مذكرات الف جنيه / الحلقه التانيه

[عزة كمال]

ـ ياخي ما تزحي شويه الضيق شنو ؟؟؟؟؟؟؟؟
ـ انت ياالعشرين عشان كبيرة يعني تعفصي في الناس ؟؟؟؟؟؟؟ ملونه كدة ماعرفناك قروش ولا فركة
ـ كللللللللللللام يا عوض دكام ..... شوفو شوفو كمان الاف بقا ليها صوت تتكلم .... دنيا
ـ معليش مابتدي حريف بس زحي شويه
ـ انا يابت يعني عاجباني الزحمه دي ما ده الكمساري المسلط ده ربطنا بالاستك
ـ اصبرو ياخوانا شويه خلو يعدنا عشان نخلص .
ـاحي يادوب اتنفست انشا الله مايربطنا تاني
ـ وااااااااي تاني دخل يدو يا ربي داير يسوي شنو ؟
بركه الحمد لله ماشالني مع السلامه يا سكينه انشا الله يشترو بيك حاجه سمحه
ـ جلي الشماته كان ما الف جنيه كحيانه كان كتي خمسين كان عملتي شنو ؟؟؟؟؟؟
ـ اتو حارقين رزكم فوق كم
. لكن هي هي براحه يا كمساري انا داير اقع امسكني
ـ مع السلامه انشا الله تقعي في حته سمحه ( دي جزات الشماته )
ـ الكمساري ده غبيان خلاص في زول في الزمن ده تقع منو قروش و مايحس بيها ؟؟؟؟
خلاص مشى ... اسه نسوي شنو ياخيتي بركه الوقعتي معاي عشان تخاويني , ارحكي نزح ما يجينا زول يعفصنا ولا حاجه ارحكي تحت الحيطه دي ..........
ـ جر زح كدا كمان ما ناقصنا غير الكلاب
ـ الله يقطعك صحي كلب ما قروش بتشمشم في شنو ؟؟ اللحمه بتجي بعد يشتروها ما هسي
ـ وووب علي ياخيتي عايني الشماسي داااك لمحنا و قام جايينا اتجهزي لريحه السليسيون
يتبع .......................

[مُهيَّد]

سياحة جميلة وخيال أجمل ....

متابعين عزة ... يديك الف عافية

[abubakr sidahmed]

الف جنيه وتبتهدل كدة ؟؟؟ ثمانية وخمسون جنيها - جنيه ينطح الجنيه - كانت اول ماهية لي كمهندس في حكومة السودان في الدرجة كيو يعني كل مرتبي في العام كان اقل من سبعمائة جنيه...كانت قطعة ارض في الرياض ملك حر باقل من مرتب عام وسيارة موسكوفيتش جديدة في حدود ذلك الرقم ..عندما طالبنا ونحن جماعة من المهندسيين كوننا بنبني بيوتا للناس ونوزع الاراضي بعلاوة سكن اها عينك ما تشوف الا النور وطلعونا شيوعيين وضد ايه ما عارف ووووفي صباح يوم دعانا المرحوم وزير الحكم الشعبي المحلي الي مكتبه وسلم كل واحد منا شهادة بالرونيو" قرر السيد رئيس الجمهورية احالتكم الي المعاش ".. الغريبة احنا لسه كان اسمنا مكتوب بقلم الرصاص يعني ما مشينا القومسيون الطبي عشان ندخل الخدمة المعاشية فلقد كانت خدمتنا لم تتجاوز السنة وكام شهر ..يعني رفتونا عشان كام جنيه اقل من عشرة جنيهات وبقينا مرافيت وخفنا من امن عبدالرحمن ابراهيم الزمن داك ويا طيارة طيري اها لليوم وانتي تبهدلي الف جنيه كدة .... دة كلام ... يعني لوقلنا الف جنيه كانو عملو فينا شنو ...

تسلمي ويسلم الجنيه من كل ردي وتعود اليه سطوته وفنجرته وتعيش الطرادة الحمرا تنور ليالينا ( بس متين ما بلغنا ارذل العمر ونحن في صحاري تابطا شرا ..)

مودتي
ابوبكر

[عزة كمال]

الاخ مهيد زي ما بتقول حبوبتي تجمل ايامك
تابعو لكن ما تزهجو انا خيالي لايوق و نفسو طويل
مع ودي

[عزة كمال]

شكرا لك يا اخ ابكر و قلبي مع كل المرفوتين
انت زعلان على بهدلة الالف ؟طبعا الحمد لله الزول ما بيتبطر على النعمة لكن في الايام دي العشرة الف خلي الاف بتعمل شنو؟
حبوبة زمان كانت بتقول لينا جدكم كان كريم خلاص ....... كان بديني جنيه كامل مصاريف الشهر اسه في الشهر كان مليون كفتك تبوس يدك عدلتا و قلبتا
مشكور

[نادر محمد]

وقام كدة الشماسي شاله ..... أها وبعدين شنو الحصل مامنتظرين وكده

[عزة كمال]

في جيب الشماسي
ـ يابت يانت ريحة السلسيون دي دوختك ولا شنو ؟ صحصحي شوية دا ما وقت دوخان قومي نشوف حنعمل شنو في الورطة دي ؟؟؟؟؟؟؟
ـ خليني خليني راسي لاااااااااااااااااافي ....... والله يا نفيسه شايفاك خمسين كدى سمممممحة و طرفها اتقول بس موس و ريحتها دي اتقول جاية من البنك اسه دي و جنبك حديد فكة كتتتتتتير زي خدمك كدى و راجلك ماشي جنبك هو شنو ماعارفاه زاتو البنك ما طلع زيو ... انت عارفا بكون دا الدولار البقولوه ... وانا دي......
هي هي اصحي عليك الله دا ما وقت خرافات انت مالك راسك خفيف كدى هو بتين الولد دخلنا جيبو ؟ ده حالتو بباقي القطنة لسه ما كب ليها جديد
ـ وانا دي كان شوفتي ودوني البنك ريحوني من القروش القديمة و المعفنه دي .. مشيت هناك لقيت ليك الدنيا غير الدنيا .... ناس نظاف و مقيفين و بعدين شنو ... مافي ناس الف و الفين و الفكة دي بس الناس كبار و راسين من خمسة و انتي طالعة .... انت عارفة انا لازم القى لي عريس من الناس ديل .... انشا الله كان عشرة مطبوقة و.........
ـ يا خوانا دي نصيبة شنو دي ...... دي البصحيها لي شنو ؟؟؟؟؟؟؟؟؟
ـ كدي انشرطها امكن تصحى ,,,,,,,,,
ـ اااااااااااااااااحي دا شنو دا ........ انت منو و الجابنا هنا شنو ؟؟؟؟؟
ــ بعدين بوريك اسه كدى اتطبقي عشان كده وقعتنا بتبقى اسهل ... تعالي نطلع لفوق نشوف الحاصل شنو برة ؟؟؟؟؟؟؟؟؟
ــ اصبري اصبري الولد دخل يدو تعالي جبني عشان يشيلنا سوا ..
ـ بركه الشالنا اهه مودينا وين ؟؟؟
ـ شوفي شوفي مودينا للمرة الكبيرة دي شكلها مشغلاهم .
لا حول الله تاني رجعنا للزحمة دا سوق القروش ولا شنو اخير منو البنك ,يا نفيسة ياختي هم مالم مخشلعاتة كدى و ملونين روحهم و مشخبتين دي قروش ما كويسة ولا شنو ؟؟
ـ انتو جيتو من وين انا ماشفت زول عندو قروش كدى في البلد دي .
ـ انت ماعارفه دي حاجة السكات بتخطف الاولاد و تعلمهم النشل وتشغلهم و بعدين تلم القروش و تشتري بيهم مخدرات تمشيها في السوق .....
ـ وووووب على كمان على اخر عمري بدخلوني في الحرام ........ نسوي شنو يا نفيسة؟؟؟؟
يابت بلا حرام بلا كلام فاضي هناك في قروش كتيره و سمحة ... كان مالقيتي عريس بتلقي ليك ونسة مع ناس ظريفين
ــ اسكتو اسكتو هداك الراجل جا يشيانا
يتبع .........................

[عزة كمال]

شنو يا باش ما تطول بالك معانا شويه ]

[الفاتح]

التحيه ليك عزه..حقيقة شميت دعاش الأستاذ/ الفاتح يوسف جبرا..
جبرا ويستبرا الجنيه السوداني