هل المعارضة الحالية تخدم السودان؟!!

[محمد زين]

تراشق بالكلمات..اتهامات و "فليق بالحجّار"..ذلك الوزير "حرامي"..مقال في جريدة..خصومة وليس نقد..أي شئ لتسقط الحكومة ولكن ليس لنصلح السودان أولاً..

هناك حقيقة..توجد انتخابات على الطريق..ولو سمحتم لي لا أجد بين كل ما أجده على الساحة مقنعاً..نفس الوجوه..وأفكار تجاوزت السبعين كعمر أصحابها..ورؤساء أحزاب يظنون أن الناس ما زالوا بسذاجة العهد الأول.


خذوني على "قد عقلي" البسيط..وقولوا لي..

هل المعارضة الحالية تخدم السودان؟ أم هي معاداة للحكومة فقط. يسقط النظام..هذا هو الهدف الأول والأخير..






تسجيل موقف:

إلى إشعار آخر أنا معارض للمعارضة السودانية.

[omrashid]

يا ود الزين اب كلاما زين

جيتنا بالمفيد

وبيني بينك كدا انا لمن اشوف العمم والجلاليب اياها واليافطات في دور الاحزاب بيحصل لي دبرشن

تصور ياهم زاتهم وكل واحد يحمل مسئوليه البلد علي الاخر واجارك الله ناس ما عايزه تقرا ولا تفهم
وكلامي دا لي كل المعارضه بكل الوان الطيف
تسجيل موقف
انا معارضه ضد الحكومه والمعارضه

ولك الله يا وطني

[أحمد يوسف حمد النيل]

عزيزي ود الزين
حالك زين
و حال السودان كمان زين

تعرف يا ود الزين "الهنتر" و "الكومر" و" اللوري الداوودي" و " بصات ابورجيلة" و " اللاندروبل القديم" ديل ناس المعارضة. لسه ملككين في الطين و الحالة صعبة , أخير منها عيشة السوق , و أخير منها العرس "ثاني" . ديل مش مدة صلاحيتهم انتهت ديل حتى الفكر العالمي لو حاول يعمل متحف عقول حيلقاه في السودان. شركات الهوستن و الكومر و اللاندروبل كلها ما عارفنها حية ولا ميته و أظنهم لو دايرين عربات للمتحف العالمي بلقوها هنا.

ليسو بحاجة لهؤلاء ان لم يتماهو مع الشباب ولكنني ارى تنحيهم , لأنهم بفكرية صلبة يأخذون حياتهم و حياة غيرهم. وما زال الشباب واقف يتاوق من صلفهم و عنجهيتهم وتكبرهم في الفاضي وحجرهم عقول الشباب, ديل لا يمثلوا آباء و لا قدوة لأبنائهم , فكيف بالله يتعاملون مع اسرهم .فنحن نكر القديم الذي لا يتطور

تحياتي ابو سارة

[محمد زين]

العزيزة ام راشد تحياتي

يعني الانتخابات دي برضو جايننا يا هم زاتم؟


أحمد يوسف
والله انت احلى زول

الهنتر والوكومر وباصات أبو رجيلة الله يحلنا منهم ساكت.

بالمناسبة يوسف وحمد النيل دي كلهم أهلنا + الريح ودفع الله وأبو عاقلة و....

عرفت قبيلتنا؟

[أحمد يوسف حمد النيل]

مرحب بيك ود الزين
يا حلو و زين
كسبنا واحد كدا للعركين
و لا ما كدا يا ود الزين
و اسمك اسم جزيرتنا الحلوة

ابواتنا اليعقوباب
أعراكنا أهل الباب

انت عركي أصلي ولا تقليد؟
و ما تكون من ناس الهنتر و الكومر والذي منه.

[محمد زين]

المشاركة الأصلية كتبت بواسطة أحمد يوسف حمد النيل

مرحب بيك ود الزين
يا حلو و زين
كسبنا واحد كدا للعركين
و لا ما كدا يا ود الزين
و اسمك اسم جزيرتنا الحلوة

ابواتنا اليعقوباب
أعراكنا أهل الباب

انت عركي أصلي ولا تقليد؟
و ما تكون من ناس الهنتر و الكومر والذي منه.

ياهو زااتو

ظني كان في محلو يا ود الشيوخ.

:::
فاتني أن أذكر أني غيرت اسمي رسمياً ولكن ما زال "ودالزين"

فتك بعافية يا أحمد ود يوسف ود حمد النيل العركي (ود عمّي)

[طارق مصطفى]

تحياتي أخ محمد زين ..

حديثك لامس الحقيقة ..

ولكن فلنبتعد عن القياس الشمولي ..

فهناك العديد من التيارات التنويرية والتجديدية قد برزت على السطح ..

فلنشجعهم ..!!!!!

ودمتم بخير

[Sultan]

المشاركة الأصلية كتبت بواسطة محمد زين

تراشق بالكلمات..اتهامات و "فليق بالحجّار"..ذلك الوزير "حرامي"..مقال في جريدة..خصومة وليس نقد..أي شئ لتسقط الحكومة ولكن ليس لنصلح السودان أولاً..

هناك حقيقة..توجد انتخابات على الطريق..ولو سمحتم لي لا أجد بين كل ما أجده على الساحة مقنعاً..نفس الوجوه..وأفكار تجاوزت السبعين كعمر أصحابها..ورؤساء أحزاب يظنون أن الناس ما زالوا بسذاجة العهد الأول.


خذوني على "قد عقلي" البسيط..وقولوا لي..

هل المعارضة الحالية تخدم السودان؟ أم هي معاداة للحكومة فقط. يسقط النظام..هذا هو الهدف الأول والأخير..






تسجيل موقف:

إلى إشعار آخر أنا معارض للمعارضة السودانية.

محمد زين

عارض من تشاء – الأهم - تحديد موقف واضح وصريح من القضايا العامة ذات الصلة بإصلاح الوطن


تحياتي