للنقاش المستفيض

[أبوجهينة]

أ : الفتاة السودانية : هل هي حشمة أكتر بالثوب السوداني أم بفستان و طرحة ؟

و إن كانت الإجابة بإن الإثنين حشمة : فأيهما عملي أكثر ؟ يعني الذي يصلح للعاملات و الموظفات و الطالبات.

هل تعتقد إن التوب سيندثر ، أم سيظل يستعمل فقط في المناسبات السعيدة ؟

ب : أيهما أصح :
لافة التوب
لابسة التوب
لافحة التوب


ج: الموبايل : هل هو ضرورة للطالبات أم تكملة للبرستيج؟



د : هل هناك ضرورة للمبالغة في الصرف على طقوس الزواج ؟

[الطيب بشير]

أبوجـهـينة
سلامات
دة تلاتة بوستين في واحد
أبدا ليك بالحــشــمــة
تعتمد برأيي على الفتاة نفسها
فيمكن أن تتخشلع لابسة الخرتاية بتاعة أنصار السـنّة فيما تبدو لابسـة الإسكيرت القصير في غاية التهذيب
الحشمة سلوك
و
أنا عمومآ بحب التوب
بثباته فوق الشعر مع بحبحة في منطقة العقد...لوووول
و المقنع السابل كاتلني من بدري
و أرجو عدم التلميح لعمري هنا

[أبو الحُسين]

المشاركة الأصلية كتبت بواسطة أبوجهينة

أ : الفتاة السودانية : هل هي حشمة أكتر بالثوب السوداني أم بفستان و طرحة ؟

و إن كانت الإجابة بإن الإثنين حشمة : فأيهما عملي أكثر ؟ يعني الذي يصلح للعاملات و الموظفات و الطالبات.

هل تعتقد إن التوب سيندثر ، أم سيظل يستعمل فقط في المناسبات السعيدة ؟

ب : أيهما أصح :
لافة التوب
لابسة التوب
لافحة التوب


ج: الموبايل : هل هو ضرورة للطالبات أم تكملة للبرستيج؟



د : هل هناك ضرورة للمبالغة في الصرف على طقوس الزواج ؟

الغالي جداً أبو جهينة...

موضوع جد مهم وأسئلة في غاية الأهمية...

ج.. أ:: الفتاة السودانية حشمة يبقى لي كدي بالعباية السوداء الفضفاضة... الماها محزوقة في النص زي بتاعت الناس إياهم!!!

أما العملي في الدراسة والعمل يبقى لي الطرحة والإسكيرت!!!

ج.. ب:: الإجابة دي عاد أقيف لي لأنها عندها تلاتة إجابات...

لف التوب دا في حالة النياحة وووووووووووووب... لبس التوب دا في الحالات العادية والأهميات... ولفح التوب دا في حالة السرعة لإلتقاط الأخبار والشمارات بي فوق الحوش تلفحوا وتقومبيهو صوف!!!

ج.. ج:: أما الموبايل سلاح ذو حدين ماب أقدر إتكلم فيهو... ويبقى لي كدي نفعو أكتر من ضررو إذا كانت البت رشيدة وعاقلة...

ج.. د:: والسؤال الأخير دا وححححححححححدو ياني البقدر أجاوب ليك فيهو وبي مزاج كمان...

أسمع يا اخوي... نحن معشر الشباب ديل... واللللللللللله دايرين يسهلوا لينا الزواج دا بي قدر المستطاع... ويعني الحكايات والولة منها دي ياريييييييييت يخلوها... ولكن الأديك السر دا... والله اليومين دي قالو الحكاية إتسهلت تَبْ... بس قبل يومين كنت بناقش مع الأخ مايم في الموضوع إيَّاهو.. إنت عارف طلعو لي بي كم؟؟؟ 15.000 ريال.. دا غير اللذي منُّو؟؟؟

لك الود كله بلا حدود... وليك وحشة كما شوقنا إليك يا أبا جهينة...

أبو الحســـــــــــــين....

[سارة]

الاخ المحترم ابو جهينة تشكر على هذا الطرح الجميل

اولا موضوع الحشمة اذا كانت كما ورد فى الكتاب والسنة حسب علمى المتواضع فهو ما لا يصف

ولا يشف لا يكون ضيقا محذقا يصف الجسم ولا شفافا ينظر من خلاله ..تأتى بعد ذلك مسألة الثوب

الثوب السودانى هو زى نفتخر بخصوصيته ولكنه ليس لزاما ان يعبر عن حشمة فهناك من يلبسن

ثيابا سودانية لا علاقة لها بالحشمة ..هذا الزمن ومع تغييرات كثيرة طرأت على حياة المرأة

تبقى مسالة الثوب مسألة نسبية هناك من يناسبهن ويناسب ظروفهن وهناك من لا يناسبهن

وانا فى رأيى كل < بضم اللام> ما تشتهى والبس لباسا تشتهيه الناس.

بجيك لباقى الموضوع كان الله مد فى العمر

مودتى وتقديرى

سارة

[معتصم الطاهر]

أبو جهينة

أنا بريد التوب
ولن يندثر ان شاء الله

لكنى سأعود لك بقصة قصيدة ..

[عبدالله الشقليني]

عزيزنا أبو جهينة
تحياتنا ليك

كلام كتير في برنامج واحد ومُكثف .

أفضل أن أقرأ ..
وأعرف الآراء

[أبوجهينة]

أبو البشير
سلام من هنا لحد عندك

تعتمد برأيي على الفتاة نفسها
فيمكن أن تتخشلع لابسة الخرتاية بتاعة أنصار السـنّة فيما تبدو لابسـة الإسكيرت القصير في غاية التهذيب
الحشمة سلوك

صحيح الحشمة سلوك .. و لكن ما رأيك لو إجتمعن الإتنين ؟ الحشمة في اللبس و الحشمة في السلوك ؟ حاااااجة ما تنتهي. لأنو حشمة في السلوك و لبس ما محتشم بينقص من رصيد حشمة السلوك و بيدي فرصة للقيل و القال و سوء المآل. مش ؟؟

و أنا عمومآ بحب التوب بثباته فوق الشعر مع بحبحة في منطقة العقد...لوووول

لولين مع زيادة في الواوات من هنا لي باب شريف محل التياب

و المقنع السابل كاتلني من بدري

من كم كدة يعني ؟

و أرجو عدم التلميح لعمري هنا

ما هو باين

تكويعة : يا أم بشير .. الزول دة ما تديهو و لو جغمة من مديدة الحلبة