تركين

[azzam_farah]

فطوم
كيف حالِك؟ علِك طَيبة

تركين يعني شنو؟؟؟؟

التركين ده نتاج لإسْتخدام رشيد وود ناس لِلطاقة الشمسِية في وكِت البشر كانو بيعبِدو الشمِش في رقبتا..

شوفي يا سيتي.. التركين في الأول هو زاتو الميلوحة.. طَيِب.. بعملو كيف؟ بجيبو يا سيتي السمك الصُغار والأفضل سمك إسمو الصيري.. وحكمة ها الإخْتِيار إنو ما بحتاج تنضيف عفشه (بطن) تجيبي ها السمك وتغسيليهو أو ما تغسيليهو زي بعضو.. وتجيبي صفيحة -ده زمان- أو باغا زيت أبات 36 رطل ديك.. وتوفري المِلِح بِكِمِيات عائِلِية.. وشطة حمره نصيحة، يعني ما مدقوقة وبُهارات الدُقة (شمار ناشِف/كمون ناشِف/كسبرة ناشفة) تقومي تلخبِتي الشطة والبُهارات مع السمك وتصوطيهُم كَدي كَدي.. كَدي كَدي وتعرِكي زيييين.. بعد داك تخُتي طبقة مِلِح في الصفيحة أو الباغا وتخُتي فوقا السمك الصيري المَبَهَرْ.. وفوق السمك المَبَهَرْ تخُتي تاني طبقة مِلِح لامِن السمك يخْتفي.. وتكرِري ها العملِية لغاية ما تصلي قريب خشُم الصفيحة أو الباغا.. في الآخر تقومي تغتي الصفيحة أو الباغا.. اليوم التاني تجيبي ليكي قناية أو مُفراكا أو شيتًا تصوطي بيهو مَوجود الصفيحة أو الباغا.. التركين (الميلوحة) بتنجض في صيف السودان أب سُحائي داك في 4-7 أيام في الشِتا بِطَول شوِية.. المُهِم بتعرِفي نُجاض التركين أو مِن عدمو، بِاللون والطعم.. ببقى لونو بني أو رصاصي -حسب نوع السمك- والطعم بِكون خالي مِن الزفارا.. أهااا بعد ما التركين ينجض.. بتشيلي ليكي خمشة مِنو وتحِلي في موية ماسورة وتقومي تصفي ها المحلول.. الموية المصفية هي البتنْطبِخ.. تحمري بصل كتير في زيت.. تكشحي موية التركين في الزيت.. لامِن يغلي تتقِلي موية التركين بالدقيق.. بس

[ناصر يوسف]

أي تركين إلهي كوتوشكرون .. أو هكذا سمعتها يوماً ما في حي النزلة اليمانية بمدينة جده ..
يا كافي البلاء سكان العماره كللللهم مرقو من العماره وخاتين إيديهم في مناخيرهم ...
الشئ شنو .؟؟؟
دنااااقله يا رسول الله ... وكنت في زيارة لأصدقائي الدناقله ذاك اليوم ...وكانوا محتفلين بي ,,,, فشنو
قومي يا أم سلطان أمرقي المخصوص المدسوس في آخر ركن في البيت وكان مُغتغت ...
ونفضيه و ،،،، تركين الهناء والسرور
بالله الريحه السمحه دي مرقتكم يا عيال المصارين البيض ؟؟ ديل الناس الساكنين في العماره طبعاً .. بالله التقول بنبان .. مرقو كلللهم وسابوا العمارة
جلسنا وإستطعمنا بيد أننا لم نشبع بعد .. ياخي تركينكم ماموبااااالغه يا عزام .. ويستحق الكتبتو فيه فوق ده ...

في الحرب العراقية الكويتيه ديك ... ولما الجيش الأمريكي دخل الكويت عشان يحررها ... بيذكر لي واحد من أصدقائي بإنو بتو قالت ليه في عساكر أمريكان مارينز في الباب .. ولما مشي هو وسألهم عاوزين شنو .. رطنو معاه بالدنقلاويه وقالوا ليه: نحن سألنا وعرفنا بإنو في دناقله ساكنين هنا .. تركين في ؟؟؟ مارينز دناقلة أمريكان ...
ياخي التركين ده سرو باتع ياخ .... هسي جوعتونا ياخ

[azzam_farah]

طارِق صِديق كانديك
كيف حالك؟ علك طَيِب

اذ كيف أصبر على مالم أعرف له خُبراً - لولا ذلك - لقلت أن هذه التحفة تدعوك طوعاً لتناول هذا الموصوف

أنْبأتُكَ بِتَأْوِيلِ مَا لَمْ تَسْتَطِع عَّلَيْهِ صَبْرًا

[azzam_farah]

أميري
كيف حالك؟ علك طَيِب

وأستجرت بجوار التركين

إذن لقد أَوَيتُ إِلَى رُكْنٍ شَدِيدٍ

[azzam_farah]

الرشيد ود عم إسْماعين
كيف حالك؟ علك طَيِب

الأوّل :إنّك استمتعت بالتركين ولحست بعذبتك أناملك..
والتاني :إنّك شبعت وما كنت داير تشبع.

أقنعت ليك بناتي مِن بت إبراهيم الغَير ناطِقة بِها، إنو أكل التركين بخلي الشعر ما يِطْوَل، وقُلت للأولاد إنو بِسبِب هشاشة العِظام.. بِت إبراهيم حاولت معاها بِذِكر كُل الأمراض المُسْتَوْطِنة جنوب الصحراء الكُبرى، مفيش فايدة، بتاكُل معاي التقول إتْوَلدت في نواحي صاي

- والله سويتي ها التركين بطريقة سمحا خلاس يا بِت إبراهيم
- إن شاءالله ينفعك يا ضُلي
- عِلا عيبو الزحمة
- سجمي يا راجِل.. الزحمة وين هسِع.. نِحْنا برانا دحين؟
- برضو كُتار
- أجييي.. علَو دايِر تاكُل براك؟!
(صمت مُطْبق)

المُهِم في حديثا الفوق ده رفعت لِمقام فمي كام لهمات كَدي.. ده برضو كَسب

[azzam_farah]

Sana Mursi
كيف حالِك؟ علِك طَيبة

نسابتي من غير الناطقين لكن بيحبوا التركيب حبا جما
جهجهت يومي الله يسامحك

ما كان مِن الحكمة تخلي نسابتك يِحِبو التركين.. المُهِم وطالما إنو الحصل حصل، حقو تنْتقِلي لِلخُطة [ب] الفحواها نشر أكاذيب حَول صلاحِية أكل التركين مِن الناحِية الصحِية ولو في نسيب مِن نسابتك عِكْليت ونفى ها المعلومات لِكَوْنو طبيب، إشْتغِلي في جُزئِية عدم إنسانِية صَيد السمك الصيري المُسْتخدم في عمل التركين، وطبعًا ها الإسْتخدام غَير الرشيد في صَيد أسماك الصيري، مُمْكِن جِدًا يؤدي إلى فناء جنس وده بِدورو بؤدي إلى إخْتِلال بيئي و...و...و.. ولو واصِل ها النسيب عكْلتو.. حاربي الله واحد.. اليِدخل الناس عليكي ما يِدخِلو.. بِناقِص نسيب ياخ.. المُهِم حاولي قدر ما تقدري على الأقل تقلِلي نسبة تواجُد نسابتك حَول التركين

[azzam_farah]

جيجي
حسن سادة

كيف حالكُم؟ علكُمْ طَيْبين

شُكرًا على المُرور (والله لو عشمانين أقول ليكُم إتفضلو معاي تركين.. تكونو بتْبالغو)

[حسن سادة]

ولجت إليك أيها العزام من كلون باب دون أن أطرقه
وركضت إليك لاهثاً حينما إنبعثت روائح التركين
وكادت أن تخترق سعف العرش المهترئ وهي تتصاعد
وهي تلتوي كحية رقطاء وشممت رائحة البصل والدكة بأنففي
فكانت أذكى من القرنفل فقلت مغرداً:

" يا بصل رايق مصفّى
يا تركين مليانة شطة
فيه شفاء للناس
ونحن بالقليل منك بنشفى
يا بصل
وساقتني قدماي إلى شجيرة الليمون التي
إنتصبت في منتصف صحن الدار ولكنني لم أجد الكوز الأبيض الذي كان
يتدلى بين أغصان الشجيرة ولم أجد الزير الذي كان كالسبيل والسلسبيل
ولم أجد تلكم الحسناء ذات الدل والدلال التي كانت تبسم لي فتضحك الدنيا
بأسرها فكنت أقول لأصيحابي:
" جقجكن أوي سكونا قُر سَمرود فقوسنا
إرن جقجقا قرين غير أوقون قُركجن غير
أوسكل إكا تيرمينا "
أي
" عندما تتفجر تلكم الحسناء بالبسمة الوضيئة
تهطل الأمطار مدراراً ويجود علينا الغيث
فتخضر الأرض المقفرة وتورق الأزاهير
أسأل الله أن تدوم هذه البسمة النقية التي ترتسم
على شفتيك دوماً وأن لا يصبك مكروه ولا أذى "
ولكنني تسمرت واجماً والحسرة تعصرني عندما إفتقدت
هذه الحسناء التي برحت البلد وهاجرت لمدن بعيدة مشتتة:
"شورتن فَلتي ووا دب توسافي نهار قرقيد أيين إكا نميني
جقتن بدا كونج فييافي بسفيك أن فنميني
تيكيق كوتكيق نيركيق فكيكيق ووا بالنا فموني
شورت إدن كوقوسوك إن مقوكن منا تجويا
وللا مسوبانقوسيد إرقدا إن جُوسيدولاك جُويا "
أي
ما أتعسه ذلك اليوم المنحوس الذي لا أمتع فيه ناظري برؤيتك البهية
يوم أن أن لا أرى ذات البسمة الرنانة والوجه الطفولي البشوش
ويقيني أيتها الحسناء أنك لا تبرحين بالي قيد أنملة
في الطيف والصحيان
قولي لي ما عساي أن أفعل
عندما تتركين هذه الروح التي إندمجت بروحك
وتبرحين بعد أن كنا روح واحدة في جسدين
أم ترى أهاجر إليك أينما كنت تماماً كما يفعل المجانين

أستاذي عزام
هل أتاك حديث عشقي لساحتك هذه إلى حد الجنون
(وتكييا أدوري وتكيا إم توري
أي فكن ديل أي أدوري )

معذرة للمنتدين من الجالية العربية
إذ أعجمت لساني
وإن لم تفقهوا قولي

[azzam_farah]

Nour
كيف حالِك؟ علِك طَيبة

في سوق بحري مطعم بعمل احلي تركين

بتْصدِقي يا "نور" إنو التركين بقى -مؤخرًا- بتْرحل مِن مُسْتوطناتنا (الكلاكلات/الشجرة/العُزوزاب/الحاج يوسُف/الدروشاب) إلى الشِمالِية! القُرى في الشِمالِية هِناك بِقَتْ أطلال حِليلا.. مفيش حد يصْطاد.. الخوف إنو مع تقادُم الزمن يصبِح التركين أكله شعبِية في العاصِمة وده مُش حلو علشانا!

[بدر الطائف]

صديقى وجارى محمد جميل والدته الله يطراها بالخير كان عندها برنامج ثابت كل جمعة بتعمل الفطورتركين .
محمد ونحن صغار كان لما يتشبك ليهو مع واحد فى مشلكة طوالى يقوم يقول ليهو امشى ياعفن يا بتاع التركين ونقعد نضحك عليهو.لغاية ما جاء يوم واكلت فيهو التركين يا سلام ياعزام.
بقينا نزاحم الناس فى عيشتهم ياخ .

[azzam_farah]

سمراء
كيف حالِك؟ علِك طَيبة

اسع الزول يقول ليك شنو فى الحالة دى !

طالما أنا هسِع باكُل في تركين.. أُفضِل إنو تسلمي وما تقرِبي نوهائي مِن مُحيط صحن تركيني.. مُش شرط إنو كُل البِسلِم يِقولو ليهو إتْفضل.. ماف علاقة بين [السلام عليكُم] وبين [إتْفضلي].. السلام علَيكُم "كلمة" وعلَيكُم السلام "غُطاها"
ـــــــــــــــــــــــ

بس عموما ربنا حايدخلك اول الشى النار ، وبعدين الجنة ..عارف ليه ؟

عندي نص في شأن "الجنة" والنار" كتبتو عن وضعي مع "فلانة" كَدي أقريهو:

- إنت عارِف أنا لو خيروني ما دايِر جنة ...
- والله جِبت كلام ... أها دايِر شنو إنشاءالله ؟
- داير الله يوم القِيامة يخليني في الأرض معاها برانا ... نبقى آدم وحواء مِن جديد ...
- إستغفر يا زول !!
- خلاص مرقتني مِن مِلة مُحمد ... أنا قُلت شنو ... كدي عَيِب لي كلامي ...
- لكِن في الجنة ما مُمكِن يكون عندك مِتِلا عشرات ... مِئات ...
- في الجنة بتكون إنسان تم تدويرِهِ ... تم إعادة تصنيعِهِ ... إنسان بِمُواصفات تانِية ... مُواصفات ومقاييس لِحياة تانِية .... أنا عاوِزا بِكُل تناقُضاتِها الفيها ... دايِرا إنسان... دايِرا يا زول ...

تفَرح ... تسَرح ... تجَرح ...
تتكبر ... تتشبر ... تتصبر ...
تِتفاجا ... تِتناجا ... تتشاجا ...
تِنْدهِش ... تِتْرعِش ... تِتْرمِش ...
تَـجـفـا ... تَـعـفـا ... تَـلـفـا ...
تدمِع ... تسمِع ... تجمِع ...
تِتْنهد ... تِتْعهد ... تِتْشهد ...
تَنسى ... تَقسى ... تَمسى ...
تهْمِل ... تعْمِل ... تشْمِل ...

إنت عارِف ... مرات الله لما بيرضى عن خلقو يقوم يِجازيهُم ويِغرِس بينُم الزَيها ... وتبقى ليهُم مصفوفة ... تبقى بيها دُنياهُم مُلَونة ... دُنيا مُزركشة بِدانتيل أبَيض ... دُنيا نضوق فيها البْشمْ ... ونشِمْ البِتْحسْ ... ونشوف البِتْسمِع ... ونسمع البِنْشاف ... ونعيش كُل الأشياء المُذهِلة ... نعيش تحليق الطِيور ... تمَوجات البحور ... وندور مع الفي المجرة بِدور ...

- ما قالو هي جات الدَوحة ... إتصلت بيك ؟
- وتتصل ليه ... جات وأدت المِهِمة المطلوبة مِنا ... أحَيت المات فينا ... سقت صحارينا ...

هلت وخلت سمحه دَوحتنا تِتلالا ...
مَش كِفاية كُنا يا صاح فوق بالا ...
قُلت ليه قالو قالت : بس كده لالا ...

لو كُنت قابلتها ... كُنت يا ربي حأتصرف كيف ... معقول كُنت حأقدر أسلِم عليها ... أمسِك إديها كُنت حأقدر أعايِن في عينيها ... والله والله أنا هسي برجِف لما إتخَيلت إنو مُمكِن كان يحصل ده ...
- إنت بِتبالِغ شَويتين ما ناس كُتار لاقوها ... حصل شنو ؟
- ما ناس كُتار لِقُم رُسل الله ... الآمن فيهُم قُلال ... وفي القُلال الإصطفاه الرسول قليل ... وفي القليل تَولى إتنين تلاتة ... وفي ديل كمان مسك واحِد ... الناس اللاقوها ... ناس طبِعِيين الله رسل ليهُم < فُلانة > الطبيعِية ... المُتجرِدة ... المُستطاعة ... المُطاقة ... الفي وِسعِهِم ... حسب قُدرتِهِم ... أنا لما أشوف < فُلانة > بشوف النفخة الربانِية الفيها ... < ... وَنَفَخْتُ فِيهِ مِن رُّوحِي ... > الحِجر 29

أنا ما بدعي إني ولي مِن أولِياء الله الصالِحين ... بس كمان أنا ما أسوأ مِن السامِري الشاف الملاك وشال أتروا سوا بيهو العِجل الليهو خواء ... الملاك ده ما نزل وكُل الناس قاعدين ما شافوهو ليه كانو أسوأ مِن السامِري ... السامِري كان أحسن ... الحِكاية ما كِده ... الحِكاية إنو الله دايِر كِده ...

ـــــــــــــــــــــــــــــ

ونهجم على التركين هجمة اسد على فريسة !! رغم انو التركين ماكنا بنحبو

ده خوفي.. وإلْتِياعي.. هذا الهجوم غَير الرشيد وإستخدام القُوة غَير المُبرر. هذا ما كُنت أتحدث عنهُ سَيِدتي الفاضِلة
ـــــــــــــــــــــــــــ

طبعا التركين حلو لمن ماتاكلو فى بيتكم ! ماعارفة السر شنو ؟

في أغلب الأحوال، بتضمني عدم التَغَوُل

[azzam_farah]

ناصِر يوسُف
كيف حالك؟ علك طَيِب

هسي جوعتونا ياخ

مهما قلت ما تِتْوقع مني أي دعَوة.. دايِر خروف بضبوحو ليك.. تطلُب تركين بفتح فيك بلاغ جنائي "الأذى الجسيم" تكتِر بحولو "الشروع في القتل".. قال جوعتونا قال

[زاهر صديق الطيب]

أستاذ عزام ..
الله يديك العافية ياخ ..
موضوع (شهي ) زكرتنا أيام حلفا ( مصنع السكر )
رغم إني من غير الناطقين بها علي قولك .. لكن عندي
غرام شديد مع ( التركين ) حتي ممكن تسألو
فياخي عليك الله ماتصنفني مع الجماعة الذين يجب
تطفيشهم من ( التركين ) حتي لا تحرمني من هذا الغرام ..

[azzam_farah]

حسن سادة
كيف حالك؟ علك طَيب

" يا بصل رايق مصفّى
يا تركين مليانة شطة
فيه شفاء للناس
ونحن بالقليل منك بنشفى
يا بصل

والله يِلِمْ فيك "عبدالعزيز المُبارك" عِلا يِسَود خَتَوتك.. يا زول الما شافك في محكمة الحقوق الفكرِية ما كضب

ــــــــــــــــــــــــ

" جقجكن أوي سكونا قُر سَمرود فقوسنا
إرن جقجقا قرين غير أوقون قُركجن غير
أوسكل إكا تيرمينا "

عليك الله ما تترجم الكلام الفوق ده.. ما تكْتُلنا في ها اللُغة.. كِفاية الحصل في التركين ياخ.. إسْتبوحوهو إسْتِباح ها المُسْتعرِبة

[azzam_farah]

بدر الطائف
كيف حالك؟ علك طَيِب

بقينا نزاحم الناس فى عيشتهم ياخ

ده الكُنت خايِف منو! لا حَول ولا قُوة إلا بِالله العلي العظيم.. اللُهم لا نسألُك رد القضاء بل نسألُك اللُطْف فيه.. الأمل الباقي إنك تقتنِع إنو الأملاح الموجود في التركين بِإهْمال، مُش كويسة لِجِسم الإنسان.. وكِده