تايه..ندهتك

[imported_الدقيقة 30]

نعود من جديد اشد شوقا الى محاولة سكب كل شى فى كل شى

تعود كعكعة الكيبورد ووحشه افتراش الشوق والتعذاب والحنين و المرفاء الحزين

اذن

يدفعنى شياء ما كى اهتف

(امرقى)

يا الشلتى النفس الباقى فينى

..

انا غرقان ...انا...فى بحر هواك

(امرقى)

يا المطلوقه تهتك استار وقارى

نعود

الى كتابات مستلفة عن وطن لم يفارق (رويحتى)

وطن بقدر سمو هذه الوجوه المعفرة بالتعب..بالحزن..بالقهر..وحته سفه..وريحة (دلكة)..وعقاب سجارة برنجى

وطنى..هذه الرقعة الجغرافية التى تسكننى وانا اتمطه فى ليل امدرمانى تعزف فيه باعوض الهم سمفونية الهوى الاول

..

وطن شقيا بحب بنيه المتطرفين فى كل شى...كل شى

حبهم له مثل خط الاستواء بذات الحرارة وبنفس الصيف الطويل...بدون مرونه

جيتكم من جديد ارقع بعض وجدان شاخ وتهتك بفعل الزمن المرهون على وجه الكابه..

احاول هنا ان اكتب نفسى ..ارسم نفسى...بالبرجل قلمى فحم...لونى (دوكه) ..واستيكه

اممممممم

احاول ان (ادفق)

يمكن (القى) خريطة ..وترجع باقى سنين رويانه (طموح)

..

اعود

هذه المرة والمكان حزين..(حيران)...

فقد مضى هذا الكون الجميل ولم يترك لى غير ..(ابتسامته...مشحونه تامل القهقه)

(داير اقابل الشباب)

سمعتها عبر اذن صديقة الكلمة

فى ذلك النهار البئيس

اييييييه..

يا زمان...

اييييه

صوت الكيبورد وطعم النيكوتين...ومذاق (تنى) القهوة....

واضغط...

على حروف لعلها توصل حنين كان.

لعل

بلادى تعود

لعل

حبا مضى لا يعود

لعل اناس كالنجوم يعودون الى مواقيت كانت لهم ولنا فكرة وتضاد

ولكن للاسف ...الكيبورد لا يفعل شياء

البته

لا يصنع وطن

لا

ولا يوقع فى جوازات من رحلوا بتاشيرة عودة ولو لبرهه

ولكن

ها نحن نضغط....

لا لشى سوى لان هذه اصبحت طريقتنا فى التعبير عن اسف

ما

عن حلم ما

من يشترى حلم حزين



نعود

[imported_scaptionoz]

تعرف:
فى الدقيقة 31 من حروفك دى..فى فكرة مجكنة فى واقع كرعينو من حنة الدامر البدمّر كل انوسة فى بواطن الامور....وده طبعا نمط وريف شكى منه من قبل واكثر من مرة العم ويندوز اكسى بى المدعى المامه بترابيس كل النوافذ لو جئنا بمثله عددا....
كلامى الفوق ده اعتبرو عربون ونسة اندر دوس وخلى اصابعك دائما على كيبورد الولف
سمح؟
لو دايرنى اجيك راجع ...حدد فى ياتو دقيقة
سمح؟

[imported_الدقيقة 30]

2010...
وابنوسه
...
(وتعرف)
مفتاح الحكى ..ونسه الحنه المرسومه موجه..
عيييييك
scaptionoz

والكيبورد هذا المسكين يتحمل ثقل المواقف والاحزان ...وبعض نشوه من فرح مسروق
حبابك...
والاجمل انو يكون بدون ميعاد...
لقاء ينتظر...اللقاء
..
راجيك..كويس

بالمناسبة...عربنتنا...
منتظرنك

[imported_بله محمد الفاضل]

هلا بك
وبإيابك
الدار نورت
وفرهدت


والحال ياهو ذاتو الحال
في البِلاد
لكنه سيتجه حتماً إلى حسن مآل

وعن الكليك فإنك لم تعطها حقها
فأنظر
تجدها قد غيرت معالم بلاد وبلاد
ودونك
تونس
مصر
والبقية تأتي
وكلها بفضل هذه الكليك
تستنشق الحرية الآن

أكيد محبتي وترحيبي بك

[imported_الدقيقة 30]

الطبع الجميل\ بله
بيت خالد واخوان خالد منورة بيكم انتو...
سودانيات دى يا بله زى البيت الكبير
قدر ما تمش
قدر ما تلف
لازم تجى لانو فيهو قيمة ناس البيت..
حاجة ما بتشوفها لكن بتكون قايدااك
عشان كده ما ظنيتها الا منورة بى اقلامكم دى
اها..
شوف بالله الكلام فى شنو ..(وتهت بى ياتو شارع انا)
قال شنو..
(‫في نواحي الليل نشدتك اقصى حتة من السكون وفي النهار والدنيا كاشفة ناس بتطلع ناس بتنزل وإنتي ما بان ليكي لون وفي المسافة البتعصى على العيون
تايه ندهتك)
بس
فى المسافة البتعصى على العيون...
ده موضوع الكلك..ذاتو يا بله ياااخ
متين بالله المسافة دى تكون مرئية..
صدقنى الشى السواهو الكلك فى مصر وتونس والجايين
شى ناقص...
صحى فيهو طعم الحرية لكن ما نفس الطعم الحقيقى
لسع..
قارن بين منشور زمان 6 ابريل...وبين طعم الفيس بوك
صدقنى الكيبورد ..عدمان الحس

اون...
الكلام المقوس ده اظنو بتاع مهندس الحس الجميل (العميرى)

اوف..
تجعلنى احلم

[imported_سمراء]

تاوقته ...ومرقتة
تاوقته ...ومرقتة
وتانى دخلته ...
ياخ والله قالو ( الكليك ) ليهو عافص
ذى القدم
وترانى عفصته ومانى خابرة عفصتى جات فى كراع منو
بس كدى النقوم نتبسمل ونتحوقل
ونتنحنح ونمسك فى حبل النضم قوى قبل مايتوه ونتوه وراهو ..

اها قلتو لى هنا فى شنو ؟؟

[imported_الدقيقة 30]

سمراء...
كيف حالك يا اخيه..
عارفه ..الموضوع انو قلنا نعمل (حله) قطر قام
اها ..
قمنا (كبينا) كل حاجة فى اى حاجة قادرة (تنجض) لينا الشغلانة
..
ياااخ دايرين نحب البلد دى بى طريقتنا
قدر ما حاولنا لقينا لازم عشان نحب البلد دى
لازم..نحب معاها حاجات تانية
ناس الحلة..مثلا
البت الشايلة..(عجين) تعوس للثورة
و.و..و
ف تهنا....
القصة يا سمراء
حاجات داخله فى بعض
مجبورين نتعايش مع لسعات التوماهوك
مجبورين
نندق صباح ومساء...بالموساد
ما الموساد العندو النجمة...
لا
الموساد صحب الكنتين
القصة..
ريد
ريد الصباح لى نسمة باردة...رويانة بى عطر جادور...
ريد بيعرف (يلضم خرز هوانا...حنين)
دى القصة...

بالمناسبة...
غصب عنهم بنحب بلدنا...وبنحب التوب...غصب عنهم بنشجع المريخ
لانو مافيهو...هلال

[imported_سمراء]

والله يا النص كل الناس ديييييييل بحبو البلد
بس !!
ترجمتنا للحب بتختلف
ذى عواسة الكسرة ..واحده رهيفة وهبهابة
وواحدة تخينة ...بس حكمة الله
كلها كسرة
وبناكله
حب البلد دى بكمن فى نقنتنا قدام الصفوف
كواريكنا فى الاستادات
وضحكنا قدام الدكاكين فى الامسيات ونحنا بنلعب فى الضمنة
ونختمها بى (بوش) وسجارة برنجى
ونفس حاااااااااار
ونتخمد عشان نصبح ندور نفس الاسطوانه
وفى كل مرة ..بكون الريد مدفون
وسط النقة
والطوابير
وحلقات الضمنة
وفى المراكز الصحية وانت بتفتش على الشاش
وبرضو ...بنرجع
نضحك
ونحكى