اقتباس:
المشاركة الأصلية كتبت بواسطة أبو أماني
هاهاهاهاهاهاهاهااااااي!.. والله ما متعقد ولا حاجتين .. ووالله العظيم تلاتة العقد في وادي وأنا في وادي .. لاكين عملت تريسينغ للحكاية دي من شهور عديدة وتأكدت إنو ما في أي مصادفة فهي تحصل مرتين أو 3 أو 4 مرات قول خمسة ستة، لاكين على مدى شهور لا ولن أصدق، وأصل الحكاية إني بحب السجع والمسدار حب شديد .. وزبون ماركة (وجع وش) للراكوبة دي .. مرات عديدة بتصفح ونادرا ما أساهم وهنا بيت القصيد ..تكون الراكوبة راشة تش .. وشئ غاية في الجمال أقوم إنطس في نافوخي ولإعجابي بمداخلة أقوم اتشوبر وأعمل لي مسدار في محاولة بائسة لمجاراة القمم الهنا .. وعينك ما تشوف عيلا النور .. قصدي النور البيولع ده .. ما النور يوسف !.. أطال الله عمره .. أها يا سيدي اللمنتي عليك .. الراكوبة حالها يقيف .. وإسم (أبو أماني) يكون معلق يجي شهر كآخر متداخل .. أقول يا زول يمكن صدفة .. يقوم علاء الدين يكسر الحاجز أو ال (نحس) ويعمل ليو مداخلة حتى بعد داك الراكوبة تدور والناس تقعد فيها والهواء والهمبريب يضرب .. بس مررررة مررررة كدي بتاخد ليها (كتمة)! لما صديقي اللدود د. أحمد زين يدخل بشتارتو العارفينها ديك .. ما يخلي ليو ديس شابك ولا كفلا مدنكل ولا بوخة مطبوقة .. ولا فنايد بتسوي تل!.. إتا يا السجمان يا أخوي دحين فنايد دي معناتها شنو؟ مالك قبلت مني غادي؟ غايتو بصراحة كده بتكييف لما إتنين تلاتة من فطاحلة الراكوبة .. يتجادعو ليهم بكلام كده.. ناس إمرو القيس وبشار بن برد لو سمعوه يدنقروا ويصنقعوا مليون مرة..حتي في اللأخر يقول ليك بخجل..والله ماندري !.
غايتو كده بطني بردت شيوية ..وفشيت غلي فيكم ..وعلى اليمن بعد ده .. أجي راكوبتكم متصفح سااااكت ..وما في داعي أقوم وأقع واتزللط وأساهم قدر قدرتي بمسدار .. اقول يلاقي إستحسان ولا مجرد أجر المحاولة .. يبقى مضحكة من ناس خبيثين زي .. فتحي مسعد .. وأحمد زين .. وهلمجرا.. وعلى فكرة ..! هلمجرا دي ما نيكنيم حق زول .. عالم تجيب الجلا .. كااااااااااااااااك 
بالجمبة : -
تاني ما بحاول أساهم ب.. (قدر قدرتي) حررررررمت !!!
|
ابواماني السلام مطبوق لعلك عافي
محقوقين وينعتزر ليك بنغيم دافي
الكاجة ان ابت حمل مستراح متشافي
يبقي الفضاية العز وان كان زعيق ختافي
شن فايدت سحاب بارا بعدت كان الوافي
