حاجات تجيب الجلطة ...

[الأغبش]

وإنت ماشي أو حتي واقف في حياتك اليومية بتلاقيك حاجات كتيره ترفع ليك الضغط وممكن جداً توصلك مرحلة الجلطه .. ممكن تكون تصرفات عادية عند اصحابها وما نفعت معاك انت بس ..وممكن تكون حاجات متقف عليها .. سأحاول هنا إستعراض بعض تلك المواقف ..والتي بالتأكيد حدث بعض منها اليوم لذا كان لابد من الفضفضة ..
تكون ماشي في شوارع الخرطوم في عز الزحمة ومستعجل أو حتي ماشي بخطوات عادية تلاقي قدامك واحد يتهادى تقول الود ماشي علي الشاطئ تخرم يمين يجيك يمين يشيلها منو شمال تلقاهو قدامك تلاقي نفسك بدون ما تشعر بتعمل في خطوات تنظيم عشان تحافظ علي سرعتك وما تضطر تقوم تاني من نمرة واحد ...
وإنت ماشي تلاقيك واحدة لابسه هدوم أختها الصغيرة وشغاله بالطاقة القصوى في جرجرة هدومها مرات لي تحت ومرات لي فوق ... هي الواحدة لو أصلاً ما بتقدر علي جنس ده لزومو شنو من الأول ...
بتاع الحافله يقيف بيك في محطة في النص زي تقول آخر محطة ربع ساعة عشان يجي زول واحد يركب .. وبعد شوية يلف بيك بالشارع البعجبو هو ويرميك في أقرب ملف بعيد من محل ماشي .. ولو حظك سمح زي حظي اليوم يكون راكب واحد بتاع شرطه يستعرض عضلاتو ويودي الحافله كلها القسم .. تقوم تشتري وقتك وراسك وتركب واحدة تاني وانت تدعو انو ما يطلع زي الأول ... وعادي ممكن يطلع ود عمو ..

ونواصل ...