لــــــــــدن

[حسين أحمد حسين]

لــــــــــدن

لو مره وِزِّينِك رطن
وامطر سماكِ على غناى
ما كان وراك خد المواويل إتعطن
وين إنتِ يا وجعى وشفاى
أنا قلبى بالشوق إتبطن

وين يا مصابيح يا بروق
فجيلنا فى العتمات سكن
مات بدِّد الليل يا شروق
لو نصحا لا ويل لا محن

لا متين أغنيك يا صباح
دفتر غناى مليان شجن
مات بِق من الوجع، الجراح
مَزِّقْ حصار هذى الدجن

مفجوعه فيك ِ الأُغنيات
بالحسرة والأَسى والحزن
وين إنتِ يا ست البنات
ما ضاع وراك كل الزمن

حجيت بِك الأَطفال حُجا
متوسم الفال الحسن
ما جيتِ لما الليل سجى
وغتْغتْ عويناتنا الوسن

أنا نفسى اغنيلك نشيد
يمدح جمالك يا لــــــدن
أُنشودة من بيت القصيد
تِتماهى فى الروح والبدن

لكنِّى لو قُتْ يا حبيب
صورة البلد، صورتك يجن
راودتَ طيفك بالنسيب
إتمارا فى عينىْ وطن.
------

[عكــود]

المشاركة الأصلية كتبت بواسطة حسين أحمد حسين

لــــــــــدن


ما كان وراك خد المواويل إتعطن



أنا قلبى بالشوق إتبطن


------

سلام يا حسين،

خد المواويل البيتعطِن، والقليب البيتبطِن!

دلّلت الخيال عندي والله.

تسلم ياخي وتسلم لدن.

[لنا جعفر]

أنا نفسى اغنيلك نشيد
يمدح جمالك يا لــــــدن
أُنشودة من بيت القصيد
تِتماهى فى الروح والبدن

حسين اخوي مساك خير ومودة...
عندي أُختي اسمها لُدن بضم اللام ...وزولة بتشبه
رسمك ده ....وعيد ميلاد لُدن قريب
فياخ اسمح لي اكتب ليها الحتة الاقتبستها منك دي
في كرت المعايدة وبقول ليها دي من اخونا حسين
يسلم قلمك وروحك الحلوة دي
ولك وافر التقدير والأحترام

[خضر حسين خليل]

انا برضو يا حسين اخوي
عايز اهدي لي لدن فردتي
ان امكن ذلك
ومشكور علي النص السمح ده

[حافظ حسين]

المشاركة الأصلية كتبت بواسطة لنا جعفر

حسين اخوي مساك خير ومودة...
عندي أُختي اسمها لُدن بضم اللام ...وزولة بتشبه
رسمك ده ....وعيد ميلاد لُدن قريب
فياخ اسمح لي اكتب ليها الحتة الاقتبستها منك دي
في كرت المعايدة وبقول ليها دي من اخونا حسين
يسلم قلمك وروحك الحلوة دي
ولك وافر التقدير والأحترام

حقيقة البطن بطرانة
لدن يا صحاب عينها مقشوشة بكحل المحبة و الحنين
أرق من النسمة
و أجمل من خيال شاعر نبيل
تلتقيها يوم و تخال انك تعرفها لسنين
كل الود ليك يا لدن .....
لنا كيفك؟
أستاذ حسين شكراً علي الإبداع
و الله جابني العنوان و لقيته
عنوان علي متن
شكراً يا أستاذ انك جملت مساءاتي الكئيبة

[لنا جعفر]

المشاركة الأصلية كتبت بواسطة خضر حسين خليل

انا برضو يا حسين اخوي
عايز اهدي لي لدن فردتي
ان امكن ذلك
ومشكور علي النص السمح ده

نعرف ياخدوري ؟؟؟ لدن اختي دي كائن جمييييييل
كفاية انها مستحملاني
زولة بي دستة شموس....
بس اياااااااااك تقول ليها الكلام ده عشان ماتجهجه باكاتي
شفت البت دي سمحة كيف؟؟؟
ثابتة وحقانية ونسمة وقدامية وهميمة وشايلانا كلنا..
الله يخليها لي نور عيني ......
واللهي ياخضر تنقل الغزل ده البد ليك
ده بس للناس الهنا...
عشان يعرفو انه عيلتنا فيها ناس مسالمين
بهناك بنصرف ليها اوامر بس..
تسلم ياخضر لينا الاتنين

[لنا جعفر]

المشاركة الأصلية كتبت بواسطة حافظ حسين

حقيقة البطن بطرانة
لدن يا صحاب عينها مقشوشة بكحل المحبة و الحنين
أرق من النسمة
و أجمل من خيال شاعر نبيل
تلتقيها يوم و تخال انك تعرفها لسنين
كل الود ليك يا لدن .....
لنا كيفك؟
أستاذ حسين شكراً علي الإبداع
و الله جابني العنوان و لقيته
عنوان علي متن
شكراً يا أستاذ انك جملت مساءاتي الكئيبة

كيفي ؟؟؟
كنت كويسة قبال مداخلتك بتاعت المطاعنة دي
العنوان ع متن وانت على شماتة ومقارنة
البت لُدن ستي وتاااج راسي
حبيبة وقريبة وشايلة همنا ...
بس انت عايز تقول شنو في حتة العيون والبصل؟؟
ياااااادي المحاور والدواير ياحافظ...
أمجد فريد عندو حكاية لزيزة عن لُدن اختي
لمن مسكوها في الشمالي اثر مظاهرة
النبي خليهو يحكيها ليكم
ولُدن تستاهل خير الدنيا كلو وفي قلبها حنية العالم
قلت البطن بطرانة؟؟؟سمح ياحافظ
---
مشتاقييين ياحفوظ...
اظهر وبان
وشكرا للنفاج ده يااخونا حسين
جميت روحنا

[ناصر يوسف]

المشاركة الأصلية كتبت بواسطة حسين أحمد حسين

لــــــــــدن



وين يا مصابيح يا بروق
فجيلنا فى العتمات سكن
مات بدِّد الليل يا شروق
لو نصحا لا ويل لا محن

ياخي هي فَجَّت ليك كل عتمات الدنيا وهج وضي ،،،،

حسين يا أخوي شكراً لحروفك السمحة دي ياخ
شكراً ليك بالجد

[الجيلى أحمد]

قريتا لندن
ولقيت المسألة كويسة

شكرآ ياأخى على تمجيد الفضاء

[محمد مصطفي]

ياخ نص تريان ورويان ... يجمل الوقت كله
لك التحية يا حسين

[حسين أحمد حسين]

المشاركة الأصلية كتبت بواسطة عكــود

سلام يا حسين،

خد المواويل البيتعطِن، والقليب البيتبطِن!

دلّلت الخيال عندي والله.

تسلم ياخي وتسلم لدن.

أُستاذنا أباذر،
الشوق والسلام مطبوق.

وألفُ تحيةٍ وشكر على الإطلالة الودودة، وإنْ شا الله مُشهادك سرور فى الدنيا والأخرة.

سلِمتَ وسلمَتْ لَكَ لَدَنُك.

[حسين أحمد حسين]

المشاركة الأصلية كتبت بواسطة لنا جعفر

حسين اخوي مساك خير ومودة...
عندي أُختي اسمها لُدن بضم اللام ...وزولة بتشبه
رسمك ده ....وعيد ميلاد لُدن قريب
فياخ اسمح لي اكتب ليها الحتة الاقتبستها منك دي
في كرت المعايدة وبقول ليها دي من اخونا حسين
يسلم قلمك وروحك الحلوة دي
ولك وافر التقدير والأحترام

أهلاً بِبِنتِ القلوب،
الأديبة الأريبة لنا جعفر.

ياااااااا،

يا لهذى السنين العواجيف، التى تستطيل حواجزاً بين سُمَّارِ التثاقفِ والموائدِ الشفيفة. فقد كنتم، ومازلتم، فناراتٍ شواهق لسفينِ التيهِ، والبين - بين، والفكرة الحائرة. فشكراً على المثابرة والنبل.

ما أنتِ من يستأذن يا أختى الكريمة، فافعلى ما تشائين بنصٍ يتزين، بين ظهرانيه، بحضورِكم البهىّ. ومِن لَدَن لِلُدَن وردةُ كِستناء، وشمعاتُ عمرٍ مديد، وهبى بيرث دــيْ لُدن.

المعزة التى تعلمين، ولا تعلمين.

[حسين أحمد حسين]

المشاركة الأصلية كتبت بواسطة خضر حسين خليل

انا برضو يا حسين اخوي
عايز اهدي لي لدن فردتي
ان امكن ذلك
ومشكور علي النص السمح ده

تحياتى للعزيز خضر حسين خليل،
حضورك شرف يا دكتور.

شكراً على إستحسانك لهذا النص الذى لم يكن ليستحق كل هذا الإطراء لو لا تداخلكم اللطيف هذا، ولو لا إرتباط النص بالإسم لَدن/لُدن، ويا للكيمياءِ بين الإسمِ والمسمى.

ويا سيدى أنت مأذون بأنْ تفعل بالنص ما تشاء.

مع خالص الود.

[حسين أحمد حسين]

المشاركة الأصلية كتبت بواسطة حافظ حسين

حقيقة البطن بطرانة
لدن يا صحاب عينها مقشوشة بكحل المحبة و الحنين
أرق من النسمة
و أجمل من خيال شاعر نبيل
تلتقيها يوم و تخال انك تعرفها لسنين
كل الود ليك يا لدن .....
لنا كيفك؟
أستاذ حسين شكراً علي الإبداع
و الله جابني العنوان و لقيته
عنوان علي متن
شكراً يا أستاذ انك جملت مساءاتي الكئيبة

أديبنا الأُستاذ حافظ حسين،
تحياتى.

تعرف يا حافظ، أعرف من النساء عدداً مِمَّن تسمين بهذا الإسم، وكلُّهُنَّ يشتركن فى الصفات التى ذكرتَ. ولا أدرِ حقيقةَ هذا الأمر. وكل ما أعرفه، على تواضعِهِ، أنَّ الأسماء نوايا حسنة وأشواق ينشدُها الآباء فى أبنائهم، بعضها يصدق وبعضها يخيب.

ويا سيدى ألف شكر على التقريظ.

خالص الود الإحترام.

[طارق صديق كانديك]

المشاركة الأصلية كتبت بواسطة حسين أحمد حسين

لــــــــــدن

لكنِّى لو قُتْ يا حبيب
صورة البلد، صورتك يجن
راودتَ طيفك بالنسيب
إتمارا فى عينىْ وطن.
------

يا لها من لدن

هكذا هو حرفك يا سيدي حين يختال مغرداً.

وأنا أقرأ مكرراً هذه الأبيات اللادنة، قفزت الى خاطري رائعة الشاعر سيد عبدالعزيز (نظرة يا السمحة أم عجن لو كان قليل تبري الشجن)، أهديها لك وللجميع بصوت الفنان الشجي نميري.
[media]http://www.youtube.com/watch?v=KJdRFGwgKAY[/media]
 


ثم إني وجدتُ في المقطع أعلاه من القصيدة، أن استبدال كلمة (صورتك) المفردة ب (صُوَرِك) الجمع أدعى للوزن ، أو لعلّ ذائقتي تقاصرت عن استيعاب الوزن.

لك المحبة لادنة ونضيرة