العلاقة الزوجية .... تحت المجهر

[محمد مصطفي]

قال الله تعالي { وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً } سورة الروم 21
سيتناول هذا البوست العلاقة الزوجية السودانية بكافة اشكالها طبيعتها ... وكيفيتها
التقليد والحداثة وبعض الاشياء الدخيلة في عصرنا هذا ....
.
.
اذا اردنا تناول العلاقة الزوجية من بدايتها ... الزواج وكيفيته وظروف الارتباط
ساذكر بعض الحالات التي بناء عليها يتم الزواج هذا طبعاً علي المستوي الخاص كسودانين
1 ـــــ زواج ابناء العمومة او الاقارب بصورة عامة ... ( التقليدي )
ما زالت حتي عهدنا هذا في كثير من العائلات السودانية يعيبون فكرة الزواج من خارج نطاق الاسرة الا اذا لم توجد فتاة حينها في عمر الزواج
بالنسبة للزوج اذا لم يجد فتاة من بنات اعمامه يختار من ابناء خيلانه او عماته او خالاته والاقرب ثم الاقرب حتي يجد زوجته
2 ــــــ الزواج العاطفي .. الذي يكون ثمرة لعلاقة عاطفية بين اثنين جمعتهما ظروف الحياة ودروبها
في بداية طلب الزواج قد يعاني احد اطراف العلاقة او الاثنين معاً
اغلب الاسر السودانية دقيقة جداً وحذرة في ما يخص الانساب التساؤلات الواردة ستكون
من اي عائلة هو\ي ؟ القبيلة ؟ العمل ؟ المؤهل العلمي ؟ ثم قبل كل هذا كيف تعرفتم واين التقيتم؟
3 ــــــ الزواج التصحيحي : ان صحَت التسمية ... وهو تصحيح لعلاقة غير شرعية تمت بين الزوجين فارادا اهليهما الستر لكلٍ
غالباً يكون مثل هذا الزواج اذا نتج عن العلاقة طفل او جنين ما زال يسكن رحم امه
4 ــــــ الزواج التعويضي ... في حال وفاة الزوجة الاولي يتم تزويج الزوج باختها لاسباب انسانية حتي يتربي الابناء علي يد خالتهم
وكذلك في حال وفاة الزوج يتم تزويج ارملته من الاخ حتي يربي ابناء اخيه
انها حالة من حالات الزواج لكنها قد تكون قاسية جداً احياناً
5 ـــــ الزواج التخييري .... هذا الزواج شائع جداً بين المغتربين بعضهم في غيابه عن البلد قد يصعب عليه اختيار الزوجة المناسبة فيترك الامر لامه واخواته
ومنهم من هو داخل البلد ويتزوج ايضاً بهذه الطريقة
.
.
هنالك عدة حالات قد لا استحضرها الآن لكن اعلاه هي الحالات الشائعة
مسميات حالات الزواج وجدتها هي الاقرب للمعني ... لذا تحتمل التصحيح
.
.
حنواصل انشاءالله

[محمد مصطفي]

{ وَعَاشِرُوهُنَّ بِالْمَعْرُوفِ } النساء ـــــــ 19

المعاشرة بالمعروف في القول والفعل وتشمل العشرة الجنسية التي سنتحدث عنها لاحقاً
لعل اكثر ما يدخل السرور علي قلب الزوجة ويبسط اساريرها هو الكلام الجميل والرومانسي
التعليق علي اشيائها وابداء الاعجاب والتعبير بصورة واضحة وصريحة
بملابسها بتسريحة شعرها بجمالها بترتيبها للمنزل بنظافتها .... الخ ...
علي ان يكون الكلام المعسول حاضراً
التعبير عن الحب والمشاعر تحتاجه الزوجة قولاً في اغلب الاحيان وليس فعلاً
بالمقابل قد يحتاج الزوج التعبير قولاً من زوجته كشكره في حال تقديم هدية لها
التخفيف عنه الاهتمام بكل ما يحبه والابتعاد عن ما يكره خصوصاً اذا كان الوقت لا يناسب الخوض في اي حديث يثير غضب الزوج
قراءة ملامح الوجه ضرورية في حال العلاقة الزوجية
من الضرورة ان تتبع كلمة بحبك نهاية المكالمة ... الخروج من البيت ... السفر ... زيل الرسائل
الزوج السوداني عموماً فقير في عطائه المعنوي تجاه زوجته والزوجة كذلك
اعتبار الزوجة ان هدية زوجها اليها هو واجب لا يستحق الشكر عليه والامتنان
يصيب الزوج بخيبة امل غير ملحوظة ولربما يكون ينتظر بعض الكلام الجميل من زوجته دون ان يعلم
بالنسبة للزوجة السودانية غالباً خيبة الأمل ان تأخرت عنها ستأتي مباشرتاً عقب وضع مولودها الأول
المجتمع السوداني يحتاج لتثقيف عالي حتي تدرك الاجيال القادمة كيفية العلاقات الزوجية السليمة
لاننا ما زلنا نتعلم بالفطرة والتقليد والملاحظة ... حتي مناهجنا الدراسية لم تتطرق للعلاقة الزوجية كمادة تستحق ان تُدرس ضمن المناهج التعليمية
نتج عن ذلك :
زوج يلوذ بالديوان ( صالون الرجال ) يقضي فيه ما تبقي من يومه بعد عمله
علاقته بزوجته علاقة جنسية يرنو اليها بعد نوم الابناء وهدؤ البيت من الحركة
آخر يقضي جُل يومه بين العمل والنوادي وتجمعات الصحاب
وآخر يأتي من عمله علي الغداء لحظات ويؤذن المغرب يذهب للصلاة بالمسجد ويعود عقب صلاة العشاء
بعضهم
أذا خرج هو وزوجته بمشوار تجده يسبق زوجته بمسافة كمن يهرب منها

.
المعالجات :
.
.
ستأتي لاحقاً

[أسعد]

يا صاحبي اعرض عن هذا اني لك من الناصحين
والعب بخطة الجدادة الحاضنة زي ما بتقول حجة فاطنة او اي كان اسمها

[أسامة معاوية الطيب]

المشاركة الأصلية كتبت بواسطة وجدي الأسعد الأسعد

يا صاحبي اعرض عن هذا اني لك من الناصحين
والعب بخطة الجدادة الحاضنة زي ما بتقول حجة فاطنة او اي كان اسمها

ياخي دا بوست تحفة
العلاقة الزوجية ؟ ويدير البوست اتنين من العذّاب!!!
وشنو كمان ؟ تحت المجهر
الله قادر

محمد مصطفى ازيك ياخي ... بالله انت وصلت العلاقة الزوجية ؟ ياخي نحن طولنا من بعض معناها

[أسعد]

المشاركة الأصلية كتبت بواسطة أسامة معاوية الطيب

ياخي دا بوست تحفة
العلاقة الزوجية ؟ ويدير البوست اتنين من العذّاب!!!
وشنو كمان ؟ تحت المجهر
الله قادر

محمد مصطفى ازيك ياخي ... بالله انت وصلت العلاقة الزوجية ؟ ياخي نحن طولنا من بعض معناها

يعني الزواج ما يتكلموا عنو الا المتزوجين؟
ما ياهو دا الاستاذ عبدالمجيد عبدالرازق اعظم صحفي رياضي بالسودان
في زول قال ليهو بغم

gap

[أسامة معاوية الطيب]

المشاركة الأصلية كتبت بواسطة وجدي الأسعد الأسعد

يعني الزواج ما يتكلموا عنو الا المتزوجين؟
ما ياهو دا الاستاذ عبدالمجيد عبدالرازق اعظم صحفي رياضي بالسودان
في زول قال ليهو بغم

gap

افحمتني لكن
طيب اقول ليك حاجة خلاص ما تتزوج زاتو بس ورينا نحن نسوي شنو

[أسعد]

المشاركة الأصلية كتبت بواسطة أسامة معاوية الطيب

افحمتني لكن
طيب اقول ليك حاجة خلاص ما تتزوج زاتو بس ورينا نحن نسوي شنو

ههههههههههههههههه
حاقد

[رأفت ميلاد]

المشاركة الأصلية كتبت بواسطة أسامة معاوية الطيب

ياخي دا بوست تحفة
العلاقة الزوجية ؟ ويدير البوست اتنين من العذّاب!!!
وشنو كمان ؟ تحت المجهر
الله قادر

محمد مصطفى ازيك ياخي ... بالله انت وصلت العلاقة الزوجية ؟ ياخي نحن طولنا من بعض معناها

موش بقولوا الـ على البر عوام .. خليهم يعوموا لا من يغرقوا

التعديل المداخلة كانت على الأقتباس الغلط

[رأفت ميلاد]

سلامات يا محمد مصطفى سلامات

ياخ عندى رغبة أفحمك

أولاً القصة دى محتاجة لآيات والله .. غير بتخليك تمعن فى الذكورية ما بتعمل حاجة .. لأن الذكورية هى أس معضلة الزواج .. ما تنخلع وركز معاى براحة وواحدة واحدة عشان تصلك فكرتى

الذكورية جزء من العنصرية .. لآن الذكور ممعنين فى أنهم مرتبة أعلى ألإناث .. التخلص من العقدة دى ساهل جداً .. هو الأعتراف بـ(النوع) بوجود كامل .. بمعنى .. المرأة تظل مرأة بكامل خياراتا وتكون مقبولة لدى الذكر بسلبياتها وإجابياتها .. بنفس القدر البتحفظ فيهو المرأة (مرجلة) الرجل .. كدة ما واضح موش

أجيك بطريقة أسهل .. المرأة بتفكر فى العاطفة غير طريقة الرجل .. بتحب الراجل يهنشكا ويدلعا .. فمافى سبب يخلى الراجل يشوف ده كلام فارغ ومنتشة نسوان .. وهن ما طالبات قاسى .. وكان جربتو تلقاهو لذيذ شديد .. يعنى كل ما تحتك فى حتة أقطع ليك قدوم .. أنت ما خسران .. ما تحوشوا لى بالليل .. ده براهو وده براهو .. وكلمة (أحبك) ما صعبة .. بتنزل ليك أنزيماتا كلها .. والله تلقى نفسك ذاتك أدمنتها من الخير البنزل عليك منها .. والهدايا ياخ أهم شيى خاصة فى الأعياد .. طبعاً طوالى فكرت فى الضحية .. لا ياخ أهم عندهن أعياد الميلاد والزواج والفالنتين وما شابه .. والمطبخ خليك فى الخدمة .. ساعد فى التحمير والغرف ولملمة الصفرة ونشيف العدة .. خلى بالك من (ساعد) دى .. ما تعمل الكمندان وتخليها تتكل عليك عشان هن أستعماريات شديد كان لقن فرقة ..
وكلو كوم ولامن يكونن عيانات كوم .. تتكلا براك كان تقيلا ما بتتشال .. وتدى الدوا بيدك وتجيب الأكل لى عندها وتحنسه عشان تاكل زى الطفل كده

جرب الوصفة دى وتعيش فى نغنغة .. طبعاً يستحيل تنحل من النقة مرة واحدة دى برضو فى طبعن ..مزاج المرأة بتقلب بسرعة لعوامل نفسية وبيولوجية .. أنت ما تنكر عليها ده لأنو واقع .. بس الوصفة دى بتقلل الخساير شديد .. وأهم حاجة البوسة .. سرها باتع

[سمراء]

دى اسمها هضربات ماقبل العرس ..ياعريس !
يازول العرس ده توافيق من ربنا ..اسمع منى انا عن تجربة
لا الحب لا غيرو بضمنو ليك نجاحو ، قول لى ليه ؟
ليه ؟
لانو المعايشة عن قرب هى الفيصل بين كل اتنين ، يعنى لو ما اتقفل عليكم باب
ودارت بيكم رحى الدنيا المابتجامل دى ، ماحاتعرفو ولا تحكمو باى شى غائب !!

اما موضوع بوستيك العن انواع الزواجات العندنا هنا فى السودان ....فحدث ولا حرج

سمعتة بالسرية !!.
او زواج السرارى ؟ بالعربى ماملكت ايمانكم ؟

اهو دا الانا لحد الان ماواقع لى ابنوووووب

بتابع معاك ياسجم ...ومشتاقون

[سمراء]

اقتباس:
المشاركة الأصلية كتبت بواسطة رأفت ميلاد

وكلو كوم ولامن يكونن عيانات كوم .. تتكلا براك كان تقيلا ما بتتشال .. وتدى الدوا بيدك وتجيب الأكل لى عندها وتحنسه عشان تاكل زى الطفل كده

والله يا انتيمو افحمتو ...
هو بالله انتو بتعملو القصة دى بدون احساس !! يعنى بياتو فهم مثلاً ؟
لو خوف تبقى مشكلة ؟
ولو بحكم العشرة ...مقبولة الا حد ما ..

بس بتخيل لى لو باحساس بتكون اجمل واروع ..
يا انتيمو نحن طلاباتنا ماصعبة ..ولا بتغلبنا شغلتنا ولا خدمتكم
بس كلو العايزنو الاحساس ...والتقدير ما اكتر
بعديها نخدمكم برموشنا

وجع

[همس الشوق]

حننتني والله يا محمد






لكن يا رأفت مااااا لقيتك

[البديري]

!

[أسعد]

محمد مصطفى يا صاحبي اني لك من الناصحين Again
كلام عمك رافت دا فطو وما تشتغل بيهو الشغلة
كلام عمك رأفت دا زي كلام المغتربين القدماء gap
تلقى المغترب القديم يشبكك يا ولدي في الغربة دي اهم حاجة سمعتنا
وما تعرف شنو ووووروووك وروروررررك والامانة والاعتزاز بالنفس وما تنكسر لي زول وشنو وشنو
كاتلوج كدة لو اتبعتو ح يخليك مغترب قديم في المستقبل البعيد
عشان تنصح غيرك بنفس الكاتلوج
في حين انو ممكن ترمي الكاتلوج دا وراء ضهرك
وتدقش السوق وتلعب مع المصلحة لحدي ما تظبط امورك وتتخارج من بلد الغربة الظالم اهلها

اها نفس الفيلم كلام عمك رأفت
شبكك ما عارف تبتسم ليها ولا تأخر قدوم اليوم الى الغد وهشتكا وبشتكا
صرف ليك كراسة شروط ممكن تحولك من زوج إلى عبد مغلول
فعندك خيارين لا ثالث لهما
يا تطبق كراسة شروط عمك رأفت دا وتكون عبد شايل الكراسة فوق راسه لحدي ما يديها عريس جديد
يا كمان ترمي الكراسة دي وراء ضهرك وتبرم شنبك وتحمّر عيونك وتنشف يدك
وتضبح ليها الكديسة والكلب والجدادة والارنب والسخل والخروف والعجل والفيل زاتو

اووووووعك تفرط في حريتك يا صاحبي
بعدين انا لك من الضاحكون gap

[أسعد]

بعدين الحياة دي فيها ثلاثة مراحل متشابهة ومتطابقة تطابق وقع الحافر علي الحافر وهم (مرحلة الاغتراب ومرحلة الزواج ومرحلة الموت)
وزي ما قلت قبل كدة في المنتدى دا انو في الحياة دي تلاتة يظهرون خلاف ما يبطنون:
الميت فهو لا يستطيع ان يخبر الاحياء بتبعات موته
والمغترب فهو يلبس ويتعطر ويقشر ليظهر خلاف ما بداخل جيبه
والمتزوج فانه يظهر سعادته من الزواج خلاف ما يبطن من تعاسة

وانت يا صاحبي زول عشت تجربة الاغتراب وعركتها وخبرتها
اها بس الزواج دا زي الاغتراب بالظبط والربط كدة
ظاهره فرحة برؤية بلاد جديدة وباطنه فراغ وعذاب وضياع للكرامة gap