قصص من الدنيا؛ وبعض حكاوي...!!!

[عبدالمنعم الطيب حسن]

جون قرنق، لن ننسى ولن نغفر..

كنت وحيدا في ذلك اليوم،
المدام نزلت السودان ومعها طفلنا الصغير وظللت مساهرا متابعا للاخبار هنا وهناك
حتى اتاني النبأ الاكيد...
ياخ بكيت بكاءا مرا وكثيرا ووحيدا هو ذاته نفس الدموع والحسرات والاحساس بالفقد وبالعدم...
نفس احساس يوم غياب مصطفى سيد احمد..
احساس بلا جدوى للحياة نفسها،
الصباح كلمتا المدام ووجدتها حزينة جدا، وسالتها عن ولدنا الصغير فقالت بالحرف كويس ولكنه زعلان على موت عمو جون قرنق كان عمر عام تقريبا وقتها...
المدام ليس لديها اهتمام بالسياسة،
ذكرتها هنا عشان نوري انو الحزن كان عام لجميع الشعب وفئاته وطبقاته...
غياب قرنق كما غياب عبدالخالق ورفاقه الميامين كما غياب مصطفي سيد وحميد..
اصلا السودان منكوب وشعبه شقي
دايما يموت من كان في حياته فرح للشعب الطيب المسكين،
.....
جون قرنق رؤية لا تموت

[عبدالمنعم الطيب حسن]

محمد صالح فهمي
اعتقد انه كان مديرا للاذاعة..
يكتب في جريدة الخرطوم- قبل ان تُخْتطف-
باسلوب قريب من اسلوبك دا، فهو يبدأ بموضوع ويربط بكلمة واحدة موضوع اخر وينتهي بحكايات اخرى مترابطة ولطيفة.. ولم اسمع كلمة (الهوج) الا عنده وعند ابوي فقط .
والهوج هي منطقة الجزيرة الحالية للساكنين في البطانة ويصلون في فترات الجفاف بسعيتهم، حتى النيل وربما عبروا البحر حيث الحشائش الخصيبة الشاربة من موية النيل، والتي تحبها بهائمهم..ابوي بدأ حياته مالك سعية، وعند انتصاف عمره اصبح مزارعا على ضفة النيل؛ وتوفى عن مائة عاما..
انت تبدع بذات الطريقة وتضيف اليها روح جيلنا؛ فننتشي..
سبق ان كتبت لك اني واضع صفحتك في المقدمة فياتيني طعم البطيخ طازجا، وعبير الطعام الزفر من خروف مضبوح لتوه..

[عبدالمنعم الطيب حسن]

ود الهادي يشبهني في حاجات كتيرة،
مثلا القراءة
اكتر زميل بقرأ اي حاجة في الجريدة هو ود الهادي، وعادل ود الجبنة وشخصي الضعيف،
بنقرا حتى صفحات نعي المسحيين في الجرايد المصرية ودائما هنالك تقليد في النعي هو ان اسرة المتوفي تشكر رئيس الجمهورية اولا..
وفي الخرطوم ست الشاي البنشرب عندها كانت تعتقد ان ودالهادي صحفي لانه دايما يحمل كمية من الجرائد،
طبعا انا بعد ما اغتربت واتفلهمتا بشتري كل الجرايد وعندي شنطة بتاعة المثقفين ديك بشيل فيها الجرايد اليومية عندما اجي بحري..
وطبعا الحركة دي شفيتا من ود الهادي..
ولما اكون مقيم في الحلة بجيب الجرايد من الجيلي، عبدالدايم اخوي وعشة اختي بقروا الجريدة برضو من الغلاف للغلاف
عشة لا تركز على الصفحة الاولى السياسية..
ولكنها تقرا باقي الجريدة كلها..
ترش الراكوبة وتقرا المجلات والجرايد..
نحن اسرة مثقفة ياخ😂😂
. ..
وايام الدراسة كنت في الحلة في الاجازات تاتيني جريدة الميدان مرات اكتر من نسخة
صاحبي كوري شغال في بحري بمشي كلو يوم بوصيهو،
مرات بوصي امي تجيب لي معاها جريدة الميدان
تشتريها من (مكتبة الجميع فيها كتب قيمة) دا اسمها
المكتبة تقع في الركن الشمالي الغربي من بلدية بحري وانت تقطع المسافة من موقف مواصلات بحري جمب المستشفى ووجهتك شرقا نحو سوق بحري..

[عبدالمنعم الطيب حسن]

محمد الهادي زميل عميق الفكرة، ولبق في توصيل نقاشه،، يمتلك معارف فكرية جمة
ويمتاز عننا انه لا يدخل في نقاشات طويلة، ولا يحتد ابدا..
زينا مثلا انا وعنكبة..
يقول فكرته ويمشي..
..
اول اجتماع لي في اللجنة السياسية مع التنظيمات الطلاببة..
تكلمت كلام سياسي وانتقدت بشدة احبابنا الاتحاديين والبعثيين وحزب الامة
كنت بصحبة محمد الهادي كممثلين ل ج د
وطبعا محمد اقدم مني في التنظيم واعرق..
فنبهني ان الاجتماعي لمناقشة الشق التنظيمي وهو الاستعداد لمعركة الانتخابات، واننا سياسيا متفقين ومتحالفين..
ناس التنظيمات كلموا قيادات ج د انو برلومكم دا كاد ان ينسف التحالف،
وان الامر ليس صدفة لانو عاطف الزين في طنطا قال نفس الكلام..
وتاني طبعا اكتسبت خبرة وصداقة ممثلي التنظيمات في اللجان السياسية وصرنا وم اصدقاء..
بعد ما طلعنا من الاجتماع محمد الهادي انبسط سرا من الشوتات بتاعتي..
وقال لي هسا لما يجي البيانات بكلفونا بيها، وبنقول كلام الشعب والطلاب..

[عبدالمنعم الطيب حسن]

صاحبنا معاذ بتعلق معاه حاجات عجيبة
اغنية للبربري بكون صاحي نايم معلقة معاه
وبعدها بكم يوم مدحة تستمر فترتا،،
ينزل مكانا اعلان عدس الوابل.وهكذا طوالي معلق...الكلام دا كتبو معاذ في القروب..
..
زمان وانا صبي كنت بقرا عناوين بازرة في الجرائد والمجلات احفظا طوالي واظل ارددها بالشهور
مثلا عنوان بارز زي دا
"السودان جزء من الجزيرة العربية لولا تطفل البحر الاحمر"
"الصلاة في المساجد حرام، والمجتمع منحل، وعلاقات الناس يحكمها الفساد"
"انا آه من الكوميديا المصرية"
والاخيرة علقت اسيا اختي عنها عندما كان الكلام عن احب الاكلات قائلة:
(مضوي) اخوي دا بحب اكلة الكوميديا المصرية
..

[عبدالمنعم الطيب حسن]

محمد ابوعركي لم يكن اخا لفاطنة امي السمحة، وخالا لي...فقط،
ولكنه كان بمثابة الاب...
فقد كنت اذهب معه طوال الاجازات الصيفية للزراعة،
منذ بواكير صباي حتى بدايات شبابي،
نعم، فقد كنت اذهب معه لجزيرة واوسي،
واذكر ان آنيتي التي احمل فيها فطوري صباحا،
أرجعها مليئة بخيرات النيل بالقنقر وبالبطاطس، وبالطماطم، والبامية، والحليب..
كنت اذهب معه، للجزيرة لنمرة عشرة،
للكرينابية، ومشروع الحوشاب،
وفِي اي مكان يعمل فيه مزارعا...
فقد كان مزارعا محترفا يعمل طوال اليوم بخيرة، وبمعرفة، وبارتياح...
لايكل ولا يمل ولا يقيِّل..
خالي محمد هو معلمي الاول
علمني الزراعة والعمل..
ومجابهة الشدائد وغرس في أعماقي القيم السودانية السمحة،
كالكرم والنظافة واحترام الذات، والغير..
حزني على معلمي محمد ابوعركي طويلا، وقائما

والطيب محمد ابوعركي هو امتداد طبيعي لهذا الرجل الأسطورة
فهو ابنه الوحيد
لذا الطيب اخوي وحبيبي ويعرف علاقتي الخاصة بوالده...
ويعتبرني دوما اخاه الأكبر..
الطيب سليل الطيبين ابعركي والنقش وفاطنة،
محمد وزينب وصفية وبلال. وخالد ....
وفقدنا تاني واحد جميل ....
في عيد رمضان وإجازتي الاخيرة زرته عشرات المرات..
كنت كانما اودعه...
وكان اخرها معي خلف واولادي محمد واحمد
أخبرتهم اليوم عن وفاة عمهم عركية وغيابه للأبد،
ورايت حزن الطفولة في عينيهما
واسترسل احمد سائلا عن سر العلاقة،
وغاب في حزنه...
ومحمد سألني لماذا انا حزين هكذا؟
وليه عركية طالما اخوك ما قاعد معانا في البيت أسوة بعبدالدايم
وعبدالوهاب..
ورجع محمد وسألني ان كان هو اخو عباس كذلك..
وتساءل عن الموت وليه مات؟

طويل الحزن
اخوك يا
الطيب عركية

[عبدالمنعم الطيب حسن]

هبطت سوبا شرق ذات ضهرية، سائق بكسيني المو خمج..
سائلا عن منزل صديقي محمد رباح، في مدخل القرية..
اول شاب
- الاسم دا في الحلة دي مافي
- كيف مافي انا متاكد محمد عبدالكريم رباح
- مافي...
- قبل كدة جيت اكتر من مرة، ومتاكد، انت من اهل الحلة
- ايوة،
- اوكي
- في واحد اسمو محمد عبدالكريم الفكي رباح
- طيب وصف لي بيت الزول القتو دا
- م زولك..
😂😂😂😂

[عبدالمنعم الطيب حسن]

اخر عشاء صفرة في حلتنا حضرته لايف، قبل ان يتحول الشعب لصحن الكوكتيل..
لاحقا تحولت مناسبة العرس برمتها لوجبة فطور..
المهم هبطت في الصفرة مع دفعتي وانا مغترب مركز على الونسة..
ما ان بدأت المعركة حتى عم الصمت وابتدأ الشباب بخبرة السنين بصحن الضلع اولا وتشالبوهوا سريع، وانحرفوا نحو الكبدة واللحوميات الاخرى، ووصلوا اخيرا للسلطات والطيبات التي حولها..وانا مستغرب ليه الونسة انقطعت فجأة كدة، قدامي صحن فول مصلح قعدت آكل فيهو ساكت، جاري وصاحبي الانتيم
الكز فيني وانا ما جايب خبر..
في النهاية قال بصريح العبارة يا زول ما تشوف اللحم داك والمطايب التانية الفول ملحوق وممكن نطلب زيادة عادي😂😂😂
...
في مصر المهندس السوداني المغترب هبط المنصورة متخيرا الجمال، وخطب احد حسانها..
وجاءت امه واخواته لحضور الزفاف..
ونحن معزومين كم طالب كدة وطالبة بواسطة قريبتهم الطالبة معانا..
وقاعدين محترمين في الزفة والشباب المصريين من اهل العروسة بتخاطفون في زجاجات الكازوزة الباردة، ويشربون ..
ونحن عاد تُقال وساكتين ساكت،
قومي يا اموالعريس واخواتو وصلن محل القازوزات الباردة، وبدأن في اخد جزءا من الكازوزات، وصرن يوزعن للطلبة وللطالبات..
غني عن القوا ان ام العريس وبناتها لا يعرفن منا سوى زمليتنا قريبتهن وامكن شافننا اليوم هنا لاول مرة، وزمليتنا صارت شوية معانا وشوية بغادي مع الام والعريس واخواته..
ولكن الام وبناتها اصرين ان نشرب البارد، انها رابطة الدم، والوطن..
الجنس للجنس رحمة ياخ..

[عبدالمنعم الطيب حسن]

كتبت التعليق ادناه يوم 17 اغسطس 2019
غداة التوقيع على الحكومة الانتقالية برئاسة
حمدوك والبرهان وحمتي
وقد كانت نظرتي صائبة
نحن جيل الشمس
موكب حريق
بيناتنا بينات الوصول لحظة شهيق
...
..
.
احتفالي يشبه احتفال الفنان محمود عبدالعزيز
في مسلسل رافت الهجان
مع الاسرائيلين عند انتصار القوات الاسرائيلية
فقد احتفل اصدقاءه معه في المنزل
كانت من اعظم اللقطات المركبة التي اداها الفنان العظيم
فقد كان يفرح بلسانه ويحزن بكل وجدانه
يا سلام لو واحد متذكر هذه اللقطة...
......
اصدقائي الفرحين ليسوا اسرائيلين
والاتفاق ليس هزيمة نكراء
ولكنه جزئي وزايف وملغم
ونحن ما بدخل روحنا فرح زايف
......
اتمنى ان لا يصدق حدسي ويفرح الشعب بانجازات الحكومة المدنية
ويرتاح فقد عانى كثيرا هذا الشعب العظيم...

[عبدالمنعم الطيب حسن]

العالم الضميرا ميت دي
عايشين على هامش الحياة
لا يستمتعون باى حدث مبهج..
ولا يتالمون لاي كارثة مزلزلة كزلزال ود النورة مثلا..
الميزان الانساني والضمير عندهم معوجات..
واللعوج خلقة عمرو ما بنعدل
كون مقياس الاشياء مختل..
وامكانية القياس والصاح والخطا
عندهم مختلطة..
متمترسون دوما في المكان الخطا والموقف الخطا
من التاريخ،
انهم هامشيون بامتياز..
..
الصور للفت الانظار

[عبدالمنعم الطيب حسن]

ليس اسوأ من الكيزان سوى الجنجويد..
الجنجويد هم البذرة التي طالما زرعها الكيزان
ورعتها حكومة قحت والبرهان وحمدوك..
..
الكوز في النهاية مشوه فكريا وانسانيا، اما الجنجويد فهم افرازات الكيزان في اضل تجلياتها..
والجنجويدي هو كوز بيده السلاح والقوة في مواجهة مواطن اعزل ومغلوب..
الجنجويدي هو خلطة من الحقد والجهل، مجرد من اي قيمة انسانية او سودانية..

[عبدالمنعم الطيب حسن]

معتوقة ومعتقة ومنعتقة
نوافير انتشاء
حشمة وحمار العين
تمشي على العجين
وتلخبطو
وترطن اذا جاها الحنين
يا بت بيوت الفقراء
ماشة وين؟
زقاق يفتش في زقاق
كتمة وضلمة وانعتاق
انا فيكي لاموني المساجين
صوتك وكت قطع البحر
قبال مراكب العممدة
ضهر النيل عرق
واتنحنح الجالوص
...
عاطف خيري ومصطفى سيد احمد
والقدال وحميد، ومحجوب شريف..
كانوا رفاقنا في تلكم الايام
المظلمة،
وكانوا خير رفاق
..
شكرا يا عمدة،
وانت توثق وتؤرخ لجيل ولرموز شعب
صعب المراس
..
وتحولت الخرطوم الجميلة،
تلك التي يحفها النيل، ويحتويها الخصيب..
تحولت لمدينة اشباح.
يسكنها العسس والجنجويد، والاغراب
تشرد اهلها
في لج الغياب
..
وتحولت لاطلال يسكنها
الدم والهم
والموت والمرقوت،

[عبدالمنعم الطيب حسن]

زمان في حلة جمبنا تقدم صاحبنا اسمه "الحيطة"
لبت اهلا رفضوهوا.. البت دايراهو
جاءته قائلة: حملني يا الحيطة
...
كتبت القصة دي في منبر سودانيات سالني صديقي اميري: وحملا؟
بالمناسبة الدكتور دا عرس قريبتكم السمحة دي ؟
..

[عبدالمنعم الطيب حسن]

الفنان صلاح بن البادية نزل مرشحا في دائرة شرق النيل مقابلا لزعيم البطاحين محمد صديق طلحة، الذي اكتسح الدائرة
وقد سخر البطاحين زملاءنا في الجيلي الثانوية من الفنان ود البادية
ومن ضمن سخريتهم:
في سهرة بنات
وقعدة صباحية
تفطر كباب
تتغدى كمونية
..
ويقال ان سرور محمد رملي نصح الفنان بان يركز في الغنا
واصل البطاحين سخريتهم:
سرور ودرملي ما قال ليك
أخير الفن
...
هسا علاء دا
ما كان أخير لي الكبد

[عبدالمنعم الطيب حسن]

كنت اعتقد ان أبطِل السجائر امرا دونه الامرين..
من غلاة المدخنين، المتورطين أنا....
ادخن بشراهة وبحب وبإستمخاخ،
فنحن تلاميذ عمك كوري..الذي هو واحدا من اكثر المدخنين الذين رايتهم تأوُّها وانسجاما ودهشة..
ما زال يعتصر السيجارة وهى انثى؛ بإشتياق ووله اصيلين..
المهم ذهبت ذات عصرية للمستشفى للتبرع بالدم لاحد اقرباء زميلي في السكن..
وكنت قد صحوت توا من النوم حيث غالبا عملي بالليل.. ولان المسالة طوالي لم اشرب شايا ولم اقرض رغيفاية، جري للمستشفى
اخذوا منا عينات وننتظر شوية إشوفوا صلاحية دمنا.. المعاي اتبرعو عادي، دمهم طلع نقي ومفلتر وانصح ما يكون.. انا دمي طلع شقي ومجنون،
اخدني الدكتور الكيني على جمب وشرح لي مطولا ان دمي ضعيف، وخفيف.. ومليان نيكوتين.. ولازم اوقف التدخين،
والا اباعد بين الوجبات..وكأنو بقول لي: تعال وتعال، ما تحرق شبابك، شبابك تشابك..شديد الزحام..
رجعت البيت، وانا شبه حزين على دمي المختلط بالنيكوتين، والضعف والرتابة.. اخرجت علبة السجائر المارلبورو الحمراء، وكانت شبه مليانة قريب ٢٠ سجارة، السجارة تغازل السجارة.. وكل واحدة محل ولهي وحبي المقيم..
عصرت علبة السجائر بكل ما املك من قوة بكلتا يدي عصرتها..وانا افش فيها غلبي ودمي المسفوح على خارطة الضعف والنيكوتين..
واحلتها فتاتا، إذا عزمت فاهْتَرِسْ،،
اختلط ورق العلبة بالبرنسيسةبالفلتر بالنيكوتين وبحسرتي على فراق الدخاناية..
ولم انس ان اعدمت ولاعتي الذهبية الغالية والوسيمة..
ولم اصاب لا بصداع ولا توتر ولا غيره..
فانا انتقم لدمي، اصحبت مسؤولية دمي معلقة في رقبتي..
رجعت اسمن ولوني
افتح..
ورجعت انسانا عاديا غير مدخن..
بل صار رائحة التدخين تزعجني، ولكني لا اتبرم على اي مدخن..
فتلك حرية وخيارات شخصية...
وطبعا لم اجرب الصعوط ابدا في حياتي
رغم المحاولات الشديدة من بعض اصدقاء المراهقة، انا قررت في صباي الا اتعاطى التمباك، خلاص فل استوب..
ولكنه خيار داخلي لم ابلغ به اصدقائي لحظتها، حساباتي طالما هم مستمتعون به..ليه اعكر متعتهم.. فظلوا يحاولون لسنين، ما ظفروا بي
..
هذه مداخلة -نقحناها- كانت في الاصل اجابة لسؤال Mohalab ،
كيف تركت التدخين ياعم عبدالمنعم؟
تسلم ولدنا مهلب بابكر..

..
هذه القصة حصلت في يوم
10 ابريل2002