تركين

[imported_azzam_farah]

بحِبو حُـبًّا جَـمًّا ياخ.. لكِن الحِكاية مُش "أكل" وبس، لا، وحاتكُم، أنا بنشُد تأصيل الغذاءات النوبِية، ومُهْتم جِدًا بالفِلْكُلور بِتاعو، وبعدين ما تنسو إنو التركين ده الحاجة الوحيدة الما بتْشارِكْني فوقا "بِت إبراهيم" الله ده ما كريم ياخ، مرات بسوو حاجات كدي، الغَشيم يِقول الله ساها ساي، عِلا وراها حِكمة بليغة .. أي نعم.

إنتو عارفين أسوأ حاجة في ها التركين شنو؟
أسوأ حاجة إنو الواحِد لابُد يِصل لحظة يشبع فيها! وده هاجسي لامِن أدْني مِن طَلِسْ التركين، بكون عارِف إني حأشبع، لِذا أُطيل جلوسي، وأتبع عادتي وطقوسي، فألْتهِم الأولى وأَسْتَودِعُها فاهي، وأُقلِبُها ذات اليمين وذات الشِمال،برَوِية وإحْسان وصمتٍ وإتْزان، وأجول بِطُعْمتي في عرائِرُ فمي وأهْضامه، وأتجنبُ لها الإنْزِلاق، والإنْفِتاق، وأحرِص أن يكون حدِها اللاةِ أو أثناءُها، ولما إسْتَيْئَسُ مِن سُلافةٍ فيها، أمرِرُها للمرئ ، ثُم أمِد أصابِعي مُتَوثِبًا لِطُعْمةٍ أُخرى، قد إصْطفاها بصري مِن بُعْدٍ، فأبدأ بِقطْعِ ما خُبِز، وأحرِصُ أن أتمكَن مِن أن تُطيق أن تُلف مرتَين، ثُم أُزمْزِم إدام الصحن (التركين) ما إسْتطعت، فإنه هو المعني والغايةِ والمُرام، فأغرِف بِلُفافتي التي لفَفْتُها التركين غرف مَن يتسحر غَير مُتَيقِن مِن إفْطارِهِ بِغدٍ، ثُم أوْدِعُها في في، وقد جحظت عَيْناي وخاف أدْناي ، وإرتجف مني الفكُ وشهق الشقُ، وإهْتزت نواجِزي، ونهضت عواجِزي، وإرتفع المِنْكب وزاد الصدر وبانت الأسنان والقواطِع، فإذا أصبحت اللُفافةِ بِتُهامةِ فمي، أطَبقتُ عَلَيها إطْباقِ المطرقةِ على السِنْدان، ولا أغِبُ في تتابُع الطُعومات، بل أتبع الطُعْمةِ الطُعْمة، بعزمٍ وإصرارٍ وبُخْلٍ وإقْتار، وأُضَيِق طريق مَن هو جلس بِيساري ما إسْتطعت، وأشْغِل بِمِرْفقي مَن جلس بِيميني، فأُغالِبهُ في موضِع كُلاه، وأُزاحِمُ بِكاهلي عُلاه، فإذا بلغت حد الشبع أو أدناه، لحستُ بعذبتي أنامِلي، وأقوم أمِش بيتنا

[بابكر عباس]

بالرغم من انو في ناس كتار ح يقولوا: بابكر عباس هرش من عزام!
لكن ما عندي طريقة غير أقول: الكلام دا سمح جدا يا عزام

[imported_azzam_farah]

بالرغم من انو في ناس كتار ح يقولوا: بابكر عباس هرش من عزام!
لكن ما عندي طريقة غير أقول: الكلام دا سمح جدا يا عزام

وفي برضو ناس كُتار "طبيعِيين" حيقولو "بابِكر عباس" ما بلخبِت الكيمان.. ده براهو وداااك براهو.. وبعدين ياخ أنا عمري ما صنفت الحِكاية "هرِش" وكِده..

ما علينا...

كتر خيرك وبارك الله فيك (علشان على الأقل نكون متساويين في الهرشه وِفْقًا لِتفسيرك للهرِش.. وكِده)

[imported_الزوول]

...
حباب عزام
وصف جيد وشهي للإستمتاع بالأكل

المشاركة الأصلية كتبت بواسطة azzam_farah

والقواطِع، فإذا أصبحت اللُفافةِ بِتُهامةِ فمي، أطَبقتُ عَلَيها إطْباقِ المطرقةِ على السِنْدان

ولكن هذه الفقرة لم تعجبني، فهي لا تؤدي الوصف الدقيق لكيفية الإطباق وهو يعني الإحاطة ولذلك فنزول المطرقة على السندان لا تؤدي التشبيه المطلوب. وكان من الأجدى أن تقول مثلاً (أطبقت عليها اطباقاً يشبه وقوع العصفور بيد البُطان) أو
(أطبقت عليها إطباقاً كما وقع معارض سوري بيد شبيحةٌ سَجّان)

المشاركة الأصلية كتبت بواسطة azzam_farah

وأقوم أمِش بيتنا

طيب فعايلك دي ..قعد تمارس فيها وين أصلك؟؟

[imported_azzam_farah]

الزوول
كيف حالك؟ علك طَيِب

طيب فعايلك دي ..قعد تمارس فيها وين أصلك؟؟

بكون ضيف.. أصلو بِت إبراهيم مِن غَير الناطِقين بِها للأسف، وبعدين معقول أمارِس كُل ها التعسُف واللئامة أدناه في ضيف فوق بيتي:

وأُضَيِق طريق مَن هو جلس بِيساري ما إسْتطعت، وأشْغِل بِمِرْفقي مَن جلس بِيميني، فأُغالِبهُ في موضِع كُلاه، وأُزاحِمُ بِكاهلي عُلاه

ــــــــــــــــــــــــــــــــــــ

أطَبقتُ عَلَيها إطْباقِ المطرقةِ على السِنْدان

لكِن "الإطْباق" ما عِنْدك!

الإطباق البسويهو لِلْفافة ما إطباق "إحْسان" ده إطباق "شرْفنه" ووِداد

[imported_فطوم]

تركين يعني شنو؟؟؟؟

[imported_طارق صديق كانديك]

العزيز عزام فرح

مساء الخير

لولا يقيني الذي بين جنبيّ أنني لا أستطع معه صبرا .. اذ كيف أصبر على مالم أعرف له خُبراً - لولا ذلك - لقلت أن هذه التحفة تدعوك طوعاً لتناول هذا الموصوف بهذه الحروف النيرات .. !!

ها أنت ذا قد جعلت من التركين شربات ...!!

متعك الله بالجمال

[imported_أميرى]

أو يو
رسمها رسما فيما بين عينيها وأظل حرها برمش العين وما بين الجفن إلي الجفن كفكف ساعدا و أبحر
ثم أغمضت فأغمض و سهت فسها ومسافة الحلم كنت هناك أساوي درب عثرات منامها

عزام اسف ياخ ما لقيت لي فجة أكتب فيها فإتوكلت وأستجرت بجوار التركين أهو كلو برائحة شئ خرج و عاد

ياخ شكرا علي اللقيمات اللائي قد يقمن صلبا أو يودوهو في ستين داهية

متعة هي القراءة لك أبنينقا

[الرشيد اسماعيل محمود]

المشاركة الأصلية كتبت بواسطة azzam_farah

إنتو عارفين أسوأ حاجة في ها التركين شنو؟
أسوأ حاجة إنو الواحِد لابُد يِصل لحظة يشبع فيها! وده هاجسي لامِن أدْني مِن طَلِسْ التركين،

سلام يا عزّام..
ياخي كتابتك دي سمحة جنس سماحة..!!!
من أصعب الحاجات إنّو الواحد يقدر يوصف شغفو بشئ ما..
لكن إنت قدرت تخليني أعيش المشهد معاك بكل التفاصيل..
جميلة الكتابة دي..
وبعدين أجمل ما في الموضوع المقطع أدناه:

المشاركة الأصلية كتبت بواسطة azzam_farah

فإذا بلغت حد الشبع أو أدناه، لحستُ بعذبتي أنامِلي، وأقوم أمِش بيتنا

بالنسبة لي، جملة "أقوم أمش بيتنا" دي جملة مبدِعة جدّاً ياخي..
بتختصر حاجات كتيرة، من ضمنها إحساسين متضادين:
الأوّل :إنّك استمتعت بالتركين ولحست بعذبتك أناملك..
والتاني :إنّك شبعت وما كنت داير تشبع.
تحيّاتي.

[imported_جيجي]

المشاركة الأصلية كتبت بواسطة طارق صديق كانديك

العزيز عزام فرح

مساء الخير

لولا يقيني الذي بين جنبيّ أنني لا أستطع معه صبرا .. اذ كيف أصبر على مالم أعرف له خُبراً - لولا ذلك - لقلت أن هذه التحفة تدعوك طوعاً لتناول هذا الموصوف بهذه الحروف النيرات .. !!

ها أنت ذا قد جعلت من التركين شربات ...!!

متعك الله بالجمال

ما يغشك
قسما ب الله مقلب دولي

[imported_Sana Mursi]

المشاركة الأصلية كتبت بواسطة جيجي

ما يغشك
قسما ب الله مقلب دولي

لا يا جيجوش اكلة التركين من امتع الاكلات على الاطلاق مع مراعاة اختلاف الازواق طبعا.

[imported_Sana Mursi]

المشاركة الأصلية كتبت بواسطة azzam_farah

بحِبو حُـبًّا جَـمًّا ياخ.. لكِن الحِكاية مُش "أكل" وبس، لا، وحاتكُم، أنا بنشُد تأصيل الغذاءات النوبِية، ومُهْتم جِدًا بالفِلْكُلور بِتاعو، وبعدين ما تنسو إنو التركين ده الحاجة الوحيدة الما بتْشارِكْني فوقا "بِت إبراهيم" الله ده ما كريم ياخ، مرات بسوو حاجات كدي، الغَشيم يِقول الله ساها ساي، عِلا وراها حِكمة بليغة .. أي نعم.

إنتو عارفين أسوأ حاجة في ها التركين شنو؟
أسوأ حاجة إنو الواحِد لابُد يِصل لحظة يشبع فيها! وده هاجسي لامِن أدْني مِن طَلِسْ التركين، بكون عارِف إني حأشبع، لِذا أُطيل جلوسي، وأتبع عادتي وطقوسي، فألْتهِم الأولى وأَسْتَودِعُها فاهي، وأُقلِبُها ذات اليمين وذات الشِمال،برَوِية وإحْسان وصمتٍ وإتْزان، وأجول بِطُعْمتي في عرائِرُ فمي وأهْضامه، وأتجنبُ لها الإنْزِلاق، والإنْفِتاق، وأحرِص أن يكون حدِها اللاةِ أو أثناءُها، ولما إسْتَيْئَسُ مِن سُلافةٍ فيها، أمرِرُها للمرئ ، ثُم أمِد أصابِعي مُتَوثِبًا لِطُعْمةٍ أُخرى، قد إصْطفاها بصري مِن بُعْدٍ، فأبدأ بِقطْعِ ما خُبِز، وأحرِصُ أن أتمكَن مِن أن تُطيق أن تُلف مرتَين، ثُم أُزمْزِم إدام الصحن (التركين) ما إسْتطعت، فإنه هو المعني والغايةِ والمُرام، فأغرِف بِلُفافتي التي لفَفْتُها التركين غرف مَن يتسحر غَير مُتَيقِن مِن إفْطارِهِ بِغدٍ، ثُم أوْدِعُها في في، وقد جحظت عَيْناي وخاف أدْناي ، وإرتجف مني الفكُ وشهق الشقُ، وإهْتزت نواجِزي، ونهضت عواجِزي، وإرتفع المِنْكب وزاد الصدر وبانت الأسنان والقواطِع، فإذا أصبحت اللُفافةِ بِتُهامةِ فمي، أطَبقتُ عَلَيها إطْباقِ المطرقةِ على السِنْدان، ولا أغِبُ في تتابُع الطُعومات، بل أتبع الطُعْمةِ الطُعْمة، بعزمٍ وإصرارٍ وبُخْلٍ وإقْتار، وأُضَيِق طريق مَن هو جلس بِيساري ما إسْتطعت، وأشْغِل بِمِرْفقي مَن جلس بِيميني، فأُغالِبهُ في موضِع كُلاه، وأُزاحِمُ بِكاهلي عُلاه، فإذا بلغت حد الشبع أو أدناه، لحستُ بعذبتي أنامِلي، وأقوم أمِش بيتنا

والله يا عزام شهيتني لمة التركين في صباح الممطر البارد ده
نسابتي من غير الناطقين لكن بيحبوا التركيب حبا جما
جهجهت يومي الله يسامحك

[imported_حسن سادة]

اقتباس:
المشاركة الأصلية كتبت بواسطة Sana Mursi
والله يا عزام شهيتني لمة التركين في صباح الممطر البارد ده
نسابتي من غير الناطقين لكن بيحبوا التركيب حبا جما
جهجهت يومي الله يسامحك



أستاذتنا سناء
أشواق ومودة وتقدير
وسؤال ملح عن صحتك الغالية
إنتي وأفراد أسرتك الكريمة
يا حليل تركين ناس أم سامي في زمن مضى
وربنا يجمعنا سوا تانية في الخير

مودة خاصة للأمورة المحروسة الصغيرة

[imported_Nour]

ما اظن في من ابدع في وصف مأكول كما فعلت والتركين يستاهل. في سوق بحري مطعم بعمل احلي تركين

[imported_سمراء]

اقتباس:
المشاركة الأصلية كتبت بواسطة azzam_farah

بحِبو حُـبًّا جَـمًّا ياخ.. لكِن الحِكاية مُش "أكل" وبس، لا،

ياسلااااام ياخ ياعزام !!
اسع الزول يقول ليك شنو فى الحالة دى !
بس عموما ربنا حايدخلك اول الشى النار ، وبعدين الجنة ..عارف ليه ؟

حاتخش النار للحالة الختيتنى فيها دى ، لانو زكرتنى زمن جميل خليت دموعى تبل الكيبورد ! يااااااااااااااااااااه !!
خالتى فاطنة الحلفاوية وهى شايلة الصحن الكبير مليان قراصة سخنة والتركين سيد المائدة ، وجاية من هناك ياجماعة بسرعة اتلمو القراصة حاتبرد ...ونجى نحنا كولنا اولاد وبنات وامى وابوى واولادها ونهجم على التركين هجمة اسد على فريسة !! رغم انو التركين ماكنا بنحبو ....بس ذى ماذكرته انو ما اكل وبس !!

اللمة الحلوة ،

اما الجنة حاتخشها ، للاسلوب الجميل ، والتصوير المجسم لتناولك للتركين !!
والله تشهى الزول اسع يمرق من المكتب ويشوف ليه تركين ، طبعا التركين حلو لمن ماتاكلو فى بيتكم ! ماعارفة السر شنو ؟