(حـبـايـبـنـا) .... (ومـشــتـاقـيـن)..... سطر رقم (2)
[align=center]أهازيجك للفرح مسدار
تنور من ملامحك ضي
تزخرف صفحة المنديل
تعطر نسمة الإعصار
عيون عشاق تتاوق ليك
سنين بطَول المشوار
مستفة بالحنان والشوق
مرصعة في الجبين أقمار
قريناها وكتبناها
ورسمناها في الخاطر
ورجعنا نغالط الحاضر
ونزرع في البحر تيار
نشيل الفرحة من ايديك
ونكتب بالرحيق اشعار
نعاين ليك
ونخت عينينا في صورتك
ونسرح بالفرح فيها
نفتش في الشبه ليها
نلاقيك شبه نفسك
شبه القمرة نص الليل
وقت تندس في غيمة
تودي شعاعها ناحيتنا
تضوي الدينا بي بسمة
تخت الصورة فوق النيل
وهناك في الضفة حورية
مفرهدة جوه أحلامنا
وما بتظهر نهارية
تحب الليل
وسمر الليل
وكلام يتقال بين قوسين
توشوش موجة للرملة
وتكتب فيها بالأول
حروف اسمك
وتعود ترجع
وتكتب في سطر تاني
كمان أسمك
وعشان الموجة حافظاهو
حفظنا الاسم زي غنوة
نغني معاك كل صباح
نغني معاك طول الليل
تضيع أحلامنا قبالك
نفتش ليها هنا وهناك
نلاقي أحلامنا في جواك
ولما وقفتي قدامنا
يا حليوة
عرفنا الفرق
وكيف ممكن
يقول الزول
كلام الحق
وشنو الممكن
يخلي الشوق
يولع بق
شنو الممكن
يخلي الجوف
يطقطق طق
تجي الأقدار
نقيف قدامك اللحظة
نمد إيدينا فرحانين
نسلم بيها في أيديك
طعم صوتك
يغوص فينا
أريتنا معاك من أول
عشان الدنيا تتحول
وأريتو الحزن ما طول
عشان في عينيك نتجول
تفتحي باب وتقفلي باب
ونحن نجيك نتسول
زمن بجمعنا من تاني
في متعة شوق
وإنت الملكة جوانا
وزول معشوق
زمن بيرسمنا في لوحة
زمن أيامو منشرحة
أصلوالقصة دون عنوان
قصة عشق للإنسان
قاب قوسين
وبين قوسين
(حبايبنا)
(ومشتاقين)
.....
..
..[/align]
|
