نقطة اللاعودة
دي قلنا مع الكُبر حقيقة ولا تحتاج لعلاج أو تعديل.. زمان بعد سنون اللبن بتقوم ليك سنون تانية، حسي إلا طقم وتقنية الزرع مصايبها أكتر، غير تقدقد حنكك ما في أيتها فايدة بالله عليك ينصلن من محلتهن ذي ما لمن تدوس ليك فص ترمس وتنزلق اللحمة من الغطاء وطبعن ما الكبر لو قلتا تأكل لحمة الترمساية جزئيتها يبهدلنك بهدلة مع خروم السنون ويبقن ذي الحشوة الختاها نطاسي حذك.. ما علينا والقصد من إسترجاع نقط اللاعودة حسي جأي من ما هو حال الحاصل في السودان... حكومة بقت ولا حكومة ولا شئ ضباط جيش عيانك بيانك يقدموا إستقالة مسببة ودي حسب الأنظمة العسكرية وظنيتهو حتى وسط الكشافة يعني هذا قمة الخلل.. أساتذة جامعة الخرطوم عديييييييييييييل كدآ بسجلوا فيديو لمؤتمر يعلنوا فيهو بحنكة الأكاديميين مطالبة البشير يمشي وبكل جراءة (ما هو معاهم سيدة وإلا الواحد كان قال رجالة) وقوة يعلنوا إنحيازهم "للمحتجين" الفنانين والإذاعيين والكتاب ديل كسروها تب.. شيختو يا الدفعة القبالنا وماااااااااااااااافي بعد دآ عودة.. بقت عليكم نقطة اللاعودة وأخير سيبوها حكومة وسيبوهو حكم وإتوكلوا إتخارجو.. |
قلناها لمن بقت ممجوجة حكاية النسيان في الكِبر..
بالله عليك تقول تقرب تنسى إسمك لمن زول يناديك لو ما الفطرة البتميز بيها الإنسان وهي الفراسة في أنك تلحظ أنه الزول النادى الإسم بعاين ليك جووا عيونك.. تنسى الإحداث وتنسى الأقوال القلتها.. دحن حسي زولي دآ البيكبرني بي سنتين (مع ملاحظة أنه تسنين) ما هو مصاب بي متلازمة الكِبر (النسيان) بس الحكمة أنه نسيانه أسرع ودي طبعن حاجة بديهية ما أنا بنسى الحاجة أو الكلام الحدث قبل سنتين وبما أنه هو أكبر بي سنتين (مع ملاحظة أنه تسنين) فيبقى أنه بينسى الحاجة الحصلت أمس أو الكلام القالهو أمس... في الساحة الخضراء قال: فيران وأمس قال: الشباب ليهم حق في إحتجاجهم لأنهم مظلومين... أنا غايتهو لاقي ليهو العذر ما مسكين ضربه الكِبر في موجع (الذاكرة)... قالوا: لو الكلام من فضة فلسوكات من ذهب.. يا أخي !!! ما تسكت بس |
يا أخوانا دآ عدل دآ...
في أوربا وكل العالم المتحضر والتاني الفي عمرنا دآ وهم في إجازة مفتوحة لمن ياخد الأمانة باريها. همهم تعويض الفات من فرجة وفسحة في الدنيا، همومهم منحصرة في ياتهو بلد لسة ما شافوها وياتو أكلة ما جربوها.. شوراب صوف ودفاية و"فجان" حاجة خاصة وجلسة علي كرسي هزاز وفاتح ليهو كتاب غلييييد بيقرآ فيهو... لكن ناس إحنا وفي باقي العمر المفروض يكون راحة وإستراحة.. مشلهتين بين محطات التلفاز وحيطان الفيسبوك ومساحات التواصل نشوف ونتابع أخبار البلد وناس ياسين وعمر وبابكر حنين وهاشم عثمان.. نراعي لي وليدات جنونا ينضربوا وبنياتنا بناتنا ينهانن وشذاذ أفاق يهينو السادة واللساتك نارها وقادة في الشارع ومنظر التاتشرات تحرق القلب والفشفاش... شوف البروف ود خالي بلالي حسن فرح والفرح فارقهو زعلن علي إعتقال دفعتنا إلا سنين مستر أحمد عبد الله الشيخ وشوف علي عبد الرحيم مسكين يتابع في الأخبار ودمهو يغلي... بالله عليكم دآ عدل دآ. بدل راحة جسد نتملي تعب قلب وبدل فسحة ونزهة تبقى قعدة قدام التلفزيون نتلقط خبيرات البلد. بس برضك بنفرح لمن نشوف الحفيدة والحفيد بملء حناجرهم يصرخو؛ تسقط بس تسقط تسقط تسقط بس :cool: |
لازم نرفع الملف ... والكبر دخل ومرق بيغادي
|
اقتباس:
وكبرنا يابا ما شين لا ختينا ولا إتعدينا كعب الكِبروا وكبرت مصايبهم أكبر بتلات سنين وهن تسنين كتل، سرق وكضب... وياهو دآ الكُبر الكعب وبالعربي الفصيح ؟؟ دا ياهو سوء الخاتمة |
ناس عمرك وقدر ما كبرت وذاكرتك ضعفت أو حتى إتمحت..
خالدين... خلودي نفتقدك كل ما ذكر الوطن فأنت كنت دوما شغوف بحبه.... http://sudanyat.org/vb/attachment.ph...1&d=1549768008 |
تحية لدكتور بابكر
مفخرة الكُبُر |
اقتباس:
قالوا: الما عندهو كبير، يشوف ليهو كبير... القولة دي رانة ليا في مخي الأيام دي بصورة دائمة.... وليداتنا يتساقطو شهداء والأحياء منهم هموا أبطال في سَاحَةُ الوَغَى الغير متكأفئة النزال والإنقاذ في غيها غير عابئة.. الكُبُر مفخرة عند الناس والبشر وما عند شذاذ الآفاق... يعني شوف حسي أغلب لو ما كل الناس الفوق الثمانيين بينصحو في الوهم ديل وبيقولوا ليهم البتعملو فيهو دآ! لا دين ولا عرف ولا إنسانية راضياهو.. يا باب شوفنا هنان على سبيل المثال، بروف ود فرح ود خالي بلالي، شوقي بدري والخواجة روفي وأنا كلنا ما راضين على البيحصل.... شوف دكتور الجزولي وسيد صادق وبروفيسور الطيب زين العابدين وعلي عبدالله كلهم بصورة أو أخرى قالوها: تسقط بس... |
التضائل
مع الكُبر كل الأمور بتضائل...
الإنسان خليهو يكون بي طول روبرت وادلو حيتضائل ويمكن دي تلقى ليها تحليل علمي في حكاية فسيلوجية البشر بسبب الجفاف وضمور الأعضاء. لكن المدهش هو؟! الفرص في الحياة العامة. قول من سنن دائرة الحياة. الزواج الفرص فيهو بتتضائل مع الكِبر فأكان أنثى بتفقد جاذبيتها وإن ذكر دآ خليهو حمده في بطنه لأني لو كان (البحر مداد) ما بيكفي الممكن ينقال عن الببقى على الذكور مع "الثقيل" دآ. الفرص في العمل ودي حاجة بديهية منهو البشغل ليهو زول معاشات. الفرص في الرزق تكاد تنعدم لأنك بتبقى ذي القرادة قعيد عند الغير(والله حتى لو جناك، مساكين ذنبهم شنهو يعيلوك وهم عندهم حقهم) يعني معتمد على رزق الغير. والأدهش فرص ما بعد دآ كلهو يعني فاطي صلاة ومصهين للصيام وجاغم وحادات وحادات كدآ :eek::eek: دي فرص النعيم ما موضوع تتضائل بس :(:(:( بتنعدم عدييييييييييييييييييل... لكن الغريبة ومع المعادلة دي!!! الأكبر مني بسنتين (وكمان تسنين) عايز ليهو فيها كجة بعد عشرين عشرين.... يابا خليك واقعي وعليك بالفروة بالجد جد ما "كضب". ربنا أهدينا وأهديهم وسهل لنا مخرجنا قبل أن نعجز...... |
الإحباط
:(:(:( دآ هو شكل الزول الإتملكه الثقيل دآ |
اقتباس:
دائماً بقولها ليك ( يا كبيرنا وتاج راسنا ) و الجملة دي مفخرة بالنسبة لي عاوزك دائماً تبقالنا قدوتنا في الفرح في التفاؤل في المحبة عيش حياتك كما ينبغي يا الحبيب |
اقتباس:
|
الإحباط
يقولو الدبرسة..
هي مرحلة سالبة متقدمة والكُبر ذي الكراكة البتنضف الواطة قبل ما يرشو فيها الأسفلت عشان يكون الطريق البوصل للهدف المبتغى.. الإحباط هو مرحلة الكتاب يعني ذي ما بيقولوا حسي في السلم التعليمي هي مرحلة الأساس.. زمنا كانت الخلاوي وقليل من الروضات هم ما قبل الكتاب، الإبتدائي، الوسطى فالثانوي ومنها الجامعة وتتخرج بالدبرسة... يعني وذي ما ديمة بنقول ورغم جراحة التجميل البيقوموا بيها "اللسة ماضاقوا مرارته ذي كدي (الأحباء شقليني ونصور)" أنه أثقل ثقيل وأنه مرحلة الأ عودة وأنه هادم المتع ومدمر اللذات.. أها وما ننسى الأمراض العضوية مما تنعكس سلبا على الجسد في الضعف والضمور والمسح عديل كدي :(:(.. يجيك دآ النفساوي :confused::confused: الأحباط القوي المؤدي للدبرسة المؤكدة.. غريبة يعني زول عمرهو صغير ولساتهو "ما ضاق الثقيل دآ".. يستبق عمرهو ويملك إحساسنا ويقول: إن حظي كدقيق فوق شوكٍ نثروه ثم قالوا لحفاة في يوم ريح اجمعوه عَظم الأمرُ عليهم ثم قالوا اتركوه إن من أشقاه ربي، كيف أنتم تسعدوه... عليك الرحمة يا سابق عمرك......... |
المصداقية في القول مربوطة بعنصر الشجاعة والشجاعة صفة يتميز بها بعض البشر عن بعضهم..
والكذب في القول مربوطة بعنصر الجُبن وهي صفة تضعف من قيم بعض البشر عن بعضهم... مستحيل تلقى ليك زول يزموهو بأنه صادق لكن الكذاب دآك سيرته لا تطاق وحتى إن إتتلاكت لا تتزقّم ولكنها تبصق دلالة على رفضه... الصدق من كرم الطباع وطالما *** جاء الكذوب بخجلة ووجوم كلامي دآ مقصود بيهو أننا في عمرنا دآ والباقي لينا فيهو القليل بعد أن مضى الكثير بحلوه ومره... حقنا نكون صادقين حتى لو كان بيودنا للقبر "قال ليك: الأعور طبزوه في عينه العورآ. فقال: هي أصلها خربانة خربانة" "محمود محمد طه ذاك الرجل الكبير "شايب"؛ إن وافقناهو ولا إختلفنا معاهو. كان صادق مع نفسه وقال الفي خاطرهو" دحن يا الأكبر مني بي سنين وهي في ظاتها تسنين.. أصدق القول، ينجيك من في السماء ولا تقل قولا هراء...... وتسقط بس :(:(:( بس بس بس إتو الكديسة مش بيقولوا ليها (بس) عشان تغور:confused::confused::confused: |
الفشل، قالهو تعريفه أنه عدم النجاح..
ويبقى النجاح هو أنه تغلب الفشل.. غلوطية لكن البيعرف فكها الياهو الزول العاشها... نمسك الشوية ونقول مثلن؟! تلاتين سنة وما في نجاح ودي = الفشل والتلاتين سنة دي (بتذكر في بحث كنا عملناهو في 1977 عن البنقو وإنتشارهو وسط شباب العاصمة حددنا التلاتين نهاية فترة مرحلة الشباب) فهي الحاسمة للفصل بين النجاح والفشل، ما هو الزول إما بقآ دكتور ولا ما بقى، بقى مهندس ولا لا، بقى ضابط ومليان طموح يقلبها ويحكم بيكون فشل في طموحاتهو وفشلت أحلامهو ويبقى فاشل.. إذن تلاتين سنة هي مفصلية في حياة الإنسان والإنسان دي تحتها خط وخطوط لأنهو ما بستحق تسمية إنسان إلا المصطفى والذي خلق على أحسن تقويم ما الحيوان ولا الجماد... بعد تلاتين سنة إن ما نجحت تبقى ؟؟ فشلتا بس..... وما تستنى أيتها نجاح بعدها ولو عندك قدرة هرقل ولا مال قاروووون. ما خلاص فترة الشباب والإنتاج ولت فما تحلم.... لكن برضك هناك عامل يغير المعادلة حتى لو نجحت في التلاتين الأولى وهو "الكُبر" ممكن جدن وممكن حقاً أنك تفشل في الستين.. ودي مصيبتها أنه ما بس فشل بالجد بس بي الزود:(:(:(..... وهاكذا يستمر الفشل مع السنين السبعين فشل شكل والتمانيين فشل حتى في الفشل ظاتهو والتسعين والسنون بغير غيابها النطق وتبقى حقيييييييييييييييييقي (الفسل).... الحكمة هناك رفيق لي(الفسل) وهو يحمل نفس الحروف بس الرصة غير وهو (الفلس)... يا أخي مصايبهو كتيرة وهمومهو أكتر؟؟؟ هو مالهو ما ياهو "الثقيل" دآ :mad::mad::mad::mad::mad::mad: |
في واحد صاحبنا إسمو (عباس الكارب ) قدرنا وكده عزم واحد في الواتساب على عرس ولدو في السودان يوم 7 فبراير الماضي
ردة ليهو الأخ ( تسقط بس) |
اقتباس:
مع أنه دآ يابا شغل الكوبار.. الأنقدر وما مدنقرlooool ___________ لكن للأسف ورغم عظمة الكُبر والكِبار... في ناس ما بتعرف أصول لعبة الكُبر.. أمسك ما هو "بشة" دآ فشلنا وخلانا وسط العالم أضحوكة... جمع كبير من وليداتي زباين "المندولا" قاعدين ومن الساعة تمانية (هم ناسين توقيت السودان وأنه تمانية هناك عشرة هنا بعد ما التوقيت إتوحد) منتظرين خطاب القدامي بسنتين وهن تسنين "الله يعلم عمرهو الحقيقي كم" مشدودين وبي حماسة.. في دواخلي وكامل قتناعي أنه زولنا ما بيجيب النجيضة لكن قلت يمكن ويمكن "بس" يكون ربنا من عندهو هداهو ويقول شيتن يفرح الوليدات ديل. لكن كمان مسئوليتي كأب ليهم لآبدن من أني أوضح ليهم حاجة غايبآ عنهم في شائننا إحنا العجزنا ديل (وهو أكثرنا عوجزن) في أنه بعض مرات بتفوت علينا وننسى وما نجيب جديد بننسى ونكرر قولنا ظاتهو. وأنا متردد في أني ممكن احبطهم في أمالهم العريضة. آها وبعد ساعة ونص ظهر وبدآ يقول كلامن ولا كلام الطير في الباقير ويهترش ويطربق لمن وبرباطة جأش أعلن الطوارئ وأنه باقي من حتتهو دي ما متحرك وعديييييييييييييييييل كدي قالها ودون مواراة وفي عين الجعيص... قولة وااااااااااااااااااااااااااحدة من كلمتين..... طُز بس.. وإنفض الجمع مع إني كنت معول بأنهو قعدتم واليوم إجازة حتطول ومن شاي لي قهوة وشوية سندوتشات حأعمل ليا قرشين تلاتة.. لكن الله لا بارك فيهو... فززهم ولي رزقي قصاهو ليا.... والله مما وعيت ما شفتا لي زولن متبجح وفارغ أكتر من القدافي إلا هو وبس :mad::mad::mad::mad::mad: |
والله القزافي أطيب من بشة ..
بشة دمو بقري فاقد الأحاسيس |
عزيزنا دكتور بابكر
ياخ قارنتو بالقذافي ... رحمتو |
اقتباس:
بالله دآ لي زملاهو في السلطة الشق التشريعي، بيعتذر... الأكبر مني سنتين وهن تراهن تسنين.... لي شعبه الهو أصله وراسهو.. متأخر ساعة ونص ولا الله ما فتح ليهو بي قولة متأسف... نستاهل وإحنا الفرغيين... الناس في شنهو وناس لساتها ماسكا لينا في الصادق وقال وولدهو سوآ... :mad::mad::mad::mad::mad::mad: هي العمالة دي ما شوف عيييين "بس" ما دايرة معرفتها دخول جامعات :mad: |
والله القلب منشطر من الوجعة
معقول "بس" أصله البيحصل من زبانية الحكومة على الشباب يا أخي والله كل ضربه في أجسادهم الطاهرة كأنها جردل موية نار إنكبت في جسمي شفتا قبل شوية فيديو للهجمة على جامعة مأمون حميدة أنا غايتهو لو كنت محلهو بسلم مفاتيح الجامعة للبشير وأخلي طرفي من الجرم الوقع في مكان هو صاحبه ومالكهو يا أخونا شذاذ الآفاق ديل ما عندهم رحمة وأنا بفتكر ذي ما الثورة دي بدت سلمية تستمر في سحب البساط من حكومة القتل دي ويمسكهوم الهواآ.. كيف بقآ؟؟ الإضراب التام وما موضوع عصيان عن العمل والذهاب للشغل... "بس" كل الناس تقعد في بيوتها لمدة يومين تلاتة نفضي ليهم البلد... الخطة على النحو التالي.. في اليومين تلاتة الجايات ديل، كل بيت يحضر مؤنته البتكفيهو فترة... من خضار وموية والحاجات الأساسية.. مدة الإضراب دي لو حتى الناس قدرت تلم الكلاب الضالة من الشارع فليفعلوا ويخلو ليهم الشوارع فاضية.. خليهم يحكموا الفراغ ويعنفوا الهواء وتاتشراتهم ما تسك الا السراب... وتبقى مش "بس" سلمية لا نخليها ليهم بلدن فاضية ومبروك عليهم حكمها.... كدي سؤال محيرني؟؟ أكان ضباط الجيش النزلوا معاش ولا دآك بتاع البوليس كيييييييييييييييف لابسين لبس الميري وهم معاشات.. هل صدر قرار جمهوري بإعادتهم الخدمة ولا شنهو :rolleyes::rolleyes::rolleyes::rolleyes: |
يا ربي ينمد في العمر ونحضر التالتة وكنا حاضرين الأهم..
حضرنا الإستقلال وهو الأهم في سن الطفولة.. ثم أكتوبر الأخضر في شبابنا فرجب أبريل في كوبرنا التالتة تكون مع عوجوزنا يا رب بي مشيئتك وقدرتك... يوم الجمعة دي كلام الرئيس ذكرني الجمعة السوداء ديك (30 يوينيو) نفس الحكاية، الجيش وهو لا يدري ينسرق.. ضباط وصباط معاشات هم أصلن صف أخونجي جابوهم لابسين دبابير بعد ما البعض خلاص رفاها.. يومتها ديك البيان كان بإسم القيادة العامة حين هو أصلن كان بتاع إخوان مسلمين.. حسي برضك نفس الحكاية كأنه إنقلاب عسكري وهو إخونجي.. شوف الصف وتاريخ رأس الدولة ورئيس الوزراء اللحسي ما عرفناهم والولاة.. غايتهو هاشم عثمان دآ بالجد مصيبة.. حسي وسط الجماعة ديل كيف، كله كآكي وهو ذي الطبشيرة الوقعت في الدواية... يا أخونا الزول دآ ما شاء الله حضور قوي وشطارته أنه ديمة في الضل لمن حسي جدع عبد الرحيم هنااااااااااك ومسك البشير من حنانه "وودادهو" :eek: |
تاني من جديد؛
يا ربي حينكتب ليا أحضر إنتصار ثورة بنياتي ووليداتي والأحفاد من الجنسين .. شعور جميل داخلي بيقول ليا: هي ما خلاص.. الشئ دآ بيزيدني إصرارية في التمسك بالحياة إنتظار لي يوم غد (مجازا وما حرفيا) وسقوط المتاجرين بالدين.. قبل شوية شفتا لي موضوع للطيب مصطفى صنف فيهو السودانيين كولللللللللللللللهم لي إتنين، حماة للدين والتانين الشيوعيين وبني علمان (يعني الما كوز يبقى شيوعي ومن بنو علمان طيب أنا أكون شنهو الشيوعين ديل تب ما ناسي أها أبقى يعني من البني وبرضك أحسن ليا مما أكون ذيهو، حاقد، ظالم، مغرور، نرجسي وكل أوصاف حماة الدين)... قمتا قلتا كدي من ذاكرتي الخربة ومعرفتي المحدودة للناس في سودان البعرفهو أنا أستعرض منو هم الحماة للدين . لقيت أنهم: متعددي الزوجات كاذبين في القول غير صادقين في التعامل مع البشر دون الرمي لمكسب مرجو ويكاد يكون غلبتهم الكثيرة من المكتظين بالشحمة وترهل البطن وبروز الخلفية (الغريبة حامي حماة الدين بروفسير حسن الترابي كان غير كدآ مما يخلق شك في حمايته وهو فعلن كان حمايته للدين من منطلق الفلسفة والتنظير ما ذي ناس الغالبية العظمى من ناس حسين خوجلي وايلآ وهلم جرآ).. يا ربي حينكتب ليا أحضر إنتصار ثورة بنياتي ووليداتي والأحفاد من الجنسين .. وأشوف يوم في هاشم عثمان |
أشوف يوم فيك يا بشة السيايكوباتي
|
اقتباس:
قوله سبحانه: وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلًا كَرِيمًا غ وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَّبِّ ارْحَمْهُمَا كَمَا رَبَّيَانِي صَغِيرًا [الإسراء:24] هذه واحدة من النعم التي لا يعيشها إلا من له بنت أو ولد وبعض من البشر سيشار اليهم لحقاً "البيتبنو جنآ غيرهم"... فالأمر لست مقصور على أن تكون أنت ِبرَّ بوالديك لكنه يمتد أن تنعم ذريتك أو من ربيت بذلك ويكسبو رضاك عنهم.. الحمد لله حسي مثلن أنا قاعد عند مدينة بتي الموفرة ليا المرقد والمأكل والمشرب غير أنها متابعة مستقبل بقائي بصورة كريمة في بلد زايد الخير.... كما أن الحال يشمل منهم غير بيلوجياً ذريتك إستناداً على (وَقُـل رَّبِّ ارْحَمْهُمَا كَمَا رَبَّـيَانِي صَغِيرا )... بت ولا ود أخوك ولا أختك أو من الأهل وحتى ممكن طفل يافع قام بتربيته من غير أهله... ولوجه الله تعالى أو الوالدين طلبوا منك أو إستجابو لرغبتك ومش ؟؟ أخنق فطس.. عشان تنعم برفقة الجمال واللظلظة :eek: ولا مش كدآ يا ;););) وتقول ليا: سيايكوباتي :rolleyes::rolleyes: ما أهو القصة واااااااااااااااااضحة ما حيتنعم بأن ينعم غيره برضاء المولى عز وجل في بِر والديهم..... |
الكُبُر بلوة لذيذة وغريبة
|
اقتباس:
والغريب فيهو أنك بعض النواحي الرقيقة تفوتك عدييييييييييييييل، تقول الحق وكتين أخير تسكت وترمي الدراب "ذي شوقي بدري" بلا هوادة... بمناسبة الكُبر؟؟؟؟ نعم الزول البيكبر بيكون ثقيل "بس" في حالات وما طوالي... بيكون بينسى وبيكابر لو حاول البعض تذكيرهو بأمر وهو نساهو... "بس" برضك الزول لمن يكبر بيبقى حنين بيبقى رقيق بيبقى عطوف ... إتا عمر البشير دآ؟؟؟ ما بيكبر ولا كِبر لمن إتحجر :(:(:(:( بكرآ كيف؟؟ ماشي الشغل ولا ذيي؟ متضامن:o:o:o:o:o |
اقتباس:
أنا في السبعين من عمري أستلهم رؤى شباب (المهنيين) وتأكيداً مني لهذا التناغم.. اليوم "المندولا" قاااااااااااافلة.. فلتكن دريهمات. فهي أكيد لن تشبع بطن أو تروئ ظمآ وغير مبكين عليها ولكن كل البكاء على الشهداء ممن هم في عمر الظبا |
البشير مشيهو زي فرامة الخدرة .. أظنو قايل ما بكبر
مشيهو مشاتر ورقيصو مشاتر . مافي زول يهديهو .. يريحوا ويريح الناس منو.. ويقول ليهو تسيب الحكم فافي زول بيسلمك أمي الله يسلمك ... ولا يسلم علي على الرئيس ويسقط بس [rams]https://www.youtube.com/watch?v=gKsB5nC9BtY[/rams] |
مع الكُبر في حاجات أخير الوصل للمرحلة العمرية الثقيلة دي يختاها..
زمان كان الواحد ذي حمل الخريف في مشيته ينطط وإن ماشي في الشارع وهناك البيستاهل ينشاف، رقبته التقول رقبة بومة أكتر من full circle. شباب وعنفوان وفتوة كمييية كدآ من الجمال.. كلها وراس مالها صفقة (حسي بنياتي بقن بي زغرودة) والخلق تتلمآ وهتافات بحلاقيم تشق عنان السمآ. أكتوبر كنا في قمة الصحة أما رجب فالعمر بدا في الخنوع والإستكآنة لطاعون الكِبر.. اها حسي مع العمر دآ؟؟ كتر خيرنا القادرين علي "طق الحنك" شقيقي الحبيب بروفسير قاسم فرضت عليه الظروف أن يكون وسط بنياته في وسط سينامي بمبان ومسكين دفع التمن والحمد لله ربنا غطاه وجات خفيفة. دحن يا قسيم ابقآ على أضعف الإيمان... بس الغريبة المصيبة دآ مع البلالي المغيرنها ليهو... "بس" التقول باقي ليهو يعمل رقصة مشي الرمل بتاعت مايكل جاكسون |
أخونا دكتور بابكر
تحياتي سمعت تراطيش كلام عن الكُبُر: أولاً : الشعر فضة ثانياً : حجارة كريمة في الكُلى وثالثاً : الكلام موزون بالدهب |
والشَعر فضة جاري دة المجننا :
[rams]https://www.youtube.com/watch?v=yWdK9721vR0[/rams] أها دة الجن عديل |
اقتباس:
تعرف كتير من الأوقات دون سابق إنذار أو ممكن لي سبب. تتذكر زولن دفعتك أو أصغر لكن عندك ليهو معزة خاصة.. دحن الأيام دي وكل يوم أفتش في "الراكوبة" لي الأستاذ الفاتح جبرة المعلم الساخر.. ما لاقيهو لمن بديت أنزعج.. يا ريت لو عندك معرفة يقدر يجيب لينا أخبارهو.. تتقل بيها قلبنا عليهو...... آها نجيك ردن لي قولك الفوق دآ.. قولة أنه الشعر فضة فدي مشكوك في صحتها لأنه مع الكُبر يبدآ الشعر في الإنعدام وياهن سبيبتين والباقي دلجة... والكلام دآك ما بتوزن حتى بالحصحاص ما ياهو هترشة خرف وحتى ما بيساوي حبتين من الخزف ... اللهم دوم لينا محبة الأحباب |
[rams]https://www.youtube.com/watch?v=80k3b90od2w[/rams]
بقيت ظالم يا أخوي |
كما قلنا من قبل.
رهافة القلب وزخم العاطفة وغلبة المحنة.. قلبي معصور شوق للأستاذ الفاتح جبرة توهني في سبيل معرفة إنقطاعه من الكتابة بالله عليكم العندو ليهو طريق يبلغه أشواقنا وبالغ تحايانا وجل إحترامنا |
هذا حديثك :
كما قلنا من قبل. رهافة القلب وزخم العاطفة وغلبة المحنة.. قلبي معصور شوق للأستاذ الفاتح جبرة توهني في سبيل معرفة إنقطاعه من الكتابة بالله عليكم العندو ليهو طريق يبلغه أشواقنا وبالغ تحايانا وجل إحترامنا والله الفاتح جبرة ما عندي خبره |
اقتباس:
لكن أنا عندي ليك خبر.. جابو لينا دكتور وكمان عميد وشرطة معتمدً لامدرمان.. يعني زول رتبة عشان عينهو حمرا ودكتور عشان يعالج الخلل وشرطي حامي الناس المساكين وناصر للغلابة... والله يا شقيق الحبيب بلدنا بقت إقطاعية.. الرئيس مكن أهله وعشيرتهو ورفاقتهو.. هاشم كمان مسك موالينهو في الشرطة محليات العاصمة القومية، ما هي حقتهو. مش هو الوالي... والله يابا... بس الواحد إلا يقول ليهو: هانت حتى صرت للخرطوم واليا وعجبي كيف أنت أصبحت واليا بتذكر مرة مشيت الخرطوم إجازة وكنت أنت مدير مكتب رئيس الجمهورية ولما كانت الدنيا عيد وأنا إتصلت بمكتبك بعد إسبوع من إجازة العيد. قالوا: أنك ما رجعت من بلدك.. ديك هي بلدك محل بتعيد شنهو الجاب لي جاب في شان تكون والي الخرطوم؟؟؟؟ غايتهو وغايتهو من هنا، لييييييييييين صنقعت... |
[rams]https://www.youtube.com/watch?v=jP_PmZ-oCAA&list=RDjP_PmZ-oCAA&start_radio=1[/rams]
استراحة |
اقتباس:
قالوا البشير مشى لحسين خوجلي يطمئن على صحته.. ياهم شبهينا وإتلاقينا......... قالوا النظام يحاول إستمالة سكان بري لإنهاء المظاهرات والمعتمد يؤكد أن المنطقة ستجد كل الاهتمام والرعاية... يعني حملات نظافة.... ودي هنا شطارة النظام وقول ليا كيييييييييف... عمال النظافة هم منهو؟؟ أكيد عناصر الأمن undercover عشان يكونوا في موقع نشاطات أحفادي الثوار.. أدوات النظافة ما هي الهروات يعني المقشاشة بتكون بدون عصاية؟؟؟ النقليات المستعملة في الحملات دي وهي بكاسي ولواري ودي هي مخازن متحركة للبمبان والأسلحة النارية لتكون في متناول اليد... وأنا بقول: نظافتكم هي. بقشكم وبس.. دي قراءة مستوحاة من دراسة سريعة لشخصية الوالي الذي هو من الدهاء والخبث واصل لحد الإعجاز وشطارته أنه أتى بوليداتهو على رأس المحليات عشان ينفذوا ليهو مخططه .. بالمناسبة الوالي دآ كان أول من قاد النظام العام وبدون مناسبة ويييييييييين دكتور عبد الباقي "كلاب" يد هاشم عثمان الطولى... وكييييييييييييييييييييييييييييف تكون في إستراحة ولساتنا في بَرَّحَ الإنقاص.... الخبر منقول من الجارة.. https://www.alrakoba.net/news-action-show-id-317033.htm ملحق وإستدراك.. بالمناسبة والحمد لله لقيت الأستاذ الفاتح جبرة في الجارة الراكوبة ورجع من جديد، حمد الله على عودته قلمن حلو وجميل وراقي... |
الشكر ليك يا حفيد مربي الأجيال / الدكتور بابكر مخير، إن شاء الله قضيت الفي مرادك . والله هذا الملف استراحة لمن لم تريحه دنياه ، فيأتي المُتأمل في خيره لك السلام ومنك السلام. |
| الساعة الآن 04:16 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.