سوّاق خاص
رياضة المشي من الرياضات التي تستهوي الجنس اللطيف البكون يوموا كلوا نايم خوفا من السمنه والامراض العصريه لاكن واحد تعبان في جري الرزق كمان حيلوا مهدود بكون عايز ليهوا رياضة يوقا الاسترخاء والنوم زي حالتنا كده... في شوارع في الرياض تم تخصيصها لرياضة المشي شوارع متعه تلقي مع كل ناصيه محلات للمثلجات والكوفي وانت ماشي شغال في راسك مكائن مياه البخار البارد كل مره بجي بالشوارع دي بشوف غالبية الناس البتريضوا نساء ده كان قبل الزواج افتكرت النسوان ديل بمشوا عشان الولاده قالبية النسوان سمان ما كنت بدقق في البطون للانشغال والسرعه بعد الزواج بفترة ناس البيت قالوا عايزين اتمشوا مشينا لشارع الحمل زي ما مسميهوا انا وبعض الناس الما عندهم علاقه بالحياة الاسريه طبعا اكتشفت مافي علاقه بين الاسم والشارع والنسوان ديل البمشوا سمان عشان انا حيلي مهدود كنت بقعد مع سواقين العوائل اتونس معاهم لما جماعتي اخلصوا المشي الونسه مع الاسيويين صعبه لعدم الفهم معاها تلقط كلام عايزه مجهود ذهني ربنا هداني علي سوداني قلت احسن شيء ولد بلد قعدنا نتونس سواء:
سألني الاخو من وين قلت ليهو من مدني قال لي انا من الشماليه لاكن اسمع ما اكون من قري مدني أو تقول لي من مدني ...عشان الونسه تكون ساهله قلت ليهوا قول من الجزيره قال لي ... ها زول ها الجابرك علي الكذب شنو كلنا سواقين الحريم ديل الله اقبحم.... بتكلم معاي جات حرمه ماشه نحيفه سكت بعد فترة قال لي انا شغال مع الماشه دي زي الشهفوفه انا ما عارف الناس دول السمان بمشوا عشان انحفوا الداهيه دي الذي السخل دي ماشه عايزه تبقي شنو ما عارف لاكن رزق.. نكسر الزمن يا الاخو بالونسه انت زولتك انشاءالله كويسه معاك قلت ليهوا والله يعني نص نص.. قلت ليهو طيب انت وقتين زهجان منها ما تخليها الجابرك شنو زولنا اخذ ليهو تململه او قعد كويس قال لي شوف الناس ديل عندهم مزرعه قدر ما حاولت امشي اشتغل فيها مالقيت طريقه كمان عندهم اسواق مواد غذائيه حاولت مالقيت طريقه قلت لي زوجها انا زهجت من الشغله دي اديني نقل كفاله ولا اعمل لي خروج نهائي الراجل طيب بس الكلام ما عندوا عند الشهفوفه دي الراجل قال لي خلاص انا عندي فيزة سواق سوداني شوف لينا واحد استلم منك اكون زيك كده انا بوديك الاسواق عندنا وليدا لي اخونا شغال في لوري طوب في البلد حالتوا بي البلا قلت نجيبوا هنا الولد مسكين ابوهوا عدمان التكتحوا رسلنا ليهوا والحمد ليك يا الله الراجل جاء مشينا استقبلنا في المطار اتقول مطلعنوا من دوكه الليلت عواسه والتفه زي الشيطان مشينا البيت جيهتوا بي الحمام حلقت ليهوا بعد ما طلعنا ليهوا الاقامه والرخصه انا ودوني الاسواق عليك امان الله ما قعدته لي شهر الشهفوفه دي اتصلت بي قالت لي تعال... مشيت قلنا نشوف الحاصل شنوا ما اكون الوليد ده جاب لينا مصيبه مع الحرمه دي وصلت الحرمه قالت لي الجبتو ده ما عايزنوا....هي يا بت الحلال استهدي بي الله الحاصل شنو قالت يلا روح استلم منوا المفتاح.... سألت الوليد ياولد انا عايزك تنفع اهلك تشتغل هنا المشاكل العملتها دي شنو الولد قال لي:
بعد اديتني المفتاح كنت بمشي مع السواق الهندي في الشوارع كلاموا شتر شتر المهم عرفت اسوق كيف في البلد دي انا نايم المغربيه جاتنا المرأ الذي المسواك دي قالت لي لازم تلبس ثوب قالت افو انا اخوك يا امنه انا البس ثوب عليك الله المرأ دي ما مطرطشه.... قلت ليهوا التوب هنا يعني جلابيه يا الاصنج الما بتفهم هي لاكن جماعتك ديل خلوني افهم المرأ زعلت مشت مني جاني الراجل شايل جلابيه بي لياقه او معاها شيتا كدي بختوا في الراس او معاهو حبل اسود قال لي البس ديل بكره قلنا طيب.......... ثاني يوم لبستهن والله الجلابيه وقتين شفتها في المرايه قلته الجماعه في السودان كان شافوني اقولوا عثمان ود طه بقي خائب جلابيه بي لياقه ضيقه بقيت زي الصارقيلا ختيت الداهي الاحمر في الراس معاهو الحبل الاسود والله بقيت بس زي الطيره ام قدوما احمر قلنا طيب اكل عيش نعديها ليهم بعد يومين جابوا لي الداهي ده قالوا لي تعبي بي بطاقه ان داير تكلم السودان وإن اتصلنا عليك تشوف الرقم ما ترد في البيت تطلع لي بره عندنا مشوار يعني الجرس وقت اسوي ررررررررننن انا ابقي لي بره اها الشهفوفه دي حمتني النوم الليل كلوا ررننننن عليك امان الله زهجت منوا رميتوا ليك في الجك الليل المويه ده جب جب كضم او نمت نومي قفلت اللوضه الزي بيت الحمام دي او نمت تاني يوم قايلني هربت اهرب وين عليك الله في بلد الطرش دي وقتين صحيت من النوم جاتني المرأ النجاضه دي تكورك وللل وللل قلت ليها ما تصني راسنا بي كوراكك ده مرقت ليها الموبايل قلت ليها الداهي ده خرب خربااان يا وليه والله خربان دي فهمتا ليك جري اها ساقوني مشوار بعد رجعت جاتني شايلا ليها واحد تاني قلت في سري الناس ديل نتحلا منهم كيف (( احلني الحلا بله)) لاكن والله كان ارمي ليها في الجك تاني عليك امان الله ما قعدنا نص ساعه قالوا طالعين تاني طلعنا لي حفله في قصر وقفت العربيه قدام القصر المرأ الشهفوفه دي قالت لي انزل افتح الباب قلت امكن الباب عصلج معاها نزلت فتحتوا الحريم كلهن اعاين لي تاري الباب ما معصلج والله زعلت زعله انا قاعد منتظرم لي الساعة اربعه صباحا سواقا كدي ما إتونست معاهوا خشمي ده بقم ما قالا وقتين جو طالعين مع جوطة النسوان وقفت لي زي الصنفور قالت لي افتح الباب قلت ليها افو انا اخوك يا امنه افتح ليك الباب انا امي في لوري الطوب ما بفتح ليها الباب افتح ليك انتي......... ده كلوا الحصل.
اتملم صاحبنا في القعده من الجلوس علي حجر الاسمنت او قال الوليد طلع انجض مني والله حسي شغال في الاسواق بقي زي التور من اكل الطحنيه وأنا موكح بالمرأ الشهفوفه دي في اللحظه دي جات المدام بتاعتوا زولنا قام فتح ليها الباب مع السلامه ما قالا لي........
التعديل الأخير تم بواسطة عباس الشريف ; 27-02-2010 الساعة 11:12 PM.
|
