دعوه توثيق لمحجوب شريف

[عمار مكى عمر حسن]

طارق
كتر خيرك على المداخله
انا وانت وسودانيات كلنا لحام عشان الزول الجميل دا
تسلم

[خضر حسين خليل]

أموت ألف مرة
ولا يموت
لحظةً ضميري

[خضر حسين خليل]

طريق الشعب
كل حلم بداهو
بتم
وتطلع من شقوق الارض
آلاف المدن طاعمات

[عبد الجليل سليمان]

عَشّه .. كلّمينا
ميرى.. ذكّرينا
كل سُنكى أحسن
يبقى ..مسطرينا
نحن شعب أسطى
يلا ..جيبو مونا
نبنى ..نبنى نبنى
مسرحاً..ونــــادى
مصنعــاً ..وبوسته
حرب لا لا لا لا
كبرى..استبــاليه
صالــه للثقــافــه
تســرح الغزاله
جنبها ...الزرافه
ركَ قمرى طار
قيره قيره قيره
نطَط الصغار
صفّق الترولى
طمّن ..القطار
حلقت ..وحلقت
حمامة المطار
كلّ طلقه..بينا
نحن تبقى وفره
سمسماً ..وبفره
سكراً وشاى
تترا سايكلين..
جاى وجاى وجاى
مافى حاجه ساى
كلّو عندو دِين
كلّو عندو راى
بور..وبورسودان
بارا.. والجنينه
عبرى ..ولاّ واو
حاجه مش كويسه
كلّ زول براو
هى سودانا بكره
من سودانا ناو
تكتب انت تقرا
تعرف السياسه
فى محل حراسه
حجرة الدراسه
تمشى انت تلقى
فى الضلمه..لمبه
ألف ضحكه حلوه
تسندك بجنبه
بى تمن طبنجه
أحسن الكمنجه
أحلى شكل منقه
أحسن الحليب
إيد .. وإيد وإيد
نزرع الجديد
غابة النشيد
إيد..وإيد وإيد
مافى بينا سيد
إيد..وإيد وإيد
نلحق البعيد
نحنه مش مرقنا
حته واحده جينا
جينا لى السرقنا
حقّنا..وعصينا
دمّنا..وعرقنا
ولّعوا الرتينا
عَشّه..كلّمينا
ميرى ..ذكّرينا
كلّ سنكى أحسن
يبقى ..مسطرينا

[عبد الجليل سليمان]

أم اليتامى



بين العمل والبيت


فصّد جبينها عرق.



أم اليتامى بكت
لمن حسابها فرق
ماهية تمشي السوق
مركب مصيرها غرق
حق اللبن والزيت
الكسرة والكراس
هم في عيونها برق
الما بحس ما بهم
والخان همومو سرق
هذا المرتب تب
ما بسدها الفرقة..
القعدة في المكتب
والإمضا في الورقة
العبرة في الخبرة
الأيدي لو تعمل
جرح الزمن ببرا
اتباصرت مكنة
ماكوكها يتقدّل
بين خيطها والإبرة
زي ما القلب ساساق
الخطوة ساساقة
وعيونها منتبهة
تباري زقزاقها
لا شك ولا شبهة
والسترة أشواقها
والشفع القصر
والدمعة رقراقة
يا حليل شريك العمر
الدنيا فراقة
اتيقنت أحسن
من تبقى نقناقة
شقشق مقص في ليل
نامت خلايق الله
طاير سُقد حلّق
في بيتها واتدلّى
تدّي الولاد بصة
وتجرب القصة
وتقلّب الحلة
جاهز عمل بكرة
أسأل تقاريرها
السرية والسمعة
هل ركلست يوماً
حتى ولو جمعة
مشكورة في المكتب
مستورة في الحِلة
رغم الشجن هبت
لم تعرف الذلة
ما فارقت سرباً
تتفهم الموقف
تستدرك العلة
ولم تعد أماً
مسكينة بتشفِّق
تفرتق وترتق
قُصاصة في إيدها
كالوردة بتبتِّق
ريانة منشرحة
هدِم قدِم يصبح
في لمحة كم طرحة
لا بد من تكية
لا بد من بكية
لا بد من غمدة
لا بد من سرحة
أنعم بها أماً
بين العمل والبيت
يا مرحىَ يا مرحىَ


محجوب شريف

[عبد الجليل سليمان]

تبتبا تبتبا تبتبا تبتب
باكر تعرف تقرا وتكتب
وياما ترتب
نحنا بنحلم وكم نتمنى
هي تحقق كل ما تحب
تبني حياتا الند بالند
اي مكانة وخانة تسد
هدهدا هدهد
كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تفكفك سيبا تلكلك عايزة تنطط
بكرة حترسم وياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب
افتح بابك آمن تب
زي ما النهر بيلقى مصب
اي حمامة بتلقى الحب
تلقى الورده الندى في الكم
تلقى حداها جناها الام
يرضع صافي حليب الحب
نقدل نحنا الجد والعم
تملا عيونا كهارب سد
باباً جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهد
اكتبي اكتبي الف المد
حمام وسلام وسعادة بجد
اكتبي اكتبي ياء المد
سرير وعصير وعبير ينشم
اكتبي اكتبي واو المد
حقول وعقول تقرا المجهول كتاب الغد
اكتبي علم وسلم
لا حد يئن لاتسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتبا تبتبا تبتب

محجوب شريف

[عبد الجليل سليمان]

ما تسألني كم تمن الغويشايه
بل جاوبني كم تمن الطمأنينة
هذه سيرة ذاتية لها
تلك الغويشايه
هجين الدبله و الخاتم
سلالة كم وكم حاجه
متل الستره وهاجه
بختم الدوله لا حوله
باوراقا الثبوتيه
صبحت في خبر كان
للي كانت ليها محتاجه
المسيكينه
ما تسألني كم تمن الغويشايه
بل جاوبني كم تمن الطمأنينة ?
دخري الحوبه للقمريه
حبة عيش و قشايه
غويشايه
تدسدس فيها و تخبي
يعلم الله بتربي
علي كل المهن طافت
من عين الفقر خافت
بس عين الصقر شافت
صقر لابس لبس حربي
وختم الدوله لا حوله
باوراقا الثبوتيه
في هنداما متخبي
صبحت في خبر كان
للي كانت بيها فرحانه
المسيكينه
ما تسألني كم تمن الغويشايه
بل جاوبني كم تمن الطمأنينة
غويشة مي و مريومه
تماما زي حمامايه
لم تعرف لها زوجا
ولم تعرف لها تومه
وحيده وجوه عشايه
= = = = = = = =
بتاتا لم تساسق
في الطريق العام
و لا في الحله قوقايه
و تب ما للتباهي
و لا لزوم القدله والزينه
هي المختوته لي يوما
المدسوسه للحفله
المحروسه من غفله
الموروثه في الخاطر
المخصوصه للممكن
يكون باكر
= = = = = = =
كتير الحمي تتسربل
مسام البيت
وتسكن في ضرا النومه
و كم تتعثر القومه
كتيرا ما
كتيرا ما
كتيرا ما
ككل الناس
تتم الناقصه بالمويه
و تبقي الستره عشايه
ما تسألني كم تمن الغويشايه
بل جاوبني كم تمن الطمأنينة
غويشايه
غويشة السترة والحوبه
ومن تعب التي ظلت
ترتق لالصبر توبا
تفتق وردة السترة
التبتق في بنياتا
وتعتق ذكري حبوبه
غويشايه
وفر من سكرا وشايا
وفر من كسرتا و زيتا
و كم من باقي ماهيه
يشيلا السوق كما هي
بلا سكة رفاهيه
ولا حتةقماشايه
تساسق مكتبا و بيتا
كما كل الافنديه
حبيبة فول وعيشايا
تساهر ابرتا و خيطا
مكنتا من زمن ياما
تحت الداما دواره
و كل زراره نواره
تفرهد في قماشايا
تخليهو القديم لنجي
يبقي المافي من مافي
و يبقي البلدي افرنجي
تقول للذله حاشايا
اما العبد باللاهي
فزوجا ليس باللاهي
قلبي الجمره واطئها
و ماني محلقا ساهي
و لا متملقا احدا
و لا متعلقا ابدا
باموال و لاجاه
طول العمر ماهيه
بقت حزمة معاشايه
اخيرا اصبحت ورقة
وما بتسد فرد فرقه
المنديل تمن طرقه
و الصقر ان وقع كتر
الباتابت عيب
ضرا و درقه
لذلك يا رضي نفسي
حزمت الامر من اول
ما بالخوف بنتحول
و لا بنجوع بنتسول
اكيد عمر الكلام اطول
قصير العمر لو طول
احب الكلمة لو حره
احب الستره لو مره
اعاف الشينه لو دره
احب العفه بت امي
حليب الستره في فمي
دبيب النمله في دمي
وكت تلقالا عيشايا
تجر جريا واباريها
و ما بتضل طريق الصف
للمخزن
و لم تأذن لنفسها
تنفرد بيها
ولم تأذن
ولم تحزن علي ذلك
و لم تحون
= = = = = =
و بعض البعض قد ذهبوا
الي من عنده ذهب
و بعض البعض قد مالوا
الي من عنده مال
و لكن من ستر حالو
يمين الله قد نهبوا
الا ما اشرف النمله
الاما اشرف النمله
و تبا للضمير
لمن يصير خمله
فيا لصاحكوميا
بختم الدوله لاحوله
باوراقا الثبوتيه
بكل ملابس الحمله
عمل عمله
عمل عمله
عمل عمله
عفيتك لو بقت سكر
وشاهي و زيت
عفيتك لو كسيت امك
صرفت روشتةالوالد
و راحت في إيجار البيت
واقول ياريت
اذا فرحتهم بالحق
اقول يا ريت
عفيتك .. لو ولكنك
دا ما منك
دا ما منك
دا من حال البلد ذاتا
حراباتا و حزازاتا
ناس السلطة ناساتا
ناس فوق و ناس تحت
تحت الارض اقرب لامواتا
ضاقت ولما استحكمت حلقاتا
ياللاسف ... كم من ولد فاتا
سهولا ، جبالا ، غاباتا
ونيلا جاري
في حزة مفازاتا
هديك لجة موانيها
و فوق رحمة سماواتا
ضاقت و لما استحكمت حلقاتا
كم من ولد فاتا ??

محجوب شريف

[عمار مكى عمر حسن]

عبد الجليل
شكرا على المساهمه
ومنتظرين المزيد
سلام

[عبد الجليل سليمان]

يا والدة يا مريم


ياوالدة يا مريم ... يا عامرة حنية


أنا عندي زيك كم ... يا طيبة النية


بشتاق وما بندم ... اتصبري شوية


يا والدة يا مريم


ما ني الوليد العاق ... لا خنتّ لا سراق


والعسكري الفراق ... بين قلبك الساساق


وبيني هو البندم ... والدايرو ما بنتم


يا والدة يا مريم


عارف حنانك ليّ راجيك تلوليني


دايماً تقيليني وفى العين تشيليني


ألقاه عز الليل قلبك يدفيني


ضلك عليَّ مشرور قيلت فى سنيني


أنا لو تعرفيني لو تعرفي الفيني


أنا كم بحبك كم


والعسكري الفراق بين قلبك الساساق


وبيني هو البندم ... والدايرو ما بنتم


يا والدة يا مريم


طول النهار والليل فى عيني شايلك شيل


لكني شادّي الحيل لا خوف عليَّ لا هم


هاك قلبي ليك منديل الدمعة لما تسيل


قشيها يا مريم


والعسكري الفراق بين قلبك الساساق


وبيني هو البندم ... والدايرو ما بنتم


يا والدة يا مريم
ما بركب السرجين وما ني زولاً شين
يا والدة دينك كم دين الوطن كمين
ما شفتي ود الزين الكان وحيد أمه
ماليلا كان العين قالولو ناسك كم
ورينا ناسك وين .. ورينا شان تسلم
العودو خاتي الشق ما قال وحاتك طق
تب ما وقف بين بين لى موتو اتقدم
قال أنا ما بجيب الشين أنا ما بجيب الشين
أنا لو سقوني الدم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
كم من حبيباً ليَّ كان مالي بينا دروب
ما ودع الحبان ما وسدوه الطوب
حي قولي ما حي ووب
حي قولي ما حي ووب
ما خلى ساعة الموت يمه السرج مقلوب
اتشتت الرصاص فى جسمو واتقسم
لاقاهو يتبسم والحولو حيله وكان
ريحة صباه تتشم
زي التقول يومداك يوم العرس يادوب
قال أنا ما بجيب الشين أنا لو سقوني الدم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
يمه السجن مليان رجالة ما بتنداس
الختو قبلي الساس والشالو هم الناس
والفات وليدن ليهو ما مسكو الكراس
ما سمعو يتكلم ما نحن عود الفاس
فرسان حمى وحراس فى الحارة نتحزم
عشم القدر ما كاس ما لاقى بيت يتلم
عشم الطواه الجوع المتعب المعدم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
ما تقولي شن سويت ما تبكي شن سويت
غير البطمن ناس بى همهم ساويت
فارس مع الفرسان حارس بلدنا البيت
أخواني علو السور أنا طوبة ما ختيت
ديل من زمن تاتيت لامن كتبتَّ قريت
عرقنا ياما يدر يمه اللبن والزيت
الكسرة والكراس لى قشة الكبريت
تقولي جيداً جيت راجع مع الفرسان
فايت الحدود واسيت
وتغني يا مريم لينا وتجري النم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
محجوب شريف

[سفيان بشير نابرى]

عمار مكى
والله الاشواق يا صاحبي شديده
كيفك ؟ والوحشه الوحشه يا صديق

طبعاً يا عمار كل ماجات فكرة التوثيق لعم محجوب
بشيل هم لانو جد جد أنا سفيان ده شخصياً عارف
ابسط حاجة اننا نمشي نفتش ونجيب القصائد الكتبه
عمنا محجوب ونحتفظ بيها ونحتفي بيها.
انا بفتكر انو التوثيق لعم محجوب نحنا كجيل وكشباب
لازم نتحقق منو بمعرفة شنو الخلي عم محجوب هو
عم محجوب وخلاهو الراجل النضيف والنزيه والسيرتو
وسريتو بيتفقوا عليها المختلفين معاهو قبل المتفقين معاهو
لازم نبحت ونبحت ونشوفوا طالما انو سوداني ومن بين بيوتنا
واهلنا شنو الخلاهو كده واضح وبسيط ونضيف وقلبو حنين
لانو نحنا عايزين من بحتنا ده يكون عندنا محجوب ومحجوب
ومحجوبين ومحجوبات .
عم محجوب ما شعر وبس ولا مواقف وبس ولا رد الجميل وبس
محجوب شريف حكاية لازم نعرف سرها ونطلقه للناس ولينا
عشان يكون عندنا محجوب طوالي .

معليش مشاركتي دي يمكن تكون شتره بس ده البفكر فيهو .

ارقد عافية
وتحياتي لك الصحاب بالبوست .

[عمار مكى عمر حسن]

المشاركة الأصلية كتبت بواسطة سفيان بشير نابرى

عمار مكى
والله الاشواق يا صاحبي شديده
كيفك ؟ والوحشه الوحشه يا صديق

طبعاً يا عمار كل ماجات فكرة التوثيق لعم محجوب
بشيل هم لانو جد جد أنا سفيان ده شخصياً عارف
ابسط حاجة اننا نمشي نفتش ونجيب القصائد الكتبه
عمنا محجوب ونحتفظ بيها ونحتفي بيها.
انا بفتكر انو التوثيق لعم محجوب نحنا كجيل وكشباب
لازم نتحقق منو بمعرفة شنو الخلي عم محجوب هو
عم محجوب وخلاهو الراجل النضيف والنزيه والسيرتو
وسريتو بيتفقوا عليها المختلفين معاهو قبل المتفقين معاهو
لازم نبحت ونبحت ونشوفوا طالما انو سوداني ومن بين بيوتنا
واهلنا شنو الخلاهو كده واضح وبسيط ونضيف وقلبو حنين
لانو نحنا عايزين من بحتنا ده يكون عندنا محجوب ومحجوب
ومحجوبين ومحجوبات .
عم محجوب ما شعر وبس ولا مواقف وبس ولا رد الجميل وبس
محجوب شريف حكاية لازم نعرف سرها ونطلقه للناس ولينا
عشان يكون عندنا محجوب طوالي .

معليش مشاركتي دي يمكن تكون شتره بس ده البفكر فيهو .

ارقد عافية
وتحياتي لك الصحاب بالبوست .

سفيان ياخ
والله مشتاقين
كلامك عز الصحه واضاءه كبيره وطريق لازم نمشيهو عشان عمنا محجوب والاجابه على اسئلتك هى البتوصلنا لاضاءات تانيه ونقاش تانى هو مطلوب بجانب التوثيق
منتظرك تانى

[عمار مكى عمر حسن]

مره كنا نتسامر فى منزل عمنا عوض عكليت بالثوره العاشره وهو رجل نقابى صلد وكان عمنا محجوب يقود الونسه بكاريزمته العجيبه وبتلقائيه كبيره حيث كان يلقى الشعر وغنى لنا مساجينك بلحن جميل واداء مفعم بالحركه مع اخرين لا اذكرهم وهم يرفعون ايديهم وينزلونها فى حركه ايقاعيه جميله تفاعلنا معها جميعا ثم قال لى هكذا كنا نغنيها فى السجن و بعد ذلك غنيت انا مساجينك بلحنها المعروف فقال لى عم محجوب صوتك جميل شيلا لحنا وغنيها فقلت له هذه تجربه كبيره ومقارنه مع قامه كبيره كمحمد الامين فقال الشعر ما حقى حق الشعب السودانى انا دورى يطلع وبعد ذاك الشعب السودانى يقيمو ويلحنو لو عاوز
بواصل