أطباء المهجر والسم مخلوط بدسم مجدوب : أحذروا
سلام لكل الاخوة والذين اضطرتهم حرب الانقاذ لهم لهجرة الوطن
ألي حيث يكرم الأنسان ،وألي حيث يجد المهني والكاتب والأديب
والعامل ، كلهم جميعا يجدون أنفسهم وهم يعاملون كبني آدميين ،
في الوقت الذي طردتهم وشردتهم حكومة الجبهة ، وآحلت البلد دار البوار والخراب ،
وأستبدلت العقول النيرة والمهن النادرة والخبرلت الثرة ،بأهل الولاء ،
وكانت النتيجة :
فساد وأفساد وموت ضمير وتعفن جتة
وأختلاسات علي عينك يا تاجر ومحسوبية
وشيلني وأشيلك
وتدهور الحال في كل مرافق الدولة ، بل في كل الدولة ،
ووصلت الحال ألي مستنقع آسن ، مليء بالتماسيح بجميع أطوالها
همها التطاول في البنيان وخم القروش والتشبث بكرسي السلطة
أما الوطن والمواطن فله رب يحميه .
أخوتي حملت الصحافة خبرا نوجزه :
مجدوب الخليفة مشي أنجلترا عشان يحل مشاك الاطباء هناك
وهو المشاكل دي سببا منو يا جماعة ،
ومعاهو عبد الله سيد أحمد وكيل أول الوزارة ،
خلاص يعني الوكيل عالج الكوليرا والأيدز والسل والتايفويد
والملاريا والحمي الصفراء وفقر الدم والفرنديت والسرطانوعالج كل مشاكل الأطباء بالداخل
وأهل المستشفيات والمراكز القومية ،والتوزيع العادل وتهيئة المناخ والبيئة الصالحة للعمل لكل
الكوادر الطبية
والمستشفيات خلاص بقت تعليمية بحق وحقيقة
وكل ناس مدينة يتعالجو في محلهم والخرتوم بقت لتحويل الحالات المستعصية فقط
بس نسأله مباشرة عندك كم دكتور شغال في الخرتوم براها ؟؟؟؟؟ ناس الحيكومة بس
وبعدين معاهو مندوب يمثل أتحاد أطباء السودان ، !! تصوروا مدي الأستهتار بالأطباء ،
ولكن نقول لأخوتنا الأطباء :
النقابة معينة بليل بهيم وحالك السواد ،
وهي نقابة منشأة ، لاتقدم ولا تؤخر ،
والطبيب طاله الصالح العام وهم بالآلاف داخل وخارج الوطن ،
والآن يوجد في صف الأنتظار للتعيين حوالي 2000طبيب أمتياز ،
والطبيب العمومي بمجرد أكمال الخدمة الوطنية يعتبر وكأنه مفصول عن العمل ،
وعليه أن يلهث بين مكتب ومستشفي لأيجاد رقم وظيفة
بل حتي بعض الأخصائيين بدون عمل ووظائف
من يتم تعينه فورا ودون تأخير هم أهل الولاء
بل يتقلدون وظائف لم يكن ليحلموا بها وحتي وهم علي
أعتاب المعاش ,
ولكن الولاء هو المتحكم في كل شيء،
وكل شيء لله / ولا مش كده ؟؟؟؟
الطبيب مظلوم حتي من ذوي القربي، وهو أشد مضاضة من الحسام المهند
المرتبات حدث ولا حرج عنها ،
طبيب الأمتياز في حدود200دولار =500000ألف جنيه سوداني ،
وهذه قيمتها الشرائية بس ملاح أسبوع وكهربة جمرة خبيثة وعلاج للطبيب وأسرته،
والسكن في سقط لقط
والأخصائي يتراوح مرتبه بين600 ألف جنيه وحبة شوية فوق المليون جنيه ؟
ونفس الحكاية قروش كتيرة رقما ولكنها في السوق صفرا
بعدين نجي لي مجدوب الخليفة زاتو
هو مالو ومال دكاترة برة ؟؟
المثل بقول :: الجفلن خلهن أقرع الواقفات
هم الدكاترة الفي السودان سو ليهم شنو ؟؟
وبعدين بتكلموا ويتبجحوا التوطين 1و2و3 ولكن الحكاية ومافيها شوية معدات قسموها زي كيمان المرارة ،
والمستشفيات بتاعة ولاية الخرتوم قسموها لكليات طب خاصة ليه ؟؟
السعودي والشيخ علي فضل للتقانة
الأكاديمية لي مامون حميدة
بشاير لي بروف نصر الدين
أمبدة النموذجي للأحفاد
البلك والنو للتقانة
البان جديد لي مامون حميدة
ولسه الساقية مدورة
ليه كلية طب خاصة ما عندها مستشفي تعليمي خاص بيها ؟؟؟
و الشعب السوداني دفع دم قلبو عشان المستشفيات دي تقوم !!
يجو أدوها لكلية خاصة يدفع طلبتها المليارات ؟؟بس فهمونا دي كيف ؟؟
أنفقت الدولة علي العلاج المجاني2مليار دينار مقابل 36مليون مواطن سوداني(2004لعام)
يعني الواحد نصيبو كم جنيه ؟؟؟؟؟؟؟تصوروا وناس تتعالج داخل وخارج السودان علي حساب
الشعب السوداني الفضل !!!!!!!!!!
نسبة الصرف علي الصحة من الناتج الأجمالي المحلي0.56% لعام 2005
السودان به 351مستشفي ،و24785 سريرو1124 طبيب أخصائي لكل السودان (حكومة وجامعات فقط)
و281 طبيب أسنان والمجموع الكلي للأطباء 6604 وهذا يشمل الجميع وزارة وجامعات
ولونظرنا لعدد الأطباء المسجلين بالمجلس الطبي حتي تاريخه فعددهم أكثر من 20000طبيب
والموجود بالسودان أقل من نصفهم والبقية شردتها الأنقاذ وحرمتها شرف رد الجميل للوطن ،
بل وبعضهم حاربتهم في أرزاقهم ، وآخرون قتلتهم غدرا وغيلة وآخرون حكمت عليهم بالأعدام والسجن ؟
ومع ذلك يذهب د. مجدوب الخليفة والوكيل وممثل لأتحاد الأطباء لحل مشكلة أطباء أنجلترا وأوروبا !!!
دا المثل بقول عليهم :::غلفاء وشايلة موسي تطهر
أنتو ناس جوه حليتو ليهم مشاكلم ؟؟؟
البرة مرتاحين وماقالو ليكم دايرين مساعدة ،
واليتيم ما بوصوهو علي البكي
أنتو أقدروعلي الجوة الجوة
وأمس أضرب أطباء مدني لأن فرد من الأمن أعتدي علي طبيب ،
وقبل ذلك أطباء في عدة مدن سودانية اضربوا عن العمل
والليلة أختصاصيين بمستشفي الخرتوم قالو الصحة الأتحادية تخرق الدستور
وتحتكر السلطات التنفيذية ، ودا كلو عشان أهل الولاء يتصرفو علي كيفم
في أمكانيات ومقدرات الوطن
يا جماعة نصيحة لله
مافي زول يفكر يجي راجع لي البلد في الوقت الحاضر
نعم بلادي وأن جارت علي عزيزة وأهلي وأن ضنو علي كرام
ولكن سبحانه وتعالي يقول فيما معناه : أن أرضه واسعة فهاجروا
ولا تستكينوا للحاكم الظالم ،
نسمع منكم يا حنينة وكل الأطباء بالمهجر
الأرقام منقولة من : التقرير الأحصائي الصحي السنوي لعام 2004
و
|
