وفاة الشاعر العظيم محمد الحسن سالم حميد

[عبد الجليل سليمان]

ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تجّز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلِّبو في إيديهن
عدمانين من إسم حكيم
واللا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حُجّار
الله يصرف الخواجات
بينات جعفر والمحجوب .. والمحجوب والخواجات
طقُّت حجي .. العمدة طفاها
باقي الناس الجات للفِِِرْجِي ..
قنّبو قيّلو شبعو لحوم .. والخواجة يصور ساكت
سِتْ خرفان وتيس ما كفّن
ست خرفان في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفُّو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحرُّوم
ستة خرفّن وتيس إنصفّن
ستة خرفّن في فد يوم
جات من صالح بت كلتوم
تسكت تخبز طول اليوم
لمن حرقّت الدولاب
قنبت المسكينة تدعِّي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع

[عبد الجليل سليمان]

بعد الحاصل والإتحصل ست الدار بت أحمد تكتب)
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. وأرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما أذوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض ..بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيت؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ثم اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك

[عبد الجليل سليمان]

تلغرافات :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد

[نبراس السيد الدمرداش]

بين الموجة والخزان حلم إنسان.

هردت لهاتي بالغنوات ... وقُتْ يبرد حشاك يا امي
ومن التعب البلا صالح .. تفيقي .. تروقي ... تنجمِّي
تسوي مكانسك المطرة .. تضوي البيت وتنحمي
تمرقي صبوحة للجيران ... قدح فوق ايد وفي ايد أَلمْي
يلاقوك شُفّع الكُتّاب نُضاف وظُراف بلا النّسْمي
ويغنولِك ... يغنّولِك غناوي السّابْ
وفي بيّوضة مافي سراب
جبال كَجَبي وفيافي الكاب ... تميد بالخضرة منقسمي
ولا غابار .. ولا هو سحاب .. وتنهجمي
من الدّهشة وتحاحيهُن ... غناكُن نيي ... غُنا الوهمي
ويهتفوا زي كلاب الحي .. على الأغراب
حوافي الصّي وبيوضة
البراسيم فيها مفروضة
خدارا يراري شوف عيني على الأبوابْ
قماريها وحواريها وطواريها بقت روضة .. بقت تشرب من الحامدابْ
تشربي عافيي من إيديّ ... تدوي اليوية بي حشمي
تسوّي السّي وتبتسمي
تشوفي رهاب بُعُد نجمي
واشوفو قريب قُرُب نضمي
اشوف العالم التحتاني .. هيلا هوب وقف ناهضْ
دكّ عمايد الفوقاني ... جوه الُّجب رمى العارضْ
وفي السابو الدمار أفراق عريق الحب نبض قابضْ
متل قبض الحروف في اسمي
غناوينا القبيل رقراق علينا تصب برد قارضْ
أَلُكْ طيناتا من دمّي .. وارمِّلها من عصب عشاق ..
أنط تُلُّبْ واجيك عارضْ
واجر نمي
أدودي لهاتي بالغنوات ... عقب يبرد حشاك يا امي
تسوي السي وتبتسمي
تسمِّي الشعب وتعتصمي
بحبل الشعب تتفرق ظلمةً فيها تتحرق .. صُرُمةً قالوا ليك قسمي
أدودي لهاتي بالغنوات عقب يبرد حشاك يا امي
ت قلبي الكلمة بي الكلمي
ضراعك يرمي ما يدمي
تقيفي بعيد عن الشمات تكوني اقرب لي من اسمي
واضمك بارتياح يا امي
أحبك صاح وصاح حلمي
ولاكي سعية للضباح ولا شمش الصباح حزمي
ولا كتف السلاح سواح ولا نزف الجراح ألمي
هيا انحزمي .. هيا انخلقي .. هيا انعتقي ..
متين مو دايرة ري تسقي
ولا في إيد النزيف نبقى ... ولا في إيد الخريف تبقي
ولا الفيضان يبضِّع بِكْ .... ولا في القيفة تنهدمي
ولا ان جات حاره تنهزمي
ولا يغشى الغلب قلبك ولا تشقي
ولا انت تخافي لا تدمي
ضراعك يرمي ما يدمي
فيا حزن البلد عوك كَرْ
ويا سعد الولد ضَرْ ضَرْ ... مع النسمي
ولي قيمة العمل عمي .. وافتحي ظلمتك للضي
سِنِّي على النضال إيدي
سوِّكي بالهتاف فمي
شوارعك لي دويها علي
اذا ما اخر العلاج الكي ... مراويدك حمر صمي
مراويدك حمر يا امي
بليلتي ولا ضبايح طي
قليلتي ولا كُتُر سّمي
وطني ولا ملي بطني
سكاتي ولا الكلام الني
سلام يا امي .. سلام يا امي .. سلام لا هكمي لا دكمي

[شهاب]

اقتباس:
المشاركة الأصلية كتبت بواسطة يحي عثمان عيسي
الآن فهمنا ارضا سلاح

اللهم لا راد لقضائك
إنا لله وأنا إليه راجعون
نعزي الشعب السوداني والسودان
النيل والصحراء والغاب
رحل من احبنا واحب السودان
لك الرحمة يا حميد
وحقا يعجل الله بخيارنا



حزنا قلم
سكت النغم
أبكيه يا بنية شعراً
بي حرقة وألم
أه يا وطن
مكسور جناح
ودعنا راح
زاد الجراح
أرضاً سلاح
صمد القصيد
ما عاد مباح
آه يا وطن
حزنك كتر
همك كبر
ناقص شبر
كل مرة ينقص
كمين شبر
غير ود اللحد
محجوز براه
لي يوم القدر
وفرحا ساكن القبر

حميد .. سلاما و وداعا يا نبيل

[رأفت ميلاد]

رحمه الله وأحسن قبوله

لا حول ولا قوة إلا بالله

[عبدو منصور]

إنا للّه وإنا ألية راجعون
رحل من كان يغنى
(يانيل قبل خاطرك يطيب
أرضك تفزع باللهيب
تكشح تواريب الغضب ..
صعب المراس ..
نوبة و زنوج و بجة و حلب
رطانه عربان
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
فى إيدنا فاس وقلم رصاص
شتلة و كمنجة و مسطرين
و طبنجة فى خط التماس )

رحل من كان يغنى بالوطن مليون ميل مربع
وتركنا نتجادل فى البقية الباقية

رحمة أللّه عليك

[أبوبكر عباس]

للشاعر العظيم حميد الرحمة والمغفرة

معدل المخاطرة في طرق المرور السريع بالسودان عالي جدا..
الأسبوع الماضي وبعد غيبة طويلة من السودان، سافرت من الخرطوم إلى الأبيض -الدبيبات والعودة في نفس الأيام لكوستي - سنار - مدني - القضارف - كسلا - البطانة - الخرطوم.
شعرت انو الناس بتتعامل مع الحياة بعبثية شديدة بممارستها لهذه المخاطرة العالية! القدر (المجهول) دائما موجود، لكن عدم وجود كتف للطريق ليس قدرا، إنما جهل وغباء، عدم التاكد من صلاحية الأجزاء المهمة من العربات ليس قدرا، إنما عدم جدية وعبث مع الحياة والحياة ما بتهظر بتمارس لعبة الإحتمالات بكل جدية

[Hassan Farah]

اللهم اغفر له وارحمه واسكنه فسيح جناتك...

[Wad Elbeck]

لاحول ولا قوة إلا بالله
إنا لله وإنا إليه راجعون ...
نسأل الله له الرحمة والمغفرة ..

[عبد الجليل سليمان]

حُميد .. يا ما شايلك فيني (حايم)
رثاه: عبد الجليل سليمان

لا العمارات السوامق فوق ضهر ناساً فقارا
هكذا كان يأتيني صوت محمد الحسن حسن سالم حميد باذخاً كالنخيل، مُمتلئاً كساقي (رملة)، مُبهماً في وضوح، وكثيفاً في خِفة مُحببة، وكنتُ أتبعه (غاوياً) وهائماً أنشد (أناشيده) وألاحق ذبذباتها التي تدور مع أشرطة (الكاسيت)، و تحلق على سماوات المسارح والمنتديات.
و (حُميد) بعد، هو من وهب للقوافي المنسيّة الحياة، ومن منح البسطاء صدر تفعيلاته ومتن أغنياته، فغنى للنسوة الكادحات و للرجال المقهورين وللأطفال الحفاة
شفع العرب الفتارى
البِفنّوا الشايلا إيدن .. ويجروا كابسين القُطاره
لا سراب الصحراء موية ..
لا حُجار سلومُ موائد
حالكم البصرخ بنادي
يا وطن عز الشدايد
(1)
من يفتقدك اليوم يا حميد هم كلاة المواني، الغبش التعاني، حشاشة القصوب، ولقاطة القطن، وعمال الفرن، ومحروقو الجوف، والمحرومين، وبت العرب النوبية، و راشد، وعم عبد الرحيم، ونورا والنوباويه، والمراكبية، والمراسي، والجزاير، والدانقا، والوطن (عز الشدايد).
(2)
عاش حُميد في شِدّة الوطن ، و شهد حريقه وحاول تخفيف وطأته، ورحل عنه وهو لا يزال يُعاني (شدائده) ويحرتق بحرائقه التي حاول إطفائها ضمن كثيرين، وكان يحلم بوطن (مسالم) يمضي إنسانه في حياة سلسلة وعذبه، وطن لا (تكبر) رأسه (فورة) ولا تصغره الهزائم
جنس يا نورة ابن آدم حلمو في عالم مسالم
لا الليالي الماها ليّا .. لا الشماتات العليّ
لا البنوك المخملية
لا تفاهات الحضارة ..
لا عفاريت المدينة .. لا العمارات السوامق .. فوق ضهر ناساً فقارى
لا البرندات الوسيمة .. ولا الأسامي الأجنبية
بتمحى من عيني ملامحك
لا شئ يَمْحِي من عينيك يا حميد ملامح (نورا)، وستأتيك (أجزم بذلك) في بيتك الآخر، ستأتيك (دايشي دايخي) المغربيه كعادتها، ستأتيك بصحبة (عم عبد الرحيم) و (راشد والتومات) يصنعون لك شاياً وخبزاً و يبشرونك بوطن مسالم وسوف تغنون معاً
ما شكيت شُح اليال
وما بكيت نُحْ ، شِلتوا حالي
رغم إنو الحال بيفضح
(3)
والوطن في فضيحته المُورقة، وفي ثنايا مسالكة المُوغِلة في وعورة الغياب وشُحْ الحضور، سافرت عنّا في رحلتك الأخيرة، وفي رحلتك هذي من منحنى النيل إلى مستشفى أم بدة ضافت المسافات كلها، وأقفرت الأرض و توقفت الأناشيد لتترك سديم الحزن يتمدد في صدور العالمين ويوخز قلوبهم البائسة، وبرحلتك الأخيرة هذي ينتهي كل شئ ويبدأ كل شئ، عد إستئناءات (صغيرة) تقتلنا جميعاً، إستثناءات مثل:
كلب الغلابة المستغلين العبيد
الليلي سيد ريس مهاب
كلب أب زهانة تهينو هانة
من المهانة تقول له تكْ
حكم إنقلابات التساب ..
دوارة دنيا فرندقس
(4)
لولا إنك (فرندقس) يا دنيا، لما أخذتِهِ مِنّا في هذا الوقت، ولولا إنك يا دنيا (داورة) على طريقة طواحين الهواء، لأطاح (دون كيخوته) بـ (سيرفانتس) و لذهب آخرون سواكَ لتبقى أنت والنشيد أبديان في أرواحنا المتشظية والمُنهكة.
صعبة وعسيرة الكتابة عنك وأنت توغل بيننا وتوقدنا، فكيف تكون وأنت في حالتك الأبدية هذه يا (حميد)، لذلك دعني أشرع في ضم يديّ لأقفل فاتحتي على هذه الخاتمة و أنشد:
ننجارى فيها سبق سبق .. نخسر بعض في هِين تراب
وسلاماً عليك لمّا ولدت، والآن، وحين تُبعثَ حيّاً.

[بدور التركي]

اللهم ارحمنا إذا يئس منا الطبيب وبكى علينا الحبيب
وتخلى عنا القريب والغريب
اللهم ارحمنا إذا أشتدت السكرات وتوالت الحسرات وفاضت العبرات وتكشفت العورات وتعطلت القوى والقدرات.

إنا لله وإنا إليه راجعون