جضماً معوّد على الكفيت

[معتصم الطاهر]

جضماً معوّد على الكفيت

-ثلاثية- ( نص – قصيدة – أغنية)

1. اولا :- النص ..
تنبيه :-
رُج القلب جيداً قبل الدخول ..
يحفظ الدمع بعيدا عن متناول الأبطال
ولا تأخذ الحزن ترياقاً قبل إستشارة الحبيب
**
فلاش باك ..
عندما ضاق وطن بمساحة مليون ميل مربع ...
و اتسع الوطن فصار زنزانة ..
فتح لنا وطنا لنمارس فيه سودانيتنا .. و أطلقنا أحرارا فى عالم أرحب ..
و حضرنا مكرمين بدعوة كريم .. فتعارفنا..
رأفت وحافظ وكيشو ..
جانيت ومنوت .. ومي و قوت و بدور ..
وجدناك ..
شجاعا و صريحا يمسك العقرب من ذيلها ..
"ماك الدرجوه للكتال .."

كما عادتنا جلسنا فى حوشك ..دون لماضة خفير أو دبلوماسية سفير ..
جوك اخوان والحضن هموم .. ما نقيت ولا اتشكيت ..
وجن البنات هاتفات ..
"يوم تمرق الخرطوم .. نتلقاك بالغنوات .. و نتلقاك بالقدوم .."
وجدناها سودانيات .. كبياض العِمّة ..و سعة قلبك الكبير ..
فيها .. اتفقنا .. واختلفنا بود .. تخاشنا فى لعبة حلوة ..و أحيانا .. تزاعلنا وزعلناك ..و حردنا .. و تراجعنا فى مسمانا أعضاء سودانيات ..
وقفنا أهل مروة مع بعضنا و غيرنا ..و سندنا المائل و سترنا المكشوف و دوزنا الأشتر. تجادعنا بالدراب و الدوبيت ..
فكانت له ولنا وطناً شاسع الوجدان
و منبرٌ سكنى ...
وكنت تلاحظها إذا نمنا ..و تمازحنا إذا قمنا ..
وإذا جُعنا لغناء .. ألقمتنا طمبوراً .. وعوداً .. ولحنا ..
حتى إذا ظننت أن قد تم فِصالنا .. رحلت عنا ..
هو محض ظن يا خال .. ما زلنا تحت سن الفطام عنك..


كدى النونسك حبة يا ابن عمي ..و اصبر على شوية ..قبال تقول لى " الشكية لله " أو " بعد احفظ الداتا "
فى مرضك الأخير هذا
قلنا نخفف عن بعضنا .. كما وصيتنا .. باحساس أولاد اختك يا خال..
وسمينا الونسة " مرض خالد " ..
ويا ريت ما قلناها ..تعال شوف ليك دِّمّيع .. و نخجى و بكا ..
.. بعضنا الذي قلنا أنه رسوبى بطيئ الانفعال عاطل التأثر .. انتفض كما لو أن به مس من حبك ..و هو لو تعلم حب عظيم ..
والذى قلنا أنه ثعلب وجدنا أنه - مكار - يفعلهما الاثنتين .. البكاء والدعاء ...
"مرض خالد" ..أخذها مبر محمودا ليفش توتره ليحل مشكلة "مرض حامد" المتفشي فى المنبر .. فتعلق بأطرافها حافظ " البكاي" والرشيد "الحنين " و تناساها غير عامد طارق الحسن والذي رغم معافرتو ..كان يبكي بين كأس مر وإحساس مرير و دعاء مستمر..
كأنهم كانو في حوجة لرحيل خالهم .. حتى يدركوا قيمة بعضهم عند الإحَن ..وهم الأحَنُ كما عهدتهم وشهدت لهم الأسافير حتى قيل أنه منبر اجتماعي أكثر منه آخر.
في مرضك يا خال .. انقطعوا عن الكتابة للدعاء ..
و تطمين بعضهم ....
وترابطنا أكثر .. خَتّينا راسنا جنب بعض و قلوبنا ربطناها صُرة فى خيط ووجهنا للذى لا نام و لا اكل الطعام ..
و هدهدنا بعض ..
"تعال يا خال
سكت الجهال "
و كنا قايلنك نايم و بتصحا .. و هتفنا .. "صحت الخرطوم ..اصح يا خال"
و هرشونا بلطف .. .."اهمسوا براحة الخال عاوز ينوم" .. و رفعت لنا نائبة المشرف بحنان و أسى بندا فى لائحة الريدة ما قريناهو قبال دا ..
وهدهدناك ..
" النوم النوم
بكريك بالدوم ..
بلحات البركل ..قهوة كسلا و بنات الخرطوم .."
يا زول ما تقوم ..
واتكينا على بعض وميّلنا .. يا الكنت سندنا ..
كنت قشاش دموعنا و كانت ضلوعك مرقدنا ..
بالله سيب الهزار .. وتعال طالع مد راسك ..قول " يااااك .. غشيتكم "
وانت عارف !!
سارة دى ما عندها أعصاب للخمج ..
مش إتواعدنا نمش ماركاتو .. يا شهقتا .. ..أو قهوتا ..
ما اتقهويت
و قمت مشيت .. و خليتنا خرمانين ليك ..

فبالله سيب هزارك البايخ دا ..أنا بحبك و بفخر بك ..ولّ ماك عارف
عارف جضيماتك ورمانات من كترة البوس من الأحباب و حباب ..
بس ياخ سيب الهزار جضيماتنا نحن وِرمن من شِلّيخ الدموع السخنات الوشلن عليهن ..
خجيت القلوب و هزيت غربال النفوس واتساقط الدمع ..تارى الدمع وشّال ..
شوف حسن خصالك و شمايلك شملتنا بعد رحيلك فأسمونا .. المنبر المحترم .. ليتك سمعتها قبل أن ترحل ..
تعال يا خال ..
يادوب فرهدتّ فى الخريف الفات ..بنين صبفت ..
يا خال
الجرح الجديد فوق القديم إتفشّ

to be continued



.
.

[imported_محمد مصطفي]

يا الله يا باش ...
رحم الله خالد الحاج وادخله فسيح جناته
نبل الحروف نبع الاحساس الصافي والدافئ والاكثر صدقاً
ومتي تلامس الود بعضه كنتم خير اخوة واصحاب ......
عملاقة شدرة الزول النادتكم ونادتنا وسميناها عالم من تواصل ومحبة
وسماها غيرنا سودانيات المحترم ... هذا شرف نهديه لروح الفقيد
وهذه الحروف المنقوشة ومعجونة بي كل احاسيسك يا باش ... اتناولها ما بين الدموع والعبرة
انه صدق التآخي ... وروعة المعاني السامية في الزمن الاجدب
اطآل الله عمرك يا باش .. ومتعك بالصحة والعافية
حار التعازي والبركة فيك

[imported_عباس الشريف]

سلامات يا باش
رحم الله خالد الحاج ....... كلام اقطع القلب

[معتصم الطاهر]

اقتباس:
المشاركة الأصلية كتبت بواسطة محمد مصطفي

يا الله يا باش ...

رحم الله خالد الحاج وادخله فسيح جناته
نبل الحروف نبع الاحساس الصافي والدافئ والاكثر صدقاً
ومتي تلامس الود بعضه كنتم خير اخوة واصحاب ......
عملاقة شدرة الزول النادتكم ونادتنا وسميناها عالم من تواصل ومحبة
وسماها غيرنا سودانيات المحترم ... هذا شرف نهديه لروح الفقيد
وهذه الحروف المنقوشة ومعجونة بي كل احاسيسك يا باش ... اتناولها ما بين الدموع والعبرة
انه صدق التآخي ... وروعة المعاني السامية في الزمن الاجدب
اطآل الله عمرك يا باش .. ومتعك بالصحة والعافية
حار التعازي والبركة فيك

محمد مصطفى
مرات أقول للناس الما شافو خالد حظكم ..
وأقول أحيانا ..من نعم الله على أن عرفته ..
كأنى أسمعه يخاطبني بلازمة
"ياااا بن عمى " بطريقته الحلوة و نغمة صوته التى تمتلئ حنية ورجولة ..
صدقا .. لم أقل الكثير ..
و عفوا اذا لم أراجع ما كتبت ..
فالحديث عن قامة يأتى " قطع أخضر "

[معتصم الطاهر]

اقتباس:
المشاركة الأصلية كتبت بواسطة عباس الشريف

سلامات يا باش
رحم الله خالد الحاج ....... كلام اقطع القلب

عباس يا جميل ..
أرى فيك من سمات خالد الصراحة والوضوع و الدغرية ..
كان يحب ما تكتب ..
و عندما لا نتفق على رأي يرجعنى ويقول " عباس دا ممكن يحرقك كلامو لكن نفسو صافية عشان ما عندو غرض "
ياخ دا حملك مسئولية !!!

أما عن قلبى فلم يتقطع ..
ففى كل جزء منه شيء من خالد لذا احتفظ به كاملا ..

[imported_جانيت]

احكي يا معتصم
دمعي بدأ النزول بعد ان جف وامتلات الدواخل ضيق وحسرة
فضفض يا ياباش ودعني اقرا
عله يهون ما بداخلي واصل ياباش تعدمنا كلنا لو ما واصلت في حروفك راحة
ودوما نمسح الدموع براحت يدي ونقول رحمك الله ياخالد وجعل مثواك الجنة

[imported_أبوجهينة]

معتصم

هذه مناحة تجلب الدمع و المواساة في آنٍ واحد
و الإتنين نحن محتاجين ليهم
الدمع بيغسل بعض الحزن
و المواساة أمر جُبِلت نفوسنا على الإتكال على جدرانه لعل و عسى

واصل يا عمدة

[imported_طارق صديق كانديك]

لايكاد يقرأ القارئ إلا وغشيته الدموع .. !!

يالله ياخي

[imported_سمراء]

الباشا ...
أعزرنى لقد تهربت من لقائك بشتى السبل ..
لم يحتمل قلبى وجع اضافى بلقائك
فأنا اعرفك جيداً ورفيقة دربك ..

وها انت تأخذ منى ماخفة عليه
ابكى ياصديقى ...
فلا يوجد من احق به لدمعنا

[imported_عزو الحاج]

الله يرحمك يا خالو خالد المرحوم العايش بداخلنا
بعد وفات والدى رحمه الله عليه كنت اسمع اى خبر وفاة اقول الله يرحمهم
ابوى مات مافى اهم واعز منو وكنت فاكرة انو دمعى خلص من شدة ما بكيت عليه
لكن كانت مفاجأتى بقدر هذا القدر الكبير من الحزن على وفاة الغالى خالوخالد
منذ وفاة والدى لم يتألم قلبى بهذا الالم والوجع
وفاة خالو خالد كانت فاجعة لكل الناس ولكن كانت لى صدمه عمرى
لانى شفتو قبل سفره الى السودان بعد غياب 10 سنوات
من الحنين والشوق واللهفة والحب
فهو لم يكن خالى فقط بل خالى ووالدى واخى وصديقى
وحبى الذى اعتز وافتخر به فى كل مكان
الله صبرنا على فراقك ياسيد الناس
كل ما تجف دموعى شويه الاقى الببكينى تانى
لكن كلماتك يا معتصم لم تبكينى فقط بل جلجلت قلبى كثيرا
نعمل شنو ما عزيز على ربه لكن نحنا ما قادرين نستوعب فكرة غيابه عننا بالرغم من غياب جسده ووجود روحه بداخلنا لكننا نحتاج لنحضنه ونقبله ونتشبع من سلامه الحنين الذى سلم به علينا عندما جاء الينا فى دبى بعد غياب سنين طويله من ناس بيتنا وقال لينا انا تانى مابغيب عنكم كل شويه بجى دبى تانى كثير وقال بمشى الخرطوم وانا راجع بقعد معاكم تانى اسبوع اشبع منكم شويه عشان ماقعد معانا كتير لانو عكود كان عامل ليه احتكار بس انا قلت ليه لما ترجع فى العودة انا بدسك من كل اصحابك وبعد ما سافر مننا قعدت افكر لما يرجع خالو نمشى وين ونعمل ليه برنامج لذيذ وافكرفى اسماء الاماكن الجميل ذيو لانو بيحب الجمال
ولكن جاءت الصدمة التى لم تكن فى الحسبان ولا فى الخاطر وجاء القدر
الان لا املك سوى رفع الايدى بالدعاء المستمر له ولوالدى رحمه الله عليهم

[معتصم الطاهر]

اقتباس:
المشاركة الأصلية كتبت بواسطة جانيت

احكي يا معتصم
دمعي بدأ النزول بعد ان جف وامتلات الدواخل ضيق وحسرة
فضفض يا ياباش ودعني اقرا
عله يهون ما بداخلي واصل ياباش تعدمنا كلنا لو ما واصلت في حروفك راحة
ودوما نمسح الدموع براحت يدي ونقول رحمك الله ياخالد وجعل مثواك الجنة

تعرفى يا دكتورة
ليه لفظ خال .. هذا اللفظ الحنين ..
لأنو كل البنات " بنات اخواتو " .. حنين عليهن و واقف معاهن ..
فوق ضهرو الولية تنوم ..
زول يفقدنو البنوت قبال الرجال ..

كفاية تقول عنو " يا خــــــــــال "

[ناصر يوسف]

هذا بُكاءٌ حارق يا معتصم

قصدتَ إني أتحاشاك أي والله

وما قدرت أتحاشاك وقلت لمتين أقعد أتحاشي فيك

مالك علي يا معتصم يا طاهر القلب النَضِر

مالك علي وأنا الصابر علي الجُرح النازف في جواي

مالك علي جاي تبكيني من تاني

يا زول كفاي .. علييييييييك الله كفاي وخليني في أساي

ربنا يرحم خالد الحاج أخوك وأخوي وأخونا كلنا

[معتصم الطاهر]

اقتباس:
المشاركة الأصلية كتبت بواسطة أبوجهينة

اقتباس:


هذه مناحة تجلب الدمع و المواساة في آنٍ واحد
و الإتنين نحن محتاجين ليهم
الدمع بيغسل بعض الحزن
و المواساة أمر جُبِلت نفوسنا على الإتكال على جدرانه لعل و عسى

واصل يا عمدة

أبو جهينة ..
ما كنت أظن أنى سأنوح يوما ..
خالد غسلنا بالدموع ..يا حبيبى ..
غسل النفوس و أحيا فينا أننا نبكي .. شعور غريب أن تبكي لأيام ..
كأننا كنا ننتظر لنتطهر بالدمع ..

أذكر أمرين بينك وخالد ..
أولا رغم أنه صاحب الموقع فلقد كنت أول من تسجل من الأعضاء قبله ..

ثانيا مقولته لك التى يكرر دائما و بنفس الخط واللون ..

اقتباس:
أبوجهينة
لا تكف عن إدهاشي أيها العملاق

#0#

[imported_عزو الحاج]

كنا انا وخالو خالد المرحوم العايش بداخلنا نتنافس فى حب الفنان المرحوم مصطفى سيد احمد وانا اقول ليه الاغنيه دى بتاعتى مصطفى يقصدنى انا بيها وهو يقول لى لا دى شبهى انا
وفى يوم اتفقنا كل واحد يختار اغنيه تكون مميزة يهديها للتانى انا اهديته ( المزار ) لانو كان بيحبها جدا وهو اهدى لى ( لمحتك )
وكان بيقول لى كل ما بيسمع لمحتك بتذكرنى
انا حسه بهديها لكل احباب المرحوم خالد العايش بداخلنا
كل ما الريح تطارد الموج بزيد اصرار
واحلف بيك اغير سكة التيار
واقول يا انت يا اغرق
تلوح لى مدن عينيك وترفع لى منارة بسمتك ساريه
وبديت احلم وبديت احلم
ما قصدته بهذة الكلمات المعنى منها
وهو ان نكمل مسيرته فى هذا المنتدى
وربنا يجمع الناس دائما بالخير
بالرغم من دخولى متأخر جدا فى هذا المنتدى وفى ظروف صعبه جدا
لكنى احسست انى وسط اهلى وناسى وكأنى بعرفكم لى زمان الله يعلم

[معتصم الطاهر]

اقتباس:
المشاركة الأصلية كتبت بواسطة طارق صديق كانديك

لايكاد يقرأ القارئ إلا وغشيته الدموع .. !!

يالله ياخي

ليت الكتابة تريح القلب
وليت الدمع يريح الفؤاد ..

كانديك
يا بن مدنى ..
هي مسئولية حملها الجميع و انت على قمة الوعد
ها هو يعلمنا العطاء و يطبق الديمقراطية مفهوما و تجربة ..