"شاي" عمتي رقية عبيد الله

[خالد الحاج]

[align=center]"أحب بلاد الله ما بين منعج
إليّ وسلمى أن يصوب سحابها
بلاد بها نيطت عليّ تمائمي
وأول أرض مس جلدي ترابها"[/align]

وطني أحبك رغم طول البعد تحلو الامنيات ،واضعف حين يأخذني الحنين الى المطر والذكريات...
يسمونه مرض الحنين إلي الوطن.. صدقوا والله بوصفه بالمرض.
دار حوار لطيف بيني وحكومتي الموقرة وهي تتهيأ كعادتها في ختام اليوم للنوم:
أها داير حاجة أعملها ليك أنا ماشا أنوم ؟
أيوة بالله يا حاجة شاي كده من يدك الطاعمة .
والحقيقة تقال لم أرفع كباية شاي إلا وذهبت بي الذكري إلي راكوبة عمرانة حنية في منزل العم حسن في الدروشاب وإتكاءة علي عنقريب دون لحاف وشرب شاي لا مثيل له من يد العمة رقية عبيد الله. وشتان بين شاي وشاي...
وكأنها تقرأ أفكاري :
عاد بيبقي ليك زي شاي عمتك رقية؟
والله يا حاجة ما بيبقي لكن شايك ما عندو عوجة .
"مجاملة لا بد منها في عالم الزواج "
نشرب الشاي وتدور ونسة يأتيك حينها ذاك الإحساس العجيب أن هذا الحديث بصورة ما دار من قبل ، هل هي الروح من زمان آخر ؟ هكذا يزعم الهندوس أن الأرواح تنتقل من شخص لآخر بعد فناء الجسد.. تشعر في لحظات أن حدث ما يتكرر في حياتك وكأنك تشاهد فلم سينمائي للمرة الثانية ... ما علينا .
تعرفي يا حاجة "أواصل الحديث" لما تمشي الخرطوم بالله لازم تمشي لي عمتي رقية وتشربي شاي عندها.. وكمان لو تميتي الموضوع بي ونسة مع عم حسن وهو يضحك من القلب ويكرش يديه في حبل العنقريب في حركة لا إرادية تكوني تميتي المزاج بالجد.

ذهبت حكومتنا الموقرة إلي السودان في أجازتها الآخيرة وقامت بتنفيذ وصيتي وشربت ذاك الشاي الخرافي وعادت تحدثني حديث الصدق :
تعرف يا خالد بالجد شاي عجيب ..مشيت أشوفها بتسوي شنو عشان الشاي يطلع كده
لقيتها ياها الطريقة ذاتها البنعمل بيها الشاي سبحان الله .
وأرد عليها :
الحمد لله عشان تاني تصدقيني .
هن رحمة لنا من زمان جميل.. تقودني الذكري لأشياء جميلة حفرت لها مكمن في صخر ذاكرتي لن يمحوه إلا الموت..
شاي عمتي رقية .. وسمك عمتي حرم الحسن ..
هل أنا بطيني ؟
ربما ، لكن الأمر أبدا ليس وجبة طعام أو خرمة لشاي وما أكثر المطاعم .
إنه الود الساكن فيهم ليل نهار..الإبتسامة النابعة من القلب.. وتلك الرائحة العجيبة وأنت تحضن كبار السن من أعمام وعمات.
ما أتفه اللغة وكم هي هزيلة حين يكون الحديث عن المحبة .

بالله يا زول ... قبل ما تنزل تمر علي بيت رحيب.. تشرب "شاي عصرية في طرف الغمامة" من يد العمة رقية عبيد الله ، ولا تنسي يا زول وأنت تسلم بالأحضان أن تشم بعمق فهذا رحيق للمحبة والود المقيم.

[خالد الحاج]

[media]http://sudaniyat.net/up/uploading/alteer_almohagir.wma[/media]

[align=center][/align]

[فتحي مسعد حنفي]

والله يا حاجة ما بيبقي لكن شايك ما عندو عوجة .
"مجاملة لا بد منها في عالم الزواج "


انت يازول ما بتخاف!!! مالك طابز مجاملتك هسع كان حيكومتك قرت الكلام دا بتقول ليها شنو انت ما عارف انو مقاليد الحكم كلو في يد الخكومات
تعرف ياخالد أهلنا المصريين العشت بينهم أيام دراستك بيقولوا الأكل وكل ما يدخل النار ليصبح طعام أو شراب عايز نفس يعني الحكاية في نفس الصانع ..ما هي النار نار والشاي شاي والسكر سكر لكن زي ما بيقولوا الفاتحة موجودة ولكن أين عمروبرضوا في فرق بين الشاي المعمول بي راحتو علي جمر وبين المعمول في البوتاغاز أو هيتر الكهربا.
ألله يدي خالتك العافية ويخليها ليك عشان تاني ترجع وتستمخ بي شايا.

[الجيلى أحمد]

ياهو دا بس البقى لينا ياود الحاج

طعم قديم لأشياء خالدة لاتفنى

ما عارف انو مقاليد الحكم كلو في يد الخكومات

بتتراجف مالك ياخواجه

[خالد الحاج]

المشاركة الأصلية كتبت بواسطة فتحي مسعد حنفي

والله يا حاجة ما بيبقي لكن شايك ما عندو عوجة .
"مجاملة لا بد منها في عالم الزواج "


انت يازول ما بتخاف!!! مالك طابز مجاملتك هسع كان حيكومتك قرت الكلام دا بتقول ليها شنو انت ما عارف انو مقاليد الحكم كلو في يد الخكومات
تعرف ياخالد أهلنا المصريين العشت بينهم أيام دراستك بيقولوا الأكل وكل ما يدخل النار ليصبح طعام أو شراب عايز نفس يعني الحكاية في نفس الصانع ..ما هي النار نار والشاي شاي والسكر سكر لكن زي ما بيقولوا الفاتحة موجودة ولكن أين عمروبرضوا في فرق بين الشاي المعمول بي راحتو علي جمر وبين المعمول في البوتاغاز أو هيتر الكهربا.
ألله يدي خالتك العافية ويخليها ليك عشان تاني ترجع وتستمخ بي شايا.

إنت لسه قاعد تخاف يا خواجة؟
غايتو أنا ختوا محلي طوبة زماااان
صدقت والله يا فتحي الحكاية " نفس" ..
كنت أظنني ممكون حنين ويبدو أنني لست الوحيد زماني
شايفك يا خواجة صابر هل لزيارتك أثر في التخفيف ولا بقيت "جضما معود علي الكفيت "

[خالد الحاج]

المشاركة الأصلية كتبت بواسطة الجيلى أحمد

ياهو دا بس البقى لينا ياود الحاج

طعم قديم لأشياء خالدة لاتفنى

قال لي أحد المصريين يا جيلي : أنتم شعب جرسة .. تطلعوا من بلدكو وتقعدوا تغنوا وتبكوا
أيه الجابركم؟

وطبعا ود بمبة نوعا معاه حق..
هناك ما يجرنا دوما إلي الخلف يا جيلي.. نعيش في غربتنا وكأننا سنرجع غدا
نلبس بالطريقة السودانية ونأكل بالطريقة السودانية وحتى عندما تشتري سيارة
يقولوا ليك (أوعي من المازدا الفاسدة)
نستاك بالسجنل ،وندخن البينسون...
هذا بينما يعيش المصريين وكأنهم يقيمون للأبد فينجحون ..

تسلم يا أبا أليشة.

[فتحي مسعد حنفي]

المشاركة الأصلية كتبت بواسطة خالد الحاج

إنت لسه قاعد تخاف يا خواجة؟
غايتو أنا ختوا محلي طوبة زماااان
صدقت والله يا فتحي الحكاية " نفس" ..
كنت أظنني ممكون حنين ويبدو أنني لست الوحيد زماني
شايفك يا خواجة صابر هل لزيارتك أثر في التخفيف ولا بقيت "جضما معود علي الكفيت "

أنا ياخالد من طول الغربة جلدي بقي جلد قرنتي والمهم باكل وبشرب البختو قدامي ولا بقول دا ولا داك يعني مريح راسي ومستسلم والصبر دا من ميتة القلب
وبعدين ياخي انا عرست تلاتة ووالد منهم التلاتة اتنين خواجيات وواحدة سودانية تفتكر بعد كلو ما بكون عرفت اسرار السعادة الزوجية
بيني وبينك كل ما اتزنق أقعد أفكر هسع الموقف دا لو كان مع ديك ولا التانية كان حصل شنو

[عكــود]

ده بوست طاعم والعليم الله يا خال . .
تعرف نوع الحنين ده ياهو البيخلينا نتطاقش كل سنة ونجري على السودان

حكيك عن شاي عمّتك رقيّة دوّر الذكريات في رأسي
شاي المغربية عند العمّة مريم
شاي ما ضقت متل طعامتو، ولا شمّيت ريحة أزكى من قنّانتو.
المغرب في البلد له طعم مختلف
منظر الناس جايين من تحت شايلين عشا بهايمهم
حوافر حميرهم تخلّف عجاج يتصاعد في الجو مع تواري الشمس
صوت البهايم وهي تطالب بوجبة المساء
الشفّع بغبشتهم وهم راجعين من لعب الكورة
ريحة كمينة طوب تنتشر مع دخانها المتصاعد مع العجاج المذكور أعلاه
الدجاج ينقّر من برسيم البهايم قبل أن يأوي إلى أقفاصه
صوت القَعو (الضفادع للحناكيش ) يجيك من بعيد ويزداد وضوحاً كلما ازدادت هدأة الليل
عربي راكب جملو وطالع الحِلّة وعلى جنب الحويّة راس برسيم
وعلى الجنب الآخر راس جريد أخدر
وحسن أب دومة يؤذّن أن حيّ على الصلاة

يا خال السودان طعمو مختلف
عشان كده:

نلبس بالطريقة السودانية ونأكل بالطريقة السودانية وحتى عندما تشتري سيارة
يقولوا ليك (أوعي من المازدا الفاسدة)
نستاك بالسجنل ،وندخن البينسون...

فتحي
الجيلي
إزيّكم.

[خالد الحاج]

المشاركة الأصلية كتبت بواسطة فتحي مسعد حنفي

أنا ياخالد من طول الغربة جلدي بقي جلد قرنتي والمهم باكل وبشرب البختو قدامي ولا بقول دا ولا داك يعني مريح راسي ومستسلم والصبر دا من ميتة القلب
وبعدين ياخي انا عرست تلاتة ووالد منهم التلاتة اتنين خواجيات وواحدة سودانية تفتكر بعد كلو ما بكون عرفت اسرار السعادة الزوجية
بيني وبينك كل ما اتزنق أقعد أفكر هسع الموقف دا لو كان مع ديك ولا التانية كان حصل شنو

لا حولا ولا قوة إلا بالله يا فتحي يا أخي إنت مفروض "تطكع"
دي ما القوة الثلاثية للأبادة

[خالد الحاج]

المشاركة الأصلية كتبت بواسطة عكــود

ده بوست طاعم والعليم الله يا خال . .
تعرف نوع الحنين ده ياهو البيخلينا نتطاقش كل سنة ونجري على السودان

حكيك عن شاي عمّتك رقيّة دوّر الذكريات في رأسي
شاي المغربية عند العمّة مريم
شاي ما ضقت متل طعامتو، ولا شمّيت ريحة أزكى من قنّانتو.
المغرب في البلد له طعم مختلف
منظر الناس جايين من تحت شايلين عشا بهايمهم
حوافر حميرهم تخلّف عجاج يتصاعد في الجو مع تواري الشمس
صوت البهايم وهي تطالب بوجبة المساء
الشفّع بغبشتهم وهم راجعين من لعب الكورة
ريحة كمينة طوب تنتشر مع دخانها المتصاعد مع العجاج المذكور أعلاه
الدجاج ينقّر من برسيم البهايم قبل أن يأوي إلى أقفاصه
صوت القَعو (الضفادع للحناكيش ) يجيك من بعيد ويزداد وضوحاً كلما ازدادت هدأة الليل
عربي راكب جملو وطالع الحِلّة وعلى جنب الحويّة راس برسيم
وعلى الجنب الآخر راس جريد أخدر
وحسن أب دومة يؤذّن أن حيّ على الصلاة

يا خال السودان طعمو مختلف
عشان كده:

آه يا عمدة يا أخي..
تعرف يا عكود مرات بتصل الحلق .. أي والله..
أشتاق لهذا الطعم المختلف يا عكود أشتريه بنصف عمري أو قول بنصف ما تبقي من عمري
أخوك يسير نحو الخمسين مشيا علي الأقدام
غايتو إنت أخير مني "ما في العمر ما تفرح " أنا قاصد بتمشي تبل الشوق
أخوك عتت الشكية لله

[فتحي مسعد حنفي]

لا حولا ولا قوة إلا بالله يا فتحي يا أخي إنت مفروض "تطكع"
دي ما القوة الثلاثية للأبادة

فتحي
الجيلي
إزيّكم
=====
القال ليك منو لسة ما طقعت انا كان ما طقعت قاعد مخللي شغلي وساكي المنتديات لامن بقيت زي السر اح
أحمد قدور
بعدين ياعكود كتر خيرك علي السلام ودي فرصة أجمعكم انت وخالد سوا عشان ما افتش لي كل واحد فيكم براه ...
المهم عايز أقول انو المواضيع المثبتة في صدر الصفحة ياريت البيمشي الصفحة التانية يتغير لان دا معناه ان الاقبال عليهو قليل ومافي داعي نفرضو عشان ما يكون شكلو انكم بتختاروا مواضيع معينة او كتاب معينين تعملو ليهم دعاية.

[خالد الحاج]

المشاركة الأصلية كتبت بواسطة فتحي مسعد حنفي

لا حولا ولا قوة إلا بالله يا فتحي يا أخي إنت مفروض "تطكع"
دي ما القوة الثلاثية للأبادة

فتحي
الجيلي
إزيّكم
=====
القال ليك منو لسة ما طقعت انا كان ما طقعت قاعد مخللي شغلي وساكي المنتديات لامن بقيت زي السر اح
أحمد قدور
بعدين ياعكود كتر خيرك علي السلام ودي فرصة أجمعكم انت وخالد سوا عشان ما افتش لي كل واحد فيكم براه ...
المهم عايز أقول انو المواضيع المثبتة في صدر الصفحة ياريت البيمشي الصفحة التانية يتغير لان دا معناه ان الاقبال عليهو قليل ومافي داعي نفرضو عشان ما يكون شكلو انكم بتختاروا مواضيع معينة او كتاب معينين تعملو ليهم دعاية.

سلام يا فتحي
رغم أنه هذا ليس مكانه وحسب النصوص أي مقترح أو رسالة للإدارة فنية كانت أم قانونية يجب أن تأتي عن طريق البريد للجهة المعنية لكن أرد عليك حتى أوضح هذه المسألة

(1) أي بوست يوضع كعنوان لا بد من توفر بعض الأساسيات فيه مثل
جودة الموضوع
سلامة اللغة

(2) تحرك أي موضوع ووجوده في الصفحة الأولي لا يعني جودته إذا يمكنني تأجيل الردود حتى يظل بوستي موجود في الصفحة الأولي لأطول فترة .

(3) للعضوية ما شاءت من قوانين تنظم كيفية التعامل في المنتديات وإدارتها وهذا حق لن ينازعهم عليه كائن من كان ما دمنا إرتضينا الدمقراطية كأسلوب إدارة لكن العناوين الموضوعة أعلاه حق في زعمي المتواضع لصاحب الموقع فهي تعكس مضامين وفكرة محددة.
(4) أحاول العدل ما أمكنني كمسئول فني في توزيع الفرص مع وضع العوامل أعلاه في الإعتبار
واليوم قمت بإضافة عنوان للحوار الذي أجراه أمير و الكردي مع شيخ الأمين. كذلك قمت طوال الأسبوع برفع عدة بوستات منها قصيدة لزميلة من منتدي الأدبي وأمس كان هنالك عنوان لموضوع هو أول مشاركة لصاحبه في سودانيات يعنوان (يوم بيوم يبيع الكمبا) .
وهذا يا فتحي دليل علي تنوع معقول..
أخيرا يا فتحي بعض الموضوعات من الجودة بحيث أنها تستحق أن تظل أسبوع في الواجهة كمقالة الدكتور إبراهيم محمد زين رغم عدم وجود حوار حولها .

وصدقني يا فتحي أنا أحاول جهدي لكن يصعب بحق إرضاء الجميع .

[الجيلى أحمد]

تعرف ياخالد فى زيارتى للسودان قبل سنتين ادهشنى ان الخرطوم اصبحت بلد قائمة بذاتها وانتشرت على حدودها أصتاف البشر ,
وفى كل تجوالى لم اشاهد سوى صور جديدة لحياة متأسلمة
وشارع يمور بالرفض المبهم , رفضأ حولته مشاريع الأسلمة
لغبار عالق بالاسلام..
حين تصل مطار الخرطوم فى صباح شتوى باردبعد اربعة عشر عام من المنافى, يخيل اليك ان
وطنآ سينهض من ذاكرتك ليحتويك ,
ان النيل المنفى فى ذاكرتنا سيمدد مجراه
ليحتويك
وان الغابات ستقذف من خضرتها انبياء
وان المدن المكتولة بظماء الجفاف ستنبت بساتينآ..


لاشئ من هذا يحدث

ستجد النيل قابعآ فى سباته الدهرى
يطوى عليه التاريخ واجساد العزارى من ممالك الجهل..

ولكنك ستجد شاى الصباح من بت الشيخ
وعمك الحاج بنفس صوته يتلو الكتاب من
جوف خاشع
وسيلتفون حولك كغمامة فى الهجير

ليت فى العمر مايفتدى
لنعيد مقابلة صورهم



ياود الحاج فى داعى..??

[فتحي مسعد حنفي]

رسالتك وصلت ياباش وانا غرضي كلو انك ما تتعرض لاي هجمة بسبب اتهام باطل او فيه شبهة وهذا كل ما في الأمر وليس انتقادا لكم وانا شخصيا دايما تلقاني أتدخل في المواضيع التي تهم الغير وطول ما بدلي برأي يبقي ما عندي مشكلة واليوم الأسكت ثق تماما انك ما حتقرا كلمة مني لاني وقتها حأنسحب بهدوء دون أن أفقد من جعلتهم وجعلوني أصدقاء ففي النهاية الموضوع ما بيسوا الخلافات وما فينا واحد شغال بي ماهية وزعلان عشان ما قبض بونص..
ولا يهمك ياسيدي والمرة الجاية حأخاطب الادارة في البريد الداخلي

[الجيلى أحمد]

للخواجة وعكود التحايا