محن سودانية ..24..ارض ناس ود الشيخ
السلام عليكم
يا زول كلنا نوثق للتاريخ اسألو السيد حمدي بدر الدين الجاب
النجيضة من دار الوثائق بورداب الخرتوم امشو اتاكدو من فرسان في الميدان
اخونا شوقي بدري برضو بسجل في التواريخ
اولا حديقة الحيوانات الاتبرعوا بيها ولا شفطوها
دا كان بيت جدي الامير عبد الرحمن ود حامد
ما صدقوا نهاجر برع السودان الكلام دا برضو موثق في سجلات
دايرين نرجع حقنا من الفاتح من سبتمبر وما ضاع حق وراهو مطالب
ودي نوع الحقوق الما بتسقط بالتقادم
تقولوني شنو تقولوني منو
ود اخوي المناضل تعال دافع لي بديك بي حق الشيوع دي زي كلمة كدي
مع إني غيرت للسودان الحر بس يدونا حقنا من الما حرين
***********
هذا البوست كتبه الصديق مهدي (ود الشيخ ) زي ما قال الملحق الثقافي في براغ الاستاذ محمد صالح في الستينات قال الاولاد يحملو البت ويجو يحملوني انا المسئولية.
لكن بالنسبه لود الشيخ فمثله لا يرد له طلب فهو شقيق احب الناس رحمة الله عليه عبدالله فرح وكبيرنا و شيخنا صالح فرح من زملاء منصور خالد في كلية القانون جامعة الخرطوم وهو مستشار الشيخ زايد القانوني ومهندس دستور الامارات وهو من من يصيبون بمركب النقص عندما يكتب بالانجليزية او بالعربية.
اخي العزيز ود الشيخ عندما تعرض اهل الانقاذ والامن لبنات العباسية والموردة وهزئوهم وشتموهم ابدى البنات استعجابهم فقال لهم احد الظرفاء ديل شتمو خادم الحرمين خليكم انتو يا خدم العباسية.
هل تعرف يا عزيزي ود الشيخ ان قاعة الصداقة بنيت على ارض وقف وهذا في الوقت الذي كان الترابي وبقية الاخوان المسلمين في السلطة مع نميري. واذكر ان الاستاذ الصادق عبدالله عبد الماجد قد ذكر لنا في مدرسة الاحفاد الثانوية بأنه قد ذهب شاكيا لوزير الداخلية وقتها عروة الذي خلف البحاري في نظام عبود ومن اول الاشياء التي اشتكى منها كان تعاطي الخمور. واين يذهب ريع تلك الجنينة اللتي كانت وقفا وتنتج الفاكهة والتمر.
فياخي ديل اكلوا مال الاوقاف خلي ارض جدك المات.
في كتاب حكاوي كنتربري السودانية يحكي احد الخواجة الانجليز كيف كلف بتحديد ملكية الاراضي ورسم الحدود. واعطوه سودانيا ليكون ملازما له ومساعدا والرجل كان مسجون (مضمون). والمدير قد قال للمهندس الانجليزي بأنه قد عين قاتلا لمساعدته وان المسجون قد اجبر على ان يقتل شخص سلب ارضه حتى يكون الموضوع عبارة عن تذكير باهمية المهمة الشاقة اللتي يتحملها والسهر وركوب الجمال والنوم في العراء.
احد الانجليز كتب قديما بانه كانت تاتيه نزاعات كثيرة بخصوص الاراضي وملكيتها. الى ان اكتشف بعد حكم بعض القضايا, وبعد الاستماع الى الشهود والبيانات والمكاتبات والايصالات القديمة بأن الارض في الاصل لا تخص اي من الخصمين . وعندما يحكم لصالح احد الخصمين يقوم بتعويض غريمه (شريكه). وتبرد ليه الواطة..
ثورة او انتفاضة ود حبوبة لم يكن لها اي صلة بالدين او محاربة الكفار... بل كانت نزاع بين عبدالقادر حبوبة ,امام حبوبة , حسن حبوبة.. وبشهادة شقيق عبدالقادر حبوبة وناظر الحلاوين احمد موسى حكم لصالح اخ عبدالقادر غير الشقيق.
جيتك يا عبد المعين تعيني لقيتك يا عبد المعين تتعان.. اها يا ود الشيخ بيت عمك ابراهيم بدري عندو بيت رقم 3 في المقرن مربع 2 مساحته 2500 متر مربع ملك حر مكون من اكثر من عشرين غرفة كان كان المركز الثقافي الروسي في يوم من الايام ومكتب شركة البترول. الآن المبنى لا وجود له. والارض رهنت بواسطة اناس لم اشاهدم ولا اعرفهم, لبنك امدرمان بمبلغ 7 مليار جنيه سوداني. ما مليون مليار تسعة اصفار ...سامع. وتوقيعي في التنازل وانا لم ارجع للسودان لاكثر من عشرين سنة وهنالك توقيع السيدة ايمان ابراهيم بدري. وطبعا هم شافوا الاسم افتكروها سيدة. وايمان ابراهيم بدري الذي هو شقيقي والذي من المؤكد انك تذكره عندما كان يعمل في الامارات في بلدية ابوظبي مع الحبيب عبدالله فرح.
كما يقول صديقي عثمان ناصر في الموردة متعه الله بالصحة ديل ياكلو ناقة صالح..طبعا القصد ليس استاذنا صالح فرح ولكن النبي صالح...وبرضو تقول لي جدك الذي مات ...يا خي ديل قلعوا الشوارع والميادين...
بعدين يا ود الشيخ من كل ناس الدنيا ما لقيتو ليكم زول تتشبكو فيهو غير القذافي.. انت قايل عملية دارفور اللخبتا منو غير القذافي..يا خي انت ناسي انو ده الخطف طائرة الخطوط الجوية البريطانية(بريطانيا العظمى اللتي لا تغيب هنا الشمس. ومش شوقي ود امينة الكان حايم حفيان في العباسية وهو في الثانوي). وشنقو اولاد الناس. ياخي القذافي ده حير الدنيا وحير امريكا يوم مجنون ويوم فيلسوف ويوم مهرج ويوم بهلوان بتاع مسرح. يوم ابو العروبة ويوم هو ملك الافارقة وعنتر ابن شداد والسليك ابن السلكة و خفاف ابن الندبة وكل اغربة العرب.
بعدين يا ود الشيخ الراجل ده حرسه نسوان كان انشبكت معاهم وكتلتهم يقولو عليك كاتل ليك مره . كان كتلت فيهم يقولو عليك بتكاتل الحروم. اخونا خضر فرج الله وبعض الجنود السودانيين الذين حاربوا في فلسطين. كانوا في الاول يرفضون قتل المجندات الاسرائيليات لانهن عوين. ولكن بعد ان ضاقوا المر صاروا يقولون طق المجنده في الاول. لان الاسد ما بكتلك بتكتلك اللبوة...
بيتنا بتاع المقرن قضيته معلقة.. كدي انت شوف لي محامي نجيض. انا قنعت من المحامين السودانيين وبعدين نشوف واطاة جدكم دي..
النميري لمن امم كل حاجة حتى اهلو الدناقلة وجيرانه ناس عثمان صالح. وكل الشركات بالرغم من احتجاج عبدالخالق الذي كان يقول له ايه يعني لمن تأمم ليك مصنع شعيرية. وكان النميري يواصل الاوامر المصرية. ووضعوا اقربائهم واصدقائهم على رؤوس تلك المؤسسات..لدرجة ان مدرس بسيط صار يسكن في منزل مدير شركة مركنتايل وصار في النهاية يلبس قمصان المدير وملابسه.
الاخ فؤاد مرهج رحمة الله عليه وهو صاحب عمارة مرهج اللتي كانت تحوي الخطوط الجوية السودانية في شارع الجمهورية. كان لهم منزل جميل على النيل..قام نميري بمصادرته واهدائه لشيخ زايد حاكم الامارات رحمة الله عليه..وبعد الانتفاضة طلب مني فؤاد مرهج ان اساعده في استرداد المنزل. لان حكومة الصادق لم تحب ان تحرج الشيخ زايد. وطلب مني محمد صالح عبداللطيف صديقهم ومدير شركتهم بالتدخل. وتحدثت مع احد آل النهيان الا انه قال لي ان الشيخ زايد يكره الاخبار السيئة ويكره من يأتيه بالاخبار السيئة. والى ان تركت السودان لم اجد اي مدخل وفؤاد مات رحمة الله عليه وابنه كان انطوائيا ولم تكن له علاقات او شدائد ومات الموضوع.. وطبعا ما في زول كان مستعد يمشي لي شيخ زايد ويقول ليهو انت غشوك وادوك بيت مسروق سيدوحي...
كانت لنا ارض 940 متر ناصية في كافوري وانتقلت ملكيته من شنقيطي الى ابن اختي الدكتور مهدي ابراهيم مالك. في ايام مرض شقيقي الشنقيطي رحمة الله عليه قام احد اصدقائه وهو محامي اسمه كمال. بعملية تزوير وباع الارض لآل النفيدي. وعندما واجهه اخواني قال لهم انا بمشي السجن لكن بدخل شنقيطي معاي. والشنقيطي وقتها كان يعاني من السرطان وعلى وشك الموت..فطلبت من خالي اسماعيل خليل ان يتدخل بواسطة قريبه مولانا ميرغني النصري. ووافق آل النفيدي في الاول. وقالوا انهم كانوا مستغربين لان الارض كانت رخيصة جدا. وانهم سيعيدون الارض بعد استرجاع الثمن. الا انهم غيرو رأيهم في ما بعد قائلين ان اوراقهم صحيحة. ثم نقلت الملكية عدة مرات من ما عقد الامور...ولم نرد ان نبهدل وان نتعب الشنقيطي في آخر ايامه..
قلت لي ارض جدك مالا ؟؟؟؟
التحية........ شوقي....
|
