بمناسبة سودانيات الجديدة... (معاك يا غالية أحس الدنيا ملكي براي)!!!
الغالين الحلوين أبناء سودانيات الأم الجامعة...
أولاً أهنئكم جميعاً وأقول ليكم كل سنة وأنتو طيبين وتصوموا وتفطروا على خير يا رب... وألف مبروك عليكم المنتدى في ثوبه الجديد الرائع..
أهديكم هذه القصيدة وإلى كل حبيب وست ريدو ،،،نسأل الله أن يجعل كل أيامنا أعياد وأن يهنئ كل سيد ريد بست ريدو يا رب... وأهديها بشكل خاص للأخ أبو ساندرا وكل الأحباب...
[align=center]حبل الوصـــــــــال (2) [/align]
معاك يا غالية أحس الدنيا ملكي براي...
سارِح فيها بي كيفي
نازِل بالعُرُض والطُول
عشْمان في غدٍ أجمل
مُستقبل ملان اْفراح
يحكي كوامِن العِشِق النَبَع جُوَّاي...
مابين القوافي التايهة في محياك
غنِّيتِك شِعِر من نور
إسترجَعْتَ ماضينا
عِشْتِك فرحة في الداخِل
حلااااة ذكراكِ لما تكوني حاضرة معاي...
تتوسع مداخل النور يجينا الضو
تِتْسارع خُطى الأيام علي الشاطئ
وفوق شاطئ الغرام نبني العُشْ الموعود
نهنئ النفس بالباقي الفَضَل فيها
ويكون حققت بي قُربِك سعادتي هناي...
نطْرُد من دُنانا الخوف
نِتْصالَحْ مع الأيام
نَوِزْنَ الصورة بالعَدَلَة
تِنْشاف واضحة بالجِيهتين
في الزمَنْ الردئ ومكَّار تكون سلواي...
نسوِّي أغاني للأطفال
مُتْنفَّس تسلِّيهُم
تَوَسِّع قُدْرَتُم للوعيِ والإدراك
تَحَفِّز فيهُم الجِد لي بلوغ المَجْد
تهْديهم تجارُب حية فكرِ وراي...
طيفِك لمَّا يغْشاني
إتْمَطَّق حلاةْ شَهْدِك
إتْحَسَّسْ خطاويكي
وصْلِ وصَال وصُول وصْلِك
مبتَغى قَصْدي كلَّ مُناي...
كم سَاسَقْ علي بابِك
واقِف لما جاني نِداكْ
أدخُل قلبي مفتوح ليك
وبي نشوةْ عشيق فرحان وجَد ليلاهُ
كُل الكون سِمِع لغُناي...
فِ ليلة سعيدة ما اْحْلاها
خطِّينا الغَد الموعود
رسَمْنا حياتنا أحلى نشيد
عشمنا سَعَد في بُكرة الخِير
نعيش اللحظة والفَرَح اللِّي قادِم جاي...
ولكم ودي كله بلا حدود...
أبو الحســــــــين....
التعديل الأخير تم بواسطة أبو الحُسين ; 23-10-2005 الساعة 09:50 AM.
|
