(اعز انسان)
يا أعز إنسان لي أنا يا أعز إنسان
ماني غريب عليك يا عاشقك الهيمان
جيتك من سجون الريد بدور لي ضمان
ما تصارحيني وقولي لي بكل أمان
في قلبك دحين عاد تاني ياتو مكان
قرًبتِك وبينك بينوا كان أزمان
طريتك وفكري في عالم من النسيان
خاشع مبتهل طالب الإله سبحان
يجمع روحي بي روحك ويعيشوا إخوان
بريدك وريدتي ليك ريدت عيان وبيان
وقولت أجفاكي عندي بعيدة في الحسبان
كل الدنيا من غيرك بشوفا هوان
حتى أفراحي غيرك فيها تبقى احزان
أشيلك في عيوني عليك وأظل سهران
وأسكب زاتي في زاتك وأجيب اوزان
بردد في حروف إسمك براي نشوان
يعقب في صداهو معاي كل لسان
أخلي الكون فرح يرقص معاي طربان
تغني طيورو تتمايل على الأغصان
ليه بغناكي ما أبكي الوجود ألوان
انا المكتوب لي احبك وليك أعيش فنان
تعالي وضمي صدري عليكي بي تحنان
ورجعي عمري وكتين كت مع الحبيان
بيكي نسيت شقاي كل العذاب الكان
وفيكي لقيت حنان أمي الفقدتو زمان
