حكايات من تحت وسادتي

[imported_جيجي]

الحمدلله قدرت انقل الكثير من دوت اورج

[عكــود]

سلام جيجي،

مشكورة على الإجتهاد في نقل البوست اللطيف.

[imported_جيجي]

الدنيا دي غريبةوملئية متناقضات ومدهشة في نفس الوقت
اصعب حتة فيها لما تكون ماعارف تعمل شنو.....لما تحس انك في مفترق طرق..... لما يموت اقرب زول ليك...لما حد يخذلك....لما تتفرض عليك حاجة بتسعد ناس تانية وتضطر تعملها....لما تحاول تطلع من حزن ونقوم تفتش ذكرياتك وتطلع منها بحزن اكبر
المهم انا امس بفتش في دولابي وفجأة لقيت لي ورقتين كدا في درج
و بالرغم من انه الدرج دا مليء بصوري من زمن الطفولة ورحلات وواسطوانات تخرج وتكريم وشهاداتي المدرسية والجامعية وفوق الجامعية وكثير من الذكريات الحلوة والمن اجلها اساسا قررت ا فتش في حاجاتي الاانهم استحوزو
على وقتي وتفكيري وذكرياتي كلها
المهم هما يا اما كانت مشروع قصائد ماخلصت. او مشاعر لحظية وانتهت اوقد رأيت في زماننهم اني اخبييهم. غايتو حانزلهم زي ماهم

[imported_جيجي]

_١_
من بيت تلابيب السحر الساكن
في وجدان محبتك
من بين ورود النبع
عناقيد الاحلام السرو
اخترت الارصفة
تدلل اشياءك
تعرضها
تدق الاجراس بميدان شعبي
يتنافس فيه الناس على
الاسعار البخس
تخادع بؤس الحاجة فيهم
هذي بجنيه ونص
وتلك بدولار
ونسيت ان على ارصفة الشوق الشعبي
كل الاشياء تداس باحذية المارة
حتى الاعناق تداس
......
على مايبدو اني كنت الوم احدا في موقف ما ولكني خشيت عليه منها ولم اكملها

[imported_جيجي]

م_٢_
معقول بس
كل البنات؟
اتنين يضاحكن غفلتك
واتنين يلامزن وحدتك
واتنين يهامزن فرحتك
واتنين يلولن صحوتك
واتنين كمان بخشيش
يلا زمن ضحكتك
بس يعني
الا اتنين عزاز
قلبي الحنين ومهجتك
...
خليت وفاءك
وكل الحنين
خليتوا ليك في صرتك
واليوم مشيت
للسفرة ديك
خليت معاي
املي الجميل
خليت معاي. حلم السنين
فستان زفافي وبدلتك
خليت معاي
فركة صفيح
توب سرتك
.....
دي غايتو بتذكرها كويس

[imported_جيجي]

متلازمة العيون
سمعتوا بيها
اها انا اكتشفتها
وحاثبتها ليكم في المداخلة الجاية
الليلة عندي رغبة شديدة اكتب
وانا حين اكتب اكتب لسودانيات فقط ومباشرة من كيبوردي دون الحوجة لورق وقلم واستيكة.
فقد تعودت ان ابثها دوماحكاياتي ومشاعري وحزني ودمعاتي وضحكاتي دونمواربة اوريب وكانت. واحتى ومتنفسي ومدرستي التي تعلمت منن خلالها الكثير واستقيت منها زلال الثقافات المختلفة وشهد المحبة وسماحة الخلاف وادب الحديث والصمت . وكنت حينها اجوب الشبكة العنكبوتية بحثا عن مزيدا من المعرفة فقد كنت اعشق الكلمة منذصغري واعشق القراءة. وتدهشني المفردات حتى الذين دخلواقلبي كان ذلك سبيلهم الوحيد واناكنت حين اكتب. اكتب من كل قلبي وبكل صدق وكل حرف اخطه له حديثه العام والخاص لذلك ودوما تصدمني حقيقة المتاجرة بالكلمات حتى انى في احايين كثير بت افقدالرغبة في الكتابة

[imported_كمال قجه]

المشاركة الأصلية كتبت بواسطة جيجي

قصاصة محمد
قصاصة محمد دي كانت فضيحة عديل
زيزي صاحبتي من الثانوية ودخلت معاي نفس الكلية
العلاقة بينا قوية جدا ..اصلا كنا متقاربين فكريا ومشتركين في هواية القراءة وكتابة الشعر
زيادة على كدا اماتنا صاحبات-القصة دي تعبتنا شديد مافي حاجة بتتدسى
محمد شاب لطيف جدا-داطبعا اول انطباع- اول يوم دخلنا القاعة في اول سنه لينا في الجامعة
انا وزيري نتلفت وراسنا مقطوع والقاعة ملانه مشينا ليك في الصف الاول عاملين فيها شفوت نعاين كان نلقى لينا مكان فاضي..
قوم يا محمد الكاتلاك الرشاقة قوم من مكانك وجر صاحبك القاعد جنبك ..واتفضلوا يا اخوات ونحن ماصدقنا انكشحنا ليك وشكرنا بطرف خشمنا لزوم قشرة وكدا
المهم بعد المحاضرة طلعنا لقينا ليك محمدفي وشنا

سلام عليكم .... وعليكم السلام ...كيفكم ...تمام والله وبقية التعارف قام محمد كمل رشاقته
-ياجماعة ايه رائكم تشربوا حاجة..الكفتريا بي جاي المهم مشينا بعد اتماسخنا عليه حبة في البداية
وزيادةفي الظرافة محمد عزمنا فطور وبعده عصير وبعده شاي وبعد داك انت يامحمد ابقى لينا في رقبتنا لف بينا الكلية كلها يدخلنا بحمد ويطلعنا بخوجلي لحدوت اليوم خلص وقررنا نرجع
-يا جماعة انا معاي عربية وانتوا في طريقي اصلا
-لا والله شكرن نحن برضو معانا عربية
طيب باي
باي بكرة من الصباح لقينا ليك محمد حاجز ليناجنبه ونفس البرنامج اتكرر وبقى مابدينا نفس
واي واحد يجي بجنبنا يحدر ليه ونحن خلاص ماعرفنا البنعمله
-يازيزي انا خلاص الجامعة دي كلها حاخليها عشان محمد دا..ومحمد دا شكله مباريك انتي(اصله اكتشف انها بت جيران ناس خالته) انا ذنبي شنو؟ ومن يوم الليلة انا من طريق وانتي من طريق..
دا شنو ياخ كرهنا
- لا والله محمد شنو كمان حلينا كدا-اصلا انا عارفة زيزي عاجبها خالد ود حلتهم المعانا في سنه رابعة نفس الكلية ويمكن تكون دخلت الكلية دي عشانه
وصلنا لاتفاق انه محمد دا تاني لو عزمنا اي شيء نرفض عشان مايستلمنا بعيزوماته دي كل مرة
-تشربوا شاي
لا والله شكرا
-تفطروا
لا يامحمد عاملين رجيم
اجيب ليكم عصير
-ماعايزين
المهم محمد اخيرا فهم واتاريه راجل احمق جدا
ونحن في قمة غتاتنا ديك مع محمد الدكتور فاجأنا انه الكورس انتهى وانه في امتحان ونحن يادوب مافاهمين حاجة ولاعندنا مذكرات ومافقنا من دهشة عالمنا الجديد دا..
طبعا اتهجمنا وما عرفنا نعمل شنو وماعارفين درب مذكرات ولاحاجة...محمد بكل شهامة بعد حسه بشلهتتنا ديك اتصدى للموضوع وقال انا حافتش مذكرات واطبعها واطبع ليكم معاي
متين يامحمد
الساعة 7مساءنتلاقى في الكفتريا
اتفقنا انا وزينب ناخد الورق الساعة7 ونبيت عند صاحبتنا في الداخلية نساهر الليل داك وبكرة على الامتحان
الساعة سبعة شوكة شايفين ليك محمد في الكفتريا شايل الورق
-اها عملت لينا شنو
-طبعت ليكم المذكرات ودبست لكل واحدة ورقها
طب والله فيك الخير ومشكور يامحمد..وغيرك ماكنا حنعرف نتصرف كيف ومانعدمك وشنوشنو

فجأة محمد قال لينا
-ايه رائكم نشرب شاي ولا نتعشى
-لا يامحمد مابناخد حاجة بعد الساعة7
-شكرا يا محمد
قبل مانتم كلامنا نشوف ليك محمد شيط شيط وقع ليك في الورق داك شريط وشرط ليك المذكرات ديك حتة حتة قدام العالمين الموجودة ورماها في الارض ومشى
نحن الهجيمة وقعت فينا لا عرفنا نبكي ولا عرفنا نضحك
المهم رجعنا الداخلية واتصرفنا ووالامتحان انتهى ونحن طالعين من الامتحان نلقى ليك محمد واقف
-تشربوا شاي
-نشرب يا محمد
ومحمدبعد داك بقى زول صاحبنا شديد
اتذكرت القصاصة الفي المذكرة دي كاانت جزء من المذكرات الاتشرطت اصلا بعد هو فات نحن خميناها من قدام الناس
محمد لاقيته قبل كم شهر لما جاء هو وعروسه شهر العسل

يااااسلااام ياااجيجي علي دسامة السرد والحكي الطااعم حضور وفي الكراسي الأمامية ومستمتع بالحكايات الطالعة من تحت الوسائد .. لكن غايتو محمد دة بكون ل هسي بشرط في الورق ههههه غايتو شكيتو ل الله كان يشرط المذكرة الساعة 7م وانت ممتحنة اليوم التاني بكرة