ذات الرِّداء الأسود.. جسدٌ يصلحُ لفراشة

[الرشيد اسماعيل محمود]

المشاركة الأصلية كتبت بواسطة ناصر يوسف

يااااااااااااه

يا الله ويا لله من هذا التداعي ..

الرشيد ..

ياخي مالك علي ..

خفت أنا علي قلبي من كترة ما ضرباتو ذادت وأنا مُش بقرا ..

لا بعيش مع كل حرف صورة وصوت وأحاسيس كيف كيف كِدَه ما عارف

أحاسيس نابضة وكأني كنت معاك ...

وهسي دي أنا برضو معاك ..

ده شنو ده هو ؟؟

ناصر ياجميل الحضور..
ياخي والله الحكاية في غاية الإعياء..
حفلة البلابل دايماً أنا من أصدقائها ومداوميها حال أني في الخرطوم..
مرقت من الحفلة وجواي مشاعر مصطرعة ومشتت بصورة
تدعو للإشفاق..
ياخي دي حكاية عجيبة وزي ماقلت انت ده شنو ده..
والله علمي علمك..بس مرات الزول بتنسرق منو حاجة ..
من جوَاهو وما بيكون عارف السارق منو ولا المسروق شنو..
يفضل يتحسس ويتفقد الحاجات عشان يصل للمفقود ..
ودي عملية مرهقة بشكل..!!
أنا غايتو كنت عارف السارق بس المسروق شنو..
وكيف..دي ماكنت عارف ولا فاهم تفاصيلا..
قلت لي كان مشيت ليها..؟؟
ورقصت معاها كمان..وشنو..وعانقتها..!!؟؟
ياخي الكاشف اخوك ده فاشل بدرجة كبيرة في حكاية إحتمال الجمال دي..
دايماً بخشي ملامسة الحاجات الباهظة..
لأني مكشوف بشكل فوضوي كدة..لا أجيد الكر والفر في ميادين البهاء
وغزوات بدر الأشواق والجلال البيحرق ده..إتجاه واحد
يؤدي يا للإحتراق يا للإحتراق أيهما أقرب للوجع..
شفت كيف..!!
حدَنا خط التمنتاشر بس..بنحاول نهدف من بعيد ياصابت ياخابت..
وطوالي قاعدة تخيب ودايماً في حالة هزيمة وإجترار أسبابها ودواعيها..
لكن الهزائم العاطفية برضو ياناصر ماكل الناس بتعرف دروبها..ولا هي في متناول الجميع..
هل ده تميز يعني..؟؟!!
الهزيمة هنا ياناصر ليست هي مايهم..المهم هو كيف تقدر تدير
بوصلة قلبك مابعد الإنهزام..وتوجهها لإتجاه الشمال العاطفي..
وتلك فكرة..حتي الإنهزام والتوجع أنا بعتبرهم كسب جديد..
كسب يُزكي روح الأمل والصحيان نهوضاً ثانياً وتفتُح آخر..
شفت ليك زول بيستعذب التأوه وهو بيتسلق لبلاب أشجانو
وأسفو..
دي حالتي والحياة جميلة بالإلفة..حتي لو كان أليفك الخيبة.
والله حكاية..
شكراً ياناصر علي الكلام السمح ياخي..
وحفلة البلابل الجاية إن شاءالله نخشها سوا..
والحتسويهو حأعملو..سجن سجن غرامة غرامة..
وأكيد صاحبة الرداء الأسود ما حتكون فيها..لأنو في حاجات كدة ماممكن تتكرر من شدة ماهي سمحة.