المولد حرام وحلاوتو حلال. أو كما قال
أمبارح الواعظ في الجامع قعد بعد الصلاة يدينا درس ... تحدث عن حقوق الرجل والمرة.
عرج على موضوع المولد وجزم بحرمة المولد وبحلال أكل حلاوته.
الغريبة الواعظ ده ما انصار سنة.
لقيتني برضو جوة دوامة أيهما الصاح ...
وسرحت بعقلي نحو الكثير من التضادات التي تخلق وجعاً لكثيرين مثلاً:
الموسيقى حلال ولا حرام.
ختان البنات صح ولا غلط.
التدخين حلال ولا حرام.
فراش البكاء.
التصوير.
المرة التانية.
الشربوت.
لبس الردا.
الخلوة.
زوغانات الشغل الخفيفة. هههههههه
الإختلاط.
أليست ماذكرت وغيرها تمثل جوهر المجتمع والتعايش؟
أها دي لازالت محل خلاف كبير.
يحلها الشربكة.
الفاتحة.
الفاتحة المقصودة حقت الوفاة، وهنا تحضرني نكتة الزول الجاء شال فاتحة مع أنصار سنة فقال ليو ماوردت. رد عليه نان إحراجك ده ورد وين.
حقيقة في حاجات محتاجة مننا نعرفه صاح وبما إننا لسنا من أهل العلم والدراية فكنا دوماً نبحث عن الصحيح عند المشايخ والوعاظ. المشكلة البلد إتملت وعاظ وستين ألف جهة دينية وأي زول رايو براو. نصدق ياتو؟
شئ يحير.
أحياناً تجد ماترتاح له عند الرمتالة.
والله جد.
المساطيل برضو ناس جو وعندهم دريباتم. ياخ الحياة دي سهلة وبسيطة والزول بعيشه مرة واحدة.
ليه الضيق والتنطع والتدجين (التدجين يعني شنو).
برضو في حتة كده دايرة فهم.. يقول ليك الحديث ده ضعيف لا يؤخذ به. طيب ليه مسمينو حديث من أصلو؟
أعتقد أن تأرجح المجتمع الحاصل نتاج عدم وقفوه على ركيزة ثابتة من القيم والأخلاق والرؤى الحياتية.
الدين وحده لا يكفي سادتي لإقامة دولة راشدة.
لربما تسبق الأخلاق الدين. فقد جاء النبي المعصوم ليتمم مكارم الأخلاق.
بينما ظللنا نتأسلم ونضيع القيم والأخلاق. وظهرت مصطلحات الإسلام السياسي والإسلاموفوبيا والفرقة الناجية والفرقة الضالة والطريقة التسعينية والشيخ المحايتو ببسي وال...........
واحد نصح صحبو أن يكلم للقبطي الغشاو القسيس بتاعو فكان أن خاطبه القسيس بجملتين (بقيت زي المسلمين تغش).
فرد القبطي للزول حقو.
نحتاج لإن نوجد أرضية مشتركة وفهم واحد يقودنا ومجتمعنا وفق منهج وسطي هادي ولطيف.
فايدة الدين والمتدينين شنو إذا ما علمنا أن نخفت صوتنا أمام الناس ونحترم سنهم ونراعي شعورم.
صديقي نصر الدين صوفي جميل حكى أنه أثناء ذهابه لزيارة الشيخ حمد النيل يوم الجمعة، في الطريق شاهد أنصار السنة يقيمون حلقةً ينددون فيها بالتصوف وأهله. وكان نصيبه عبارات على شاكلة (بلاي شوف الزول الأهبل ده ماشي الذكر قال. لو قعد في بيتم وذاكر لي أخواتو ما كان أحسن. ياضال. إندهش صحبي وأسرع بي مشيو لمن إتخارج).
وعربة البوليس تغفو قرب الموقع والعساكر شهود.
ياأخوانا.
الدين ده مارجالة.
|
