اقتباس:
المشاركة الأصلية كتبت بواسطة وهاد ابراهيم محمد
ايوة الجناقير* 
_____
*لو غلبتك استعيني بـ/ حمادة  |
أهااااا جيتك للجناقير gap
اول أيام من جيت و بقيت ربة منزل، كنت بعاني من شد العصيدة، عارفاني انا في بيتنا بيجيبوها لي و ياها عصيدتنا المااارنه البياكلوها بالمعلقة ديك، جيت لقيت ليك زوجي العزيز حماضة بياكل عصيدة أهلنا القويييييية ديك، كان فلعتي بيها زول بينفهقgap
من اول يوم ما جاملني طوااالي ختاها لي واضحة، عصيدتك دي يا ست البنات ماااابتنفع معاي و بتجيب لي(أم جِريطي)
اها انا كل يوم أصوط العصيدة و في النهاية باكلها براي و أبكيييي و باقيها في الزبالة، لحد ما حسع بسم الله ماشاءالله بقيت عندي عضلات تبش من صواطة العصيدة و خلاص إتاهلت للدوري الحداشرgap
المهم
ربك رب الخير يوم كدا واقفه جنب الباب جات واحده ماشه، شبت ليك فيني: إنتي سودااااانية؟! قلت ليها بالحيلللل مرحب بيك.
يعلم الله من ما إتعارفنا بقت زي أختي، بعدين حسستني ليك إني قاعده في أم بده، تجي ماشه الدكان لازم تغشاني تشوفني لو دايره حاجة، خبيز العيد خبزتو معاها و هاكذا أشياء
أها يوم قالت لي: تعالي لي الليلة عملت ملاح تقلية بي كول، قلت ليها كووووووول ماااابصدق، قالت لي بتعرفيو، قلت ليها بري يا بت أمي لا بعرفو لا شميتو لكن محمد قاديني الكول الكولgap
أهاااا جارتي دي طلعت من بنات الزغاوة لكن مولوده و متربيه في بحري،زغاوية تايوانgap
جريت جري شلت الملاح و الكول، لقيتها خاتاهو في علبة قزاز حنكوشة كدا، شلتو و جيت فرحاااانة، بلاهي يا مؤمنين فتحتي للعلبة كدا و رشتي ليو فوق العصيدة ديك، نسال الله السلامة و السدادgap
قلت لي محمد: أول مرة في حيااااتي أشوف لي أكل ريحتو بعر بعر!!
شلت لي لقمة كدا و قلت ليو: الله يسالني طعمو زاتتتتتو بعر بعرgap
شبكني ليك يا ما بتفهمي دا شي مغذي جدن و العلماء أثبتو إنو فيو فيتمينات و حنك نمل عاضي من النوع داgap
قلت ليو : هييييي الفيتمينات دي كان ابلعا حبوب ما بقبل على شيتك دا.
أها النجيك لي (ام جنقر) او الجناقر يا عملاتكgap
اليوما داك قالت لي جايبه ليك ام جنقر، قلت لي حماضة اوعى يكون مقلب زي الكول، طلع دخن بالروب gap
جارتي مشكوره علمتني بيعملوها كيف و إنطلقت ليك gap
أحيطك علماً يا أستاذة وهاد، أختك في لندن دي و بلا فخر أجمل من تشد العصيدة بي ملاح الكول و ال (أم-جنقر عارفاني قاصده أقولا كيفgap)
و شكرن شعبي
