محن سودانية 53 (عتود البرم) ..

[imported_شوقي بدري]

هذه الايام نمر بمحن المحن ، قديما في السودان كنا نقول الزول ده بيهضرب زي الراميه جمل ، البشير وحكومة السودان ، يصرحون ويقومون بأعمال يستعجب منها إبليس.
لم نسمع أبدا بحكومة دخلت في شكلة مع إذاعة . الحكومات المحترمة تتجنب مواجهات مع منظمات أو هيئات . وإذا كان عند حكومة السودان مشكلة مع الحكومة البريطانية فلماذا اقحام البي بي سي التي هي منظمة مستقلة من الحكومة . وليس هنالك حكومة متألمة من ال بي بي سي كالحكومة البريطانية وال بي بي سي متخصصة في شواء الحكومة البريطانية .
ومشكلة المعدات التي ادخلت بطريقة غير قانونية بواسطة ال بي بي سي إلي السودان لها سنتين . ولقد حسمت واعتذرت ال بي بي سي . ولكن يبدو ان الوزير الجديد يبحث عن بطولات وقد اضحك علينا العالم .
مستر مبارك (الشيوعي الآبق) والذي يمثل حكومة الانقاذ كملحق في لندن بدون مناسبة يبدأ يتحدث عن وقوف الحكومة البريطانية مع أعداء السودان والمتمردين علي الحكومة . بكل بساطة وضع سيادته المناضلين والشرفاء ومعارضي حكومة الانقاذ في خانة أعداء السودان . نشكره لأنه لم يصفنا بالخارجين عن الملة . والذين سينتهون في نار جهنم وبئس المصير .
البشير كالغريق لا يتمسك فقط بقشة بل يتمسك بأي شيء حتى بذبد البحر . ولهذا فتح موضوع دكتور علي الحاج حتى يحمله بعض مسئولية دارفور .
هذه ليست محنة بل هذه مسخرة . السؤال ليس هو هل أكل دكتور علي قروش السكر أم لم يأكلها . السؤال لماذا أدخل دكتور علي في السكر ؟ مما نحن صغار بنسمع وبنغني :
واحد اتنين سرجي مرجي . انت حكيم ولا تمرجي .
أنا حكيم بداوي الناس . من الحمة ووجع الراس.
العيان بديه حقنة . والجعان بديه لقمة.
يا عالم بلد متخلف تفتك به الأمراض يحتاج لأي داية أو بصير . ودكتور إخصائي دفعت عليه البلد دم قلبها . يشتغل في تجارة تغيير العدة "أديني كفتيرة أديك رطلين سكر" بمعني اعطني سكر اعطيك شارعا .
في الخمسينات كان للاستاذ ميسرة السراج سيارة تجوب العاصمة ونسمع بالمايكرفون : أعطني قرشا أعطيك مسرحا .
عندما أتت المنظمات العالمية في بداية الانقاذ وسألوا المسجونين السياسين عن احتياجاتهم . قال لهم الدكتور خالد الكد رحمة الله عليه : هذا هو السؤال الخطأ السؤال هو لماذا نحن هنا ؟ .
السؤال الآن ، السودان من أكبر الدول العالمية مساحة ويمكن أعرق حضارة في العالم . هل السودان ده انقاية ولا مترة ؟ عشان يخلوا فرد واحد من أمثال علي الحاج يتصرف في مصائر الآخرين .والسكر ده لمن أدوه لي دكتور علي الحاج ختاه في دحلوب ؟ ولا عباه في كباكا ؟
علي الحاج ده مش سيد القصر العشوائي في فترة الديمقراطية ؟ والذي اوصل الكهرباء لمنزله من الجامع لأن كهرباء الجامع مجانية ؟
ألم يستورد الأسمدة الفاسدة لحكومة الصادق المهدي ؟
وهاجمته الصحف إلا أنه كان محميا بالترابي الذي كان ولا يزال يتحكم في الصادق المهدي .
ان صلة علي الحاج بالسكر وبناء الطرق مثل صلتي أنا بجراحة الأعصاب . ولماذا يقبل علي الحاج السياسي والزعيم والاخصائي بمهمة إعمار وإنشاء ؟ .
البشير يحب أن يصرف الأنظار عن مشكلة دارفور ، وتفسيره واتهامه هذا زي عتود البرم ، كان ضبوحوه ما بيزيل قرم وكان خلوه ما بعشر غنم .
منذ أن بدأت مشكلة المحكمة الجنائية البشير بقي زي الولد الخواف في مدرسة الشرامة لازم يدي حق الفطور عشان ما ياخد علقة .
جاب المصريين واكرمهم وصرف ليهم عربات . واتنازل لي مبارك عن حلايب . قاشر الافارقة بخصوص مياه النيل ووقف مع مصر . مسح جوخ للقذافي . دفع لي شاد . وأرسل مساعدات . ونسي موضوع طوكر بالرغم من الفيضانات والغرق والموت والجوع وكأن "توكر" ليست جزءا من السودان .
أرسل الولد مصطفي عثمان الي لبنان بمساعدات ومستشفيات متحركة . يرسل مساعدات وفلوس هبطرش للفلسطينيين . والمأكولات والفاكهة المعروضة في شوارع غزة ، الأغنياء في السودان عايزين درس عصر عشان يعرفوا أنواعها وأسماءها .
دي كلها جرسة . قالوا المافيه فايدة لي أهله ما فيه فايدة لي غيره .
طيب دارفور دي اصلو البشير مقاشرها وقال فيها مالم يقله مالك في الخمر . طيب شندي دي ما بلد البشير ، أهلو جعانين وغرقانين وقاعدين في الصقيعة . لماذا ترسل المساعدات لي باكستان ؟
باكستان دولة نووية ؟ أكرر .. دولة نووية. يعني تمتلك طاقة نووية ولديها قنابل ذرية.
متي ساعدت باكستان السودان ؟ وهل هنالك دولة في هذا العالم تمر بظروف أسوأ من السودان . فحتي رواندا قد انتعشت وانشأت فيها المدارس والجامعات والآن تمر بانتخابات ديمقراطية .
هذه محن المحن .

[imported_سمراء]

والله دى محنة المحن ياعمو شوقى !!
غايتو نقول شنو بس
سياسات غريبة ماتعرف الناس عاوذة تصل بالظبط لـ شنو ؟
بعدين على رغيفة ده كرت محروق من يومو الاول ، يعنى بقى كان تكوهو وضبحوهو مابفرق
حتى على اهلو مافارق ..خلاص !
بس حكاية عاوذين يدقونى ، انا مابدقه براى ..دى شينة والله

[imported_فيصل سعد]

سلام استاذنا شوقي،
رمضان كريم ، تصوموا
و تفطروا على خير ..

انا في انتظار الرد على الرسالة
الاخيرة بخصوص اهل بيت المال ..

اطيب التحايا و الاحترام
و التقدير ..

[imported_Hassan Farah]

سلام عليك اخى شوقى --رمضان كريم وكل عام وانتم بخير --
والله صدقت يا اخى-- الما فيهو فايدة لى اهلو ما فيهو فايدة للغريب حاجات تجنن والله-- قبل فترة طوكر اكتسحتها السيول-- بعدها شندى وبالامس معتمدية السلام بالنيل الابيض- الالاف من مواطنينا- فقدوا كل شئ--ينامون فى العراء والحكومة عجزت ان تمدهم حتى بالخيام-فى طوكر هناك العشرات من الموتى--يطلعلك معتمد السلام ويصرح ان الكارثة اكبر من امكانياتنا--طيب الفلقسة والمكابرة لزومها شنو---
الحكومة تصرح انها سوف تسير جسر جوى لباكستان-- شئ عجيب يجنن عديل--يعنى باكستان دى حتتقاسم معهم اسرارها النووية او حتتوسط ليهم لدى الامريكان!!!!

[بابكر مخير]

بعض مرات تكون تسمع في سمفونية وإتا سايح عديل،
يقوم حمار يهنق ويدخل صوتهو وسط الموسيقى عنوة،
ينسف ليك أبو اللذة في التمتع والتمتع بتلذذ ظاتهو....
حشر الاسماء لمراضاة الامزجة وإفراح القراء،،،
ببقآ ذي صوت الحمار وسط المعزوفة...

[imported_بدر الدين اسحاق احمد]

المشاركة الأصلية كتبت بواسطة بابكر مخير

بعض مرات تكون تسمع في سمفونية وإتا سايح عديل،
يقوم حمار يهنق ويدخل صوتهو وسط الموسيقى عنوة،
ينسف ليك أبو اللذة في التمتع والتمتع بتلذذ ظاتهو....
حشر الاسماء لمراضاة الامزجة وإفراح القراء،،،
ببقآ ذي صوت الحمار وسط المعزوفة...

كتب العم شوقى بدرى ...

أرسل الولد مصطفي عثمان


اقـول بعد السلام ..

رمضان كريــم ..

د. مصطفى عثمان اسماعيل يبلغ من العمر ( 55 ) عامــا وهو طبيب متخصص

ثم وزير خارجيــة السودان لاكثر من ( 6 ) سنوات

هــل مــن العــدل فى الكتابــة ان يقال عليــه ( الــولد ) مصطفى عثمان ؟

ثم تأكــد بمعرفتى الشخصية لــه انــه لــن يقول لــك حين الخطاب الا بالـ ( عــم شوقــى )


عشــان يظــل الابناء يوقرون الاباء مهمــا كانــت القضية والرأى حولهــا ( اكتب هذا )

_______________________


شوف جملة صغيرة افســدت مقال موضوعــى يثير اسئلة استفهامية جديرة بالنقاش ..

[imported_خالد الحاج]

المشاركة الأصلية كتبت بواسطة بدر الدين اسحاق احمد

كتب العم شوقى بدرى ...

أرسل الولد مصطفي عثمان


اقـول بعد السلام ..

رمضان كريــم ..

د. مصطفى عثمان اسماعيل يبلغ من العمر ( 55 ) عامــا وهو طبيب متخصص

ثم وزير خارجيــة السودان لاكثر من ( 6 ) سنوات

هــل مــن العــدل فى الكتابــة ان يقال عليــه ( الــولد ) مصطفى عثمان ؟

ثم تأكــد بمعرفتى الشخصية لــه انــه لــن يقول لــك حين الخطاب الا بالـ ( عــم شوقــى )


عشــان يظــل الابناء يوقرون الاباء مهمــا كانــت القضية والرأى حولهــا ( اكتب هذا )

_______________________


شوف جملة صغيرة افســدت مقال موضوعــى يثير اسئلة استفهامية جديرة بالنقاش ..

الحبيب بدر الدين
كل سنة وانت طيب يا أخي والأسرة الحبيبة .

هل سمعت يا بدر الدين بقصة سفير أسبق للسودان في هولندا "لبع " قروش السفارة ولعب بيها القمار؟
مش كده وبس الراجل قصر رقبتنا واستدان من كل السفراء العرب تقريبا حتى صار اسمه (السفير الشحاذ) ؟؟!!
القصة حصلت في عهد من اسماه شوقي ب "الولد" . أي والله ..
وقد طرح الأمر بتفاصيله علي وزير خارجيتنا حينها لكن "الراجل كان صاحبو" ؟ شفت كيف ..
هذا المصطفي عثمان شخص غير جدير بأي منصب يوكل إليه وقد شاهدت له عدة مؤتمرات صحفية كان فيها لسانه يفلت بأقوال تسيء للعديدين آخرها عندما أساء الرجل لكل السودانيين وقامت الدنيا ولم تقعد .
كلمة "ولد" ولا أدافع عن شوقي هنا تعبر عن "قصر القامة" عن مناصب شغلها قبله فطاحلة وما تركوا إلا سيرة زكية طيبة .

[imported_قرقاش]

ناس مابيعجبكم العجب ..ولا الصيام فى رجب ...
عليكم الله خلال الشهر الفات بس مش افتتحوا اضخم مجمعين اسلامين فى افريقيا والشرق الاوسط ...الاول فى كافورى ...وتعالوا شوفوا الناس العمرهم ماشافوا مكيف هوا ح يتبطحوا اليله هناك كيف بعد صلاه الظهر ..
والتانى حق مولانا عبد الحى فى جبره ...يازول برد والله لمن الحيطه منديه من بره ...وكلهم منح من بره كم ديشليون كده ماعارف والله ..اها هسه دى مابراه نعمه ..اقصد الناس الحترتاح بعد صلاه الضهر لى قريب الفطور ينوموا فى الميكفات دى دى مانعمه ..
فاضل كمان تقولوا لينا المدارس الاوليه ماعندهاكراسى ولا كنب ولا بيبان ..ولا الجامعات فيها معامل ..غايتوا جنس فلقصه ..الله يهديكم بس ..

[imported_محمد حمد العامري]

(عتود البرم ، كان ضبوحوه ما بيزيل قرم وكان خلوه ما بعشر غنم ).
والله ياعم شوقي ده قلبت فيها الهوبا عديل كده، تسلم ياعم، يارائع

[imported_عثمان]

ياتو مناضلين وشرفاء البيتاجروا بقضياء أهاليهم ديل
المناضلين والشرفاء ديل عشان "يسقطو" الإنقاذ دي ياخي
ديل مستعدين يعملوا أي شئ حتى لو كان على حساب السودان نفسه
وده الحاصل كأنما السودان ده حق الإنقاذ فقط.
يا عم شوقي البلد ماشة تتقسم تقولي لي مناضلين وشرفاء

كل سنة وإنت طيب يا عم وأسرتك الكريمة بالف خير وعافية

[imported_شوقي بدري]

سمراء
الابنة الغالية
شكرا علي المداخلة
يثلج صدري تضامنكم معنا حتى لا نتمحن لوحدنا
التحية
شوقي

[imported_شوقي بدري]

أخي الكبير حسن فرح
لك الحب والتحية
والله يا حسن يا اخوي كل ما نفتكر انه الانقاذ وصلت مستوي لا يصدق يأتونا بالبدع ومسخرة جديدة .
يا اخي معتمد السلام بالنيل الابيض لابس بدلة وكرفتة وابيض في ابيض زي كأنو شغال في معمل بنسلين . والتلفون ما ماسكو براه ماسكو ليه زول ؟ وبيتكلم عن معاناة الناس !!
يا اخي الناس دي لا بتختشي لا بتخجل . اتمنيت لو كنت قابلتو في زقاق المنفلة في أم درمان بالليل .

التحية
شوقي

[imported_شوقي بدري]

العزيز بابكر
يا اخي انت عارف اني زول بليد وفهمي تقيل . لما تكون عندك رسالة خليك واضح عشان أفهم .
مرات بتكتب كلام أنا ما بفهم إنت عايز شنو ؟ فبالله وضح لي عشان أفهم إنت عايز شنو .

[imported_شوقي بدري]

الأخ بدر الدين اسحق
بعد التحية
دكتور مصطفي عثمان اسماعيل وصف كل السودانيين بأنهم شحاذين . قال بكل بجاحة في الانتخابات الأخيرة : الما عاوزنا ما يشرب مويتنا وما يمش في شوارعنا وما يولع بي كهربتنا .
يعني ما يشوت كورتنا وما يدردق ترتارتنا ولا يتمرجح في طوطحانيتنا .
هذا الشخص ليس بولد هذا عيل .
ولقد كان وزير خارجية لستة سنوات بدون وجه حق لأنه اشترك مع مجموعة حرامية سرقوا السلطة بليل وهذا نصيبه من المسروقات .
والترابي ولي نعمته هو الذي وصفه بالولد . وهو بعضمة لسانه قال : ان الترابي قد قابله في لندن عندما كان مبعوثا والبعثة منحة من الترابي وكان الترابي يغدق عليه المال لدرجة شراء ملابسه .
ولقد خان الترابي واثبت انه لا يتمتع حتى بالولاء السوداني .
أنا أعرفه لأكثر من ربع قرن . ولم يكن يصفني ب "عم شوقي" بل كان يخاطبني مباشرة ب "شوقي" .
ولا يمكن ان يصفني بعمي لان الفرق بيني وبينه تسعة أو عشرة سنوات . وهو أقرب إلي جيلي . إلا أنه يتبع جيل الجحود . وإذا لم يكن ولد فلماذا قبل بالمراسيل المشينة ؟
التحية
شوقي

[imported_شوقي بدري]

الاخ قرقاش
تحية طيبة
والله يا قرقاش يا اخوي نحن زاتو بدينا نقتنع اننا ناس بطالين او عندنا شيزوفرينيا ام برد
لانو ما ممكن الناس دي بتعمل في الحاجات دي وبيناتهم في بروفسيرات وحملة شاهدات عليا مافي زول يقول ليهم يا جماعة عينكم في راسكم ؟
الواحد قرب يهبش راسو ويشفو في ولا مافي
لك التحية علي مداخلتك الظريفة

شوقي