اقتباس:
المشاركة الأصلية كتبت بواسطة شليل
وفقا لإفادة وزارة التوجيه والتنمية الإجتماعيه ففي حوالي 140 ألف طالب ، مابيتناولوا وجبة الفطور ، الحاجه الحتؤثر على مستوى تحصيلهم الأكاديمي..
طيب..
رايكم شنو يا جماعه إنو نتشايل سوا ، ونحاول نغطًي أكبر قدر من الطلبه اللي ما عندهم حق الفطور !
بقترح : إيجار دكان ، وتعيين متعهد يقوم بإعداد وجبة الإفطار ، ويقوم بالتنسيق مع مناديب المدارس المختلفة ،ويحرص على إنو إ تحصًلوا على الكوته حقتهم يومياً..
الفكرة بسيطة ، وما حتكلًف الكتير
إيجار دكان+ كهرباء، مويه ، نفايات ، إلخ
راتب شهري لبتاع الدكان
قدرتين تلاته بتاعة فول
كم جركانة زيت
شوية مطايب
- عايزين متطوعين ، يشيلوا وجبة الفطور دي ويوزعوها على المدارس
يللا إيدكم معانا يا ناس جوًه ..
|
شليل سلامات
عندي فكرة صغيرة كدة ممكن
نتجاوز بيها قصة إيجار الدكان ومنصرفاتو الكتيرة(والله المحلية تولدك فيو ولادة بالرسوم)
الفكرة إنو نختار أسرة فقيرة
في كل محافظات الخرطوم التلاته
يعني أسرة في الخرطوم وواحدة ف بحري وواخدة ف أمدرمان
أسرة يكون عائلها متوفي مثلا
و المرة هي الشايلة الشيلة
نمدها بالمستلزمات و هي تقوم بالعمل مقابل أجر و غذاء
كده نكون سدينا جوع أسرة و مرقنا من سلطة المحلية ورهق الإيجار
بالنسبه للتوزيع الله ما كتر إل الركشات و بي أسعار نقل مهاودة
بس المشكلة الأساسية هي الرقعة الجغرافية الشاسعة للولاية فلو ركزنا في المناطق الأشد فقرا يكون أفضل
بالجنب منظمة صناع الحياة قايمة بواجب كبير ف الإفطار دة لدرجة إنو عندها مناديب عديل لصالات الأفراح و الإستفادة من كميات الأكل الذايدة
...
ممكن الناس تتعاون معاها برضو