اقتباس:
المشاركة الأصلية كتبت بواسطة خالد الصائغ
ناضر التحايا شليل و طارق
يبدو إنو حديثي عن مسألة (الحصر) قد فهم في إطار إنو أنا قاصد (الفرز) بمعني تمييز المستحقين فقط للوجبة من الطلبة.
و لا أخفي عليكم إنو في البداية كنت رامي لي كدة لكن بعد داك قلبي أكلني.
أتفق معاكم في إنو الشغلانة لازم تكون شاملة لكل الطلبة في المدرسة الواحدة غض النظر عن توفير الاسرة للإفطار من عدما.
و الحتة دي لفتت نظري لأمر آخر ممكن نصطحبو عن إختيار المدرسة موضوع المشروع.
إنو الشباب في السودان يوجهو جهدهم بقدر الإمكان لإختيار مدرسة يكون فيها نسبة الطلبة غير المستطيعين كبيرة عشان نضمن إنو المشروع يحقق أكبر قدر ممكن من أهدافو.
و أنا بقول الكلام ده و مدرك تماما صعوبة النقطة دي و حساسيتا لكن أتصور إنو ممكن إدارات المدارس و المعلمين فيها يساعدو في حسم الحتة دي من واقع التصاقم بأحوال مدارسم.
برضو يا شليل و طارق أنا بفكر معاكم بي صوت مسموع في مسألة صعوبة تقدير تكلفة ثابتة للوجبة في ظل تقلب أوضاع الأسعار و الأحوال في السودان.
و لكن كيف سيتسني لنا تحديد تصور للميزانية يكفل لنا الحركة في إتجاه صحيح لتوفير الدعم دون هذه الخطوة ؟؟
و عشان نتلافي المطب ده
هل ممكن يكون في إقتراح بتقدير قيمة نقدية ثابتة و متحركة تبعاً لحركة المشروع تكون بمثابة إحتياطي (ميزانية إدارة مخاطر) لسد أي فجوة محتملة في الميزانية.
يعني مثلا الإحتياطي ممكن يكون 5% أو 3% أو أي نسبة واقعية من مجمل الميزانية.
يخوانا أنا قومة النفس دي و الله في شان إنو ميزانية مشروعنا ده تبري و تستبري من متلازمة الترقيع حال ميزانية حكومة السودان 
و أكيد يا أحباب نحن متفقين تماما إنو نقاشنا هنا بمثابة عصف ذهني بهدف الوصول مع بعض لي صيغة واقعية للمشروع أكتر من كونو مقترحات نهائية أو ملزمة.
|
أهلين يا خالد ،
إستهداف مدرسة كتارقت لمشروعنا ده ما إعتقد إنها مسألة صعبه ، كتير من المدارس في الأطراف المهمشه بتعدم البنى التحتيه وطلبتا بيفترشوا الأرض ووو.. زي دي قد تكون نموذج لإنو تصلهم وجبة الإفطار..
في شي تاني .. موضوع المويه..
كتير من المدارس بتعدم ( الأزيار ).. بل في مدارس بيشربوا من براميل مصدية ودي حاجه ما صحيه.. مفروض ننتبه ليها ونختها تبع أجندتنا..
يللا بعد ده ، الأخوان/آت يعملوا إتصالاتهم ، وينتخبوا مسئول مالي يحدد لينا مبلغ الإشتراك الشهري.. ونكسب زمننا..
وياريت لو من هسي لمينا إشتراكاتنا ، بدل ما ننتظر ال 3 شهور لأنو الميزانيه كبيره ،..
--------
ملحوظة : إتصلت بي أخت عظيمة ، وهي زميلة بورد ، ما إتداخلت في البوست ده ، هي على إستعداد لدفع مليون جنيه ، التحيه ليها ، والتحيه للسيدة الكريمة الإتبرعت بشوال الفول.
