الحبيب فتحي
سلام والله اشكرك فقد كفيتني الكلام الكتير الكان ممكن اقولو وما لاقي ليهو وقت
المهم بهمني جدا ارد علي كلام نبيل لاني حسيت انو البوست بتاعو منحاز للشخصنة والتار والشماتة وطبعا دي حاجات في قاموسي مافي وما كنت ابدا اتوقعها .. لانو اي انسان خياراتو ما ابدية وبالغريب انو ده مفروض اي ماركسي يؤمن بالحاجة دي .. طيب .. ده لو كان صحيح زعم نبيل انو عادل كان خيار لي او بتناول مواضيعو باعتبارها امر مقدس وده فهم غريب و ما من الحقيقة في شي .. لو بسمح المجال نعيد وبدون زعل مقالات اغتيال الشخصية ممكن نجيبا تاني ونقول راينا الكتبناه زمان .. لكن متاكد ( الحنبكة ) ح تقع تاني من جديد ...
كل ما في الموضوع انو طرحنا كتابات عادل باعتباره كان جزء من الحزب الشيوعي وعاش التجرية اضافة الى كده فيها استشهاد بقيادات للحزب الشيوعي مثل التجاني الطيب وغيرو .. كل ما حدث هو طلبنا من الزملاء تفنيد واثبات عكس ما قيل في المقالات دي جريمة دي ؟؟
يعني لو هم اهتموا بنقد المقالات واثبات انها كاذبة وغير حقيقية كان افضل من اتهام ود العمدة بالكوزنة ..
عموما ما يكتبه عادل في السايبر وما يكتبه اي انسان في هذا العالم بيكون موضع اخد ورفض من الجميع فقط مطلوب التعامل بحرية واحترام للاخر
انا عاوز اعرف التناقض وين في ده يا نبيل ؟؟
يعني مثلا لامن استشهد براي سلاطين باشا في رايو في السودانيين باعتبارهم عبيد حسب ما جاء في كتاب الرق للاستاذ محمد ابراهيم نقد هل ده بيعني اني انا بعترف بسلاطين او اقول بصدق سلاطين ؟؟!!
لامن استشهد بكلام الترابي في عمر البشير وانو عمر البشير ده زول طيره ساي و دكتاتور ولامن استشهد بكلام على الحاج وكلامو عن طريق الانقاذ الغربي وخليها مستورة ولامن اجيب نضمو في بيوت الاشباح واعترافو بيها هل ده بيعني اني بقيت مؤتمر شعبي ولا مع الترابي ؟؟!!
اذا كان ده تناقض يبقى كلنا متناقضين ولا شنو يا نبيل ؟
نبيل حاول تبعد عن النفسية الدوغمائية دي وح تشوف العالم بشكل تاني
في الوان كتيرة يا نبيل غير اللون الاحمر البخلي الثيران تتهيج في حلبة المصارعة
واللي بيغذي النفس بعدائية تجاه الجميع
وليبقى ما بيننا
مودتي
|
