فَرحانة بيكْ كُل النِجُوم ، وأنا رَاقِد مَرَدَّخْ بالحَلاَ

[imported_عبدالله الشقليني]

فَرحانة بيكْ كُل النِجُوم ، وأنا رَاقِد مَرَدَّخْ بالحَلاَ

إثر دعوة فخمة للإحتفال بمنتدى عكس الريح تحت إشراف
بروفيسور مُعز عمر بخيت في أبوظبي ، على شرف
الأستاذ خالد الحاج يوم 29/12/2005 م .
حضرنا الحفل وتم ( قولة خير ) عن مؤاخاة بين منتدى سودانيات
ومنتدى عكس الريح ، وكتبت للمنتدى : ـ
لعكس الريح في عيدها السنوي الأول نقول :
ـ فرحانة بيكْ كُل النجوم وأنا رَاقِد مَرَدَّخْ بالحَلاَ .
لم يكُن لقاءً و افترقنا .. ، ولم تكُن الدُنيا أسعد في هذا العام
إلا حضور سيدة عُمرنا الجميل عندما يهبِط طائرها البَاذِخ بيننا هي وزهرتيها ،
و رفقة ( خالد الحاج ) و( معتصم الطاهر وقوت القلوب ) ، ومن ثمَ عيد الكواكِب :
عيد عكس الريح الأول .
نعم .. ياسيدة الريح المُعاكِس .
نعم .. يا فتنة العِطر الفوَّاح .
هُنا بين الأحباب نعمنا ذلك اليوم منذ إصبَاحه علينا .
بدأ برفقة عزيزنا الفاتح و وردة عُمره ، و ( معتصِم الطاهر )
..بدون وردة عُمره فقد أخذتها الأسواق ، وتركتها الأشواق ! ،
و (خالد الحاج ) بدون وردته أيضاً ، ولَم ( تَقصِّر ) فمن هولندا
( شّبَّتْ التلفونات حُب مَطرة ) وكما رقابة لصيقة ! ،
زي ما بقولوا ناس الكوُرة ، وكان معنا تاج عكس الريح و ( خاتِف اللونين ) :
بروفيسور مُعَز عُمر بخيت ومعه (الشِبل الرَجُل) ( والزهرة الصغيرة ) .
هو وإبنه : عَينَّا باردَّة ( صُحبَان صُحبَان سَاكِت ) الدَاير يفَلِّتْ ..يفَلِّتْ..
دُنيا ! .
كُنت بينهم ( المِسيكِين الوحيد ) بدون وردتي ،
فقد فارقت هيَّ للسودان مع زهرتيها من بعد عيد الفِطر ،
وتركتني ( لـ الله وعِيشةَ السُوقْ ! )
. قضينا من بعد الظهيرة وإلى ما قبل الغروب أحلى سويعتين ،
ثم جاء المساء :
لم أعلم أن القَدر قد خَبَأ لي في جيب سُترته الداكِنة كنـزاً من السُعُود .
في العاشرة والنصف مساء التقيت نُجوم عَكس الريح المُتلألئة .
ليلة بألف ليلة .. وليلة .
بيننا وبين الجِنان المَوعُودة أن ليلَتنا لم تدُم ، وكما يقول أهل مِصر
( الحِلِو ما بيكْمَلش ) .( إشراقة الغناء الفَخيم ) ، على يمينَها شِعر
مُعِز المَغسول بماء ورد الملوك ، ونَغم موسيقى الموصلي الفارِهة
على يسارها ، وحلَّقنا في سُدُف الغيم ..
ولا ( غِناء وتلحين الموسيقار حَمزة سليمان الرائع
من شعر الشاعر محمد محمد خير ؟ ) :

من ليل ملتخ
بالكوابيس والسهر
فجيت رؤاي
قالدت سوق الشجرة
واب روف والبَنات
الزنكي سوق الناقة
والنَاس والخَدار
وقطعتَ حي البُوستة
مَرفوع الكلام
ودمي ينبح ويندهِكْ
00000000
تاوقت بى عيني اليمين
جوه الشمال
من قلبي كان نازل مطر
لون المطر كان بشبهك
عبيت مشاعري من النسيم
وزفرت طلعت الوحيح
قلت النسيم ما يجرحك
00000000
الله إذا ارتاح شجاي
صبح الحزن مليان ضحك**

ولا الكَلام الأنا قَاطعُو مِن رَاسي لأني ما حافظ الباقي : ـ
**
و أتغَدى في نادي الهِلال ،
و أتعَشى مع الشَواطِين الحُمر .
ونَادُو لَي عابدين شَرَفْ ،
يكَفِّنِي بى بِتّ الحَلالْ .
**
ولا الحِلوين في العَزف والتوزيع والضبط الموسيقي ؟
.. ولا أتكَلَّم عن الموسيقار الموصلي ؟ :
( الحاضَر الغائب ) وهو ( يَغَمِت لينا في إضنينَّا لَحنُو الحِنَيِّنْ )
ولا أتكلم في سيدة التجهيز من خلف الكواليس وفي وَش الكَواليس .
لها منَّا جميعاً من الشُكر أجزله .. ولا منُو تاني يا ربي .. كُتَاااار و كَتيرات..
عَينَّا باردة عَليهُم .. وناس لابسين فُل سُوت يخَوِّفُو الشِتَّا ؟.

أتكَلَّم في منُو ولا أقطَع مع منُو ؟
و لا أشرَب عَسل مِنو ؟
ولا ناس الشارقة كمان ؟
إتذكرتَ أغنية سَباتَة قديمة بهديها ليكُم بِتقُول :
{ الناس البِرِيدُوني بَجَامِلُن بى عِيُونِي }
الشُكر موصول ( للكيكَة ) الله يرحَما ما قَصرَت مَعانا .
أهلاً بأهل عكس الريح ، بشيبهم وشبابَهم .
الله..... أنا ما هَبَشتَ رُوحِي وكمان معاي الكَاشِف اللابِس ( مُواطِن ) !
**
مرحب بيكُم في القلب النابِضْ
عُمرُو مُشَاتِر.. دَايماً يقَابِضْ
**
دمتُم بمَحبتكم العامرة ، ويدوم صَفَاكم .. يحيَا النيل الرَّوَاكُم ،
و المَا عِندهُم نيل ( أكَلُو النِيم ْ ) .
وكل يوم وأنتم في عباءة الطيبة وسجادة الكِلمَة الصَدِيقة والطلاقة ،
أو كما قال الشاعر حسين بازرعة .

محبتي للجميع .
وكل سنة وإنتُو طيبين .

عبدالله الشقليني
قبل 2005 م ما ينتَهي بى يوم واحِدْ .. فقَط .

[imported_mamkouna]

الصديق العزيز و الأخ الغالي...عبد الله الشقليني...
كفيت...و...وفيت...

كل سنة و إنت أطيب و أروع و أصدق و أعمق...
بيك إنت....يبدأ العالم الجميل...
تسلم...

[معتصم الطاهر]

الله نم كتاباتك يا شقلينى

والله من ونستك

ولى الله من بعادك ..

[imported_عبدالله الشقليني]

عزيزتنا ممكونة
سمحة السيرة
وسيدة حُلو الحديث

والله مُشتاقين ، وكل سنة والجميع بخير
وأتم العافية .
كان يوم جميل ، وكان بالفعل أجمل من احتفال رأس السنة
الجديدة . وكان الغناء جميل ، ورقصنا زي الناس الصُغار ! .
وشاهدنا مي هاشم لأول مرة وتعرفنا لخطيبها الظريف .

[imported_عبدالله الشقليني]

عزيزنا معتصم
دوماً نفتقد استرسالك الذي لا نعرف من أين يبدأ .
فقدناكما أنت وسيدة قلبك في ذلك اليوم . أول أغنية بدأت بها
إشراق كانت للموسيقار الرائع : علي السقيد و مطلعها :
فَرحانة بيك كل الدروب ...
وبدأ اليوم الجميل نوراً ومعنى .
امتدت السهرة حتى الثالثة من صباح يوم 30/12/2005 م .

[imported_عمر صديق]

عزيزنا الغالى الشغلينى
اول هام
اهنئك بالعيدوعيد سعيد واتمنى ان تتحق فيه كل الامنيات والتهنئة موصولة لكل رواد سودانيات بدون فرز الصغير قبل الكبير طبعا لا زم اتحيز للشباب بس صور التى فام بانزالها الخال ما شاء الله جميلة جدابامانة كده كنت راسم صورة فى خيالى غير الصورة


والحمد لله طلعت الصورة الحقيقية اجمل
وانا كنت معتمد على القصص التى تكتبها والمشاركات
كنت خاتى ليك صورة خمسينية وبجلحات
لكن كانت المفاجاة السارة
وتحياتى لكم

[imported_Garcia]

الجميل بيكاسو ... تحية طيبة وكل سنة وانت بخير وادام ايامكم فرح وسعادة ..
وما اجمل تلكم الايام بصحبتكم والاحباء خالد / عكود / معتصم ...
وباهل عكس الريح تكتمل الفرحة والصحبة الجميلة ...
ولك كل الود ...

[imported_خالد الحاج]

العزيز شقليني
عساك بخير يا زول يا جميل

كانت ليلة بألف ليلة..

غمرنا الجميل دكتور معز بكرمه ولطفه كالعادة وهذا هو دأبه كلما ألتقيته

كان هناك حمزة سليمان الحبوب وهو يتلطف مع الكل وتحسهم يحبونه حقآ..

كان هناك أيضآ الفاتح (زيكو) وهوازن أروع البشر ,اكثرهم بشاشة..

خال فاطمة الزول الرائع الودود..

ود الدامر وقد إكتشفت فيه روح النكتة والسخرية المحببة..

الأخوان خواجات وإبتسامة ومشاركة ...

عاطف موسي وكلماته الدقاقة ..

مي هاشم..

مكرّم..

وبقية الرائعيين من عضوية "عكس الريح" وبينهم لا تحس أنك غريب

شروق ذاك الصوت الملائكي (أنتظر أن يفي العزيز معز بوعده ويرسل لي بعض أغانيها) ..

نعم كانت ليلة بألأف ليلة وألف مبروك لعكس الريح مرور عام وعقبال العام المائة إن شاء الله

[imported_Dr. Moiz Bakhiet]

حبيبنا الرائع الشقليني

أنت رجل من ماء وورد

نجمة وشمس على كفها برتقالة

نار وقرآن وخشوع

في حضورك يشرب المطر رحيق العافية من ندى معشرك الجميل

ويصطف الليل على أرصفة الحلم ينتظر صباح مودتك البهي

كانت ساعات مفعمة بالأماني والمحبة

وكم سعدت وسعدنا بلقائك وأنت تستخرج بساتين الإلفة من نبض الوردة ومن عبق الحنين

ولكم أحببناك أيها الرجل النبيل

وأسعدنا إسمك بين الأحباب بعكس الريح

ومعذرة لغيابي الطويل هنا وهناك بسبب السفر..

ولسوف أعود بالصور من ألبوم عكس الريح هدية للأحباب هنا

[imported_Dr. Moiz Bakhiet]

المشاركة الأصلية كتبت بواسطة خالد الحاج

شروق ذاك الصوت الملائكي (أنتظر أن يفي العزيز معز بوعده ويرسل لي بعض أغانيها) ..

نعم كانت ليلة بألأف ليلة وألف مبروك لعكس الريح مرور عام وعقبال العام المائة إن شاء الله

سلام يا ود عمي العزيز

وكل سنة وانت وكل الأحباب بألف خير

بالجد كانت سعادة غامرة أن نلتقي والرائعين من كل فج عميق بالإمارات

وآدي الرجعة من لندن والله ..

منتظر من شروق تديني الأغاني في سي دي عشان أرسلهم ليك

لكن ح أنزل ليها أغنية هنا لم تؤديها في الحفلة وهي من كلماتي وألحان الشاب المبدع محمد عواض

الأغنية بعنوان «غيم الفراق» وتقول كلماتها:


[align=center]ما بوصّي عليك تاني

وما بقيف قدام عيونك

واشتهيك بي صدر حاني

كل سكة معاك مشيتها

ارهقت فيني الثواني

واتعبت نبض الدقيقة

وفارقت زمني ومكاني

***
ما بعيد في العمر مرة

لحظة بترجع هواني

وما بسوق غيم المحنة

لي ضفاف هجرت حناني

وما بعيش ليل ما بضوّي

نجمو بالحب والمعاني

عمري كم شان فيهو أنزف

كل يوم دم ارجواني

***
شوقي ما معناهو انو

بي هواك اشقى واعاني

وكل احساس فيني عامر

هاربة من دربو الأماني

وكل نظرة حزينة تصبح

آهة تتوسد زماني

لا عشانك دمعي جف

لا الظروف حنّت عشاني[/align]

[imported_Dr. Moiz Bakhiet]

للأسف الأغنية ما اشتغلت من الموقع الكانت مرفوعة فيهو

وكمان اكتشفت انو المدام صادرت السي دي في لندن..

ح انزل ليكم الصور بدلها..

[imported_Dr. Moiz Bakhiet]

نبدا بي خالد



وبعدين حمزة



ثم الربة:

[imported_Dr. Moiz Bakhiet]

[imported_Dr. Moiz Bakhiet]

زيكو وهوزي





والشقليني ظهر.. آخر بهجة..

[imported_Dr. Moiz Bakhiet]

ونختم بي مي هاشم وودالحاج