و الله يا قيقا قصصك قصص يعني في تعريفك للعلمانية الفجة دي إستندت علي كلام بيناوي الفوق دا بس يا زول كان كدا ما في أي مشكلة فجة فجة لكن تبقي العلمانية المرتكز الأساسي لقيام أي دولة مدنية...
لكن كدي نجي نشوف أمانيك الوردية دي فيما يختص ما لقيصر لقيصر و ما لله لله دي , إنت ما ملاحظ العبارة دي قاعدين نسمع بيها كتيييييييييييييير و حد علمي البسيط أنها عبارة إمكانية صمودها في وجه الإسلام السلفي صعب شديد.....أسمح لي يا قيقا أقول ليك كلامك دا إنشاء ساي ... شنو قصة علي كيفك دي , تصلي الصلوات الخمس في الجامع, تربي دقن, تقصر جلابيتك و تلبس حجاب , أي دي مظاهر دينية لكن نابعة من فكرة متماسكة جداً صرف النظر عن إختلافنا أو إتفاقنا معها .... يعني الزول البصلي خمسة صلوات في الجامع دا قطع شك ما داير يتريض, و لا البربي دقنه متعامل مع الموضوع كجزء من الزينة فقط كما قالت السيدة الحميراء , و لا قصير الجلابية عبارة عن رغبة في إظهار السيقان, كمان الحجاب دا ما لابسنه من البرد .... دي أفكار متماسكة جداً و مطلعنها من الدين دا ذاته أصلاً ما قعدوا كدا و قالوا نجر لينا دين متشدد و مواصفاته كيت كيت, و علي فكرة الأفكار دي عادي جداً يسحبوها علي الزول المختلف معاهم و من هنا بتجي محاكم التفتيش و تنصيب المشانق الخايف منها دي .... و يا حبيب عشان مسلمو جبر الخواطر أو moderate muslims ديل كما تقول عنهم السيدة أمريكا ذات السر الباتع.... عشان مسلمو جبر الخواطر ديل ما ياكلونا حنك ساي يجوا يحددوا كيف عبارة ما لقيصر لقيصر دي يطبقوها في بلد سكانها مسلمون؟
يا خي إنت بتدرس الشفع من صغار و بتكلمهم عن الجهاد كركن أساسي من أركان الإسلام, بتدرسهم الحجاب, بلقوا سورة التوبة قاعدة في المصحف .... دا كلو في في النهاية بعد ما يكبروا تجي تقول ليهم دايرين دولة مدنية و أي زول علي كيفه... و الكلام داك كان كلام مدرسة ساي؟, قادر تتخيل الشرخ النفسي الممكن يحصل للإنسان
بعدين شنو موضوع (لست عليهم بمسيطر ) ما عادي ممكن أجي أقول ليك البدل دينه فاقتلوه , أو أقول ليك و قاتلوهم حتي لا تكون فتنة و يكون الدين كله لله......
غايتو نصيحتي ليك زي ما بقول المغني
If u wanna do it
Do it rightly
لكن جنس الحكي دا ما بأكل عيش مع الدين السلفي.
|
