اقتباس:
المشاركة الأصلية كتبت بواسطة الرشيد اسماعيل محمود
يا أسامة معاوية..
أتابع من بعيد.. من المساطب الجانبيّة.. ولا لياقة زمنيّة تسعفني لأهتف ملء الكلام..
لكن ياخي بالغت في السِّر ده..!!
قال:
"السِّرُّ أن تبقي طليقاً في غنائك"..
ثم بفكرة فرض الكفاية ربما.. واحتمال بعامل الشفقة.. أضاف بياناً يطمئن به سجناء الغناء (وتُقرأ الشجن)..أضاف:
"يا سجينا في غنائك لا عليك"..
غايتو البيت ده مجهبذ جدّاً..
ثمّ..
دايما بفتكر صلاح حاج سعيد كاتب قصصي.. وماهر في القصّ القصير جدّا.. القصيدة عندو بتكتمل من البيت الشعري الأوّل.. (لسه بيناتنا المسافة والعيون واللهفة والخوف والسكون).. خلاص.. دي قصيدة مكتملة.. الباقي كلو كلام ثانوي وتفاصيل.. لو ما كتبها برضو القصيدة بتكون مكتملة..
المهم:
دي قصة براها.. وممكن تعرش علي كدة ونفهم أيّ حاجة بعد داك..
يعني البيت دة براهو قصيدة.. ولو كنت رسّام تشكيلي.. كنت أبدعته لوحة تحتفي بتفاصيلها الألوان..
قلت لي تحنِّس في سريح ايدا...!!!
وتغنيلكم البحر..!!
يا سلام.. طبعا كلمة "قعدت" دي أجمل ما في الحكاية.. يعني لو قلت "كانت" تحنس في سريح إيدا.. كنت خربت لي الرّصة.. لكني عارفك زول رصّاااص..
والله غايتو أمنيتي الكبيرة إنو التشكيليين يبارو الشعراء الغاويين وسامة ديل.. لوحات جاااهزة.. ومجاّناً..
هسع يقولولك شنو..؟؟
بجيك.. بس ألقي لي سانحة طيّبة.. زي ريحة كلامك الفوق ده..
|
حبيبنا الذي يبحث عن سانحة طيبة
جيتك دي بالنسبة لي سانحة أكثر من طيبة
وهاك
ماغنيت قدر وصفك
ولا عشر المدسدسو ليك
بكا واشواق
ولا حتی ان كتلني الفاق
ولا النيل ان بقالي مداد
رسم جياتك الازهار
علي روض الغنا الحراق
يظل افراق
ويغزر في القلوب معناك
ويحفر حنو في الأعماق
يظل افراق
ويكبر شتلك الرويان
ويهطل غيمك الدفاق
واظل افراق
وشن تنفع مع ضلك
حبيبات حبنا الرقراق
وما قامت صلاة اشواقنا
في بعدك
علی لقاط تيممنا
وانت وضونا للأشواق
واظل أفراق
الا ان تصطفيني سماك
نبي الغنوات وتامن بالقصيد
اوراق
واهاجر في مدن عينيك
مسرج طيب هواك براق
واكوّع فوق ضهر ريدتنا
اكركع حنّك العشراق
وانز من كل مسام الروح
سماحتن أحلى من تنضاق
واضاير من غناك غناي
مخافة نورك البراق
وماغنيت قدر وصفك
ولا عشر المدسدسو ليك
بكا واشواق
ولا حتی ان كتلني الفاق
وبعد دا وكت ليك سانحة اطيب من دي تعال ... لأننا نستمد حياتنا من سوانحك هاذي
