راكوبة المجادعات.. النمة والدوباي

[imported_فخري الزين]

المشاركة الأصلية كتبت بواسطة سجمان

بعد الراح سدىً بردت يمين همتنا
ياما مع الصحاب سقنا النضم همبتنا
الربقي القبيل قلناهو في لمتنا
يالمسئول متين تسهل عليو لمتنا

الربقي السمح عاقدين عليو جمتنا
راجينمبو الخلود بعد الحياة إن متنا
الشبكة ان غِبَت متل الحدي كفتتنا
رافعين الأمر لي أمينّا ما يكلفتنا

خلي الفات وماتبقي في النحيب والوووب
كتير الراح والقش ملخبت حسكنيت وسهوب
سو عوسك في الحروف وجيبب النضم مقلوب
ونسوق الليل غنا وتبقي الردود شلهوب

[imported_طارق صديق كانديك]

ديون كتيرة والله

الله يفك ساجورنا ونجيكم

المشاركة الأصلية كتبت بواسطة علاءالدين عبدالله الاحمر

الصافي المنقي في العتم بتلالا
في خده الندا عليه الخلوق تتبالي
شيتا غزل ومرات كلام في رسالة
الا القادر الله ياقمر العشا البتعالي

شفّيت الجسـم والحالـة ياهـا الحالـة
يا نايـر الخـدود الحالـة جـد بطّالـة
مفارم الشوق جوات القليـب شغالة
يـا تلفاهو يا سيدو أو ترجاهو بنقالة

[imported_سجمان]

المشاركة الأصلية كتبت بواسطة علاءالدين عبدالله الاحمر

بنصبح وفي الشق نصال شتا
لابنقلعن جت لابنلم الصق انحتة
الواجعني وبقطع دوام في الجتة
نيلنا البجف والراعيه ينمد ويتمطا

بنصبح كل صباح وهمومنا راقدة كللق
وان غابت شمس ود عينّا نومو مشلّق
الشغل الفكور من دوبو علق اتخلق
شال البال معاو بي شوقو سابني معلّق

[imported_سجمان]

المشاركة الأصلية كتبت بواسطة علاءالدين عبدالله الاحمر

الصافي المنقي في العتم بتلالا
في خده الندا عليه الخلوق تتبالي
شيتا غزل ومرات كلام في رسالة
الا القادر الله ياقمر العشا البتعالي

صافي البريق الريقو زادنا ثمالا
مو محتاجلو زئبق نورو سبقو ولالا
مشنون الشمال شمايلو شتى الشالا
شل شمالي شمة شريفة من شمّالا

[imported_احمد زين]

عذبتنا يا سجمان

[imported_احمد زين]

المشاركة الأصلية كتبت بواسطة سجمان

صافي البريق الريقو زادنا ثمالا
مو محتاجلو زئبق نورو سبقو ولالا
مشنون الشمال شمايلو شتى الشالا
شل شمالي شمة شريفة من شمّالا

شاشيت للرُشاش شال لي بريق يتلالا
شال الشوق طفش شاف البضَوِّي جمالا
شيش يا شابة ..قلبي الشاف شوي الملّالا
شلال الشمال شهبات ناري ما بيطفالا

[imported_علاءالدين عبدالله الاحمر]

في قربة المر معتق مرار الغربة
والشوق الدفق مقامو حد الكربة
الحن للحبايب في الملامح شبة
البرجع حظوظو ليه في القرقراب شربة

[imported_علاءالدين عبدالله الاحمر]

المشاركة الأصلية كتبت بواسطة عبد المنعم حضيري

شفّيت الجسـم والحالـة ياهـا الحالـة
يا نايـر الخـدود الحالـة جـد بطّالـة
مفارم الشوق جوات القليـب شغالة
يـا تلفاهو يا سيدو أو ترجاهو بنقالة

المعلول خباره شفه فات لغادي
قنجر في الودي لوريه دودو سادي
لا واحة فكر روض في جفاف متبادي
لا زفة لقا تطل المساه رمادي

[imported_سجمان]

المشاركة الأصلية كتبت بواسطة فخري الزين

خلي الفات وماتبقي في النحيب والوووب
كتير الراح والقش ملخبت حسكنيت وسهوب
سو عوسك في الحروف وجيبب النضم مقلوب
ونسوق الليل غنا وتبقي الردود شلهوب

مسدارنا البقى بعد الحصل مخروب
والدلجة الفضت جارت عليها هبوب
في بادي الأمر فكرت منو أتوب
إلا النم معاي باقيلي زي مِكْروب

رايك شنو في البمبي

[imported_سجمان]

المشاركة الأصلية كتبت بواسطة طارق صديق كانديك

ديون كتيرة والله

الله يفك ساجورنا ونجيكم

نديك شوية تسخينة

طارق يا كريم راجيك تفك ساجورو
بيهو المنتدى يكبر يتم تطويرو
للمسدار يعود قبال يكمل دورو
يسجع بالنميم للدايرو والما بدورو

يعلم الله شوقنا درادم..

[النور يوسف محمد]

بسم الله الرحمن الرحيم


المتابع لهذا الضرب من الأدب الشعبى
يلحظ دون عناء وفرة ( مزعجة ) فى العرض ،
وقانون العرض والطلب الأزلى فى ظنى يسرى ولا يعرف إستثناء ،
قنوات التلفزة ومواقع التواصل تضج وتعج بالشعراء ومن اتبعهم من الغاوون
ومفردات البادية ـ ملح المرابيع ـ يحشرونها عسفاً وعصفاً فى سجالهم ،
وأحداث الحضر والمدينة يلبسونها ثوب البادية فى نشاز تصطك له الحروف ،

لماذا استسهل الناس هذا النوع الراقى من الأدب !!!!


وبالطبع لا أعنى الأحبة داخل هذه الراكوبه ،
أتكلم عن ظاهرة عامة وإن أصابهم رائش كلامى ،


كل الود

[imported_سجمان]

المشاركة الأصلية كتبت بواسطة عبد المنعم حضيري

شفّيت الجسـم والحالـة ياهـا الحالـة
يا نايـر الخـدود الحالـة جـد بطّالـة
مفارم الشوق جوات القليـب شغالة
يـا تلفاهو يا سيدو أو ترجاهو بنقالة

نقر السوس بحاكي الفيني علّب نارو
ساهي مع النجوم بالريدو خت حكارو
أنا يا حضيري انبقيت السيف جرح جفّارو
بسلاهو وبقابل قدر الله في جحّارو

[imported_سجمان]

المشاركة الأصلية كتبت بواسطة احمد زين

عذبتنا يا سجمان

إنت وكانديك إلا يكبولكم جمكسين في جحوركم دي حتى تجو مارقين

[imported_احمد زين]

انا تراني قاااااعد وبجادع ومرات بجيب الحجار

الله يفك ساجور صاحبك