ود مدني

[أبوبكر عباس]

كانت قصور مملكة سنار تعج بالجواري الحسان قبل سقوطها..
بعد الانهيار انتقلن شمالا الى العاصمة الجديدة المنتعشة إقتصاديا بفضل الجنود و التجار و المغامرين الغربيين الذين جاءوا مع الحملة من أجل الحلم الكبير:
الذهب
ريش النعام
سن الفيل
و العبيد..
قامت الملاهي الليلية حول ود مدني.. و أصبح بود مدني أكثر من تقابة!!

[رأفت ميلاد]

بابكر عباس
سلام
ياخ ما تجينا من الآخر .. مشكلتك شنو مع مدنى
حيرتنى وأنت بتوصف مدنى من حى البان للدرجة وتجى وتقول لى الخواجات أكلوا فى المسلمية فى قصرية !! ياكلوا السم ياخ .. وواحد غلبوا يقعد فى البحر عشان الريحة ..
والله حقوا يسلموك موسى الثعلب ولا الصادق أبو العافية يقعدوك فى الواطة .. مدنى فيها خواجات من زمن حفروا البحر .. ناس لمنيوس وأبو شمس جيوبم إنتفخت من خير مدنى وما إتنكروا ليها ..
وبعدين شابكنا سنار سنار .. زى كأنوا مدنى ريفى سنار .. ياخ سنار دى كنا بنسافر ليها .. سيبك من قراية كتب التاريخ .. كان الفنج ولا المهدية كلو إستعمار أخير منهم الإنجليز .. ياخ مدنى الجميلة بلد الحبايب .. جلسة فى كعكاتى وطله على حنتوب إتكتبت فيها أشعار .. ما طلعت مرة الكريبة ترجا الله ومريت على التجارب وشفت الخضرة !! .. ما مشيت الحى السودانى البريطانى سابقآ !!.. ما طلعت رحلة أم بارونة !! كان حمت السودان كله فى أسمح من بنات القسم الأول !!
الكورة ناس مدنى زى البرازيل غيروا صورتها فى السودان .. مدنى أنجبت سانتو أخوان .. حمورى أخوان .. القله أخوان .. جعفر ود النوبة .. سنطة .. عمار .. والقائمة تطول .. السياسين ورجال الأعمال ..
مدنى عاصمة الجزيرة الخضراء .. مساعد معرض الزهور .. ود الشافعى سكة حديد الجزيرة .. بركات رئاسة المشروع .. مارنجان محالج القطن أرقاه فى العالم .. ذنبنا شنو كان دمرم المهووسون الجدد ديل .. دايرين تدنسوا لينا تاريخ أخضر بالخواجة قال ؟
ياخى الفن نابع من مدنى .. الثقافة من مدنى .. الصعلكة والشفتنة من مدنى ..
وحارساها الصوفية شرق النيل وغرب النيل .. من أبو حراز لى طيبة للشكينيبة .. نحن قطر بى حاله .. جايين تختصرونا فى ناس بقضوا حاجتم على النيل ؟؟
زى ما طلع مننا و فينا شيخ الجيلى وشيخ أبو زيد نحن ناس الليثى وشداد والحضرى .. نحن ناس القادرية والبرامكة وزى ما قال ود الطاهر توتوماتا .. مالا ؟ ما مدينة كاملة متكاملة بحضارة .. وخالية عنصرية ما ضاهتا هنا إلا أمدرمان ..

سليمان أخوى الشهيد طيب الله ثراه .. شرد من مطار الخرطوم لى بعثة هندسة فى روسيا .. فى شنو يا خوى ؟ .. قال لى حد يسيب مدنى ويمشى موسكو .. وتقول لى عبد الحميد قال لى قال !! .. ودى زاتا من مدنى

فكيتا فيك شوق لى مدنى

[Wad Elbeck]

بابكر عباس
سلام
ياخ ما تجينا من الآخر .. مشكلتك شنو مع مدنى
حيرتنى وأنت بتوصف مدنى من حى البان للدرجة وتجى وتقول لى الخواجات أكلوا فى المسلمية فى قصرية !! ياكلوا السم ياخ .. وواحد غلبوا يقعد فى البحر عشان الريحة ..
والله حقوا يسلموك موسى الثعلب ولا الصادق أبو العافية يقعدوك فى الواطة .. مدنى فيها خواجات من زمن حفروا البحر .. ناس لمنيوس وأبو شمس جيوبم إنتفخت من خير مدنى وما إتنكروا ليها ..
وبعدين شابكنا سنار سنار .. زى كأنوا مدنى ريفى سنار .. ياخ سنار دى كنا بنسافر ليها .. سيبك من قراية كتب التاريخ .. كان الفنج ولا المهدية كلو إستعمار أخير منهم الإنجليز .. ياخ مدنى الجميلة بلد الحبايب .. جلسة فى كعكاتى وطله على حنتوب إتكتبت فيها أشعار .. ما طلعت مرة الكريبة ترجا الله ومريت على التجارب وشفت الخضرة !! .. ما مشيت الحى السودانى البريطانى سابقآ !!.. ما طلعت رحلة أم بارونة !! كان حمت السودان كله فى أسمح من بنات القسم الأول !!
الكورة ناس مدنى زى البرازيل غيروا صورتها فى السودان .. مدنى أنجبت سانتو أخوان .. حمورى أخوان .. القله أخوان .. جعفر ود النوبة .. سنطة .. عمار .. والقائمة تطول .. السياسين ورجال الأعمال ..
مدنى عاصمة الجزيرة الخضراء .. مساعد معرض الزهور .. ود الشافعى سكة حديد الجزيرة .. بركات رئاسة المشروع .. مارنجان محالج القطن أرقاه فى العالم .. ذنبنا شنو كان دمرم المهووسون الجدد ديل .. دايرين تدنسوا لينا تاريخ أخضر بالخواجة قال ؟
ياخى الفن نابع من مدنى .. الثقافة من مدنى .. الصعلكة والشفتنة من مدنى ..
وحارساها الصوفية شرق النيل وغرب النيل .. من أبو حراز لى طيبة للشكينيبة .. نحن قطر بى حاله .. جايين تختصرونا فى ناس بقضوا حاجتم على النيل ؟؟
زى ما طلع مننا و فينا شيخ الجيلى وشيخ أبو زيد نحن ناس الليثى وشداد والحضرى .. نحن ناس القادرية والبرامكة وزى ما قال ود الطاهر توتوماتا .. مالا ؟ ما مدينة كاملة متكاملة بحضارة .. وخالية عنصرية ما ضاهتا هنا إلا أمدرمان ..

سليمان أخوى الشهيد طيب الله ثراه .. شرد من مطار الخرطوم لى بعثة هندسة فى روسيا .. فى شنو يا خوى ؟ .. قال لى حد يسيب مدنى ويمشى موسكو .. وتقول لى عبد الحميد قال لى قال !! .. ودى زاتا من مدنى

فكيتا فيك شوق لى مدنى

العزيز رأفت..سلامات..
سرحت معك بالذاكرة متجولاً فى شوارع القسم الأول، التجارب وأزقة فريق الحلبة..ضحكت من كل قلبى وأنا أستحضر شخصيات ناس موسى الثعلب، حيدرقطامة (رحمه الله)، الصادق أبوالعافية وودالفتلّى لا سيما وهى تذكرنى بحقبة عندما كانت الدنيا بى خيرها...
ياخى حركت فينا الأشجان والأشواق الكامنة..فلك الشكر أجزله على المداخله الثرّة..

[طارق صديق كانديك]

المشاركة الأصلية كتبت بواسطة بابكر عباس

الأخ/ طارق
حضورك و مشاركتك في البوست إضافة ننتظرها...
لكن يا طارق حب ناس مدني لمدني ده حقيقي و لا حركات ساكت فكوها فينا ناس مؤتمر الخرييجين؟!

الأخ بابكر

صباح الخير

يمكن أن يدعي الكثيرون حبا لشئ ما مرة واتنين وتلاتة .. غير انهم لا يمكن أن يكونوا مدعيين طوال العمر .. حب الذين عشقوا ود مدني حبا لا يخالطه شك حسبما أعتقد .. ولنا شواهد عديدة في ذلك ..

كيف لا يحبها المحبون وهي تتمرغ كأجمل أنثى على ضفة ذاك الأزرق الوهاج .. !

كيف لا يحبها المحبون وهي صوفياً .. أنشدت فطفقت الروح تتسامى الى علٍ .. فكانت صوفية الهوى .. !!

كيف لا يحبها المحبون من بانت غرباً حتى منعطف جزيرة الفيل وحي المكي شرقاً حباً لا يعرف النفاد .. !!

كيف لا يحبها المحبون من أقاصي شمالها هناك عند النشيشيبة ( مؤخرا ) حتى نهاية الإعدادية وحي الدرجة جنوب .. !!

ثم كيف لا يحبها المحبون وقد انغرس فيها نادي الخريجين العتيق وألهب حماس الناس في عموم بلدي ..

وكيف لا يحبها المحبون وهم يعبرون يوميا على شارع النيل يؤكدون من مصلحة الري و( قصر بوكاسا ) أن هذي الأرض للناس جميعا .. !

وكيف لا يحبها المحبون وتتوسطها حديقة سليمان وقيع الله ... وجامع الصائم ديمة وبيوت الناس هناك لايفرقهم لونٌ ولا دين .. !!
وكيف لا يحبها المحبون وهي الرائدة في كافة المجالات .. لعلني لا أحتاج الى كثير بعد أن قال الجميل رأفت ميلاد ماقال فكفانا مؤنة أن نعدد فنكون كالذي يمنن فيستكثر .. !!

متى كنا فيها انفصلت عنا عرى الحنين لتفسح مجالا واسعا للحب فيها لكل الناس ولكل زقاق وكل شجرة ,,

كتب عنها من كتب لكنها تبقى في دواخل عاشقيها دوحةٌ لا تدانيها ( موسكو ) .. !!

أكتب ما شاء الله لك أن تكتب فقد سبق الحب الكتابة ... !!

مودتي

[أبوبكر عباس]

المشاركة الأصلية كتبت بواسطة رأفت ميلاد

بابكر عباس
سلام
ياخ ما تجينا من الآخر .. مشكلتك شنو مع مدنى .....
فكيتا فيك شوق لى مدنى

الأستاذ ميلاد
شكرا على الفكة ...و هي ما جديدة و يكاد يكون ناس مدني كلهم حافظين عن ظهر قلب خطاب المرحوم عمر الحاج موسى في افتتاح تلفزيون الجزيرة...

بالتأكيد الانجليز ليهم فضل كبير جدا علي ود مدني البتتكلم عنها انت و المرحوم عمر الحاج موسى...
يا سيدي أنا شايف انو المدينة دي يجب ان تكون أغنى و أهم مدينة في أفريقيا...
و الشوف بتاعي ده ما عاطفي...

مدني المشروع و عطبرة و بورتسودان مدن حديثة قامن وفق دراسة جدوي إقتصادية مدروسة و ما زالت مجدية..

كنت بنتظر منك تقول لي كيف ميلاد الكبير انضم لنسيج مدني؟ و يجي ولدو يرفض منحة للدراسة بموسكو عشان خاطر مدني! (فهمت انها دعابة لكن برضو ليها مغزى) و ليش جو بعد داك أحفادو هاجروا لاستراليا بلجو سياسي؟ الشردة بتاعتهم كانت حتمية حتى لو الانقاذ ما كانت جات..

[أبو خليفه]

سلامات أخي بابكرعباس


وروحي ليه مشتهيه ودمدني
ليت حظي يسمح ويسعدني طوفه فد يوم في ربوع مدني

[ramv]http://sudaniyat.net/up/uploading/medani.mp3[/ramv]

بالله شوف الناس دي بتقول في شنو

الكاشف
ود اللمين
أبو عركي
عصام محمد نور

أهم ناس الملاليج نكهة إيقاع الغناء السوداني ..


..

[أبو خليفه]

المشاركة الأصلية كتبت بواسطة رأفت ميلاد

بابكر عباس
سلام
ياخ ما تجينا من الآخر .. مشكلتك شنو مع مدنى
والقائمة تطول .. السياسين ورجال الأعمال ..
مدنى عاصمة الجزيرة الخضراء ..

أستاذ رأفت ميلاد تحياتي
والقوائم تطول .. وتطول وو ..
وإليك جزء قليل من هبات مدني ورعيلها مشاااهير ودمدني
ومؤكد تذكر أيضاً مجال آخر يشتهر فيه أهل مدني :
صيدليه النيل الأزرق كان بها الدكتور فتحي الذي كان يتجه إليه الناس ويغنيهم عن الدكاتره ..
صيدليه عمران ..
صيدليه الحضري .. د. يوسف الحضري
أجزخانة بحيري .. د. عز الدين بحيري
صيدلية الجزيرة .. د. على محمود البرنس
صيدلية كمال .. د. كمال أحمد صالح دياب
و..
و..
..
تحياتي بابكر عباس ..
ومدني .. لا تضاهي ..

[أبوبكر عباس]

المشاركة الأصلية كتبت بواسطة أبو خليفه

أستاذ رأفت ميلاد تحياتي
.....
صيدليه النيل الأزرق كان بها الدكتور فتحي الذي كان يتجه إليه الناس ويغنيهم عن الدكاتره ..
..

أبو خليفة
تحياتي،،
ده طبعا خرق لقانون الصيدلة و السموم و ممارسة للطب من غير ترخيص..

[أبو خليفه]

المشاركة الأصلية كتبت بواسطة بابكر عباس

أبو خليفة
تحياتي،،
ده طبعا خرق لقانون الصيدلة و السموم و ممارسة للطب من غير ترخيص..

سلام أستاذ بابكر عباس

ياأخوي خرق شنو كمان ..
ما للآن الناس في كل مكان في الدنيا بمشوا للصيدلي ويديهم الدواء من غير إستشاره طبيب بقت على دكتور فتحي ده بس ..

ترفق ..
هي مدني .. وهم أهلها .. وهي طيبه أهلها ..


حاشيه ..
ألم يعجبك في مداخلتي غير دكتور فتحي ....

[أبوبكر عباس]

المشاركة الأصلية كتبت بواسطة أبو خليفه

..
....كل مكان في الدنيا بمشوا للصيدلي ويديهم الدواء من غير إستشاره طبيب ...

حاشيه ..
ألم يعجبك في مداخلتي غير دكتور فتحي ....

تكون قلته بابكر عباس ده ينطبق عليه قول الشاعر:

وترى الشوك في الورد و تعمى ان ترى فوقها الندى إكليلا
والذي نفسة بغير جمال ...لا يرى في الوجود شيء جميلا

الشوك ده يا أبا خليفة هو البحرس جمال الوردة و استمراريته...

بعدين يا زول الدنيا دي كبيره خلاص و في ناس قوانينن دي ما بختوها ساكت و ما بلعبوا في تطبيقها...

[أبو خليفه]

بابكر أخوي
نحن بتكلم عن مدني ..
دره .. وناس ..
قوانين شنو .. ولعب شنو .. تطبيق !!
هي بقت على د. فتحي .. بالله خلي يقطوا راسو عشان صيدلي وبعالج الناس ..

مدني ..
مدني ..

[بسمله]

طبعا بلالالالالالالا منازع



معليش انا بكون كنت نايمه الوقت الكتبتا فيهو كدا ..

ياخى مدنى دى اصلو مافى زيها .. و لا بيحصل .. تاريخ و حضاره .. و فن ..
زمان فى الشغل لامن زول يسالنى انتى من وين ؟ بقول ليهو من مدنى !!
يعنى ساكنه وين ؟ اها ساكنين المنشيه بقرف طبعا ..
مره زميلى قال ليهم البت دى عجيبه خلاص كان قلتا ليها ازيك بتقول هى من مدنى





مدنى بلدنا و ناسا يملو العين ..

بلا منازع

[أبوبكر عباس]

المشاركة الأصلية كتبت بواسطة رأفت ميلاد

.. مدنى فيها خواجات من زمن حفروا البحر .. ناس لمنيوس وأبو شمس جيوبم إنتفخت من خير مدنى وما إتنكروا ليها ..

عودة لميلاد
مساء الخير،،
لو زمن حفروا البحر هو نفسو تاريح دخول الأتراك بنبقى متفقين... لكن لو البحر ده حفروا قبل داك بيبقى صعب عليك إثبات دخولهم لمدني..

الخواجة القال الكلام ده، الزمن داك كان جديد و لسع جيبو ما إنتفخ!

[رأفت ميلاد]

بابكر عباس
سلام
إنتا بتصلحا بى جاى وتلتخا بى جاى .. لكن نكت لى كلام يرقد القلب .. كلام ود البيك وطارق كانديك وود الخليفة .. كأنى بك تنكتهم نكت .. غايتو معطيات ملت العين

المشاركة الأصلية كتبت بواسطة بابكر عباس

كنت بنتظر منك تقول لي كيف ميلاد الكبير انضم لنسيج مدني؟ و يجي ولدو يرفض منحة للدراسة بموسكو عشان خاطر مدني! (فهمت انها دعابة لكن برضو ليها مغزى) و ليش جو بعد داك أحفادو هاجروا لاستراليا بلجو سياسي؟ الشردة بتاعتهم كانت حتمية حتى لو الانقاذ ما كانت جات..

أولاً عمك ميلاد رحمة الله عليه عمل فى كل أرجاء المشروع فى الجزيرة والمناقل مفتش غيط .. إستقر 11 سنة فى ود الشافعى وبعدها الى بركات .. وختم خدمته مدير سكة حديد الجزيرة فى ود الشافعى .. وفى المعاش إلتحق بمؤسسة القطن فى الخرطوم .. وتوفى أثناء الخدمة .. أنا درست فى 11 مدرسة أبان تنقلات الوالد ..
سليمان يا سيدى درس الإبتدائية فى مدرسة النويلة والوسطى بين أبوعشر والمدينة عرب والثانوى فى مدنى الثانوية .. عمل أستاذاً لمدة عام فى مدرسة ود النعيم الوسطى .. بعد أن قدم إستقالته من معهد الخرطوم الفنى كلية الهندسة شهر من إلتحاقه به ليذهب الى موسكو التى "طرشقها" كما حكيت لك .. كاد يلمع نجمه فى نادى الإتحاد بمدنى لولا ولوجه الكلية الحربية .. هذه علاقته بمدنى ..
أما أحفاده بهجرتهم التى أسميتها حتمية بطريقة تقريرية لم تعجبنى .. أقول لك سليمان سعى لإخراج عائلته من السودان لمدة سنة قبل إلتحاقه بالتحالف .. فخرجوا قبله الى مصر وإستقروا بها حتى إستطاع اللحاق بهم لينضم الى التحالف .. بعد إغتياله سعينا نحن وأصدقائه لترحيلهم لأستراليا .. سليمان خرج ليعود .. وكان سهل عليه الذهاب الى أمريكا وإبنه يحمل الجواز الأمريكى لولادته هناك أبان تحضير والده للأركان حرب فى جامعة متشجان .. فبطل الحتميات بتاعتك دى

تحياتى

[أبوبكر عباس]

المشاركة الأصلية كتبت بواسطة رأفت ميلاد

أما أحفاده بهجرتهم التى أسميتها حتمية بطريقة تقريرية لم تعجبنى ..

عزيزي الاستاذ رأفت ميلاد
المداخلة دسمة..
قبل المداخلة دي ما كنت بعرف أي معلومة عن أسرتك. فقط من حكاية أخوك عرفت إنو ليكم علاقة بود مدني..
أعتذر على الطريقة التقريرية و حكاية الهجرة الحتمية..
القصة كلها إنو أنا استنتجت من الاسم إنكم أقباط و لا يحق لي تصنيف الناس من اسماءهم و دي بعتذر عليها إعتذار شديد...
القصدتو انا من حتمية هجرة الاحفاد كنت قاصد بيهو احفاد الاسر القبطية و ليس احفاد ميلاد بشكل شخصي و الحتمية قصدت بيها قراءة الاقباط الجيدة للحالة الاقتصادية في مدني و السودان عموما بوجود الانقاذ أو عدمها..
و دي تحتاج مني لاعتذار اخر لكل الاسر القبطية بالسودان لانو دي فيها اشارات غير مريحة و إن كانت تستند على ارقام نختلف في قراءتها..