اقتباس:
المشاركة الأصلية كتبت بواسطة خالد غالي
اما بخصوص البت السمحة التي استنكرت علينا تكسيرنا فيها، فانني اقول لك بعد التوكل على الله، انني ياسيدي ومنذ نعومة اظافري تعودت ان اتكسر في اشياء قد تكون صغيرة وليست ذات اهمية، مثلا ممكن اتكسر في لفتة بنت ... ممكن اتكسر في عقلة اصبعا الصغير بتاع يدها الشمال .. ممكن اتكسر في خصلة عربيدة فوق الجبين ... ابتسامة ... نظرة .... اي حاجة من النوع ده
اذكر وانا في سنة اولى جامعة كنت مكسر في حنك بنت!! ايوة والله زي ما اقول ليك كده بالظبط، كنت اقعد بالساعات الطوال مبحلقا متغزلا في ذلك الحنك الفريد، وفي يوم افتراقنا انا والبنت دي وكانت اللحظات شجية ومشحونة بالكثير من العاطفة قلت ليها كآخر حاجة عايز اقولها انو حايوحشني حنكها كثيرا، فبكت البنت وجعّرت ولي يوم الليلة ماعارفها بكت لييه 
اها بخصوص البنت السمحة، ما اظنك بتحتاج اني اقول ليك انها عندها ابتسامة قاتلة واسنان مرصوصة رصا رصا
لكن خليني اديك مثال لي حاجة ممكن تتسبب في اني اموت بها عشقا للابد
في الفيديو التالي في الدقيقة الثانية و ثلاثة وثلاثين ثانية مع الجملة بتاعة ولاحرك احساسك هي عملت حركة بي اصابعها كده، اها انا حركة زي دي ممكن جدا تتسبب في مقتلي
طبعا بالاضافة لي حركات تانية بالكتف وايماءات وتغميضات واشياء اخرى ممكن انت نفسك تلحظها بسهولة لو بطلت سواد النية وعاينت بي احساسك وقلبك ان كان لك قلب 
http://youtu.be/tivLpqk9eoM
طبعا ده ماكل شي، في حاجات تانية لكن مابقدر اقولها |
عليك الله شفت الاحساس دا حركتو كيف
يازول حلاتها والله سبنا بس
