ســـــــــــــــــــاحة ســــــــــــــــــــاره

[سجمان]

المشاركة الأصلية كتبت بواسطة طارق صديق كانديك

[SIZE="4 "]

بورداب الرياض: ياخي فعالياتكم أقعوا بيها الخميس مراعاةً لأحوال أهل الأقاليم من أمثالنا.

لكم/ن التحيات النواضر[/SIZE]

كاااااااااااك
دي بي حقة الدوحة يا حلو..gapgap
ثم خمايسك دي طلع منها واحد خميس مشيط..
ضيعتا الفرصة علي حمزة يا شفيف و
كااااااك

[مواهب عبد العزيز نقد الله]

المشاركة الأصلية كتبت بواسطة لنا جعفر

واللهي ياهوبي تسلمي العيشتينا الجو المجيد ده انتي ونور الكون...
لكن لو عايزة تعرفي هالة عبد الله خليل بتعمل كده ليه....
كنتي تعرفي امك قسمة يا مواهب...الكانت بتعشي الضيف في كفوف رحمتها وشهامتها...كانت مرة صاحبة واجب ومرؤة
كانت والدة استاذنا الجميل شمس الدين ووالدة هالة وزينب
وكنا بنمشي بيتهم مع دالي رحمة الله ويوسف الحبوب لمن كان شمس
معتقل ..وكنا بنمشي مع شمس لمن طلع وبقينا تاتي بنمشي برانا
الناس ديل اصلا عاملين كده....
وارثين الهبة والتبة من الجسورة ماما قسمة...
هالة دي ماتخلعكم ساي ولااااا ربع البتعملو ماما قسمة واللهي....ماما قسمة كانت بتموتنا بالشهقة
سمحة الروح ومرة ثابتة وضو قبيلة.....
كلهم كده الناس ديل بالجد....ماركة مسجلة

يا سلام عليها وعلى ماما قسمة ....
ومن ناحية الخلعة يا لنو مخلوعين تاااااب والله ........وانا اتسأئلت قلت ياربى فى البيت بتستقبل ضيوفا كيف لو هى هنا كدا ........
ما ننجه هلولتنا وربنا يقويها كمان وكمان ويديم خيرا .......

[مواهب عبد العزيز نقد الله]

المشاركة الأصلية كتبت بواسطة أسعد

(تسلم)


^_^

يا أسعد عندى إحساس انو انت فهمت الكلمة دى غلط لأنو اتقالت ليك بدون تشكيل .......
ودا من واقع انو سارة فى رحلة هداية وكدا , فيمكن تكون (تسلم دى )تفيد الدعوة الى الدخول فى الملّة وقيل التهديد ..........

[الرشيد اسماعيل محمود]

المشاركة الأصلية كتبت بواسطة أمير الأمين

يا الرشيد الصحيح تسالو من البلاء
المرقتو منو دعوة سارة

يا عمّك،،
هو قال بلاء "يترقبني"، مع إنو مافي مترقب غيرو

يا سارة ياخي عُمرة مقبولة، ويا شباب وين بقية الصور؟، البوست كلو سارة

[نبراس السيد الدمرداش]

المشاركة الأصلية كتبت بواسطة النور يوسف محمد

بسم الله الرحمن الرحيم

ســــــــــــــــــــاره ،،

خفيفة الظل ،
نقية الدواخل وسهلة المداخل ،،
ضيف يملأ المكان ولا تحس بوجوده ،،
على فرشٍ من المحبة تعبث بالوقت والتراتيب ،،
بساطة فى حِلها وسفرها ، وسهولة فى امرها وممرها ،،
فلا غرو أن بادلتها الرياض الود وأنس لمقدمها الوديع ،،

شكراً أم فرح ،
شكراً على اللحظات الجميلة التى منحتينا إياها ،،
كل الأسرة تبلغك التحية ،،

دي ساره الواحده حقتنا دي ولا سارةً تانيه

مباركه العمره يا سرور وربنا ينولك حجه كمان قريب
يا نورنا انتو كريمين وساره تستاهل
ملمومين في الخير وعلى خير دائما باذن الله

[رحاب سليمان]

كم نحتاج إلى الفرح فى وقت أصبحت فيه الضحكة صدفة
سارة الجميلة قيثارة الفرح ....
زولة تفتح الروح ضلفتين
التقينا بعد زمن طويل .. وعشمنا كان كبير في وقت اطول .. ولكن .
جيتك لينا اسعدتنا ...
و إن شـــاءالله تكرريها مرة تانية في وقت أرحب ....
يا سلااام عليك يالنور بوست كامل الدسم
تشرفت بمعرفة زميلاتي وزملائى بسودانيات (فيس تو فيس ) كنت اعرفهم من خلال المنتدى فقط
فرحانة بيكم يا بورداب سودانيات بالفعل سودانيات تواصل ومحبة
لكم مؤونة عام من الود

[رحاب سليمان]

المشاركة الأصلية كتبت بواسطة مواهب عبد العزيز نقد الله

***شهد تنقلت بين يدى الحضور واستقر بها المقام فى راحة رحاب سليمان وحين موعد المغادرة فضلت رفقتها علينا

بتي ستي دى لشهودة يا مواهب

[رحاب سليمان]

المشاركة الأصلية كتبت بواسطة النور يوسف محمد

منظر عام للساحة
والتى سوف تكون مكان اللقاء الشهرى
لأسر سودانيات

[محمد حسن الشيخ العالم]

المشاركة الأصلية كتبت بواسطة النور يوسف محمد

منظر عام للساحة
والتى سوف تكون مكان اللقاء الشهرى
لأسر سودانيات

النور:
فليكن هذا وإنا له لمنتظرون
وداعمون
نيابة عن حسن وياسين
ومنة الله وسعد الدين

[اسامة عبدالماجد]

صديقي النور
( اسرج خيولك .. او أنثر حروفك )
فهاهي سماء الرياض حبلي بوعد المطر ...
وهاهو مقدم الوافدين يرسم علي الشفاه بسمة ترقب وانتظار ..
وجوه مستبشرة ضحكة ادمنت فعل الترقب وانتظار المستحبل (كما قال شمو).
مقدم الخير كان هطول هذا الرذاذ الذي غسل المدينة المسكونة بالشوق والتعب.
كيشو .. مضي لدوحتة بعد ان بلل عيوننا برؤي تلجم اندياح الاشواق ولو لحين (وله عودة).

سارة إمرأة ساحة ..
تفصيلية حد الدهشة.. مرحة بوقار .. ووقورة بمرح طفولي .. و جلسنا تسامرنا تعارفنا تمددت سودانيات في كل الامكنة .
أكثر ما أدهشني هو حرصها على أن تعطي كل من في الجلسة مساحة من وقتها حتى الأطفال لم تستثنيهم سارة وكأنها فراشة توزع رحيقها ..(ساعود مساءا اخر لاواصل ).

[سارة]

انا ... كبرت كراعى من الفرح
نص فى الارض ونص فى النعال


ساعود باذن واحد احد لاكتب ما لم استطيع التعبير عنه
وجها لوجه وحتى حينه لكم جميعا اهل رياض الخير
كل المحبة والاعزاز..ساكتب عن رحلة اراد الله لها
ان تكون بدون مقدمات ..تبدأ ببيته الحرام مرورا بمسجد
النبى الكريم وتقف فى اجمل اللحظات عند معاليكم وتختم
ببيت الله الحرام .
لكم محبتى فرادى وجماعات

سارة

[سارة]

قال احدهم ثمار الارض تجنى كل موسم وثمار الصداقة تجنى كل لحظة
هؤلاء هم اصدقائى وصديقاتى..فى زيارة اراد لها الله ان تكون سريعة ومفاجاءة
بدون تخطيط مسبق..كتبت رسالة الى ابو حمزة واخرى الى بلة الفاضل وقلت
لهم احتمال ان احضر فى عمرة سريعة فرحوا وبدأوا فى عد الايام.
كان اول من شرفنى الله بمقابلته العزيز بلة الفاضل وقد اصر هو على مقابلتى
اثناء العمرة رغم تحذيرى له بان لا يخرب عمرتى بالكواميج ولكنه حضر
وكان اللقاء فى اشرف بقعة على وجه الارض مكة المكرمة وعلى بعد خمسين متر من
الكعبة التقينا وضحكنا من القلب وصلينا العشاء فى الحرم المكى وكان يوما
رائعا كروعته ناصعا كبياض قلبه وصفاء سريرته لم يقطع لقائنا الا تلفونات
يحى عثمان والذى ضحك كما لم يضحك من قبل وصب جام غضبه على بلبل
او بلال كما اتفقنا على تسميته بانه تسرع فى ضياعgap عمرتى الوحيدة ..ومن يومها
لم تنقطع تلفوناتهم واتصالتهم حتى اكملت بفضل الله عمرتى وعند حضورى
الى جدة كانوا هناك يحى حجز الفندق تحت اصرارى بعدم الذهاب الى اى مكان
غير الفندق ودفع وانتظرنى فى الاستقبال وهو متأنق ولابس احمر ودى قصة
تانية بعدها حضر بلة وكان مساء حفته الملائكة كنا ثلاثتنا وكاننا خلقنا فى اسرة
واحدة وكاننا لم نفترق شكرا بلة وشكرا يحى لكم محبة تعلمونها واخرى الله وحده
يعلم بها .

[سارة]

اصبح الصبح وانا فى هوتيل كازابلانكا اتصل العزيز فخرى الزين
وفخرى دا يا جماعة الخير عروبى ومخ اتجاه واحد اتصل فخرى
وقال انا فى الطريق عشرين دقيقة بكون عندك..لبست عبايتى الجميلة
وانتظرت فى الاستقبال والعشرين دقيقة بقن ساعة وفخرى رايح
المهم وصل الجميل تسبقه ابتسامة لو قسمت لاهل الارض جميعا
لشفت سقيمهم واحيت ميتهم وبعد التحايا والسلامات سالنى ان كنت
اسكن فى الفندق مع فوج ..قلت لا انا وحدى..قال وحدك؟؟؟؟؟؟؟؟
على الطلاق بالتلاتة ولا دقيقة ما تقعدى قومى تقوم قيامتك قومى لمى
حاجاتك ويلا قدامى..هذا هو فخرى الزين أب احمد حاولت جاهدة
ان اقول له بانى رفضت الذهاب مع يحيى وبلة ولكنه لم يسمعنى
دهبت معه الى منزله العامر وست بيته الراقية جدا جدا ام احمد
وبسرعة البرق تعلقت باحمد واخته وتعلقوا بى وشكلنا تيم خطيييييييييير
لعبنا أتارى ولعبنا كراتيه وكل ما يخطر بالبال وسعدت بمقابلة
بعض افراد اسرة العزيز فخرى شقيقته وابنها وابن اخته الحبيب رامى
وللحظة شعرت انا وابنى فرح فى مكان واحد
شكرا اب احمد فقد كنت واسرتك فى تمام البهاء وكامل النور
شكرا لاحمد ولوزة فقد جملوا ايامى والله وشكرا مقدما لام احمد

اما موضوع البوش بالصينية فدا داير ليهو بوست براهو وصور
فخرى الزين بدون تجميل برضو عندى انتوا بس سووا صبر
والله سوى تدبير.

[سارة]

سامحونى يا احبة
ساتوقف هنا لظروف تخصنى
والى ان يقضى الله امرا كان مفعولا

[شبارقة]

المشاركة الأصلية كتبت بواسطة النور يوسف محمد

شبارقة والذى منعه من الحضور شواغل هذا الزمن المتسارع ،،
لا عليك يا أبا الساره ،، بس الشاى والقهوة بكونو (دبل) فى المرة جاية

أي والله يا النور

شكرا ً لكم جميعا ً وشكرا ً للأخ أسامة الذي أتاح لنا فرصة السلام على الأخت سارة ولقاءها هاتفيا ً وكم تمنينا أن نكون معكم وبينكم ولكن حبسنا حابس وظرف طارئ .. فالعتبى لكم وللأخت سارة.