اقتباس:
يا زول كُبر شنهو، لساتك ماوصلت عمر الرؤساء والملوك القدميين، يعني عمر وزراء وكدآ :cool::cool::cool: إتو تعالوا، عمر البشير ما برضه في العمر دآ،،، لكن تسنين طبعا وهو أكبر في العمر بس:( ______ تعرف حكاية النوم دي أمرها عجيب.. الساعات بقل عدد النوم فيها، لكن في الحقيقة!! الساعات الفي اليوم بتتنام، بتكون أكثر وموقاربة لعدد ساعات نوم الطفل اليافع "الرضيع، نوع البيقوم (يرضع) وينوم تاني" الساعات المفروضة وهن تمانية بالليل، بيمونن ياهن مجهجهات وفي مجموعهن ما فوتن الخمسة بتاعاتك ديل. لكن بالله عليك، دقسات نوع الرأسك براهو يقع لمن الحنك يلاصق الصدر، ديل بيكونن في مجموعهن تلاتة لي أربع ساعات في اليوم، تكون بتتفرج في التلفزيون ولو في فيلم وطوله ساعة ونص، مجموع البتكون شفته نص ساعة والساعة غفوة حلووووووة كدآ يابا هو في اللحظات الحاسمة الواحد بيدقس :rolleyes::rolleyes: وبرضك تقول ليا النوم بيقل... :cool::cool::cool::cool: |
رؤى العواجيز المتأكلة
نشوف الشباب اليوم وهم يتصرفوا بعفوية وحسب الطرق المتعامل بها في زمانهم هذا (ما إحنا زمنا رآآآآآآح) نشوفهم ونقوم ننتقدهم دون تذكر ما كنا إحنا بنعمله في شبابنا والعمر المماثل لي عمرهم الحالي. كيف كنا بنحرق دم الأكبر دون الشعور بالآذى الكنا بنجيبه ليهم.
يومتها ومع شباب حلويين في عمرهم متقاربيين وأنا ومعاي واحد تاني "جلاكين" بنلعب كوتشينة (وست بي فهمي تقنية القرن الماضي وهم بي حضارة حسي وترامب رئيس أمريكا، يعني الحديث والمستحدث). حصل إختلاف في الراي وطبعن حسب ضغوط العمر الكأنه الواحد شايلها حمل في ضهره، شفتا أنهم ما بيراعوا الذوق ولملمت كرايكبي وإنهزمت. يعني الود زعلان ومستني منهم إتصال يعتذروا.. مشيت البيت وجلست أتأمل وأجتر الحادثة.. ضحكت من نفسي وإتذكرت القولة بتاعت: تلعب مع الجريوات .... طيب ما إتا أصلن يا تبقى تتعامل بي عقليتهم الثائرة أو أنك تنهزم في بيتك بي عقليتك المنغلقة. ركبت العربية ورجعت وقبل أوقل شئ.. وين يا دكتور قيمك رآح، لكنك والله التقول شميتها.. زميلك في قبوله أخدها "السيك".. ضحكت علي الحصل لي زميلي وعلى نفسي الأني دقة قديمة، ما هم أصلهم في فورة شبابهم ما شعور بأني زولن تفكيرة رجعي.. ومن يومها بقى الجينز سروالي لمن أكون ماشي عليهم.. :o |
اقتباس:
Hi دكتور وينك .. من لاعب الجريوات خربشنو ... عدت أدراجك .. يكون قالوا ياخي العجوز الثقيل ده رجع ..:p من كان له شباب فليتشابى لهم بحبوك .. إليك هذه القصة .. للتسلية وانت تتشابى بسروالك الجينز ... من كان له صبي فليتصابى له ... الحديث تحكي واحده عن زوجها .. قالت لي صديقتي: كنت أنتظر مولودي الأول، وذات يوم اصطحبني زوجي في نزهة، وفي النادي لمحنا رجلا جاثيا على ركبتيه في حديقة الأطفال يلاعب طفله الذي مازال يحبو. انتقد زوجي ما يفعله هذا الأب، وتغيرت ملامح وجهه، وكأنه يشفق عليه من تعليقات رواد الحديقة، وقتها قلت له مداعبة: الأيام بيننا، وستفعل مثلما يفعل عندما يأتي طفلنا، فرد علي باستنكار: أنا محال. ومرت شهور الحمل، وجاءت طفلتي الأولى، وكبرت، وحَبَت، وحملها زوجي على ظهره، وانحني أمامها ليلاطفها وجها لوجه، وتنازل لها عن ركبتيه لتستخدمهما كأرجوحة. وحين ذكرته بالموقف القديم ضحك وقال: صحيح.. من سمع ليس كمن رأى. فبادلته الضحك وقلت: بل من كان له صبي فليتصابى له، كما قال رسول الله (صلى الله عليه وسلم). ولأن هذا الحديث يتفق مع الفطرة الإنسانية السليمة، فقد فعلت يا زوجي ما اعتبرته منذ عامين محالا. ويشرح د. علي الحمادي - مؤسس ورئيس مجلس إدارة مركز التفكير الإبداعي بدولة الإمارات المتحدة - بعض دلالات هذا الحديث النبوي الشريف فيقول: إن كل إنسان يمر في حياته بمراحل متعددة، ولكل مرحلة طبيعتها المميزة، فالطفل له طبيعة تختلف عن طبيعة الشاب، وطبيعة الشاب تختلف عن طبيعة الشيخ المسن، والرجل تختلف طبيعته عن طبيعة المرأة، وهكذا. ولذا يجب علي الإنسان أن يتعامل مع الآخرين بما يتناسب وطبيعة مرحلتهم، بل يجب عليه أن يترك الآخرين يعيشون مرحلتهم، فالطفل يحتاج إلى إشباع حاجة اللهو واللعب، والمرأة تحتاج إلى التدليل، والوالدان يحتاجان إلى البر..إلخ. من الأخطاء التي يرتكبها بعض الناس أنهم يريدون من الطفل أن يكون رجلا فيترك اللعب واللهو، ومن المرأة أن تتعامل بخشونة وكأنها رجل، وكل ذلك لا يصح؛ لأنه مخالف للطبيعة والفطرة البشرية، وقد يتسبب في نشأة الإنسان نشأة غير سوية، وربما لا يظهر ذلك إلا بعد حين، وصدق المتنبي: فإن الجرح ينغر بعد حين .... إذا كان البناء على فساد لقد كان رسول الله (صلي الله عليه وسلم) يلعب مع الأطفال، ويمازحهم، فقد ثبت في الصحاح أن رسول الله (صلي الله عليه وسلم) قبل ابنه إبراهيم وشمه، وأنه تأخر في السجود تأخرًا ملحوظا، فلما سئل عن السبب بعد الصلاة قال: ((إن ابني ارتحلني وأنا ساجد فكرهت أن أعجله))، وكان الذي فعل ذلك هو الحسن ابن ابنته فاطمة رضي الله عنهم أجمعين. كما ثبت أنه كان يضع الطفل في حجره حتي ربما يبول عليه، فكان يرش موضع البول بالماء، وثبت أنه حمل أميمة بنت ابنته زينب على عاتقه وهو يصلي. وأخرج الحاكم عن ابن عباس (رضي الله عنهما) قال: أقبل النبي (صلي الله عليه وسلم) وقد حمل الحسن على رقبته، فلقيه رجل فقال: نعم المركب ركبت يا غلام، فقال رسول الله (صلي الله عليه وسلم): ((ونعم الراكب هو)). وأخرج ابن سعد عن أبي سلمة بن عبد الرحمن قال: كان رسول الله (صلي الله عليه وسلم) يدلع لسانه - أي يخرجه - للحسن بن علي، فإذا رأي الصبي حمرة اللسان يهش إليه، أي يسر، وتنبسط أساريره. وأخرج ابن سعد عن عبد الله بن الزبير (رضي الله عنهما) قال: أشبه أهل النبي (صلي الله عليه وسلم) وأحبهم إليه الحسن بن علي، رأيته يجيء وهو ساجد فيركب رقبته - أو قال ظهره - فما ينزله حتى يكون هو الذي ينزل، ولقد رأيته وهو راكع فيفرج له بين رجليه حتى يخرج من الجانب الآخر. ويروي ابن أبي الدنيا وابن عساكر عن جبلة بن سحيم قال: دخلت على معاوية بن أبي سفيان - وهو في خلافته - وفي عنقه حبل، وصبي يقوده، فقلت له: يا أمير المؤمنين، أتفعل هذا؟ قال: يا لكع، اسكت، فإني سمعت رسول الله (صلى الله عليه وسلم) يقول: ((من كان له صبي فليتصاب له))، وقال ابن عساكر: غريب جدا. |
اقتباس:
الحبيب عبده وأنت سيد الحكمه ومستبشربك من أحسنت له حكمً، شكري للإطلالة والمشاركة المرصعة بأحرف، قرائتها متعة وفهمها حكمة وختامها خليهو سآكت:cool:. عندي صديقي وهو دفعتي برضك بس إستسلم ونزل "معاش"، بتكلم معاهو يومتها في التلفون: وينك، قاعد في البيت مربية أطفال لي حفيدي،أصله أمه شغالة... هههه بقت فيك يا صاحبي... دآ هين يا بابكر، المشكلة في الهبل البقينا نتهبله مع الشفع، بالله عشان تجر إنتباهو إلا تبقآ "أرجوز"... فعلن مع الأحفاد تبقآ أهبآآآآآآآآآآآآآآآآآآآآآآآآآآآآآآل.. لكن شكرا ليك، طلعتها لينا إتباع سنة goood ........................... كوكي بالله عليك سؤال؟؟؟؟؟ عبد الحكيم بتحمال الجآية دي :confused::confused: السنة دي سهلة، شوفوا لينا طريقة مع السنة ديك :eek::eek::eek: |
يا زووووووووووووووووووول
قالوا: جآ يتفولح جاب ضقلها يتلولح... الود خلاص بقآ مرجع خطط شمولية، إستراتيجية، مرجعية، سحلية ومحلبية بس ناااااسي أنه يومين ويدق الدلجة... لكن ما في ناسي شغلانتها ملاحظة الأمور الما بتدسدس. وجاء الخبر اليقين خلاث يابا حضر نفسك السنة الجآية شوف ليك صرفة.. في لحظتها بتحز في النفس أنك (بعضهم بيقول: إتفنش وبعضهم إستقناء عن الخدمات والإتنين شينات، ليه ما يقولوا مثلا، هناك مجالات تانية ممكن تسفيد من أكتر "أجمل شئ أنه قال ليا مديري الجديد، شاب في منتهى الرقي") خلاث إستغنوا... هنا بقآ مربط الفرس هل بستسلم وأدخل في دوما دبرسة ولا بتجاوز المرحلة وأفكر أنه لسة فيني فايدة.... حبوبتنا زوج الأمير يابا ود مخير لمن كبرت، قالت ليهو، يا الأمير إتا لساتك فيك شئ وأنا خلاث، أها نجيبو ليك عروس وقد وقد أنجب الرجل وهو عمره اربعة وتمانيين.. أكون ذي جدي يا رب النشيف :cool::cool::cool: |
الآحاسيس
توب القنجة من كترت إستعماله ببقى ارقآ من شاش الإسبتالية وعمة الكرب الأصلية بعد تقدم بتبقآ يصفوا بيها الروآق للعصيدة والزول لمن يكْبر يبقآ عبئا تقيل علي قلوب الناس....
يغيب، يبتعد، يسافر ويمكن حتى يموت مآآآآآآآآآآآآآآآآآآآفي زولن يطراهو. طبعا دآ أخف الأمور، ما هو يمكن تصل مرة؟! الحمد لله... |
اقتباس:
تحايا وشوق ومحبة تعلم مداهم يا حبيب المسألة ما في كونك تغيب وترجع وتلقي مافي زول فقدك كلنا بنغيب يا دكتور بنغيب غصباً عننا والله ممغوصين ومقهورين ومطعونين ومقتولييييييييييييين ياخ ربنا يدينا قُدرة نكون متواجدين هنا علي الدوام نعمر بيتنا الكبير ده والله |
اقتباس:
شيال الهموم، رواق الأرق كلامك عسيل، "رحيق"، نسيم تشمه تقراهو كانه مسطر في ورق.... __ نخليك يابا معا العصيان وربنا يكون في العون نصرا وإنتصار آمين |
ما في حاجة في الدنيا بتتغير غير الإنسان
فصول السنة ياها ظاتها، الشمس من يومها بتشرق شرق وتغرب غرب، الموية أساس الحياة والخلق ياها الشجر والتراب والسماء والارض. الموت حق والولادة مستمرة، تجي ناس وتمشي تاني. الإنسان هو الوحيد البتغير طبعه، شكله، أخلاقه، خلقه، زمان وما زمنن بعيد الإنسان السوداني! عزيز نفس، كريم، متجرد، عطآي. إتغير لي مستكين، شحيح، سئآآآآآآآل زمنا وهو بالنسبة لناس المك نمر والمهدي الإمام وعلي عبد اللطيف، برضك ما زمنن بعيد. مرقنا في أكتوبر شفنا كيف الأصغر مننا ولعو رجب/أبريل حسي عووووووووووووووووووووووووووع |
لي البشير رسالة وبي هداوة وعقل.
ذي ما ليك جدود ليا جدود بتذكر منهم رجاحة العقل وسداد الرآي، عرفت منهم لي ديك العاشرتهم؛ أجدادي الطاهر ود الأمير أبراهيم مخير وجدي حسن الأمير يعقوب كان متشاركين في المهنة الإتعلموها في فترة أسرهم في مصر قدر ما هم أبناء أمراء لكنهم كانوا فاجيين الواطة وقاعدين فيها، كلامهم سمح منتقى وما أظنهم في يوم زعلوا زول ولا أغضبهو، جدي عبد الكريم بدري، الناس بتعرفوا أكتر مننا أبنائه وأحفاده بخلق عظيم وشقيقه جدي الخضر بدري وهو من المهندسين الشاركو في تشييد هيثرو لندن وليه أعمال من أحبها الي قولبنا من الأسرة هو مسجد شيخ بابكر بدري وهو الجد الذي آسرا شعبه وأمته على نفسه وأسرته وأهله حين سجل كل ماهو "أحفادي" ماضيا وحاضرا ومستقبلا بإسم الشعب السوداني وترك مهمة تحمل العبء و إنجاز المهمة (شبه المستحيلة) على عاتق أبنائه وبناته وبناته وأبنائهم بناتهم وبنات وأبناء أبنائهم وبناتهم من بعده ويقف يوسف عليه الرحمة والعميد قاسم الأن شهود على ذلك لهم التجلية والإحترام، منهم كذلك صديق مخير مساعد مدير الشرطة ذلك الرجل الذي بيننا من آل مخير علم، عالم وهو العالم بكله بطيبته ودرايته ومعرفته. ولي ديك الماعاشرتهم، أبوالقاسم مخير وهو عاش وسط أهلك (الجعليين) مهندس سودن مشروع قندتو وعمل كمدرس في مدرسة الزراعة بكلية كتشنر، منهم يوسف بدري الذي كان حال إخوته بابكر وعبد الكريم (العم) وخضر؛ ناكرا لذاته مقدما غيره على نفسه حتى حياته الغالية وهبها لي ديك الكان طالبهم سداد دين وحين لم يستطيعوا أخذ حياته بنفسه تاركهم يعيشون حياتهم دون حرج ودون – غلبة الدين وقهر الرجال-. سيدي الخليفة وقدر ما وصفة فترة حكمه بالجور والظلم إلا أنه لم شمل السودانيين وجعل منهم دولة تحمي جيرانها وترعب الإستعمار، الأمير يعقوب ويكفى أنه لقب بجراب الرآي (شهد له بابكر بدري بعظمة شأنه)... ودآ كله قصدت منه أن أذكرك بجدودك أيضا الذين لا بد أنك تتفاخر بهم وهم فعلا مدعاة تفاخر. آها،، غير دآ إتا وأنا ولاد عمر واحد، عشنا حياتنا في أولها أواخر أيام الإستعمار وفي بدايتها ديمقراطية حكم الأبوين المقدرين والمرحومين بعفونه ولطفه إن شاء هو الواحد الأحد؛ عبد الله خليل و إسماعيل الازهري "دون تقديم أحد على الأخر، ثم حكم إبراهيم عبود والذي برغم كونه حكم شمولي عسكري إلا أن العقل ومحنة الأبوة كانت شفيع في بعض الأحيان لقبح "حكم العسكر" ثم حكم الديمقراطية الثانية ورغم قصرها فقد كانت ممتعة، عرفنا فيها الأحزاب والليالي السياسية ونشاط الشباب والتنظيمات والنقابات التي كانت حكرا على أهل اليسار وظهر خلالها التيار الإسلامي بشكله المستورد وسط مجتمع كله إسلام التسامح والمحبة. وجاء نميري ووقتها كنا في قمة فورة الشباب وتشتت جمع أبناء عمرنا، فكان الجيش حلم الكثيريين لسرعة صرف الرواتب فيها وكان هذا سبب للكثيرين ممن كانوا طامحيين في الإستغلال بمواردهم ومنهم من إختر الجيش لصرف راتب بطريقة أسرع ما هن سنتين وفي الكلية الحربية وبعدها ضابط بي راتب لمساعدة الأهل ومن من ذهب للجيش لطموح شخصي وربما عقدة السطوة والكآكي ومنهم من أغلق أمامه السبيل ولم يوفق بدرجات أكاديمية تعطيه فرصة الإستمرار في الدراسة والتخرج بي شهادة جامعية. وعادة الديمقراطية التي لا تزال ولن تنفك في جهدها لتكون نظام حكم مستدام رغم هذو وهزآل أبناء الوطن الذين لا ينفكون في حربهم ضد إرادة شعبهم والرغبة الدائمة في ظلمه، جاءت الديمقراطية لكن لينحرها نفر ما كان لهم أن يفعلوا فعلتهم المشينة هذه إلا لأسباب واهية وبرغبة من أمراض أشخاص قضى الله عليهم بعد أن أفسدوا حياة الأمة. بتذكر أنه أوائل أيام إنقلاب 25 يونيو، أنا رفعت شعار النهادنة وأنه الناس تتصل بيكم وأننا نتفق على أنه الأربع سنين بعد الإنقلاب تكون هي فترة يوكل لكم فيهو بالحكم تعقبها إنتخابات حرة بالصورة الديمقراطية التي يتراضى بها ةعليها وفيها حيبين الحق على الباطل، إن كنتم حكمت بصورة يرتضيها الناس فهم قطعا سيعيدوا إنتخابكم و\إن أخفقتم في تحقيق طموحات الشعب حينتخبوا غيركم. كان هذا أملي ولكن لم يستحسنه الكثيرين ممن لم يضعوا ثقتهم فيكم من اللحظات الأولى "أنا نفسي ما كان عندي فيكم رجآ، لكن قلتا أنه رأي دآ هو خيار أم خير". خلاصة قولي دآ ورسالتي دي البتمنى أن تصلك بشوفها كلام من زول ود عمرك، بيحب بلده وأريتك تكون متلي بتحب بلدك برضه وتفكر في مستقبله وتستعجل العمل على حل.. هو شنهو يعني لو سمعت كلام الناس التانيين مش نصف رأيك عند أخيك، وليييييه يعني تستبد على الأمة وهي الجابتك من رحمها وناسها الجابوك من صلبهم، ليييه يعني إتا والقليلين تغنوا والتانيين يفقروا، ليييييه إتا وإنتم تفتكروا الرآي عندهم والتانيين جهلاء، لييييه يعني تتحكم بطانتك الإتا جبتهم في أمور أولاد الناس التانيين أواد التسعة ذيهم وليييهم عيال عايزززين يربهم ذيهم وطموحات ذييهم.. كدي وبعد ما وصلت العمر دآ وما راجييك إلا الشبر أسمع كلامي دآ، كلام زول شايف أنه إلا الذكرى الطيبة هي البتبقآ وأنه العمل الشرير بيجيب لي سيده المسبة واللعنة.. سيبهو الحكم البيجيب ليك فرقة مع ناسك وملعون أبوها الدنيا الزايلة... |
في أحايين تلقاني أقول الحبيب ومرات يابا وما بقصر لمن أقول أخوي
في جلسة مع نفسي ودي بتحصل يوماتي ومرتين مع الصحيان الصباح والتانية برضك مع الصحيان بس التاني، بكون مع نفسي في لحظة صفاء وصنة ما تسمع فيها إلا صوت مروحة الشفط البتديك خلفية ذي لمن تكون قاعد ليك في "لوبي" في هوتيل من خمسة الي إتا طالع من عدد النجوم وهناااااااااك في الركن بيانو ومن وراه إن بقيت محظوظ تكون تحفة من سلالة بناتها وإن إتا ذي بيكون وراهو عجوز وش مكرفس وأصابعين براااااااااها تنطط بي مفاتيح البيانو والحكمة برضها تتوفق في تجميع نغمات فيصبحوا لحنا. قلنا بعض الاحيان المخاطبة بين الحبيب ويابا وأخوي فهل هناك إختلاف أو تفاوت.. بالنسبة ليا كزول عااااااااااادي وبي فكره المحدوووووووووود بس بي قِدمُه الما شوووية، رايي في الحكاية دي على النحو التالي: الحبيب قولة جميلة ومنمقة بس كمان لمن تشوفها كدآ طوالي بيتبادر لي ذهن الإنسان "طبعا بتكلم عن روحي مع الإفتراضية الواقعية بأني إنسان" أنها تطلق لي إعجاب وكثير من الأحيان الإعجاب يكون وقتي قدر ما طال زمانه، دآ غير المفهوم العام بين الأجناس (ذ او أ). باخد مثال سيد صادق والراجل دآ بحبه من جوا قلبي، بفرح لمن أشوفه شخصيا أو حتى صورة ساكت، آها تلقا جماعتنا فكو فيهو قولة الحبيب إلا هو من أكثر المسميات البيطلقها على الحوالينه قولة "أخينا" وهي تعني أخي بس بالعامية السودانية وقولة كانت الأكثر شيوعا زمان، يعني بتذكر الوالد عليه الرحمة كان بكثر إستعمالها " ربنا يهدينا ويهديك يا أخينا". قال لمن النخودة سأل الراجل بي أسرته في المركب التي بدت تغرق، ياتهو في ناسك عايزيني أنقذه معاك دون تردد الراجل قال: أخوي... سيدنا يوسف ربنا نصره بي أخوهو. وبين الإتنين قولة يابا دي بتجي في مناسبات وليها برضك رابط تأريخي (هو ما تأريخ تأريخ قدر ما هو يعني القصد بيه زمان اللهو زمنا) طيب إتا بقآ يا بابكر بتنوع فيهم التلاتا بناء على شنهو؟؟؟ الحبيب تنقال لزوم التهدئة ما هو بعض مرات تكتب مداخلة ولا تعلق على حاجة وتلقا الطرف التاني ما إرتاح لي قولك، تقوم بي حرفنة كدآ تديه روشتة تهدئة (قال ليك حبة فاليم إتنين مليغرام ما تكتر في القرامات وإلا بتبقا من الغراميات) ولا بتكون تخاطب واحد من جماعتنا "جماعة الحبيب ولا ناس الحزب، ما دآ ديالوق متعارف بيناتهم" بس الغريبة ماااااااااااااا بتقدر لو شنهو وشنهو دآك تخاطب بيها جنس (إ) وإلا بس خلينا ساكت ما (الشريعة سمحة)" وعشانها تقوم تصرف قولة الغالية. يابا دي تقدير وتكبير وبتنقال لي الزول الكلامه بيعجبك ما الأبو هو الغدوة وهو في نظرك بيمثل العقل والفهم والخبرة وحاجات كتيرة يمكن تصل للقدسية (عند أهلنا الغرابة لمن تجي تجيب سيرة زول كبير بتقول "يابا، أبا" فلان) أخوي دي عات وصفة خاصة تب تنقال في أوكات زروة الأحاسيس وفيضانها والمشاعر وسيولها .. بالمناسبة ورجوعا لما ذكر من قبل، أنه الكبر بيخلي الزول فهمان أفندي وعالم باشا |
حقيقي مع الكُبر!!؟
1 تشوف الدنيا بعيون عمياء.. 2 تسمع بي إضنين صماء.. 3 تتكلم بلسان مقطوع. كييييييييف بقآ:rolleyes: 1- عيونك بعد ما تُستهلك من كترت المعاينة وسرق النظر في الجميل والمثير بتبقآ عايزآ دعم تقني من أرق شرائح الزجاج كعدسات من المحدبة والمقعرة وبعد دآ ما بلحق :( ما هو كل أنواع المياه تفيض فجاءة ومتقلبة من بيضاء مرورا بالرمادي "الرمد" وإنتهاء بالسودآ.. لا تشوف جميل في الخلق ولا في الكتب والصحف ولا في التعامل والمعاملة وخلقك وروحك فوق نخرتك.. آها دآ ما العماء ظاتهو.... 2- تسمع بي إضنين صمآ، ما إتا الكبير وبس كلامك هو الصاح وقول الناس ما بستحق يدق طبلة أضانك،، وحالك المملوك لشيطان الكُبر مغرق الأذن الوسطي في إدعاءات (هم ولاد متين ولا شن عرفهم).. مش برضك الما بيسمع قول غيره آطرش:mad: 3- قول قولك حتى لو صرخت بأعلى صوت وإن ما كفآ، جيب سماعات "آكاي" (دي بقآ شباب اليوم ما ليهم فيها لأنهم بيعرفوا حسي _بوس وإنفينتي... الخ_) ولو تتكلم بي ميكرفون ريموت ولا ثابت برضك منك طناش، ما بتكون مصنف بأنك مخرف... أووووووووووووف.. أها في لزوم للكلام ظاتهو، مش أخير يكون لسانك منقطع وأبكم... غايتهو ما أثقل منه إلا البعدهو :(:(:(:( |
الزعل
الزعل دآ وصفة فيها فوايد وليهو أشكال ؟؟؟
بتزعل!! تديك فرصة تراجع أمور "زعلت من زول بتخليك تستعرض ملفه" تزعل؟ فط سطر (حاجة زعلتك، تاني ما تطراها) زعلة؟! بتجدد (ممكن تزعل من زول وهو بقدرك، يقوم يراعي البزعلك ويتجنبه وتتجدد أمورك معاهو) زعلان!؟ نشاط (تكون كبرتا كدا والعبد لله، الزعلة إفرازات أدرينالين وحركة نشطة) تزعل؟؟ متعة (بي قتاتة تشوف البتزعله يتحرق ويسيتشيط غضبا،، خالتنا عزيزة بدري كانت بتقول لقاسم أخوي "عليهم الرحمة"؛ يوم القيامة في شجرة كلها شوك تتلصق في الزول ويقوم يزحزحها، آها تقول ليهو، ما بهظر معاك "يعني تزعله بي تلذذ وهو الإغاظة).. نوعين للزعل! في الزعل البزعل وفي الزعل الما بزعل، البزعل الما بزعل دآ هو البيحصل بسبب شئ تافه أو صدر من حدث ما ليهو قيمة أو فعل شخص جانبي أو جاهل... دآ النوع بس تتجاوزه... الزعل البزعل من سبب قوي له اصداء تؤثر على النفس أو من شخص قيم وعزيز له مكانة... دحن عليهو نقيس.. ونبقى نزعل أو لا نزعل بس المشكلة مع الكُبر الزول أصله ببقآ حساس زيادة وأدرينالينهو على الهبشة وسريع الإلتهاب.. دحن يا أخونا الكُبااااااااااااار لا تزعلوهم :cool: |
سنييييييييييييين مرت وباقي؟؟؟؟؟
سبحانك الله
الزول يحتفل بعيد ميلاده وبرضك "يوحتفل" ليهو في عيد ميلاده. بس يجيك الوكت وإلا بس تتزاوغ من طارية عيد الميلاد، جآي جآي لمن يجيك راس السنة وتغيير النتيجية من 2016 لي 2017. برج خليفة بالألعاب النارية وبيكدلي سيركس وماديسون إسكوير ويا ناس اليسار عشانكم الميدان الأحمر!! وقبالة الكرميلين ودار الأوبرا في سيدني (مع مراعاة فروق الوقت) وخلق ولمة بالألوف وسكر وقلة فكر وبوووووووووووس في الخد وحتى كمان في المحظور. قال بيودعوا في السنة الماضية!؟ طيب يا حلويين دي محسوب من العمر:mad: يعني إستهلاك في المخزون الإستراتيجي:( والمخزون الإسترتيجي يا صحبان:confused::confused: النفس يبقآ شحتفة النظر يبقآ نتفة الكلام هطربة الشكل تحفة القلب ضارهو خفة أما الذي منه حتة لفة جارآ ليها قفة :eek::eek::eek::eek::eek: "كوكي" الوصف وقع لييييييييييييييييك.. |
من فوائد
زمان لمن الواحد كان أصغر عمر وعقله متقد علما ومعرفة وحضارة، كان بيحسب الأمور بمناظير علمية.
يعني قبل ما تشتري حاجة تحسبها صاح، تقول تمرق تمشي محلة تخت ليك خطة إستراتيجية تشوف المخاطر والمهددات والفوائد، تلقى ليك زول حتى يسلم عليك سلام الله والرسول تاخد الموضوع وتخضعه للفحص والتمحيض تصور القصة وتحمضها وفي الأخير تدرس الصورة بمناظير وتلسكوبات وممكن تكون إيجابية فعلا فتتقبل القصة بواقعية ولكن في أغلب الأحيان وبحث إستخباراتي إستباقي ترفض تقبل السلام البرئ دآ وتشوف فيهو كل الممكن والما ممكن من سوء نية، بيقولوا ليهو (مركب نقص المتحضرين) ما هو الحضارة والتقدم تفرض عليك بس نفسك. حسي الحمد لله مع التأكل الذي يصيب العلم والفهم والصدى البياكل قوائم الظن والشكوك تلقى أنك بقيت ذي زرزور في يد جهال، تبقآ تستجيب إيجابا لكل شئ وما تفكر مرة سلبي أو تظن بغير حسن النية وتثق في الشيطان وتصدق الكذاب وتنتصح من عند الأطفال.... مش بالله الواحد حسي بيعيش في نعمة لا هم ولا وهم |
| الساعة الآن 07:56 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.