اغاني .. واغاني

[احمد زين]

حسب الاعلان في النيل الازرق
حلقة اليوم عن أحمد الجابري


اعتقد انها حا تكون حلقة مميزة
واتوقع تميز نجم نجوم الغد أحمد مأمون

[قيقراوي]

المشاركة الأصلية كتبت بواسطة آيات

..

المهم ..مصعب محمود عبد العزيز صوتو سمح ..بس محتاج شغل كتير

لكن هدمو اللابسا .. أتقول من لبسا .!!!. طوالي بي برشوت نزل في الأستديو ومالاقاهو زول قاليه عينك في راسك

فهيمة .. دي بالجد ماقادرة أسامحا على أغنية عثمان حسين .. عملتا كلها دلع وحركات يدين .. وقطعتا طلعت روحا

فعلاً يا آيات البوتنشيال لدى الود كبيرة .. عندو جزء من تفرد صوه ابوه..

الغريبة الناس لمن طلع محمود همسلف برضو سخروا منو واستهجنوا اسلوبو (الهرمنة) .. وقيل كرهوه عديل كدا

يا حواتة


خلوا رقراق لعبور الضوء
المافي شنو










-----

اما بخصوص (فخيمة) يا آيات فانا سامحتها غايتو ..

سامحتك .. سامحتك

وهكذا

شكراً يا زين .. على الخبر الزين

الجابري احد اعمدة الطرب الاصيل

[طارق صديق كانديك]

المشاركة الأصلية كتبت بواسطة احمد زين

واتوقع تميز نجم نجوم الغد أحمد مأمون

ود الزين عليك الله ما عصرت على التميز؟

ياخي ما ممكن تقعد تنتظر متين حيطربك الزول البغني ده. ترديد خالي من أي فن. الله يرحم الجابري، والتحية لصديقنا الجميل محمد زمراوي

----

زولك ده لحقتو ليك معتز صباحي باطمئنان، عليه اتباع وصية أخونا أب رويس قيس شحاته،ويشوف ليهو شغل بي ايدو

[طارق صديق كانديك]

المشاركة الأصلية كتبت بواسطة آيات

فهيمة .. دي بالجد ماقادرة أسامحا على أغنية عثمان حسين .. عملتا كلها دلع وحركات يدين .. وقطعتا طلعت روحا

سامحيها ياخ، الدلع وحركات اليدين، لم يفسدن للأغنية طرب واحد،كلو كان كاش داون

رمضان كريم يا آيات

[نبراس السيد الدمرداش]

قيقتنا يا قيقتنا
رمضانك كريم ودايما عامر ولامي الحبان
متابعه البوست دا يوميا بجيهو بعد نهاية الحلقات

مدرسة احمد الجابري دي من اصعب المدارس
وامتحان عديل والله
مصطفى السني مافي كلام
رغم انو غنى كوبليه واحد من حبيبتي بستلطفا
الثلاثي فاطمه وزحل ومنى بعاينو لمصطفى بدهشه بالغه ادتني احساس
انهن بيتسآلن الزول دا بغني كيف والحاجه دي كانت في حلقة اول امس برضو
ولا يكون اعجاب من نوع آخر

ودالمامون ما قصر مع الرسايل
سيد الاسم ما سمعتها

[قيقراوي]

غايتو مبدئياً كدا اتوقعوني في النسخة العاشرة بي جوة
المافي شنو!؟











----1

بيو كل سنة وانت طيبة يا صديقة

جاملت ود المأمون غايتو!!

[نبراس السيد الدمرداش]

يا اخوانا معتزصباحي دا بصحَو يعني
يا قول ساره اللهم لا تمحنا لا تبلينا
اصلا ما بطربني بس قلت كدي انتظر اسمعو في البلوم حسب راي ود الشيخ
بس والله غلبني كتر علي

يا قيقتنا ما قصر دي يعني عمل البقدر عليهو
وضحى بالجنين عشان الام تعيش
اهن انو بننتظر الموسم العاشر

[قيقراوي]

سيد اللسم .. سيد اللسم يا سبنة ياخي

الحالة عمك قدور غششكم ليها .. ولقنكم بذاكرة عصافير في خشمكم دا












-------

يا نيبو مشكلة النسخة العاشرة ح تكون نفس مشكلة (المسخة) التاسعة (التصحيف قصدي!)

الا ما يكون فيها حلقة عن الجابري ..
مدرسة الجابري الغنائية بتجلع الغنا ..

وانا سبنا ديل خجولين شديد ..
طبعنا اصلو كدا!!

حلقة الجابري في (المسخة) التاسعة لاغاني واغاني ..

لم ينجح أحد!!

[خالد غالي]

عمة حمرا وسروال طويل احمر

ههههههههههههههههههههه

[خال فاطنة]

الحلقة جيدة جداً
نسرين الهندي كانت نجمة الحلقة، أدت الغنية بثبات و إحساس عالي...

و الله الناس لو خلت الإنطباع (زي حبيبنا خالد غالي) معتز صباحي ما قصر و كان الأداء رقم 2 بعد نسرين الهندي.....

[زول الله]

ذكرتوني الملحن ذرياب عندما اتى ومعه محمودعبدالعزيز الى استقبال الاذاعة السودانية في الثمانينات ليستلم شهادة إجازة صوت حوته او تقرير اللجنة فوجد الرد كالآتي(بعد الاستماع الى الشاب ..... وجدنا انه "فارِق تون" الشيء الذي يضر بأداء الاغنية وووو...الى ان قالوا: عليه التمرن جيداً والعودة بعد ستة أشهر)
فدخل الملحن ذرياب غاضباً الى ستديو مانديللا حيث اللجنة مجتمعة لتسمع متقدمين آخرين وقال لهم بالحرف: انتو ناس زمنكم فات والولد دا بغني لناس غيركم وزمن غير زمنكم ماحتفهموا غناهـ ابداً واتحداكم محمود دا حيكون هو "الحوت" الحيبلع ليكم السمك العاجبكم دا ويخليكم في السهلة.
وقد صدق

بالمناسبة كانت اول مرة أسمع لقب "الحوت" لمحمود






اقول قولي هذا واستغفر الله لي.................

[مهند الخطيب]

لالالا الليلة لن نرحم أحدا....

والله يانسرين بالغت مع سيد الاسم وماتسمعي كلام قدور وعمنا كامل ، ديل والعلم عند الله مجهجهاهم الحنة الحدوت نص الاصبع دي ، جوبكتيها وعرت صوتك ...غني على قدرك عليك الله..

معتز صباحي والله لبستك خطيرة ، لا جد خطيرة اي نعم بقتك بتشبه الافغان البشتون لكن كمان ندعم الغريب الجديد ..بس عليك دينك ترخي موضوع البلوم ده شوية تراك ذبحتنا..

فرفور بصراحة كان استماعي محايد قصاد ملك الطيور وزحل الغنتا معاك دي شكلها لسة مالقت لونا ياعملات ود الشيخ بس عليك الله لمن تقيف على حيلك عشان تغني مع الملا معتز اتأكد انو سوستتك مافاتحة ﻷنو موضوع الاناقة زي ماقال احمد زين مهم...

مصطفى السني.....لاتعليق ياخي...لاتعليق

ود المأمون ده منو؟

[طارق جبريل]

اذكر في بداية الثمانينات كان في برنامج «مطرب وجماهير»
كانت الحلقة فيها سيف الدين الدسوقي وأحمد الجابري
وأنا حينها في المتوسطة .. شد انتباهي الحوار بين الجابري وسيف الدين الدسوقي
وانتبهت اكتر لمن سيف الدين الدسوقي القى قصيدة «بدون رسائل»

مافى حتى رسالة واحدة ..
بيها إتصبر شوية
والوعد بيناتنا إنك ..
كل يوم تكتب إليّ
هل يجوز والغربة حارة ..
بالخطاب تبخل علىّ ؟

لما آخر مرة شفتك ..
قبل ما أودع وأغادر
كنت حاسس إنى خائف ..
إنى متردد وحاير
داير إتصبر أمامك ..
داير أضحك ..
ومانى قادر !
بس دموعك لما فاضت ..
ضيعت صبرى الشوية
وصحت موعدنا الرسايل ..
وين رسايلك ؟
وين خطاباتك إلىّ ؟

وصرت بعدك يا حبيبى ..
ذرة فى بحر الزمن
بعت للتجار (الجابري بيقول لـ«للآلام») مواهبى ..
بعتها بأبخس تمن
وحشة ما بتعرف رسايل ..
وغربة عن أرض الوطن
بس أمل واحد بعيشو ..
لو رسالة تصل إليّ
بيها أطمن عليكم ..
وتنقذ الموقف شوية

من خطابي أظن عرفت ..
آيه مكانتك فى فؤادى
أنت يا فجر المحبة ..
تستحق شوقى وسهادى
أنت صورة ماضى أبيض ..
ولوحة بتمثل بلادى

بس حرام تبخل علىَّ ..
وتنسى ما ترسل هدية
حتى لو كلمة أحبك ..
في خطاب مسرع إليّ

منذ ذلك التاريخ ورسخت هذه القصيدة في ذهني وحفظتها كما ألقاها سيف الدين الدسوقي..
ولمن غنى الجابري «سيد الاسم» لي كامل عبد الماجد
اتسمرت في مكاني وكملت السهرة ومن يومها ابتدأت محبتي لغناء الفنان الجابري
واذكر في سنتنا الأولى في الجامعة كنا بنراجع في بعض الشرائح الخاصة بي علم الانسجة
وكان معي اصدقائي أسامة خضر محمد الرضي من بورتسودان والصديق خالد عبد العال حمور والصديق حاتم جبارة عبد الرحمن جبارة
مجرد أن استوعبنا الشرائح وحفظنا محتوياتها بدأت أن في ترديد أغنية «سيد الاسم» وزي ما بيقولوا من يومداك أصبحت «فرمالتنا» أيام الامتحانات
ما أن نستوعب مادة ما جيدا إلا ونغنيها..
مع بداية غناء نسرين هندي اتصل بي من السودان صديقي العزيز أسامة خضر ودن أن اسلم عليه قلت له: قااااااعد بسمع في سيد الاسم
ضحكنا كما لمن نضحك من قبل وأخذتنا الاغنية إلى عالم الزقازيق ولياليه الجميلة..

حلقة اليوم كان فيها الكثير من الشجن..
الجابري فنان ضخم وعنده لونية موسيقية متفردة جدا وله امكانيات صوتية مهولة وقدرة على التطريب ما عادية..
ودة كله انسجم انسجام كبير مع الشعراء الذين اتعامل معاهم وخصوصا سيف الدين الدسوقي وكامل عبد الماجد
يمكن سهولة المفردة عند الشاعرين ودخول الكلمات إلى الوجدان دون تأشيرة مرور سهلت على الجابري عملية التلحين

ود المامون غنى باحساس عالي جدا وفي نظري اجاد لأنه يمكن دي اللونية بتاعة الغناء البتنفع معاهو ويمكن أيضا لي حبه للجابري
صديقنا مصطفى السني يبدو ما كان حافظ الاغنية وبرضو دي ما اللونية البتنفع معاهو عشان كدة كروتنا

نسرين هندي كان بتغني بي احساس عميق واجادت وان اعيب عليها طريقة نطق آخر الكوبلي ما كانت مريحة بالنسبة لي

ما عايز اظلم معتز صباحي بس ما اداني الاحساس اليخليني انطرب او اتقبل منه الاداء
ولو أنه كان افضل من المرة الفاتت بي كثير (يمكن عشان قام وقف وغنى هههههههههههه)

رحم الله الفنان الجابري كان فنان عجيب
ولمن يغني بالعود بيخليك تحلق في عوالم عجيبة كدة
وشفى الله الرائع سيف الدين الدسوقي
واطال الله في عمر شاعرنا كامل عبد الماجد

حلقة الليلة كانت الافضل في نظري حتى هذه اللحظة


تليشة:
يا معتز صباحي والله الصلعة دي فيها جمال ما عادي
أسألني أنا وكم زول هنا مافي داعي نقولهم ههههه
ياخي قاعدين نكسر قلوب العذارى
ههههههههههههههههههههههههههههههههههههههههههه

[خالد غالي]

ياخال فاطنة انا بصراحة ماسمعت معتز، كنت قافل الصوت للآخر
لكن عجبتني جدا العمة الحمرا والسروال الاحمر، وضحكت من كل قلبي

[لنا جعفر]

المشاركة الأصلية كتبت بواسطة خالد غالي

عمة حمرا وسروال طويل احمر

ههههههههههههههههههههه

مساكم خير وعافية يااحباب
ياغالي البرنامج ده فيهو شقين ﻻزمن يتناقشو
اﻷول الميول الطالبانية لي معتز على قول مهند الخطيب حسب لبسو بس ﻻنه ماهبشنا الدماغ لسه:
واللمحة التانية ريحة الشاب عصام كاريكا في لف العمم وعدم القدرة على مواجهة العالم بالصلعة
لفتني زول عزيز لي العﻻقة العكسية بين معتز صباحي والمايك والعﻻقة الطردية بين ذات المعتز والمحلبية
بالمناسبة انا بحب صوت معتز في تجريدو وبحب غناهو .
عموما شغل جربندي في مجملو شغل حلقة الليلة وﻻيرقى لقامة شامة الغنا السوداني ع قول قيقا
وفعلا ياقيقا...مدرسة الجابري لم ينجح احد عدا مصطفى السني صاحبي اللي جادو عليهو بكوبليه واحد وماعارفة حكمة قدور في كده شنو
الناس ديل مجتمعين كانو يدخلوهم معسكر قبال التسجيل عشان يقدرو يتفاعلو مع بعض ويحسو غناهم
يااخونا ود المامون ده موش كان كاسح دفعتو؟؟؟ ويييييين مشى الصوت داك؟؟ ياخ الجابري كان سلس وسااااااهل في الرسايل وﻻكان بطلع صولة بي رهق وﻻبنزل بوعورة.. ود المامون كان سايق تراكتور والعدرا تراكتور من زمن تعاونيات ثورة 17
قيقا ياخ يجازي عملك حنقعد نناهد كده رمضان كلو ونزازي بين بوستك والبرنامج الكانت معظم وجوهو محترفة واتحولت بقدرة قادر لي هواة ربوهم ناس نجوم الغد؟؟؟