*** مصطلحات عامّية سودانية ***

[شبارقة]

ما المقصود بالشوكة والشنكار؟

[أحمد طه]

المشاركة الأصلية كتبت بواسطة أحمد محمد زين حسين

سلام يا شبارقة وضيوفه الكرام
عمك طه الضرير قال في واحدة من مربعاته

كم عتمرتبن فوق قجة العبادي
وكم غصتلن من الدنادر وغادي
أكان مي قسمة يا الديفة أم قريناً نادي
ما خصّانا بي زراعة الفشق والوادي

عليكم الله اشرحو ما تحته خط

معليش يا شبارقة (لحظات و نواصل البرنامج)
أنا قبيل قلت غصتلن دي ما راكبة عدلها ( من ناحية وزن)
فتشت علي المربع في مظان أخرى فوجدته:

كم عتمرتبن فوق قجّة العبّادي
و كم غوّصْتلِن مِنَّ الدنادر و غادي

عليك الله شوفو كده ما استعدل

[طارق صديق كانديك]

المشاركة الأصلية كتبت بواسطة أحمد طه

معليش يا شبارقة (لحظات و نواصل البرنامج)
أنا قبيل قلت غصتلن دي ما راكبة عدلها ( من ناحية وزن)
فتشت علي المربع في مظان أخرى فوجدته:

كم عتمرتبن فوق قجّة العبّادي
و كم غوّصْتلِن مِنَّ الدنادر و غادي

عليك الله شوفو كده ما استعدل

احمد طه سلامات ياخي ومساك الله بالخير ..

يعلم الله استعدل و ( غوّصْتلِن ) في تقديري أضبط وزناً من ( غصتلن) و ( غصتلهن ) والعبادي بقريحته الفذة لايبدو غير أنه أراد ( غوصتلن ) .. !!

شكرا ليك ولأحمد الزين ولشبارقة ..

رفقتكم ممتعة ياحاملي المسك

[أحمد طه]

الله يمسيك بالخير أخي طارق كانديك ، و شكراً لرأيك الداعم لصحّة (غوَّصتلن)

أها نرجع ل (شوكة و شنكار)
* يقولوا : الساعة 12 شوكة و شنكار ، يعني بالضبط ! ما زايدة ولا ناقصة دقيقة ، أنا غايتو ما عارف ، لكن يتخيّل لي إنو الشوكة و الشنكار حاجة ليها علاقة بالميزان !

بعدين في (الشنكارة) بتاعة ناس الكورة البلبسوها تحت الشراب عشان تحمي الساق من الإصابات ، دحين مش اسمها الشنكارة برضو ؟
كان عندي صاحب لامن يشوف بت كرعينا سمحات يقول لي (عليك الله شوف الشنكارات دي كيف؟)

غايتو يا شبارقة جطت ليك الشغلة
تعال ورّينا المفيد

[أشتر]

1- دوا ملاح
2- داقّي سِستِم

[أشتر]

المشاركة الأصلية كتبت بواسطة أحمد طه

الله يمسيك بالخير أخي طارق كانديك ، و شكراً لرأيك الداعم لصحّة (غوَّصتلن)

أها نرجع ل (شوكة و شنكار)
* يقولوا : الساعة 12 شوكة و شنكار ، يعني بالضبط ! ما زايدة ولا ناقصة دقيقة ، أنا غايتو ما عارف ، لكن يتخيّل لي إنو الشوكة و الشنكار حاجة ليها علاقة بالميزان !

بعدين في (الشنكارة) بتاعة ناس الكورة البلبسوها تحت الشراب عشان تحمي الساق من الإصابات ، دحين مش اسمها الشنكارة برضو ؟
كان عندي صاحب لامن يشوف بت كرعينا سمحات يقول لي (عليك الله شوف الشنكارات دي كيف؟)

غايتو يا شبارقة جطت ليك الشغلة
تعال ورّينا المفيد

كلامك دا فيهو ريحة صاح حيث إنو لو قلنا الساق هو الشوكة والشنكار معاهو لحام لكن المسعلة دي بتكون ظابطة في حالة تكون الساعة اطناشر شوكة وشنكار ...
غير كدا الكراع في جهة والشنكار ربك العالم ...

[بدور التركي]

المشاركة الأصلية كتبت بواسطة شبارقة

ما المقصود بالشوكة والشنكار؟

يسعد صباحكم بالخير جميعا

اعتقد انها ألة يستخدمها النجار لقطع الخشب

يا محمد طه
لما يقولوا ليك البت دي كرعينها زي الشنكارة
يعني زي لوح الخشبة ما متناسقة
والله اعلم

[بدور التركي]

التحية والتقدير لصاحب هذة الفكرة العظيم
ولكل المجتهدين. وللأخ شبارقة
لماذا لا يكون هناك كتاب يضم كل هذة المفردات والمعاني السودانية القديمة يكون كمرجع للدراسات
تلتي تخص التراث السوداني
حقيقة هذا البوست فيه مجهود وفيه كمية من المعاني القديمة التاريخية
حرام ما يستغل للفائدة الأكبر!!
مجرد فكرة ورأي

[شبارقة]

المشاركة الأصلية كتبت بواسطة أحمد طه

أها نرجع ل (شوكة و شنكار)
* يقولوا : الساعة 12 شوكة و شنكار ، يعني بالضبط ! ما زايدة ولا ناقصة دقيقة ، أنا غايتو ما عارف ، لكن يتخيّل لي إنو الشوكة و الشنكار حاجة ليها علاقة بالميزان !

المشاركة الأصلية كتبت بواسطة بدور التركي

اعتقد انها ألة يستخدمها النجار لقطع الخشب

سلام يا شباب

الشنكار في الأصل هو آلة يستخدمها النجار وهي عبارة عن مربع خشبي مجوف يُرَكـّب داخلو مستطيل والمستطيل بيسموهو (شوكة) ويوجد في اخر المستطيل مسمار بيسموهو(سن الشوكة)

يستخدم النجار الشوكة والشنكار لتحديد مكان الثقوب المطلوبة أو لتحديد حدود المفصلات بدقة قبل ما يقشروها بالأجـَنـَة (الإزميل) كما يستخدم لرسم خط مستقيم أو لقياس أو تحديد نقطة البداية و النهايه لقطعة الخشب المراد نشرها بالمنشار ... طلاب الهندسة برضو بيستخدموا آلة لو ترجمناها حنلقاها قريبة من الشوكة والشنكار.

الرمزية في النهاية هي الدقة والإنضباط ... ولذلك أصبحت الشوكة ترمز لعقرب الساعات والشنكار يرمز لعقرب الدقائق.

والله أعلم ،،،

ملحوظة :

جائزة السؤال ده من نصيب الأخت بدور ... تستلميها من فيصل سعد

[بدور التركي]

سامع يا يا ود العم!!
عايزة هدية كاربة

يعني شنو كاربة?

[شبارقة]

المشاركة الأصلية كتبت بواسطة بدور التركي

يعني شنو كاربة?

كرّب (فعل ماضي) ... يكـرّب (فعل المضارع) .... ومنها (الكرّاب) على وزن فعـّال .... لو عرفتي كرّاب العنقريب ح تعرفي معنى كاربة.

هناك عائلة مشهورة في مدني (آل الكارب) منهم الأخت / رباب الكارب كانت زميلتنا في الدراسة.

[شبارقة]

المشاركة الأصلية كتبت بواسطة أشتر

1- دوا ملاح
2- داقّي سِستِم

دوا الملاح هو مصطلح عامي فعلا ً وهو البهارات (اللازمة) للملاح عموما ً.

أما التانية الفيها system دي فما من مصطلحاتنا العامية.

وبمناسبة الملاح ... ما هو الكاتول؟

[بدور التركي]

المشاركة الأصلية كتبت بواسطة شبارقة

كرّب (فعل ماضي) ... يكـرّب (فعل المضارع) .... ومنها (الكرّاب) على وزن فعـّال .... لو عرفتي كرّاب العنقريب ح تعرفي معنى كاربة.

هناك عائلة مشهورة في مدني (آل الكارب) منهم الأخت / رباب الكارب كانت زميلتنا في الدراسة.

لا بعرف كراع العنقريب

اعتقد كراب يعني الحامل.
أي الرجل الذي يحمل العنقريب

[بدور التركي]

المشاركة الأصلية كتبت بواسطة شبارقة

دوا الملاح هو مصطلح عامي فعلا ً وهو البهارات (اللازمة) للملاح عموما ً.

أما التانية الفيها system دي فما من مصطلحاتنا العامية.

وبمناسبة الملاح ... ما هو الكاتول؟

يا شبارقة دواء الملاح
نوع من أنواع البهارات يعني مش البهارات كلها
ومش كل الملاحات تحتاجه
في اليمن يطلق عليه الكبزرة الناشفة

الكاتول
اظنه نوع من أنواع الشجر
كانوا قديما يحرقو منه لطرد الأرواح الشريرة
لانه خانق جدا

[بدور التركي]

يعني شنو الترتوس?