أشجع منه لم تلد النساء صراع شاب سودانى مع مرفعين (فيديو)

[سمراء]

معقولة وصلنا للمرحلة دى ياناس !!
ياحليل زمن ناس جدى يعلم الله

زمان الناس كلهم ذى الشاب ده ، الاستناء كان لو عمل غير كدة !
الخوف الان اتسيطر على النفوس ، الخشية ملة قلوب الناس من كلمة الحق ،
الزول البقول كلمة قوية ويصادم - بقى مفخرة لانو براهو وسط كم هائل من ناس حلقها اتحجر ولسانة برد لانو قلبها اتملى بالخوف !!
الخوف - والحق ..مابتلاقو فى جوف زول حر

ياجماعة لو ما مرقنا من جلاليبنا الضيقة ، البلد ماااابمشى بمهلة ..

ابعدو من الحزبية الضيقة عشان نتوسع فى المشى ...

[زول الله]

المشاركة الأصلية كتبت بواسطة ود الخير

الأنقاذ سابحه في تيار الشعب السوداني
ودونك التعتير العائش فيه شعبنا فما بالك
من يريد ان يسبح بنا عكس التيار والريح

وما بين جلابيه الإنقاذ المفصله علي مقاس 96٪
من الشعب السوداني والجلابيه المستورده المظلومه
حا يستمر كيّك وعذابك يا شعبي

ودالخير سلام
سؤال: انت عايش في سودانا الوااااحد دا وللا حتة تانية؟؟

تحية إجلال وتقدير لمن قال لا في مواجهة وليس من خلف كيبورد
تحية إحترام وقبعة مرفوعة لمن قال لا بالطريقة الصاح









اقول قولي هذا واستغفر الله لي ..................

[جمال خضر]

الإخوة الأعزاء بجيكم راجع إنشاء الله

[بله محمد الفاضل]

تحياتي جمال
ومرحباً بك


وتعظيم سلام لهذا الشاب الجدع
رغم أني لم أعرف إلى اللحظة ما قاله
فهل يتكرم علينا أحدكم بكتابة ما قاله لهذا الضار
...

تحياتي واحترامي

[سارة]

المشاركة الأصلية كتبت بواسطة زول الله

ودالخير سلام
سؤال: انت عايش في سودانا الوااااحد دا وللا حتة تانية؟؟

تحية إجلال وتقدير لمن قال لا في مواجهة وليس من خلف كيبورد
تحية إحترام وقبعة مرفوعة لمن قال لا بالطريقة الصاح









اقول قولي هذا واستغفر الله لي ..................

صح لسانك يا ابو فجر

الناس ديل دايرين عشرة بس زى الاسد دا وتقوم قيامتهم
نضال الشتائم والكىبوردات اصبح ما عندو قيمة لما ينط ليك
واحد زى ود الخير ويمرقك عن جادة الطريق
دايرين مواجهة عينى عينك والحشاش اليملأ شبكتو

[سارة]

المشاركة الأصلية كتبت بواسطة بله محمد الفاضل

تحياتي جمال
ومرحباً بك


وتعظيم سلام لهذا الشاب الجدع
رغم أني لم أعرف إلى اللحظة ما قاله
فهل يتكرم علينا أحدكم بكتابة ما قاله لهذا الضار
...

تحياتي واحترامي

بلبل يا جميل لو ما سمعت نص عمرك ضاع
اللى حصل واللى جرى ولا ينكتب ولا ينأرى

[أميرى]

سلام علي الولد البشيل سودانو في عينو ...و ما لاوز

دي سرقتها مخصوص عشانك

[Sana Mursi]

قبل 4 ساعات تقريبا زوجي صحى متوحم بسمك وقال ارح نمشي ناد الربيع بالعاسيه ناكل سمك طازه ونجيب لي ناس البيت وانا ما كضبت خبر.
مشينا واكلنا السمك الطازه وملهلب بمزاااااااااااااااج ومشى جاب لينا شامبيون و طلعت اغسل يدي من اثار الجريمه وكان ف كوز بيغسل يده قصادي وما انتبهت له وما اشتغلت بيه بس سمعت ليك زول بيقول لي غطي شعرك ربنا بيعزبك وبيدخلك النار , عاينت لمصدر الصوت لقيت زول بيعاين لي وغالبا كانت النظره التالته ويا كوز جاك بلا قلت ليه مالك ومالي انا دايره اتعزب واخش النار الحشرك شنو وهو مصر يتحشر قلت ليه اخير ليك يا عفن تتلمى وبلاكيزان بلا لمه معاك و وبلا حركات معاك ومع رئسك الحيوان وانتو بتعرفوا الحرام سرقتوا بلد كامله بي ناسها و جاء زوجي قال لي مالك حكيت ليه قال وينو الحيوان ده , حصلناهو في عربيته وقال ليهو انا زوجها وبقول ما تغطي شعرها مالك ومالها وقام دور العربيه عشان يجري فنيتو بقزازة الشامبيون الما شربت منها جغمه.
خرب لي مزاج السمك ياخ حريقه تحرق الكيزان تجار الدين.

[سمراء]

اقتباس:
المشاركة الأصلية كتبت بواسطة Sana Mursi

خرب لي مزاج السمك ياخ حريقه تحرق الكيزان تجار الدين.

ماعرفتك يابت والله !!
اها يلا النسمعك كلام الببكيك ، ويبكى معاك ياشريرة
اول شى انت الغلطانة ، اى والله
والغلط راكبك من راسك الكاشف ده ولحد كرعيك السكيتى بيهن الراجل المسكين المرقنو كرعينو !!
اول شى القال ليك منو الزول ده كوز ؟؟ مايمكن زول شغال بمبداء الامر بالمعروف والنهى عن المنكر !ويكون عداهو العيب ياخ !
بارك الله فيمن اهدى الى عوراتى ..ولا عيوبى هى ؟ مافرقت
بعدين القال ليك الكيزان بنبهوك منو ؟ على بالقسم يتفرجو كده لمن يقولو بس !
ويعملو رايحين ...
وتانى شى ياسنوية ، البوديك تاكلى السمك شنو وانا لا اسع مافطرتة ؟ الله يعلم عيونى مطششات اسع
انت شكلك جاية تعملى لينا ازمة فى البحر ..سمك وتركين ياخ

تالت شى : الشامبيون ده اختيهو

[اسامة عبدالماجد]

الأخ جمال خضر
تحياتي ..
ومرحب بيك في سودانيات وياااااااا له من مدخل.

محمد حسن عالم (بوشي) كان يتحدث بلسان الشعب السوداني .. وكان يرتكز على صفات الشخصية السودانية الحقة (الشجاعة، الوضوح، المواجهة) لأنه خرج من رحم معاناة الشعب السوداني .. ورضع أوجاعه .. وشب في شوارعه الحزينة وهو يحمل في عينيه أمل باكر .. ففاجأه باكر بالفجائع الكبيرة .. فلم يحتمل فسن حنجرته بالهتاف ليرسم معالماً جديدة للنضال والفعل.

ليس غريباً أن يصادم أو يواجه فهو متحدث الأركان طوال سنوات دراسته بجامعة النيلين .. ولا يعرف الخوف لأنه تجرع كل ما وصلت إليه الآلة الجهنمية لأجهزة الأمن من أساليب مبتكرة في الإعتقال والتعذيب والتشريد.

هكذا بدا نافع على نافع وكأن على رأسه الطير .. متضائلاً منزوياً ومحتاراً من هول هذه المواجهة ولأنه كان بطل من ورق فلم يصمد أمام لهب الحقيقة التي كان ينفحها به محمد بوشي فلاذ بالصمت .. مجبر أخاك لا بطل..

سلمت يمناك وسلم لسانك .. ولنكن كلنا محمد حسن عالم لفضح هذا النظام وجرائمه البشعة في حق هذا الشعب.

ملحوظة: ياريت لو تم إضافة بعض الإشارات في العنوان توضح علاقة الفيديو بفضح نافع على نافع.. ليكون ملفتاً.. مع تقديري.

[Sana Mursi]

المشاركة الأصلية كتبت بواسطة سمراء

ماعرفتك يابت والله !!
اها يلا النسمعك كلام الببكيك ، ويبكى معاك ياشريرة
اول شى انت الغلطانة ، اى والله
والغلط راكبك من راسك الكاشف ده ولحد كرعيك السكيتى بيهن الراجل المسكين المرقنو كرعينو !!
اول شى القال ليك منو الزول ده كوز ؟؟ مايمكن زول شغال بمبداء الامر بالمعروف والنهى عن المنكر !ويكون عداهو العيب ياخ !
بارك الله فيمن اهدى الى عوراتى ..ولا عيوبى هى ؟ مافرقت
بعدين القال ليك الكيزان بنبهوك منو ؟ على بالقسم يتفرجو كده لمن يقولو بس !
ويعملو رايحين ...
وتانى شى ياسنوية ، البوديك تاكلى السمك شنو وانا لا اسع مافطرتة ؟ الله يعلم عيونى مطششات اسع
انت شكلك جاية تعملى لينا ازمة فى البحر ..سمك وتركين ياخ

تالت شى : الشامبيون ده اختيهو

اوفه ياااااااااااااااااخ كوز لمن غلط وكان بيتكلم معاي وهو في النظره ال20 ولسه مواصل يعاين وعامل دقن الاستثمار الاسلامي و عربيته قزازها مصفح و قارورة الشامبيون حتى ما خدشتوا.

[سمراء]

اقتباس:
المشاركة الأصلية كتبت بواسطة Sana Mursi
اوفه ياااااااااااااااااخ كوز لمن غلط وكان بيتكلم معاي وهو في النظره ال20 ولسه مواصل يعاين وعامل دقن الاستثمار الاسلامي و عربيته قزازها مصفح و قارورة الشامبيون حتى ما خدشتوا.

يعنى حكاية غطى راسك كانت حنك عاضى منو ؟
اذا دى حركة فى شكل وردة ....يكون غلبو التعبير ساى ..

بس برضو كنتى تحسنى الظن يازولة ، ومافيها شى لو جريتى توبك وغمتى راسك ،،،عادى اهو تكونى استثمرتى حركتو فى شى كويس

نحنا ياسناء لو بارينا على فكرة انطباعيتنا عن الكيزان ، حانغلط فى ناس كتار ، وفى روحنا دى زاااته ..عشان كده المصريين بقولو اولاد ....ماخلو لى اولاد الحلال حاجة ....والعياذ بالله

طولى بالك يا اختااااااااااه وركزى فى سمك البنفعك

[اسامة عبدالماجد]

المشاركة الأصلية كتبت بواسطة ود الخير

هنيئاً للشعب السوداني بالإنقاذ وقادته
إذا هذه هي عيوب أنفذ حكام الإنقاذ
في السلطه خلال أكثر من عشرين سنه!!
إشارات هذا المناضل
خواف ومكتبه ما بفتحه حتي للإسلاميين
الدرجه العلميه نالها علي حساب الشعب السوداني
كلام الانقاذ دوماً عن الأخلاق
لهته السلطه وعندو عماره في بري
ولدك قبول خاص
ولدك مربت ثلاثه مرات بالجامعه
ولدك عملوا ليه منظمه

ود الخير ..
إن هذه ليست (عيوب أنفذ حكام الإنقاذ في السلطه خلال أكثر من عشرين سنه!!) ليست هذه فقط .. فلا المكان ولا الزمن المتاح كان يسع لسرد الكم المهول من جرائم انفذ حكام الإنقاذ.. فهي دقائق سمحت بها المنصة فحاول هو جاهداً أن يختزل الحديث ..
هل تريد كشفاً مفصلاً بأسماء من تم حشرهم في بيوت الأشباح.. أم هل تريد كيفية ممارسة التعذيب وأدواته الغريبة على الأخلاق السودانية.. أم هل تريد قائمة بأسماء الأكرم منا جميعاً (الشهداء) الذين قدموا ارواحهم فداً لهذا الوطن وإنسانه.. هل تريد كشفاً بعدد ملايين الدولارات التي دخلت جيب شيخك الفذ منذ دخوله الإنقاذ وهو الذي لم يكتب إبراء ذمة بممتلكاته قبل تنصيبه في حكومة الإنقاذ.. أم هل تريد أن تعرف كيف غادر الزعيم إسماعيل الأزهري هذه الفانية ولم يكن يملك منزلاً وهو رئيس دولة لسنوات طويلة ومثله كثير من المناضلين..

أدناه كشف صغير بأملاك معالي الدكتور نافع علي نافع ولاية الخرطوم:
1- قصر مشيد في المنشية في الخرطوم ، مكان أقامته الحالية.
2- عمارتان تطلان علي النيل الازرق ، وبجوار فندق القرين فليدج في الخرطوم !
3- مزرعة بمساحة 16 مليون متر مربع في العيلفون ، ومحصنة بسور اسمنتي بطول 16 الف متر طولي !
4- قصر مشيد من عدة طوابق في الرياض لسكن أبنته ، المتزوجة من أبن المرحوم الزبير محمد صالح !
العقارات أعلاه في ولاية الخرطوم فقط !
ولم نذكر العقارات في مسقط رأسه في ولاية النيل !
كما لم نذكر الحسابات الدولارية المرقمة ، في ماليزيا ودبي !

وأدناه صورة لقصر الأميرة نسيبة نافع على نافع إبنة مثلك الأعلى في الزهد:

وهذا قليل من كثير.

[نبراس السيد الدمرداش]

بقول غنوات .. واقول غنوات
فى البلد البسير جنياتها لى قدام ..
وفى الولد البتل ضرعاتو فى العرضة
ويطير فى الدارة صقرية ..
ولو السمحة تلت إيد
ومدت جيد يقوم شايلاه هاشمية
يشيل شبالو وختفة ريد وفرحة عيد ..
وريدة روح وحمرة عين وإيدية
وفى الولد البشيل مدقاقتو قولة خير على القمرة
يقابل الجاية متحزم ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
و قبال حول تغيم غيمة قبلية
ترش الدارة والحدبة الصعيد الحلة
يا فرحه بتطارد الصفقة فى النسمة الصعيدية
وياجهرة نهار الليلة بدرية
رحيح جنياتنا فى
الحدبة الصعيد الحلة
يا قمحاتنا هو لبلب ...
يا سمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب ..
ويا حجواتنا يا دعواتنا هو لبلب
سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
وزى برق السماك الجابها دغشية
وزى زغرودة البطن الكبارية
مرق من شامة القمرة
مهيقت بى وداعة الله
ومقدم بالعديل يبرا
تعالوا ابشروا ياجنيات
شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
مزارع بات على عشقين
تراب بلدو وسماح فوق بت مزارعية
وبقول غنوات

لله درك يا محمد,ربنا يحفظك

ود الخير موش قلت ليك امس
في ناس لو ادوها تلسكوب ما بتشوف

[Hassan Farah]

المشاركة الأصلية كتبت بواسطة بابكر عباس

صلاح كرار سألوهو بيتك بتاع الرياض بنيتو كيف وانت موظف؟ قال ليهم : من سنة 77 لحدي 80 كنت مغترب بالإمارات.
الشي الأنا متأكد منو انو نافع لحدي سنة 89 كان ساكن في بيوت الجامعة بشمبات ولحدي هسع الدكاترة الحفروا معاهو البحر ما عندهم بيوت إن شاء الله طابق بالأطراف!!

----------------------------------------------------------
غايتو يا بابكر الشاب دا ود امو وابوهوعفارم عليه...فضح الحرامى نافع واسرته وفسادهم بالدلائل الثابتة...بس هو نافع براهو..اول امس مصطفى عثمان اسماعيل بعضمة لسانه ذكر فى لقائه مع الصادق المهدى انه قبل انقلاب الانقاذ كان ساكن فى الكلاكلة.. يا ربى هسع ساكن فين..