]

( ربيع كان شغال مخزنجى باربعه الف ريال فى السعوديه . )


[gdwl]المقرر كان نقاش محدد . الدخل الاستاذ محمود محمد طه والجمهوريين فى الموضوع شنو . [/gdwl]


[gdwl]
ودى المحن السودانيه اقحام اشياء لا دخل لها بالموضوع .
[/gdwl]
صحيح والله دا المحن السودانية ذاتها ....
حسى ربيع دا كان شغال مخزنجى ولا تمرجى ولا راعى جمال علاقتو بموضوع حلقة النقاش مع القراي شنو ؟
ما هى دا ذاتها المحن السودانية

[imported_ابوبكر حسن]

المشاركة الأصلية كتبت بواسطة بدر الدين اسحاق احمد

( ربيع كان شغال مخزنجى باربعه الف ريال فى السعوديه . )


[gdwl]المقرر كان نقاش محدد . الدخل الاستاذ محمود محمد طه والجمهوريين فى الموضوع شنو . [/gdwl]


[gdwl]
ودى المحن السودانيه اقحام اشياء لا دخل لها بالموضوع .
[/gdwl]
صحيح والله دا المحن السودانية ذاتها ....
حسى ربيع دا كان شغال مخزنجى ولا تمرجى ولا راعى جمال علاقتو بموضوع حلقة النقاش مع القراي شنو ؟
ما هى دا ذاتها المحن السودانية

مقال الاستاذ شوقى بدرى بعنوان محن سودانية - ربيع عبد العاطى
لم تكن حلقة برنامج الاتجاه المعاكس بعنوان الجمهورية او الاستاذ محمود محمد طه , وقع ليك؟

[imported_somiaadam]

عمو شوقي بدري لك التحيه والتجله وانت تنثر لنا من رحيق معرفتك
وعلمك
..
قيل ان الربيع العربي غير حكومات بعض الدول وربيع عبدالعاطي سيغير حكومه السودان بتصريحاته .
التكشيرة بتاعه المسؤلين علي اجهزة الاعلام دي الله يفكها وياريت يلتحقو بدورات تدريب للقاءات الاعلاميه
دمت بخير

[imported_رأفت ميلاد]

المشاركة الأصلية كتبت بواسطة شوقي بدري
طيب الاعمار دى من الطوخى ؟

ياخ الطوخى دى أنا لامن قريتا انخلعتا .. لحدى ناس كانديك عصرت بيها عليهم

قلت لى أطفال حوش بانقا البشير بعد ما جاب أهلو كافورى أنشاءاله حوش بانقا تغرق

[imported_هشام ديدي]

المشاركة الأصلية كتبت بواسطة رأفت ميلاد

ياخ الطوخى دى أنا لامن قريتا انخلعتا .. لحدى ناس كانديك عصرت بيها عليهم

قلت لى أطفال حوش بانقا البشير بعد ما جاب أهلو كافورى أنشاءاله حوش بانقا تغرق

غايتوا كافوري البعرفها انا كان شارع كسلا من كوبر لحله كوكو..الريس عرس

تااالت ...امكن.

[imported_الزوول]

المشاركة الأصلية كتبت بواسطة somiaadam

التكشيرة بتاعه المسؤلين علي اجهزة الاعلام دي الله يفكها وياريت يلتحقو بدورات تدريب للقاءات الاعلاميه
دمت بخير

....

الله يسامحك يا سمية آدم
لسه ح ننتظرهم لغاية يلتحقو بى دورات ويتخرجو ويجو يبتسمو لينا ؟؟
شقايا الحال ديل ... قاعدين لى متين؟
...

[imported_طارق صديق كانديك]

المشاركة الأصلية كتبت بواسطة بدر الدين اسحاق احمد

صحيح والله دا المحن السودانية ذاتها ....
حسى ربيع دا كان شغال مخزنجى ولا تمرجى ولا راعى جمال علاقتو بموضوع حلقة النقاش مع القراي شنو ؟
ما هى دا ذاتها المحن السودانية

لا ما ياها زاتا .. ربيع عبدالعاطي تم تقديمه ( خبير وطني ) في أكتر من مكان والحديث عن سيرتو الذاتية ينسجم مع الموضوع تماماً ، ثم اني لا أجد في العمل باي كيفية شريفة حرج لكن قصة خبرتو الوطنية دي وظيفة لأنو ابن أخت على عثمان وأحد أذرع الاجهزة الأمنية التي يرأس مجلس ادارة احدى المؤسسات التابعة لها.

ياخي عليك الله لو ما محن سودانية حقيقية زي ربيع عبدالعاطي ده يرأس مجلس ادارة خمسة مؤسسات بي ياتو فهم ..؟

[imported_بدر الدين اسحاق احمد]

المشاركة الأصلية كتبت بواسطة طارق صديق كانديك

لا ما ياها زاتا .. ربيع عبدالعاطي تم تقديمه ( خبير وطني ) في أكتر من مكان والحديث عن سيرتو الذاتية ينسجم مع الموضوع تماماً اني لا أجد في العمل باي كيفية شريفة حرج لكن قصة خبرتو الوطنية دي وظيفة ة لأنو ابن أخت على عثمان وأحد أذرع الاجهزة الأمنية التي يرأس مجلس ادارة احدى المؤسسات التابعة لها.

ياخي عليك الله لو ما محن سودانية حقيقية زي ربيع عبدالعاطي ده يرأس مجلس ادارة خمسة مؤسسات بي ياتو فهم ..؟

كدا يا طارق خت الكورة فى الواطه ... الموضوع ما سيرة ذاتية
ولو سيرة ذاتية ربيع عبد العاطى عندو دكتوراة فى الاعلام وبيدرس فى اكثر من ثلاث جامعات بطريقة منتظمة ...
بالدارجى كدا ( هو خبير ى مجال الاعلام ورسالته ) ..
+
بروفسير بدر الدين محمد ابراهيم استاذ الاعلام فى جامعة امدرمان الاسلامية هو امين الاعلام بالمؤتمر الوطنى عمل تصريح بأن المؤتمر الوطنى لم يفوض ربيع للحديث بإسمه لان المؤتمر الوطنى عندو وظائف بأشخاصها وهم معنيون بالحديث عن الحزب ..
+
المؤتمر الوطنى رفض تحديد شخص لقناة الجزيرة وهم الذين إختاروهو بصفته الشخصية ولصقو فيه صفة قيادى فى المؤتمر الوطنى والمؤتمر الوطنى ما عندو وظيفة اسمها قيادى ..

+

زول بروفسير بتاع إعلام حين يعمل تصريح لوكالات الاعلام قطع شك بيكون عارف الرسالة الاعلامية ومردودها وولكن دوما حين ينظر الانسان الى النصف الفارغ من الكوب ...

معلومة ...
أ . د. بدر الدين محمد ابراهيم رسالة الدكتوراة بتاعتو كانت عن قناة الجزيرة ولم يمضى على إنشائها ثلاث سنوات وهى اول رساة فى العالم عن هذه القناة التلفزيونية ..

عليك الله المحن دا كيفنها ...
حسى المقال دا ذات نفسه ما جزء من المحن السودانية


-
بالاحمر دا ترفع بيها صوتك عالياً ليسمع عمك شوقى الذى إحتفى لينا وهو محق بوظيفته كعتالى فى يوم من الايام ( وتقول صحيح محن سودانية )

[imported_بدر الطائف]

المشاركة الأصلية كتبت بواسطة بدر الدين اسحاق احمد

[gdwl]
ودى المحن السودانيه اقحام اشياء لا دخل لها بالموضوع .
[/gdwl]


أ . د. بدر الدين محمد ابراهيم رسالة الدكتوراة بتاعتو كانت عن قناة الجزيرة ولم يمضى على إنشائها ثلاث سنوات وهى اول رساة فى العالم عن هذه القناة التلفزيونية ..

عليك الله المحن دا كيفنها ...

[imported_somiaadam]

اقتباس:
المشاركة الأصلية كتبت بواسطة الزوول

....

الله يسامحك يا سمية آدم
لسه ح ننتظرهم لغاية يلتحقو بى دورات ويتخرجو ويجو يبتسمو لينا ؟؟
شقايا الحال ديل ... قاعدين لى متين؟
...





ماتزعل حندرب الجايين لانو الحكايه دي عاامه
اسمها التكشيرة التلفزيونيه لناس الحكومه والمعارضه
ربنا يستر من قاعدين لمتين دي

[imported_طارق صديق كانديك]

المشاركة الأصلية كتبت بواسطة بدر الدين اسحاق احمد

كدا يا طارق خت الكورة فى الواطه ... الموضوع ما سيرة ذاتية
ولو سيرة ذاتية ربيع عبد العاطى عندو دكتوراة فى الاعلام وبيدرس فى اكثر من ثلاث جامعات بطريقة منتظمة ...
بالدارجى كدا ( هو خبير ى مجال الاعلام ورسالته ) ..
+
بروفسير بدر الدين محمد ابراهيم استاذ الاعلام فى جامعة امدرمان الاسلامية هو امين الاعلام بالمؤتمر الوطنى عمل تصريح بأن المؤتمر الوطنى لم يفوض ربيع للحديث بإسمه لان المؤتمر الوطنى عندو وظائف بأشخاصها وهم معنيون بالحديث عن الحزب ..
+
المؤتمر الوطنى رفض تحديد شخص لقناة الجزيرة وهم الذين إختاروهو بصفته الشخصية ولصقو فيه صفة قيادى فى المؤتمر الوطنى والمؤتمر الوطنى ما عندو وظيفة اسمها قيادى ..

+

زول بروفسير بتاع إعلام حين يعمل تصريح لوكالات الاعلام قطع شك بيكون عارف الرسالة الاعلامية ومردودها وولكن دوما حين ينظر الانسان الى النصف الفارغ من الكوب ...

معلومة ...
أ . د. بدر الدين محمد ابراهيم رسالة الدكتوراة بتاعتو كانت عن قناة الجزيرة ولم يمضى على إنشائها ثلاث سنوات وهى اول رساة فى العالم عن هذه القناة التلفزيونية ..
عليك الله المحن دا كيفنها ...

المحن ياها جنس ردك ده يا بدرالدين الكورة عندي في الواطة انت براااك الوديتا فوق .

كالعادة لا تلتفت لماتحتويه المداخلة التي ترغب في الرد عليها .

كتر خيرك على المعلومة بس ياهو ده زاااتو البتكلم عنو استاذنا شوقي .. نكلمك عن ربيع عبدالعاطي وانت تمجد لينا في استاذك بدرالدين محمد ابراهيم ..!!!

--

شكرا بدرالدين الطائف ( الاسم سالم)